Read Mid Grand Valley Dani Markus 14 Bible Online

Markus 14 - Mid Grand Valley Dani bible

Markus 14

¹Itinem it Yahudi meke domba pesta Paskah etnogo meke men, eken roti hisuagaluk akla usakharek meke akla usakhidek werago nekarek etnogo meke men, iniki pere dogoluk, ageikhe nen nuogoluk werek korlek, it ap Allah iteerek meke emenogo inougi koktek men, Allah ane holal waganek iteerek meke emenogo men, Yesus inileken wolok limago ha'iluk wasuogoluk abok palhe lagoukha.

²Abok palhe dogolik, men isukha, “Pesta kok isago nukunem wene woklatluk ilugun oba weak asunogo nen hakhigidek dogoluk, o we dikene halok hakhauwok o,” iluk abok palhukha.

³Abok itithogon palhe korlek, at Yesus lak o Betania lagoukhasik, ap Simon u henako hakene inayuk meke haganeat ebemake welageikhe meke iti aila ukisikhesik dogolik, hipiri nuogoluk hurek lageikhe. Hurek lageikhesik werekma, he ageikhe nen isoak helekit etaga pualam meke hagarek meke baga apusu narwastu apusu obasi hano meke oko kogat palogo akla henago wolok Yesus oba ukisikhe. Oba ukisikhesik, isoak etnogo ape obakha thekekhogon, apusu Yesus ukuloak oba tialogo usa'isikhe.

⁴Usakhunem it akhuni aperek etoma dogolik, men isukha, “He yi apusu obasi hano meke we yugunat alomarogo usakhe yi nenaluk.

⁵Apusu yi baga, uang perak akhuni yabu iniki opaki hasik hagakhunem iniki oko opakitek wogeisegarek etnogo meke 300 nen waganiluk nen, akhuni inameke dek meke supurisausak meke,” iluk, he etnogo wenagakhukha.

⁶Itithogon wenagakhukha mekeat he, at Yesus nen, men yogeisasikhe, “He yi wenagakhe 'buk o. Thogotdini o. At nen hano hagatnakhe o.

⁷It akhuni inameke dek meke iti, hit hinom motok dogogun o. Itithogon dogolik, itithogon yomageisagun, iluk hinakla apalok nenat yomageisaumo hano. Itithogon mekeat he, at anek he, hit ninom motok dogogun dek o.

⁸At nen an hagatnabu hagat, erlok hagatnakhe o. Akhuni warek oba apusu warisegarek iti hak, an yabokane nakhunem nebe watlasumo warek thalnabuogoluk noba watdanu hagat, arat watdani aga o.

⁹Nane eberogonat yokhisak. He yi oba eberek dogoagaluk akhuni nen wene hano wene etnogo, o yi ai ti ai yogeisilik nekhe dogolik, He iti nen itithogon hagakhikhe, iluk abok hano iluk ekhe dogogun o,” iluk yogeisasikhe.

¹⁰At Yesus wene itithogon yogeisasikhemo nen, at agarumi inebe 12 emenogo meke, ageikhe at Yudas Iskariot etnogo, Yesus wasuagaluk yoko it ap Allah iteerek inougi koktek emenogo inoba lageikhe.

¹¹Yoko lageikhesik yogeisasikhemo inasuk holhukhasik nen, inakla arleken agoukhasik, men yogokhukha, “Halok he, oko uang ageikhe wokhesugun o,” iluk abok yogokhukha. Yogokhukhama, at Yudas akla nen, “Yesus ebe o hano iluk ka baga nen it iniki baga 'bigin he,” iluk abok palhe dogolik wene munini ebekhe lageikhe.

¹²Yudas itithogon akla ebekhe korlek, it akhuni Yahudi meke eken roti hisuagaluk akla usakharek meke akla usakhidek werago nekarek etnogo meke nuogoluk dirlu alebageik nekarek meke nuogoluk hagakhe dogolik, pesta Paskah hasik domba warogo nausak tak-tagat ageikhe. Tak-tagat ageikhemo, at Yesus agarumi ane waganhe lagoukha meke emenogo oba wagoukhasik men yogokhukha, “Noe. Hat domba pesta Paskah hasik nanok nen, nit nen yi meke ti meke o koma tugurogo 'bi lausak warlok apegen,” iluk oba hinok waganhukha.

