Read Mid Grand Valley Dani Matius 5 Bible Online

Matius 5 - Mid Grand Valley Dani bible

Matius 5

¹Akhuni doalegat wagunem, at Yesus ileken 'birisalok nen, tom oba dageisikhesik hurek lageikhemo, it at ane waganhe lagoukha meke emenogo oba wagoukha.

²Wagoukhama, wene yakulisekhe dogolik,

³“Akhuni inakla nen, An he, Allah il oba, ebe meke hasik nerlageik welagei, iluk apegarek meke iti, kok pogot oba meke apma 'bisekherekma etoma iteerek irat iti nen, inakla arleken akhekhe dogosagat o.

⁴Nen, akhuni inakla wiik-weakhogon welageikharek meke iti, Allah nen inetaiken thebeligin iti nen, inakla arleken akhekhe dogosagat o.

⁵Nen, akhuni inobabut enogo welageikharek meke iti, o Allah nen o abok yoknisasikhe iti, irat ite asugun iti nen, inakla arleken akhekhe dogosagat o.

⁶Nen, akhuni hipiri inom, i inom, abu ageikharek hak, Allah akla apekherek meke kogotdiluk mot motok hagasu warlok apegarek meke iti, hipiri ina'ithogon nekarek hak, yabokane Allah nen inakla warlok apiliogei tak-tagat wogeisagein iti nen he, inakla arleken akhekhe dogosagat o.

⁷Nen, akhuni inebe inakmurogon welageikharek meke iti, ninopase nen it akmurinabigin iti nen he, inakla arleken akhekhe dogosagat o.

⁸Nen, akhuni inetaiken opakiat karelek motok welageikharek meke iti, yabokane Allah ebe ineleken hugun iti nen, inakla arleken akhekhe dogosagat o.

⁹Nen, akhuni inom weak werekma, it aperek nen dapulogo 'bisegarek meke iti, at Allah nen he, Yi an na'buriat o, iluk yogeisagein iti nen, inakla arleken akhekhe dogosagat o.

¹⁰Nen, akhuni nen Allah akla apekherek meke kogotdisegarek meke hasik, it aperek nen weagarinakhunem, kok pogot oba meke apma 'bisekherekma etoma iteerek irat asugun iti nen, inakla arleken akhekhe dogosagat o.

¹¹Hit aban werek korlek, haganeat it ap Allah ane yogeisekhe lagoukha meke weagarinakhe lagoukha hagat, hit an nebe hasik, it akhuni aperek nen wenakhisigik, weagathinakhik, inekalat nenat hinabok palhe dogolik, yi weak ti weak hinoba 'bigik, hagakho halok he, hinakla arleken akhekhe dogosagat o. Yabokane ninopase pogot ona meke nen oko kok meke woknisagein iluk, hinakla hano ageik, hinakla arleken akhigik, kokhogon hagakhe dogono,” iluk yogeisasikhe.

¹²

¹³Wene itithogon yogeisasikhesik nen, “Akhuni yoma tha'bokhogonat inobasik, mayu hekene hirat welagap o. Meke re, mayu iti aik dek aga halok he, nena meke baga aik weregerasusak apegep? Dek o. Aik weregerasusak motok dek nen, pulelogo la'isegarekma akhuni inisok nen tamelogo la'isegarek o.

¹⁴Nen, akhuni agat oba yoma tha'bokhogonat liarinakhe lagap meke hirat welagap o. O kota ageikhe tom ukul ebe baga halek meke limaklasusak erlok dek o.

¹⁵Nen, akhuni nen isagal yibarlogo isoak abura thebelogo 'begarek degat. Isok tilik oba dukhogon 'bisinem akhuni uma welageikharek meke inebe tha'bokhogonat liarinakherek.

¹⁶Iti hak, hit hano hagakhunem, it aperek nen, It hano hagariogei, iluk hinopase pogot oba meke etnogo hogorasuak nen, hit akhuni iniloba iti hakeneat liarogo dogono o,” iluk yogeisasikhe.

¹⁷Itithogon yogeisasikhesik wene ageikhe men yogeisasikhe, “An wagagi iti, Allah ane nisasuk wakhikhe meke etnogo inom, it ap Allah ane yogeisekhe lagoukha meke inane iti inom, inane thagaligiluk wagagi dek o. Eberogonat hagatlasuagaluk kogotdigiluk wagagi o.

¹⁸An nane eberogonat yokhisak. Pogot inom, agat inom, aban dek ageidek werek korlek ya, wene Allah nen ninasuk wakhikhe meke iti, holal herlekha'bugat murluban al hakene inom, inisiken opakiat hakene inom, dek ageidek motok tha'bokhogon eberogonat hagatlasigin o.

