Read Mid Grand Valley Dani Markus 13 Bible Online

Markus 13 - Mid Grand Valley Dani bible

Markus 13

¹Wene itithogon yogeisalok, at Yesus Allah ai halekma nen dukhisikhemo, at agarumi ane waganhe lagoukha meke emenogo ageikhe nen men yogokhikhe, “Eiye! Noe, nayuk o. O helekit hano meke baga o hano motok halek ethoma lakhan!” iluk hogorakhikhe.

²Hogorakhunem, at Yesus nen men yogokhikhe, “O yiluk-muluk halek ethoma lakhekhe lagan a? Helekit oba thapapal halek ethoma ageikhe thogotdigidek motogat misak-dapukhogon la'isagun o,” iluk yogokhikhe.

³Wene itithogon yogeisekhe lageikhesik nen, at Yesus lak Allah ai halek i aik yi bagake thogotdiluk i aik ilibaganke italhukhasik, tom Zaitun ukul oba dageiluk inebe hurek lagoukha. Hurek lagoukhasik, Petrus men, Yakobus men, Yohanes men, Andreas men, Yesus inom inarligat dogolik, at oba wene ageikhe hinok waganhukha.

⁴Hinok waganhe dogolik, men yogokhukha, “Noe. Wene yoknisegen etnogo, mera nen hagatlasigin. Ebe hagatlasigiluk hagakhe korlek, ki meke tak hagatlagunem nit ninetaiken eketlasugun. Wene hutukhogon yoknisan o,” iluk hinok waganhukha.

⁵Hinok waganhukhama, at Yesus nen men yogeisasikhe, “Akhuni nen nukhetdinageinogo iluk, hinobabut hebelogo dogono o.

⁶Akhuni inebe doalegat nen inetaga an netaga meke thalogo nen men ilik wisugun, At wisigin isukha etnogo an nebe wagei yiat o, iluk inane eberogonat thalek akhuni doalegat nukherinabisugun.

⁷Itithogon hagatlaga korlek, wim kagaldiluk horogat yakhunem inane hinasuk holhik, walegat yakhunem inabok holhik, hagakhe dogolik, hinetaiken aborlok ugup o. Itithogon hagatlasigin mekeat he, o ilugun hurli baga hagatlasigin meke iti abanat o.

⁸Yi akhuni ti akhuni inukuloak etaga dopok wim kagalhik, ap inetagapogot inagarumi inapma meke dopok wim kagalhik, hagasugun. Wim kagalhunem, yi ai ti ai dugul luk-lagathigik, hipiri no ageik, hagatlasigin mekeat he, iti, humi ineagei itaginabuogoluk hinet wakharek iti hak, alebageik hugun itiat o.

⁹Itithogon hekhe dogolik, hit he, hinobabut hebelogo dogono. Akhuni aperek nen, hiniki herle warogo ap koktek nen hinitema waganuagaluk inoba wokhisik lageik, o akhuni Yahudi meke sembayan egarekma nen tugi hinakhik, hagasugun o. Itithogon hagakhe dogolik, It yi Yesus agarumi, iluk, it ap pemerintah meke koktek inom, inetagapogot inom, ukum hinoba 'buagaluk inelokhoma meldinagumo, itinem hano iluk, an hagakhunem hinileken neekhe lagap meke pakhogon yogeisagun.

¹⁰Meke re, wene hano wene yi, yi ap ti ap inukuloak etaga dopok yogeisilik lagap halok he, ilugun hurli baga arat hagatlasigin o.

¹¹Hit hiniki herle warogo wene inoba 'bigik, kokhik, hagakharekma wokhisik lagunem hit nen, An nen wene oko nikithogon igin, iluk hinelabut hikhup o. Wene oko hit nen hinakla kagalogo ugun 'buk. Allah Agoreke nen, Yigithogon ini o, iluk itinem yokhisagein mekeat yogeisano o.

¹²Nen, agarlak ageikhe nen, ekaerek agarlak wasuagaluk wolok lageik, opase nen, a'but wasuagaluk wolok lageik, ina'buri nen, inagosa inopase inasuagaluk inabok palhik, hagasugunat o.

¹³Nen, akhuni tha'bokhogonat nen an netaga ilik, Hit he, at agarumi, iluk hinebe ina'it motok hisagun o. Mekeat he, tha nen etaiken thebekhogon obakhanini hapugutdiluk dogogin halok he, o ilugun hurli baga Allah nen tiligin o,” iluk yogeisasikhe.

¹⁴Wene itithogon yogeisasikhesik, ageikhe men yogeisasikhe, “Hit nen holal waganek yi, etaga thalhe dogolik, hanorogo hutdekhe dogono o. Akhuni nen inalilo meke hagakhunem agorlerogon lo lugun meke o dogosak dekma melaga halok he, akhuni o Yudea eloke meke etoma lo tom obake dagouak o.

¹⁵Lo dagouogoluk halok, akhuni aperek o warleke baga dageiluk werekma, inapuke usatluk nen, inameke yi meke ti meke uma werek meke wagani ukigidek piokthegat dagouak o.

¹⁶Nen, it aperek wen atomke nen, hipirikamake nen, inapuke uma inasu wagani ageidek lo piokthegat dagouak o.

¹⁷Itithogon dageikhe dogolik, it humi ineagei inakla meke men, ineagei ket itago meke inirlak aban niliogei meke iti men, weak hugun iti, eiye! Nakmu lak e.