¹³Hinok waganhukhama, at nen, agarumi ane waganhe lagoukha meke emenogo aperek inebe pere la'isasikhe. La'isekhe dogolik men yogeisasikhe, “O kota etnogo lani. Lugun hak, ap ageikhe isoak agat meke hagarek i henatluk wagunem hinom abuk asugun etnaga. Hinom abuk atluk oporligat lano.

¹⁴At oporlik lagunem, at ebe uma ukekhe halok he, ap ai iteerek meke iti oba hinok men iluk waganino, At ninoe wene yakulnisekherek meke etnogo nen, men ekhe, An nagarumi nane waganiogei meke ninom pesta Paskah hasik domba warogo noagaluk, o kakok palek ki hak 'banhen, iluk hinok wagani lani, iluk la'inani agama wago.

¹⁵Itithogon yogokhunem, at nen, o henaipu hurli kogat palekma werago nausak oba oboluk hagarek karelek werekma yakulhisagein etnaga. Yakulhisekhe halok he, etomaat nuok nen, yi meke ti meke tugurogo 'biluk dogono,” iluk la'isasikhe.

¹⁶At agarumi ane waganhe lagoukha meke inebe pere la'isekhe dogolik, “O kota lani,” iluk yogeisasikhemo it etomaat lagoukhasik, at Yesus nen isikhe hagat, werekma 'bikha lagoukha. 'Bikha lagoukhasik, pesta Paskah hasik domba werago tugurogo 'bisukha.

¹⁷Yi meke ti meke tugurogo 'bisukhasik werekma, hiamaganekeke at Yesus agarumi inebe 12 ebetlake emenogo inom inoba lagoukha.

¹⁸Lagoukhasik uma ukiluk hureklatluk, pesta neke dogolik at Yesus nen men yogeisasikhe, “Hit meke ageikhe hipiri an nipisak opakimo neke lago meke iti nen, an nebe nasuagaluk yoko ligin o, iluk eberogonat yokhisigi,” iluk yogeisasikhe.

¹⁹Itithogon yogeisasikhemo it inakla weak atluk men yogokhukha, “An a? An dek apigi,” iluk inebe dopok nen itithogon anek ilik lagoukha.

²⁰Itithogon ilik lagoukhama, at Yesus nen men yogeisasikhe, “Hit hinebe 12 welagap yoma, hat ageikhe an nipisak niniki tak-takhogon piring akla usa'iluk apusu mago noko meke iti nen.

²¹An abat itaklasi agagi etnogo, watlasigin meke holal waganek werek tak-tagat watlasigin mekeat he, at ap nebe nasuagaluk yoko ligin meke iti anek he, eiye! Ebe motok weagat asigin o. At ap iti itaklatlep dekma, hanoat dogolep meke,” iluk yogeisasikhe.

²²At Yesus agarumi inom hipiri itithogon neke dogolik, at nen hipiri roti meke ikimo waganhikhesik Allah heagei warogo ebe kusogo supurisekhe dogolik men yogeisasikhe, “Te. Yi an nebeat o,” iluk yogeisasikhe.

²³Itithogon yogeisasikhesik isoak anggur eken apusu henago meke ikimo waganhikhesik, Allah heagei warogo, supurisasikhemo inebe tha'bokhogonat nasukha.

²⁴Noagaluk supurisekhe dogolik men yogeisasikhe, “Yi re, an namebat o. Allah nen wene warogo wokhinabigin isikhe etnogo, akhuni doalegat inobasik namep ulabogo nasugun iti baga, ebeat asigin o.

²⁵An nane eberogonat yokhisak. Anggur eken apusu yi nalok nen, an yabokane ageikhe nikidek dogoluk nen, hurli, at Allah nen apma 'bisagein iti hurli apusu ket meke nigin o,” iluk yogeisasikhesik

²⁶etai Allah aetai ageikhe watluk dukhisukhasik tom Zaitun ukul oba dageisukha.

²⁷ Itithogon tom Zaitun ukul oba dageisukhasik, at Yesus nen, men yogeisasikhe, “At Allah nen, At ap domba therogo welagarek meke iti ebe an nen wakhunem domba emenogo lo thirlik-pirlikhogon lugun o, iluk isikhemo holal waganogo 'bisukhama werek iti nen, hit tha'bokhogonat an here'aniluk lo thirlik-pirlikhogon lugun o.

