Read Mid Grand Valley Dani Markus 12 Bible Online

Markus 12 - Mid Grand Valley Dani bible

Markus 12

¹At Yesus nen wene itithogon yogeisasikhesik yabokane wene ageikhe oba lisogon men yogeisasikhe, “Ap ageikhe ayabumo anggur ai yakhikhe. Yakhikhesik leget halhik, eken thagalogo apusu kelelhe dogogun oba agat hulelhik, inileken dogogunmo kayo perlakhik, hagakhikhe. Hagakhikhesik it ap aperek elanma hasik it inaen negen dogoagaluk 'bisalok ebe o werlekma etoma lageikhe.

²Lageikhesik werek korlek, eken ikhunem palharek oba hagatlasi ageikhemo, at ayabu iteerek meke etnogo nen it ap therogo dogoagaluk 'bisasikhe meke emenogo nen anggur eken ageikhe palogo wogosuagaluk, atuaneke ageikhe inoba la'i ageikhe.

³La'i ageikhemo, it ap emenogo inoba wageikhe meke re, ebe tugi warogo eken palikhidek werlegat apuke la'isukha.

⁴La'isukhama lageikhemo, yabokane atuaneke ageikhe inoba la'i ageikhemo wageikhe meke re, it nen ekarli warogo tugi ukuloak kageik-kagoukhogon wakhukha.

⁵Itithogon hagakhukhama, yabokane atuaneke ageikhe la'i ageikheat. Wageikhemo ebe motogat wakhukha. Wakhukhama yabokane at atuaneke aperek inebe doalegat it ap emenogo inoba la'isa ageikhemo wagoukhama it nen, ebetlake tugi warogo 'bisigik, ebetlake inebe motok inakhik, hagakhukha.

⁶Itithogon tha'bokhogonat inakhukhama at ayabu iteerek meke etnogo a'but etaiken hunik meke opakiat iti anek ageikhemo, at nen, An na'but yiat inoba la'umo, it nen alon halogo heagei warogo waganugun o, iluk apisikhesik, ebe yabokane inoba la'i ageikheat.

⁷La'i ageikhemo wagunem, it ap yabu therogo welagoukha meke emenogo nen, it-it ekhe dogolik men isukha, Ap ithi opase obolukmo yabu iteerek asigin meke etnogo ebe waga ili. Halok he, yabu yi nirat iteerek asuok nen, ebe wasuok o, iluk isukhasik,

⁸ebe hakhalok wakhukhasik warek anggur yabumo nen leget itikmanke ula'isasukha.

⁹Itithogon hagakhukha iti nen, ap kok ayabu iteerek meke iti nikithogon hagasigin apegep. At ebe witluk men hagasigin. It ap iti inebe motogat warogo podisalok inobolukmo yabu anggur yabu etnogo therogo dogoagaluk ap ninat meke meldisageinat o.

¹⁰Hit nen Allah ane holal yigithogon waganogo 'bisukhama etaga thalhidek welagap nogo? It nen, It ap tukang o helekit meke halharek meke nen, o ebe halhe dogolik, Helekit yi weak, iluk here'isukha meke iti ebe herlagaat hagatlagama o.

¹¹ Itithogon hagatlaga iti, ninopase Allah Etagapogot nenat hagakhe o, iluk ninileken hogosik nen, Eiye! iluk hogorakhe logo, iluk holal waganogo 'bisukha meke iti etaga thalhe lagap dek nogo? Thalhe lagabat o,” iluk yogeisasikhe.

¹²Itithogon yogeisasikhemo, it nen men isukha, “Wene oba lisogon ekhe iti, nit ninobasigat yoknisekhe higi,” iluk hutdisukha. Hutdisukhasik Yesus ebe hakhauwogoluk hagakhukha mekeat he, akhuni doalegat emenogo inayuk nen thogotdisalok kikil wakhukha.

¹³Yabokane it ap koktek emenogo nen, Yesus ileken waganogo ane igin oba wene oba 'buogoluk, it nen it ap Farisi meke aperek men, it ap Herodes werekmake meke aperek men, inom nen Yesus itema waganuagaluk oba la'isa agoukha.

¹⁴La'isa agoukhama wagoukhasik, men yogokhukha, “Noe. Hat hobabut wene eberogonat anek ekhe dogolik, akhuni inelokhoken oba naek 'birisalok, aperek helokhoma 'bisigik, aperek hoporlike 'bisigik, hagakhetek dek. Inebe hayuk degat dogolik, Allah akla nen, Akhuni itithogon hagakhe dogoak, iluk apekherek meke eberogonat anek yakulnisekhe lagan iti nit ninilu o. Halok he, nit Yahudi meke hagakhorek mothogonat, uang pemerintah hasik, kok etagapogot Kaisar wogosusak erlok a? Erlok dek a. Wogokhe dogouok a? Thogotdekhe dogouok a,” iluk hinok waganhukhama,