¹⁸Hit lo dagagun iti, o weak oba launogo iluk, sembayan ekhe dogono.

¹⁹O iti dikene weagat asigin iti ebekeram Allah nen yi meke ti meke winametdisikhe iti hurli nen logat, o yogotak ya hurli, weak kok iti hakene ageikhe hagatlageidek meke, opaki hasik itiat hagatlatluk yabokane ageikhe hagatlasigin motok dek o.

²⁰Weak hagatlasigin iti, ninopase Allah Etagapogot nen, Hurli yi hurli arat o, iluk igidek kamotdilepma re, akhuni tha'bokhogonat tilinakhidek weagat atlep. Meke re, akhuni Allah nen wenageinakhikhe meke, it inobasik anek he, Yogo. Weak arat hegep o, iluk hurli wasigin werek o.

²¹Nen, weak itithogon hagatlaga korlek, it aperek nen, Kristus etnogo yi waga yi 'bikhani, igik, it aperek nen, Kristus etnogo ili waga ili lakhani, igik, ugunem hit hinakla nen eberogonat iluk apugup o.

²²It akhuni aperek inekalat ekhe dogolik, Kristus etnogo nebe anat o, igik, nen, it aperek nen, Allah ane yokhisegerek meke anat o, igik, i wisugun o. Witluk nen, Akhuni Allah nen wenageinakhikhe meke emenogo nukhetdisausak a? Dek a, iluk nukhetdisauwogoluk, inane eberogonat apoagaluk hagasusak dek meke elalin meke hagarik wisugun o.

²³Wene iti aban hagatlageidek werek korlek husupi tak yokhisigi iti hinobabut hebelogo dogono o,” iluk yogeisasikhe.

²⁴At Yesus nen itithogon yogeisasikhesik ageikhe men yogeisasikhe, “Weak kok hugun iti halok oba nen yabokane o mulikin mum ageik, thut yakhidek huk ageik,

²⁵ husagal pogot oba nen kilelogo usa'ageik, it pogot oba inobatneak welageikharek meke iti Allah nen inaborlogotdisigik, hagasigin o.

²⁶Itinem an abat itaklasi agagi etnogo nobatnerogonat oisa akla usa'agunem, akhuni inileken nealok, motok hogotnabugun o.

²⁷Usa'aga dogolik, it malaikat Allah nen yoko usa'isa agarek meke emenogo, akhuni Allah nen wenageinakhikhe meke o wema elomake, upu elomake, ilike, yike, welageikharek meke natogorinabuagaluk, yoko pogot erlomake erlomake o yi ai ti ai eloma la'isagein o,” iluk yogeisasikhe.

²⁸At Yesus nen itithogon yogeisasikhesik ageikhe men yogeisasikhe, “Wene yi o ara oba lisogon yokhisagein yi hutdini o. O ara iti eka lologo usekherethek, yabokane asi'bat dageigik, eka dabelhik, hagakhunem hinileken halok hinakla nen, Yogo. O arat hibi asigin higi, iluk hinakla hutdegethep iti hak,

²⁹Itithogon hagatlasigin, iluk yokhisigi etnogo ebe hagatlagunem, hinileken halok nen, Yogo. O ilugun hurli baga hagatlasigin etnogo horok asi aga higi, iluk hinakla apano o.

³⁰Yigithogon hagatlasigin, itithogon hagatlasigin, iluk yokhisigi iti, akhuni o yogotak ya werek meke inebe dek ageidek aban werek korlegat ebe tha'bokhogonat hagatlasigin o, iluk eberogonat yokhisigi.

³¹Pogot men, agat men, iti dek asigin mekeat he, an nane iti dek asigin motok dek o,” iluk yogeisasikhe.

³²At Yesus nen itithogon yogeisasikhesik wene ageikhe men yogeisasikhe, “Hagatlasigin iti, o itinem, jam iti baga hagatlasigin iluk, nit tha'bokhogonat ninokodek anek. It malaikat Allah nen yoko usa'isa agarek meke emenogo inokodegat. Nen, an nebe at Allah a'but mekeat he, nokodegat o. An nopase arligat ilu o.

³³Mera hagatlasigin hit hinokodegat iti nen, hinobabut hebelogo thuam hanorogon dogono o.

³⁴Wene yi ipisak tak-tak, ap ageikhe aila nen o walegat lagaluk, atuaneke aila therogo dogoagaluk 'bisalok lagarek. Lagaluk, atuaneke emenogo inayabu dopok supusogo wogeisekhe dogolik, Hat ageikhe yi hagakhe dogono. Hat ageikhe yi hagakhe dogono. Hat ageikhe nai holagapema thuam welagatek meke yi, hileken hanorogo dogono, iluk supusogo wogeisalok lagarek hakeneat o.

³⁵Iti hak, hit hinileken hanorogo dogono, iluk yokhisigi iti, hinoe Etagapogot ai iteerek meke etnogo apuke wisigin iti mera wisigin. O hiamaganekeke wisigin a? Hibako eketurlem wisigin a? Thue ane isi korlek wisigin a? O wik-wik wisigin a. Hit hinokodek.

³⁶O itinem wisigin hinokodek iti, akhirak noge isi korlek 'bithisasunogo nen,

³⁷hinobabut hebelogo dogono o, iluk hit yokhisigi yi akhuni inebe tha'bokhogonat hinomat yokhisigi o,” iluk yogeisasikhe.