²⁸Lo thirlik-pirlikhogon lugun mekeat he, an nakhunem, yabokane Allah nen nilugutnakhunem, an tak o Galilea dageiluk hinelokhoma dogogin o,” iluk yogeisasikhe.

²⁹Itithogon yogeisasikhemo at Petrus nen men yogokhikhe, “It hetlake yoma inebe tha'bokhogonat here'ageiluk lo thirlik-pirlikhogon lugun halok he, an itithogon lo dukhigin dek o,” iluk yogokhikhemo,

³⁰at Yesus nen, “Yogotak hibako yiat, thue ayam ane alebageik iluk nen, yabokane igidek werek korlek, hat nen, Yesus iti an nokodek o, iluk hiki henagan oba la'beligin etnaga, iluk eberogonat yokhikhi o,” iluk yogokhikhemo,

³¹at Petrus nen men yogokhikhe, “Itithogon egenat meke re, an nipisak nasumo hano. Yesus nokodek, iluk an nen la'beligin dek o,” iluk ane obatnerogon isikhemo, it agarlak lak aperek inebe dopok inane itithogon anek ilik lagoukha.

³²Wene itithogon ilik ilik nen, yabula ageikhe etaga Getsemani lagoukha. Lagoukhasik, at Yesus nen men yogeisasikhe, “An horok ya lalok sembayan isi korlek, hit ya hurek dogoni,” iluk agarumi ane waganhe lagoukha meke emenogo yogeisasikhe.

³³Itithogon yogeisasikhesik Petrus men, Yakobus men, Yohanes men, wogosik lagunem, at Yesus etaiken motok weak ageikhe.

³⁴Itithogon hagakhikhemo men yogeeisasikhe, “Nagarumi. An netaiken motok weak agasik watlasusak hakene hagatnabiogo. Halok he, hit ya dogolik hinobabut hebelogo therogo dogoni o,” iluk yogeisasikhe.

³⁵Itithogon yogeisasikhesik, at sembayan igiluk horogat eta agat oba elokhe thogoumhogo wilageikhesik sembayan men isikhe, “Nopase! An yogotak yaat weagatnabugun iti, weagatnakhidek thogotdanusak halok, thogotdanuak o,” iluk isikhesik,

³⁶yabokane ageikhe men isikhe, “Nopase. Nopase o! Hat he, yi meke ti meke hagasumo hagasusak anek iti nen, an weagatnabugun iti, hat nen tilnabino, iluk u hak, eken apusu henago noagaluk woknesugun iti hat nen wokhano igi. Meke re, an nakla apigi iti dek o. Hat hakla apegen meke itiat hagatnabino o,” iluk sembayan isikhe.

³⁷Sembayan itithogon iluk, agarumi emenogo inoba wageikhe meke, it noge isi werekma nen, at Petrus men yogokhikhe, “Simon. Hat nogeat ekhe lagan? Yogotak ya elanma jam opaki hasigat hobabut hebelogo dogosak erlok dek a?” iluk yogokhikhesik

³⁸it ebelake emenogo inomat men yogeisasikhe, “Weak hagasuagaluk hinakla kagalisunogo, hinobabut hebelogo dogolik, sembayanat ekhe dogoni o. Hinakla nen erlok hagasusak iluk apekhe lagap mekeat he, hinebe nen itithogon hagasusak erlok dek o,” iluk yogeisasikhe.

³⁹Itithogon yogeisalok sembayan alep isikhe hagat, yabokane i lagiekhe.

⁴⁰Itithogon i lageikhesik yabokane wageikhe meke, it emenogo noge inil ageikhemo noge isi werekma 'birisa ageikhemo nogo nen, inane nikithogon yogosu heat kamotdisukha.

⁴¹Kamotdisukhama, at iki pere baga ileken 'birisa ageikhesik nen yabokane lalok 'birisa ageikhesik, men yogeisasikhe, “Hit thet walogo noge isi motok dogogun a? Noge arat egep o. An hagatnabugun etnogo yogotak yiat o. Ap ageikhe nen it ap weak hagariogei meke nen an abat itaklasi agagi etnogo nasuagaluk iniki baga 'banigin iti arat 'banigin yi lakhani!

⁴²Halok he, luok nen, melatni o. Ap an nasuagaluk yoko laga meke etnogo horogat waga ithi,” iluk yogeisasikhe.