¹⁵at Yesus nen, “It ap yi an nukhetdanuogoluk inane 'bitokhogon yoknekha,” iluk inobabut ekagat palhikhesik nen, men yogeisasikhe, “An nobabut paluogoluk egep iti nenaluk. Uang perak yabu iniki opaki hasik hagakhunem iniki oko wogeisegarek etnogo meke ageikhe nileken hak nen, wagani lani o,” iluk yogeisasikhemo,

¹⁶wolok wagoukhama, at Yesus nen men yogeisasikhe, “Yi tha ebe hagarek oba etaga holal waganek werek apegep,” iluk yogeisasikhemo it nen, “Ithi Kaisar at o,” iluk yogokhukhama,

¹⁷at Yesus nen men yogeisasikhe, “Kaisar meke halok he, Kaisar at wogokhik, Allah meke halok he, Allah at wogokhik, hagakhe dogono o,” iluk yogeisasikhemo it nen, “Eiye! Nayuk o,” iluk hogorakhukha.

¹⁸Yabokane, it ap Saduki meke nen, “Akhuni watlatluk iniluk asugun dek,” iluk egarek meke aperek Yesus oba wagoukha. Wagoukhasik at oba hinok waganhe dogolik men yogokhukha,

¹⁹ “Noe. At Musa nen men yakulnisasikhe, Ap ageikhe a'buri itaginakhidekma age thoge 'biluk ebe watlaga halok he, obolukmo a'but ageikhe itasuagaluk he thoge iti ap iti agorat waganusak o, iluk, yakulnisasikhesik, holal waganogo 'bisikhemo werek o.

²⁰Itithogon isikhe meke werekma, ap inebe 7 nen inopase opakiat nen itago welagoukha. Dogolik, inoe makusa meke iti age waganhikhesik, a'buri itaginakhidekma watlageikheat.

²¹Watlageikhemo agot oporlik meke iti nen he thoge iti waganhikhesik a'buri itaginakhidekma watlageikheat. Watlageikhemo yabokane inagot inoporlik meke iti nen itithogonat hagakhikhe.

²²Itithogon it ap inebe 7 nen ina'buri itaginakhidekma watlarik anek wagoukhama, yabokane ebe yabokane, he iti ebe watlageikheat.

²³Halok he, it ap inebe 7 nen iti, he opakiat meke iti waganik wagoukhasikmo, yabokane Allah nen akhuni warek meke inilugurinakhunem it iti iniluk aga dogolik, he iti tha hak age asigin apegen,” iluk Yesus oba hinok waganhukhama,

²⁴at nen men yogeisasikhe, “Hit he, Allah ane holal waganek iti men, Allah obatne iti men, hinokodek dogolik, hinane korlo egep iti.

²⁵Akhuni warek meke Allah nen inilugurinabilukmo nen, humi waganhik, it aperek igisigik, hagakhe dogogun motok dek o. It malaikat pogot oba meke welageikharek iti hakeneat dogogun o.

²⁶ Akhuni watlatlukmo Allah nen inilugurinabigin, iluk wene Musa nen holal waganhikhe meke etnogo etaga thalhidek welagap nogo? At Musa o 'beroat erloma lageikhesikmo, Allah nen men yogokhikhe, Abraham inom, Ishak inom, Yakub inom, inopase Allah anat o, iluk yogokhikhemo holal waganhikhe meke etnogo etaga thalhidek welagap nogo? Etaga thalhethebat o.

²⁷At Allah re, akhuni warek meke inopase 'buk. Iniluk meke inopase o. Itithogon mekeat he, hit hinane korlo motok egep iti,” iluk yogeisasikhe.

²⁸Wene itithogon inom isi korlek, it ap Allah ane holal waganek iteerek meke emenogo opakiat ageikhe wageikhesik asuk holek welageikhesik, akla nen men apasikhe, “It ap yi Yesus oba hinok waganhama at nen wene oko mothogon yogeisekhe higi,” iluk akla apasikhesik men yogokhikhe, “Noe. Wene Allah nen ninasuk wakhikhe wene etnogo wene ebe kok he, ki isikhe apegen,” iluk hinok Yesus oba waganhikhe.

²⁹Hinok oba waganhikhemo, at Yesus nen men yogokhikhe, “Wene iti hok he, Musa nen men isikhe Hit ap Yahudi meke yi hinasuk holini! Ninopase Etagapogot Allah arligat o.

³⁰ Halok he, hinetaiken men, hinobabut men, hinakla men, hinobatne men, opakiat atluk ninopase Allah Etagapogot ebe itiat hinetaiken hunik dogono o, iluk yogeisasikhe meke, wene kok he, itiat o.

³¹ Nen, wene iti wema baga negen, men isikhe apigi, Hinekaerek hinebe hinetaiken hunik welagathep iti hak, it akhuni aperek hinom welagathep meke iti hinetaiken hunik dogono o, iluk wene pere isikhe etaat kok o. Wene ninasuk wakhikhe meke aperek weregat mekeat he, abelma negen anek o,” iluk yogokhikhe.