¹⁹Halok he, tha nen Allah nen isikhe meke herlekha'bugat meke opakiat thebelogo 'biluk, it aperek nen itithogon hagakhe dogoagaluk yakulisekhe halok, kok pogot oba meke apma 'bisekherekma etoma, at iti etaga yekerugi negen inakla meanetdekhe dogogun o. Meke re, tha nen Allah ane iti mothogon hagakhe dogolik, it akhuni aperek nen itithogonat hagakhe dogoagaluk yakulisekhe dogogin halok, kok pogot oba meke apma 'bisekherekma etoma, at etaga pogorat werekma kogotdekhe dogogin o.

²⁰Allah akla apekherek meke mothogon hagasuogoluk, it akhuni nen Allah ane holal waganek iteerek meke emenogo inom, ap Farisi meke inom, inobabut hagariogei iti hagat, hagakhe dogogun halok, kok pogot oba meke apma 'bisekherekma etoma ukugun dek o. At he, it 'bugurlagat negen hagakharek meke, hit ebenageik kokhogon hagakhe dogogun halok anek ukugun o,” iluk yogeisasikhe.

²¹ Itithogon yogeisasikhesik wene ageikhe men yogeisasikhe, “Wene Allah nen nit ninopa lak yogeisekhe dogolik, Akhuni inakhup o, iluk isikhemo, Inakhep halok he, wene hinoba 'bigin werek o, iluk isukha etnogo hinasuk holhe lagabat o.

²²Meke re, an nen wene ageikhe yi yokhisak. Hat tha nen hagarlak hasik hakla aga dageikhe halok he, wene ageikhe hoba 'bigin werek o. Nen, hat tha nen hagarlak ageikhe yogokhe dogolik, Hat he, hebe kepu yi re! iluk isi halok he, it ap wene erlo pilinekharekma etoma wokharek lalok, ukum hoba 'bugunat o. Nen, hat tha nen, Hat he, hebe uo motok yi re! iluk isi halok he, wene hoba 'biluk weakma hetu aikmo la'agagin o.

²³Halok he, hat tha nen hinameke hano weke wolok Allah ake 'bi laga dogolik, hakla nen, Nagarlak etnogo nen, At weak hagakhemo, iluk wene noba 'biliogo, iluk hinekaerek nen hinetaiken ebetlasi aga halok he,

²⁴wolok ligin meke etnogo Allah ake 'begarekma etoma werlegat 'biluk, yabokane suguluk hapuke hagarlak etnogo oba witluk, wene thagalogo degetdusak o. Nen, wene etnogo arat thagalhep halok he, yabokane lalok Allah ake etnogo 'busak o.

²⁵Nen, ap ageikhe hipisak agorek meke nen hat wokharik ap wene erlo pilinekharekma lagunem, ap etoma nen yabokane wokharik polisi inoba laumo, it polisi lak nen yabokane wokharik, iniki herle warogo 'bisegarekma launogo iluk, hipisak agorek meke iti holagarlem aban laga dogolik etaat ibathogon wene iti thagalogo heanerasusak o.

²⁶Itithogon heanerakhidek halok, hiki herle warogo 'bagoumo, ap iti ameke pelegeke hat hoba werek meke iti oko 'bogokhogon aban wogokhidek werek korlek, ula'agousak motok dek o, iluk eberogonat yokhisigi,” iluk yogeisasikhe.

²⁷Itithogon yogeisasikhesik ageikhe men yogeisasikhe, “At Allah nen ekhe dogolik, Humi param ha'isausak dek o, iluk isikhe iti, hinasuk holhe lagabat o.

²⁸Mekeat he, an nen wene yi yokhisak. Ap tha nen, he ageikhe ileken lakhalok akla nen, Eiye. An he iti param hagatle, iluk apekhe halok, akla nen param eberogonat arat ha'ekhe o.

²⁹Halok he, hileken ebeke nen weagathabusak hagatlaga halok he, hemelogo la'isano. Hebe abisake hetu aikmo po la'ageinogo nen, hemelogo la'isalok ebelake anek werekma hano.

³⁰Nen, hiki ebeke nen weagathabusak hagatlaga halok he, hiki ebeke iti tekhogon la'isano. Hebe abisake hetu aikmo la'ageinogo nen, thekhogon la'isalok ebelake anek werekma hano,” iluk yogeisasikhe.

³¹ Itithogonat yogeisasikhesik, ageikhe men yogeisasikhe, “Nen, wene ageikhe haganeat yogeisekhe dogolik, Ap ageikhe age lologo here'isagaluk halok he, An he yi here'isigi o, iluk holal waganogo, he iti wogosusagat o, iluk isukhaat.

³²Itithogon meke re, an nen wene ageikhe yi yokhisak. Ap ageikhe age waganek meke, it ap ninat meke param ha'igidekmaat, lologo thogotdisekhe halok, he iti param hagasuagaluk thogotdisekhe o. Nen, at ap ageikhe nen, he lologo here'igin meke iti waganhe halok, at ap iti paramat hagasigin o,” iluk yogeisasikhe.

