Read Mid Grand Valley Dani Markus 11 Bible Online

Markus 11 - Mid Grand Valley Dani bible

Markus 11

¹Itithogon lagoukhasik, at Yesus agarumi ane waganhe lagoukha meke emenogo inom, o kota Yerusalem ukuogoluk horokhogon asi dageisukhasik, tom Zaitun apma o ukul ageikhe etaga Betfage, ageikhe etaga Betania etoma mot-mot asi dageisukhasik, at Yesus agarumi ane waganhe lagoukha meke emenogo inebe pere wene warogo alebageik la'isasikhe.

²Itithogon la'isekhe dogolik, “O ukul hinelokhoma ili lani o. Arat lagap halok he, aban ukekhe dogolik wam keledai eak meke akhuni apot oba yasukhogon wogosik lageidek meke kupi irlelek werekma hinileken hugun etnaga. Nen, arat hinileken hegep halok he, kupi irlelek iti hisalogo wolok wetno.

³Itithogon kupi hisalhunem, it akhuni etoma meke ageikhe nen, Keledai kupi hisalhe lagap iti, nenaluk, iluk wene palhe halok he, men yogeisano, Ninoe Etagapogot etnogo nen keledai yi meke dek nen wolok luogoluk hisalhe lago. At nen keledai yi apuke ibat-ibat la'isigin o, iluk yogeisano,” iluk wene warogo la'isasikhe.

⁴La'isasikhemo lagoukha keledai isikhe etnogo eak meke ageikhe o ageikhe holagarlem halekma thu uma ukegarekma, holak abelma, ape kupi irlelek werekma 'bikha lagoukhasik kupi hisalhukha.

⁵Hisalhunem it akhuni etoma metek welagoukha meke nen, men yogeisasukha, “Wam keledai eak meke yi nenaluk kupi hisalhe lagap,” iluk wene palhunem,

⁶it nen he, at Yesus nen, “Wene itithogon yogeisano,” iluk isikhe hagat, yogeisasukhama, it nen, “I o,” iluk here'isasukha.

⁷Here'isasukhama, wam keledai eak meke etnogo Yesus oba wolok wagoukhasik inasu itikmanke ugu meke nokorlogo keledai apot oba talogo 'bisukhama Yesus ebe keledai apot oba yasuk lageikhe.

⁸Apot oba yasuk lageikhesik lagunem it akhuni doalegat emenogo ebetlake inasu itikmanke ugu meke nokorlogo holagarlemke talogo 'bilik lageik, it ebetlake nen oka yabumoke meke palogo holagarlemke talogo 'bilik lageik, hagakhukha.

⁹ Itithogon 'bilik laga dogolik, at Yesus ebe turlumotdiluk, it aperek alebageik, it aperek oporlik yabokane ageik, laga dogolik inane kokhogon men ilik lagoukha, “Noe wa! Wa! Wa!” iluk u hak, “Hosana!” ilik laga dogolik, “Ninopase Etagapogot Allah nen la'agei agama wagan yi, at nenat hanothabuak o.

¹⁰Haganeat ninopa Daud apma welagoukha hak, Allah nen ninoe yi apma 'binaniluk hanotninabuak o. Allah kok pogot oba welagarek meke, nopase wa!” u hak, “Hosana!” iluk amitmit luk-luk ilik ilik,

¹¹o Yerusalem ukisukha. Ukisukhasik, at Yesus ebe Allah ai halekma ukisikhesik yi meke ti meke tha'bokhogonat ileken penakhe korlek, o arat hi ageikhemo, agarumi inebe 12 nen emenogo inom o Betania dukhi agoukha.

¹²O Betania dukhi ageikhesik noge iluk, hubuluk ukekhe dogolik, Yesus hipiri abu ageikhe.

¹³Hipiri abu ageikhemo, o ara erlo ageikhe eka mirli werekma ileken walegat nen lakhasikhe. Ileken lakhalok, “Eken ugu a? Dek a,” iluk, 'bikha lageikhe meke, o eta baga, o ara eken ikhidekma nogo nen, eka anek mirli werekma 'bikha lageikhe meke, eken ageikhe ikhidek. Eka anek mirli werekma 'bikha lageikhesik,

¹⁴men yogokhikhe, “Hat o yi re, hurli yogotak nen lok-logat yabokane heken akhuni aperek nen neke dogogun motok dek. Ikhun,” iluk yogokhunem it agarumi ane waganhe lagoukha meke emenogo inasuk holhukha.

¹⁵At Yesus lak o etoma nen o Yerusaleem ukisukha. Ukisukhasik at Allah ai halekma ukisikhe hak, it akhuni etoma ukiluk dogolik oko waganhik, palhik, hagakhe lagoukha meke tha'bokhogonat sikhogo-mukhogo itikmanke ula'isigik, it aperek uang meja perlago baga 'biluk okokhe lagoukha meke men, it aperek o perlago baga inebe hurek dogolik thue merpati yogeik hakene meke oko waganhe lagoukha meke men, inago iti abel dagak-pagakhogon podisigik, hagarik lageikhe.

¹⁶Itithogon hagakhikhesik akhuni aperek nen yi meke ti meke wolok Allah ai halekma o sili obakha thekekhogon lausak dek iluk wene palhikhe.

