Read Mid Grand Valley Dani Markus 1 Bible Online

Markus 1 - Mid Grand Valley Dani bible

Markus 1

¹At Yesus Kristus Allah a'but wene hano wene hagakhe lageikhe wene yokhisak.

² Wene iti, erlo baga, at Yesaya Allah ane yogeisekhe lageikhe meke etnogo nen holal waganogo 'bisikhe hagat hagatlageikhe. Itithogon holal waganhe dogolik men isikhe, “At Allah nen he, Hat yabokane lanogoluk, ap ageikhe hat hagolak ya'agekhe dogoagaluk ayoko 'biluk alep la'igima o.

³ At ebe o limo akhuni dekma etoma ane wai ekhe dogolik, Eiya! Ninoe Etagapogot wisiginke, holak hanorogon yakhik, korlo meke mothogon yakhik, yakhe dogoni o, iluk waisiliogo,” iluk isikhemo, at Yesaya nen holal waganogo 'bisikhe iti.

⁴Wene holal waganek werek iti tak-tagat, at Yohanes ebe o limo akhuni dekma wageikhe iti. Wageikhesik nen, akhuni ima usa'isigik, wene yogeisigik, hagakhe dogolik, men ekhe lageikhe, “Wene hinoba meke Allah nen thagalogo degetdisoagaluk hit weak hagakhe lagap meke iti here'isalok hinobabut hebelatni. Hinobabut hebelasumo, an nen ima usa'inagagin o,” iluk yogeisekhe lageikhe.

⁵Itithogon yogeisugunem he, it akhuni o propinsi Yudea, meke inom, o kota Yerusalem meke inom, inebe tha'bokhogonat, at oba natogosi aga lagoukha. Natogosi wagoukhasik, yi weak ti weak hagakhe lagoukha meke 'bualogo here'isugunem, at nen i Yordan ima usa'isekhe lageikhe.

⁶Itithogon hagakhe dogolik wam unta isi meke karogo asu ikhigik, oado meke karogo therlok hagarogo ikhigik, ikhe lageikhe. Itithogon hagakhe dogolik, hipiri yibirla meke nikik, themuk apusu okama meke nikik, hagakhe lageikhe.

⁷Itithogon hagakhe dogolik, men yogeisekhe lageikhe, “An nebe yekerek nobatne dek meke wagei yi, ap kok obatneak meke yabokane wisigin o. At ebe kok obatneak iti nen, at isok agot herle warek iti, an nen nitibagal yukukhogon hisalusak erlok dek o.

⁸Nen, an weat, ima usa'inageikhe lagei mekeat he, at ebe witluk nen ima usa'inagu hak, Allah Agoreke hinoba usa'inageisigin o,” iluk yogeisekhe lageikhe.

⁹At Yohanes nen wene itithogon yogeisugunem, at Yesus Galilea eloke o etaga Nazaret etoma nen oba usasikhemo, i Yordan ima usa'isikhe.

¹⁰Ima usa'isikhemo i aik oba dukhisigin thalekma, Allah Agoreke pogot kagoukhogon thue merpati yogeik hakene oba duk i usa'agunem ileken hasikhe.

¹¹Ileken hasinem, Allah ane pogot oba nen men isikhe, “Hat hebe an na'but netaiken hunik meke o. Hat hobasik noba hotok ekhe o,” iluk ane usa'i ageikhe.

¹²Allah ane usa'i aga korlek eranogoat, Agoreke nen, Yesus o limo akhuni dekma wolok lageikhe.

¹³Wolok lageikhemo nen, o limo akhuni dekma etoma, iki 40 hari werek korlek, Iblis nen akla kagaligiluk oba waga lageikhe. O etoma 'bagei aila werekma malaikat Allah nen pogot oba yoko usa'isa agarek meke emenogo aperek usa'isa agoukhasik therogo welagoukha.

¹⁴Yabokane Yohanes etnogo iki herle wakhukhasikmo, at Yesus o Galilea eloke dagei ageikhesik nen, Allah ane hano wene etnogo yogeisilik nekhe lageikhe.