⁴³“Horok ithi waga ithi,” iluk isi korlek eranogoat it ap Allah iteerek meke inougi koktek emenogo men, Allah ane holal waganek iteerek meke emenogo men, inarluetek emenogo men, inom nenat, ap opaki doalek la'isa agoukhama, karok wolok, payuk wolok, Yesus agarumi inebe 12 emenogo meke ageikhe at Yudas etnogo nen oporlik wogosik wageikhe.

⁴⁴Waga dogolik, at Yudas yoko lageikhe meke etnogo nen wene men warisasikhesik nen wageikhe, “An lalok nape tharluk heagei wakhe halok he, hit nen, I, ebe itiat higi, iluk hakhalok hiniki hinobatnerogon wolok wetno,” iluk wene hutukhogon yogeisasikhesik, at inomat wagoukha.

⁴⁵Wagoukhasik at Yudas etnogo Yesus oba horokhogon wageikhesik, men yogokhikhe, “Noe,” iluk ape tharluk heagei wakhikhe.

⁴⁶Ape tharluk heagei wakhunem, it ap emenogo nen Yesus ebe hakhasukhasik iki herle warogo hago welagoukha.

⁴⁷Itithogon hakhasukhama it ap etoma metek welagoukha meke ageikhe nen karok aika akla uakma nen kigikhogon waganhikhesik, ap Allah iteerek meke inoe kok atuaneke ageikhe wasigiluk yigilabethasikhe meke re, asuk anek 'bogokhogon la'isikhe.

⁴⁸Itithogon la'isikhemo at Yesus nen it ap emenogo men yogeisasikhe, “An niki abusak ageikhe waganhima nen, hit karok wolok, payuk wolok, niki herle wasuogoluk wagap a?

⁴⁹Hibiku-yogokuat an hinakerlekla Allah ai halekma dogolik wene yakulisekho werekma haknakhidek welagasip nen, Itithogon hagasugun, iluk Allah ane holal waganogo 'bisukha meke tak-tagat, haknabi agap o,” iluk yogeisasikhemo,

⁵⁰at Yesus agarumi emenogo inebe tha'bokhogonat ebe here'isalok lo thirlik-pirlikhogon lagoukha.

⁵¹Lo laga korlek elege ageikhe asu lenan meke itikmanke meke anek ugu dogolik Yesus oporlik lagaluk hagakhunem, it ap emenogo nen hakhasukha.

⁵²Itithogon ha'isinem su etnogo nokorlogo thogotdisalok, aloak 'buguligat lo lageikhe.

⁵³At Yesus ebe hakhasukhasik ap Allah iteerek meke inoe kok oba wolok lagoukha. Etoma it ap Allah iteerek meke inougi koktek inebe tha'bokhogonat men, inarluetek emenogo men, Allah ane holal waganek iteerek meke emenogo mel, natogokhukha.

⁵⁴Yesus itithogon wolok laga korlek, at Petrus etnogo yabokane inoporlik huyo'bo laga lageikhesik, ap Allah iteerek meke inoe kok etnogo agokutlu agarumi Allah ai halek therogo welageikharek meke werekma inoba ukisikhesik, inom hetu mokalekma hurek dogolik thogei isakhekhe lagoukha.

⁵⁵It itithogon thogei isakhekhe korlek, it ap Allah iteerek meke inougi koktek emenogo men, wene Allah ane hasik erlo pilinekharek meke inebe tha'bokhogonat men, inom dogolik, ukum Yesus oba 'biluk wasuogoluk men isukha, “Akhuni at weak hagakhunem inileken hega meke uak nen herageinabini o,” iluk isukhama herageinakhukha mekeat he, dek ageikhe.

⁵⁶Dek ageikhemo, it aperek inebe doalegat nen, men isukha, “Weak itithogon hagakhunem ninileken hogo,” iluk wene inekalat isukha mekeat he, inane opakiat mothogon isukha dek.

⁵⁷Itithogon isukhama, yabokane it ap aperek melatluk, inekalat nen men yogeisasukha,

⁵⁸“At yi nen, Allah ai akhuni iniki nen halhukha meke yi, an nen misalogo la'igin o. Misalogo la'iluk obolukmo akhuni iniki nen halusak dek. Ninat meke niki pere baga halhe dogoluk, niki ageikhe yi baga, arat haligin o, iluk ninilhanem isinem ninasuk holhugu o,” iluk isukha mekeat he,

⁵⁹inane iti opakiat mothogon igidegat.