³² Yogokhikhemo, at Allah ane holal waganek iteerek meke etnogo nen men yogokhikhe, “I noe. Wene hanorogo egen higi. At Allah ebe opakiat, ageikhe dek, iluk eberogonat egen.

³³Halok he, at Allah ako warogo ebe abisake hetumo hunekhik, yi meke ti meke at obasik 'bisigik, hagakhe dogosak erlok dek negen meke re, ninetaiken men, ninakla men, ninobatne men, opakiat atluk, at Allah ebe ninetaiken hunik dogolik, it akhuni aperek ninom welagorek meke ninekaerek ninebe hakene ninetaiken hunik dogosak iti kogat o,” iluk yogokhikhemo,

³⁴at Yesus akla nen, “Ap yi etaiken werek meke nen ekhe higi,” iluk apasikhesik men yogokhikhe, “Hat he, Allah apma horogat ukusak welagan higi,” iluk yogokhikhemo it akhuni emenogo nen yabokane Yesus oba wene hinok waganu inayuk ageikhe.

³⁵Itithogon hagakhukhama, yabokane at Yesus nen Allah ai halekma wene yakulisekhe dogolik men yogeisasikhe, “It ap Allah ane holal waganek iteerek meke emenogo nen, Kristus Allah nen ayoko 'biluk la'isigin isikhe etnogo, ebe Daud nen itago meke o, iluk iliogei iti, nikithogon halok iliogei apegep.

³⁶ At Daud Allah Agoreke akla dogolik, ekaerek nen men isikhe, Allah Etagapogot nen an noe Etagapogot yogokhe dogolik, Akhuni hat hathili meke emenogo hisok nen al debelogo 'bisanok nen, an nen aban hoba 'bisa'ageidek werek korlek, hat an nalilu niki ebeke hurek dogolik hebe kok dogonok, iluk Allah nen Kristus yogokhikhe, iluk Daud nen isikhe.

³⁷At Daud ekaerek nen Kristus ebe hasik, An noe Etagapogot, iluk isikhe mekeat he, hit nen, Kristus iti Daud nen itago meke o, iluk nikithogon nen usak apegep. Itithogon usak erlok dek o,” iluk yogeisasikhe. Wene itithogon yakulisugunem it akhuni doalegat emenogo, at ane holhe dogolik, inakla arleken akhekhe lagoukha.

³⁸Akhuni doalegat emenogo inakla arleken akhekhe korlek, at Yesus nen wene men yogeisasikhe, “It Allah ane holal waganek iteerek meke iti nen weagathinabunogo iluk, hit hinobabut hebelogo dogono o. It inakla warlok nen hagakharek yi. Inasu uanat meke ikhalok pasar oko waganharekma etoma akhuni nen inane agugurogo heagei warinabuagaluk lageik,

³⁹o akhuni Yahudi meke sembayan egarekma ap koktek meke inobolukmo thelekmarogon hureklasi ukigik, akhuni pesta kok isago nukunem it ap koktek hurek lageikharekma thelekmarogon hurek lageik, hagakhe dogou warlok welageikharek iti.

⁴⁰Itithogon dogolik, humi thoge meke inai halek men, inameke men, thebelekhe dogoligat, akhuni nen inasuk holiluk, It hano apoagaluk sembayan uan-nagan likhalok lageikharek itithogon hagakhidek dogolepma, Allah nen ukum herlekha'bugat inoba 'biluk dogolep. Meke re, itithogon hagakharek iti nen, ukum akin meke inoba 'biluk weagarinabigin,” iluk yogeisasikhe.

⁴¹Wene itithogon yogeisasikhesik at Yesus ebe hurek lageikhesik dogolik, peti uang Allah hasik akla 'bisegarek meke itik ebelake werekma, akhuni doalegat nen uang 'bilik lagunem 'birisik welageikhe. Akhuni inikierek meke doalegat nen uang doalegat 'bilik lagoukha.

⁴²Itithogon 'bilik lagoukha mekeat he, at he thoge ameke dek meke ageikhe wageikhesik uang sen meke opakiat 'bu hak motok 'bugurlaktek meke pere 'biluk lageikhe.

⁴³Itithogon 'biluk lagunem at Yesus nen agarumi ane waganhe lagoukha meke emenogo waisasikhemo wagoukhama men yogeisasikhe, “It akhuni tha'bokhogonat iti inameke doelegatma oba hiakhogon 'bisega iti, herlekha'bugat negenat o. Mekeat he, at he thoge ameke dek meke iti anek he, apiri oko palogo nausak meke tha'bokhogonat 'bisekhe iti anek he, motok doalegat negen 'bisekhe o, iluk eberogonat yokhisigi,” iluk yogeisasikhe.