¹⁵Yogeisilik nekhe dogolik, men ekhe lageikhe, “O Allah apma 'binagagin etnogo arat 'binagagin o. Halok he, hit weak hagakhe lagap meke here'isalok hinobabut hebelogo hano wene yi eberogonat iluk hutdini o,” iluk yogeisilik nekhe lageikhe.

¹⁶Yogeisilik nekhe dogolik, i Galilea yekelekma aik obake laga dogolik, Simon agot Andreas ipisak hibiku-yogoku ikanat waganharethekma nogo nen ikan waganuogoluk, su yoge su ima usakhunem ileken lageisasikhe.

¹⁷Ileken lageisasikhesik nen, men yogeisasikhe, “Ikan waganhe lagap iti hak, akhuni itithogonat woginakhe dogobageik nen, yakulhisak nen noporlik witni o,” iluk inayoko 'bisasikhe.

¹⁸Inayoko 'bisugunem eranogoat inasu yoge su etoma here'isalok, Yesus oporlik lagoukha.

¹⁹Oporlik lagoukhama horogat lagoukhasik nen, Zebedeus a'buri Yakobus agot Yohanes ipisak, ku baga inasu yoge su 'bugukakhunem ileken lageisasikhe.

²⁰Ileken lageisalok nen, eranogoat waisasikhe. Waisasikhemo, inopase inom, ap oko wogeisagaluk inayoko 'bisikhe meke inom, ku baga 'bisalok Yesus oporligat lagoukha.

²¹It emenogo Yesus oporlik laga dogolik, o Kapernaum ukisukha. Ukisukhasik nen he, iniki 7 baga Allah hasik werlegat dogolik, o akhuni Yahudi meke sembayan egarekma ukisikhesik nen, Yesus nen wene yakulisasikhe.

²²Yakulisugunem, it akhuni emenogo nen men isukha, “Ap Allah ane holal waganek iteerek meke nen yakulnisegarek hak iliogo dek o. At he, wene ebe iteerek dogolik yakulisegarek hak yakulnisiliogo iti nayuk o,” iluk hogorakhukha.

²³Itithogon hogorakhe lagoukha itinemat, ap ageikhe mokat obabut weak meke akla ukisikhesik welageikhe meke, o it akhuni Yahudi meke sembayan egarekma inoba ukisikhesik ane kokhogon men yogokhikhe,

²⁴“Yesus ai Nazaret meke yi! Hat nen nikithogon hagatninabigiluk wagan. Nit weagatninabigiluk wagan a? Hat hebe Allah ekaerek hasik meldageikhesik la'agei agama wagan iti, an nen hutdagagi o,” iluk ane kokhogonat yogokhikhe.

²⁵Itithogon yogokhikhe mekeat he, at Yesus nen wenagakhe dogolik, “Hane. Ap yi akla nen dukhi lan o!” iluk yogokhikhemo,

²⁶mokat obabut weak meke etnogo ap etnogo akla nen dukhigiluk hagakhe dogolik, ap etnogo oageleke dik-dik igik, ane naik igik, hagakhe dogolik dukhisikhe.

²⁷Dukhisikhemo, it akhuni emenogo it-it men isukha, “Eiye! Yi nikithogon hagakhe. Wene iti, ket ninat wene iteerek nen yakulnisiliogo higi. At nen ane hakhugunem, mokat inobabut weak meke inasuk holiogei iti nayuk!” iluk hogorakhukha.

²⁸Itithogon hogorakhukhama, at Yesus abok o Galilea eloke o ya ta etoma ibat thak-pakhogon hagatlageikhe.

²⁹At Yesus inom, Yakobus Yohanes ipisak inom, agarumi aperek inom, o akhuni Yahudi meke sembayan egarekma nen dukhi agoukhasik piokhogon Simon dok, Andreas dok, inaila lagoukha.

³⁰Inaila lagoukhasik nen, uma ukisukhama, Simon akhoan oba u agaken weak nen witik werekma ukisinem eranogoat, it nen, “He yi oba u nen werek o,” iluk Yesus yogokhukha.