¹⁷ Wene palhikhesik, it akhuni emenogo inasuk wakhe dogolik, men yogeisasikhe, “At Allah nen ekhe dogolik, An nai halek yi hasik akhuni nen ekhe dogolik, Yi akhuni ti akhuni inukuloak etaga dopok sembayan ekhe dogogun oba o, iluk ekhe dogogun, isikhe meke holal waganek werek etnogo dek? Itithogon iluk holal waganek werek mekeat he, hit nen, it ap akhuni inameke iniki abusak tilogo horlegarek meke inai negen halogo 'bisekhe lagap yi re!” iluk inekarli warogo inasuk wakhikhe.

¹⁸Inasuk wakhunem, it ap Allah iteerek inougi koktek inom, Allah ane holal waganek iteerek meke inom nen wene iti inasuk holhukhasik nen, Yesus wasuogoluk abok palhukha. Abok palhukha iti, Yesus nen wene yakulisugunem akhuni doalegat at ane holhukhasik hogorakhe lagoukha iti nen, at ebe inayuk atluk, wasuogoluk hagakhukha iti.

¹⁹Itithogon hagakhe korlek, o arat hi ageikhemo, Yesus agarumi inom o Yerusalem nen dukhi agoukha.

²⁰Yesus lak itithogon dukhi agoukhasik noge iluk hubuluke hubenat inapuke o ara etnogo erloma mot-mot ukekhe dogolik, inileken 'bikhasukha re, omaken inom motok puk ageikhemo hasukha.

²¹Hasukhasik, Yesus nen o ara yogokhikhe meke etnogo, at Petrus akla ebekhikhesik men yogokhikhe, “Noe. O ara homan 'begen etnogo arat puk agama yi hileken 'bikhan o,” iluk yogokhikhemo,

²²at Yesus nen it men yogeisasikhe, “Hit he, hinetaiken Allah oba hakotdiluk dogono.

²³Tha nen etaiken pere ageidek opakiat dogolik, An igin yi tak-tagat hagatlasigin, iluk etaiken Allah oba hakotdiluk, Tom yi henokhogon i laut yekelekma ponhogo lan o, iluk igin halok he, at igin meke tak-tagat Allah nen hagasigin o, iluk eberogonat yokhisigi.

²⁴Itithogon hagakherek iti nen, hit nen yi meke ti meke Allah kino yogokhe dogolik, hinakla nen, Arat woknisekhemo, iluk apegep halok wokhisageinat o, iluk yokhisigi.

²⁵Hit ageikhe melatluk sembayan ekhe dogolik, weak hagakhep meke ninopase Allah pogot oba meke nen thagalogo degetduagaluk, akhuni nen hit weagathinakha meke hit nen eken inoba 'biluk welagap halok he, iti thagalogo here'isano.” [Itithogon mekeat he, hit nen eken inoba 'biluk welagap meke iti thagalogo degetdisigidek hinakla weak welagap halok he, hit weak hagakhep meke iti ninopase Allah pogot oba meke nen thagalogo degetdisigin degat o,] iluk yogeisasikhe.

²⁷At Yesus nen wene itithogon yogeisasikhesik nen, yabokane o Yerusalem ukisukha. Ukisukhasik at Yesus Allah ai halekma etnogo o silimoke lageik, wageik, hagakhunem, it ap Allah iteerek meke inougi koktek emenogo men, Allah ane holal waganek iteerek meke emenogo men, inarluetek emenogo men, inom oba wagoukha.

²⁸Wagoukhasik men yogokhukha, “Hat nena meke iteerek agatik, yi hagakhik, ti hagakhik, hagakhe lagan. Nen, ap tha nen, Yigithogon hagakhe dogono, iluk iteerek dogoagaluk meldageikhemo hagakhe lagan,” iluk yogokhukhama,

²⁹at Yesus nen, “An meneke hinok opakiat ageikhe waganiginat. Hinok waganhunem hit nen hutukhogon yoknekhep halok he, an nen meneke, iti meke iteerek atluk hagakhe lagei o, iluk, pakhogon yokhisageinat o.

³⁰At Yohanes nen akhuni ima usa'isekhe lageikhe etnogo, Allah pogot oba meke nen yakulikhikhemo usa'isekhe lageikhe a? E a, at he, akhuni agat oba meke nen yakulikhukhama usa'isekhe lageikhe a. Yoknitni ta!” iluk yogeisasikhemo,

³¹it-it ekhe dogolik men isukha, “Nit nen, Allah pogot oba meke nen yakulikhikhemo usa'isekhe lageikhe, iluk yogosumo, at nen, Halok he, hit nen Yohanes ane eberogonat iluk hutdigidek welagagip iti nenaluk, iluk nit yoknisaunogo,” isukhasik,

³²it akhuni tha'bokhogonat nen, “Yohanes iti Allah aneat yoknisekhe lageikhe,” iluk ebe hutdekhe lagoukhasikmo nogo nen, akhuni inayuk nen men isukha, “Nit nen, Akhuni nen yakulikhukhama usa'isekhe lageikhe, iluk yogosumo, erlok degat o,” iluk isukhasik,

³³yabokane Yesus men yogokhukha, “Wene iti nit ninokodek o,” iluk yogokhukhama, at Yesus nen men yogeisasikhe, “Halok he, an nen meneke, Iti meke iteerek agarik hagakhe lagei, iluk hit yokhisagein degat o,” iluk yogeisasikhe.