³³Itithogon yogeisasikhesik, ageikhe men yogeisasikhe, “Nen, wene ageikhe yi, Allah nen ninopa lak emenogo yogeisekhe dogolik, Hit hinekalat an Allah netaga hupuk palhup o. An yigithogon hagasigin o, iluk an netaga hupuk palhep halok he, hinopase Netagapogot nil oba egen hagat, hagatno, iluk isikhe wene hinasuk holhe lagabat o.

³⁴Meke re, an nen ageikhe yi yokhisak. Hit nen, at ageikhe yogokhe dogolik, Yi meke ti meke etaga hupuk palogo yokhikhi o, iluk yogosusak motok dek o. Allah ebe pogot iti baga hurek dogolik wene morerakherek. Halok he, pogot iti etaga hupuk palusak motok dek o.

³⁵Nen, agat iti ninopase Allah isok yago welagarek. Halok he, agat yi etaga hupuk palogo yogeisausak motok erlok dek o. Nen, o Yerusalem ukul kok iti an hinopase Netagapogot meke etoma welagarek. Halok he, o iti etaga hupuk palusak degat o.

³⁶Nen, yogotak he, nisi opakiat morla asugak igik, nen, yogotak nisi opakiat mirli asusak igik, isinem hinane hologo morla ageik, mirli ageik, hagakherek motok dek o. Halok he, hinukuloak iti etaga palogo hupuk palusak degat o.

³⁷Hit nen, I o, uogoluk halok he, I oat usak. Nen, Dek o, uogoluk halok he, Degat usak o. Wene ninat meke ageikhe lapeli lagap halok he, Iblis obabut weak meke etnogo nen hinakla kagalhe korlek ugun o,” iluk yogeisasikhe.

³⁸ Itithogon yogeisasikhesik, wene ageikhe men yogeisasikhe, “Haganeat wene ageikhe men isukha, Hinileken hemelho halok he, oko inelekenat hemelusak. Nen, hinaik dakulho halok he, oko inaigat dakulusak, iluk isukha meke iti hinasuk holhe lagap o.

³⁹Itithogon mekeat he, an nen wene ageikhe yi yokhisak. Weagathinakha halok oko 'bugup o. Hinelokhoken ebeke dapukhogon hinakho halok he, paike inomat hasuagaluk wogosusagat o.

⁴⁰Nen, it akhuni aperek nen, it ap wene erlo pilinekharek meke emenogo inoba wokhisik lalok, Hasuk akmanke ugu meke woknom, iluk isi halok he, iti inom, hasu thogei meke itikmanke ugu meke iti inomat thabakhogon wogeisausak o.

⁴¹Nen, at ap ageikhe nen ane obatnerogonat ekhe dogolik, Suke yi horok eta 'bani lausak o, isi halok he, hit nen walekhogon negenat 'bisa lausak o.

⁴²Nen, at ap ageikhe nen, Hameke iti an woknom, iluk kino isi halok he, hina'it hisigidegat wogosusak o. Nen, at ageikhe nen, Hat meke iti yabokane wokhesik nen, elanma hasik woknom, iluk isi halok he, Na'it, igidek wogosusagat o,” iluk yogeisasikhe.

⁴³ Itithogon yogeisasikhesik, ageikhe men yogeisasikhe, “Haganeat it aperek nen wene men yogeisasukha, Hit he, akhuni aperek hinom welagathep meke hinakmurinakhe dogolik, it aperek hinom agorek meke halok he, hina'it inabusak o, iluk isukha meke iti hinasuk holhe lagap o.

⁴⁴Itithogon meke re, an nen wene ageikhe yi yokhisak. At ninopase Allah pogot oba meke mo iteerek dogolik agat oba liarogo akhuni inobabut weak meke dek, hano meke dek, tha'bokhogonat inobasik yarisigik, nen, miso usa'i agarek iti, it mothogon hagariogei meke dek, korlo hagariogei meke dek, tha'bokhogonat inobasik usa'i ageik, hagakherek iti hak, hit hinopase Allah pogot oba meke a'buriat asubageik iluk, akhuni hinom agorek meke iti hinakmurinakhe dogolik, it weagathinabiogei meke iti, Allah nen hanorinabuagaluk, it inobasik sembayan ekhe dogono.

⁴⁵

⁴⁶Nen, it akhuni aperek nen, hit inakmuthinakharek meke iti anek hit nen hinakmurinakhe lagap halok he, Allah nen oko wokhisagein nogo? Dek o. Iti hak he, it ap pemerintah meke hasik uang kino iluk natogokharek meke nen inobabut itithogonat hagakharek o.

⁴⁷Nen, hinerugi hinagarlak lak halok anek heagei warinakhe lagap halok he, hinobabut itithogon hit anek hagakhe lagap 'buk. It ap itikmanke meke inobabut itithogonat hagakharek dek a? Itithogon hagakharek o.

⁴⁸Halok he, ninopase Allah pogot oba meke obabut hano motok karelek dogolik akmurinakherek hak, hit itithogonat hinakmurinakhe dogono o,” iluk yogeisasikhe.