³¹Yogokhukhama he etnogo alilu lageikhesik nen, iki hago meldisikhe. Melidisinem he, oba u agaken etnogo dek ageikhe. U dek ageikhemo nen, at nenat yomageisekhe lageikhe.

³²Itithogon yomageisekho werekma, hiamaganekeke mo kobokhogon lageikhesikmo nen, it akhuni nen he, it aperek u warek meke inom, mokat inobabut weak meke inakla ukisukhasik welagoukha meke inom, wogosik Yesus oba wagoukha.

³³Waga korlek akhuni aperek o etoma meke tha'bokhogonat silimo natogosi agoukha.

³⁴Natogosi agoukhama, it yi u ti u warek welagoukha meke inebe doalegat hano hagarinakhik, mokat inobabut weak meke inebe doalegat akhuni inakla ukisukhasik werekma mukhogo ula'isigik, hagakhikhe. Hagakhunem, it mokat inobabut weak meke nen, “Ap yi ebe Yesus o,” iluk hutdisukha iti nen, “Hinane usak dek o,” iluk wene palhikhe.

³⁵Itithogon hagarinakhe lageikhesik nen, noge isikhesik o wik-wik at iluk atluk dukhisikhe. Dukhisikhesik nen, o limo akhuni dekma lageikhesik sembayan ekhe lageikhe.

³⁶Itithogon sembayan isi korlek, it Simon lak nen yabokane Yesus hearik lagoukha.

³⁷Hearik lagoukha meke, Yesus ebe werekma lagoukhasik, it nen, men isukha, “Akhuni tha'bokhogonat nen herakhabiogei o,” iluk yogokhukha.

³⁸Yogokhukhama, at Yesus nen, men isikhe, “Ninaliluke o ukul tha'bokhogonat upuke wemake yoma wene hano wene yogeisilik lagalugat wagei iti nen, yogeisilik luok nen witni o,” iluk yogeisasikhe.

³⁹Yogeisasikhesik nen, o Galilea eloke akhuni Yahudi meke sembayan egarekmake ukisikhesik nen, wene hano wene etnogo yogeisigik, mokat inobabut weak meke akhuni inakla ukisukhasik werekma mukhogo ula'isigik, hagarik laga lageikhe.

⁴⁰Itithogon hagarinabik lagunem he, ap ageikhe u henako hakene inayuk meke oba welageikhe meke Yesus oba wageikhesik nen, itibagal yukukhogon heagei wakhe dogolik nen, men yogokhikhe, “Noe nakmu o. Hat hakla nen hano hagatnabigin apegen halok he, erlok hano hagatnabusagat o,” iluk ane a'buarek negen yogokhikhe.

⁴¹Yogokhikhemo, at Yesus nen, at ebe akmu ageikhesik nen, iki hakhasikhesik nen, men isikhe, “Nakla nen hano hagathabigin apigirikmoat o. Halok he, hoba hano asin o,” iluk yogokhikhe.

⁴²Yogokhe korlek, eranogoat oba u henako hakene etnogo dek ageikhesik hano ageikhe.

⁴³Hano ageikhemo, at Yesus nen ebe la'igiluk ane obatnerogon asuk wakhe dogolik,

⁴⁴men yogokhikhe, “Yesus itithogon hagatnakhe iluk, akhuni aperek motok yogeisugun o. Ap Allah iteerek meke ileken heoak nen oba lalok men hagatno. At Musa nen ekhe dogolik, Akhuni inoba hano atluk, Allah hasik ageikhe 'bisano, iluk isikhe tak-tagat, Oba hano agama, iluk hutdaguak nen, Allah hasik ageikhe 'bisa lano,” iluk asuk warogo la'isikhe.

⁴⁵Itithogon yogeisugun iluk asuk warogo la'isikhe mekeat he, at etnogo nen akhuni yugunat yogeisekhe dogolik he, “Yigithogon hano hagatnakhe o,” iluk abok ya ta yogeisilik lageikhe iti nen, at Yesus nen o ukul kokmake etoma thelekma lausak erlok dek nen, itikmanke o limo akhuni dekma lageikhesik welageikhe. Itithogon welageikhe mekeat he, akhuni o yi ai ti ai etoma nen oba natogosi aga lagoukha.