⁶⁰Itithogon isukhama nen, it ap Allah iteerek meke inoe kok etnogo melageikhesik nen turlem inakla ukisikhesik, Yesus men yogokhikhe, “Yesus. It ap yoma wene hat hoba 'biliogei yoma, hat oko ageikhe yogeisagein dek a? Oko yogeisaumo re,” iluk yogokhikhe mekeat he,

⁶¹ane igidegat huk ageikhe. Huk ageikhemo yabokane it ap Allah iteerek meke inoe kok etnogo nen, wene ageikhe men yogokhikhe, “Allah hogorakhe lago meke nen a'but Kristus la'isigin isukha etnogo ebe harat a?” iluk hinok waganhikheat.

⁶²Hinok itithogon waganhikhemo, at Yesus nen men yogokhikhe, “Iti, an nebe yiat o. An abat itaklasi agagi etnogo, at Allah obatneak yi meke ti meke hagasusak anek etnogo alilu iki ebeke kogat hurek dogoluk, pogot oba etoma nen oisa akla usa'agunem hinileken neagun o,” iluk yogokhikhe.

⁶³Itithogon yogokhikhemo, it ap Allah iteerek meke inoe kok etnogo ekaerek asu ugu meke li'bilogo la'isikhesik nen, men yogeisasikhe, “Akhuni nen at weak hagakhunem inileken hega meke wene pakhogon uagaluk nenaluk therisik dogogun.

⁶⁴Allah akla meanetdiluk etaga weagatdisinem arat hinasuk holhep iti, hinakla nen nikithogon apekhe lagap,” iluk yogeisasikhemo, it emenogo tha'bokhogonat nen, “Ukum oba 'biluk ebe motok wasuok o!” iluk yogokhukha.

⁶⁵Itithogon yogokhukhasik it ap emenogo aperek nen wosi suphogon Yesus oba 'biluk iniki nen ileken labetdiluk, iniki dikilik wakhe dogolik, “Tha nen hake nogo. Yoknisan ta,” iluk yogokhe lagoukhama, it ap koktek emenogo inagarumi Allah ai halek therogo welageikharek meke nen ebe hakhasukhasik tugi iniki agot tugi tamuk-hamukhogon wakhukhaat.

⁶⁶Itithogon hagakhe korlek, at Petrus okutlu holkerlekma werekma, ap Allah iteerek meke inoe kok etnogo atuaneke horlak meke ageikhe wageikhe.

⁶⁷Wageikhesik, Petrus etnogo hetumo thogei isakhasinem lakhasikhesik, ileken oba durlu ageikhesik men yogokhikhe, “Hat meneke Yesus ai o Nazaret meke etnogo hinom nekhe lagap meke apigi,” iluk yogokhikhe.

⁶⁸Yogokhikhemo, at nen men yogokhikhe, “An nokodek o. Hat egen iti an hutdigidek o,” iluk la'belhikhe. La'belhikhesik, holagape kok palekma dukhegarekma dukhi ageikhesik werek korlek, thue ayam ane isikhe.

⁶⁹Itithogon ane isikhemo, at Petrus holagape palekma eranogoat werekma, at horlak etnogo yabokane ileken hasikheat. Hasikhesik men yogeisasikhe, “At yi it inom nekhe lageikha mekeat o,” iluk it akhuni etoma welagoukha meke emenogo yogeisasikhe.

⁷⁰Itithogon yogeisasikhemo at nen yabokane la'belhikheat. La'belhikhesik weat eranogo werekma nen, it akhuni etoma welagoukha meke emenogo nen men yogokhukha, “Hat hebe o Galilea meke heogo yi hebe eberogonat it mekeat o,” iluk yogokhukhama,

⁷¹at nen, la'belhe dogolik men isikhe, “Hit nen ap abok ekhe lagap iti, ebe an nokodek o. Nopase Allah oak! Nekalat igi halok, at nen nasuak o,” iluk etaga hupuk palhikhe.

⁷²Etaga hupuk palhe korlek eranogoat, thue ayam etnogo ane yabokane isikhe. Ane yabokane isinem, at Petrus nen, “I. At Yesus nen an yoknekhe dogolik, Thue ayam ane alebageik iluk nen, yabokane igidek werek korlek, hat nen, Yesus nokodek o, iluk hiki henagan oba la'beligin, iluk yoknekhe etnogo, arat la'belhi yi o,” iluk akla ebekhikhesik, de etaiken hisogo de ageikhe.