Read Mid Grand Valley Dani Markus 2 Bible Online

Markus 2 - Mid Grand Valley Dani bible

Markus 2

¹At Yesus iki pere negen o etoma welageikhesik nen, yabokane o Kapernaum uki ageikhe. Uki ageikhesik nen, uma ukisikhemo, akhuni nen he, “At ebe uma werek o,” iluk isinem inasuk holhukha.

²Inasuk holiluk nen, akhuni inebe doalegat natogosi agoukha. Wagoukhama uma kerlekhogonat, nen, miso hulakma inom kerlekhogonat natogosi agoukhama, wene hano wene etnogo yogeisasikhe.

³Yogeisugunem he, ap inebe 4 oba nen, ap ageikhe iki isok aborlok dek motok welageikhe meke o perlago wolok Yesus oba wagoukha.

⁴Wolok wagoukhasik, Yesus oba wolok ukuogoluk hagakhukha meke re, akhuni kerlek nen, nikithogon wolok uku heat ageikhemo, o warleke baga dageisukhasik, Yesus ebe welageikhe mot-morat warleke supuk talogo nen, ap iki isok aborlok dek meke etnogo arlit eka noge ekhe lageikhe meke baga earogo usa'isukha.

⁵Itithogon usa'isukhama, at Yesus ileken halok nen, men isikhe, “Ap yi inetaiken an noba hakotdegasik nen wolok wageikha higi,” iluk ileken ekagat hisasikhesik nen, ap iki isok aborlok dek meke etnogo men yogokhikhe, “Na'but o. Hat weak hagakhe lagan meke an nen thagalogo degetdigi o,” iluk yogokhikhe.

⁶Itithogon yogokhunem, it ap Allah ane holal waganek iteerek meke aperek etoma hurek dogolik, it-it inakla nen he,

⁷“Ap yi wene ekhe iti, nenaluk ekhe. Nit akhuni weak hagakhe lago meke iti, it akhuni aperek nen erlok thagalogo degetdisausak nogo? At Allah arligat nen erlok thagalogo degetdisekherek mekeat he, at yi nen Allah akla meanetdiluk etaga weagatdiliogo,” iluk inakla apasukha.

⁸Itithogon inakla apasinem, at Yesus akla nen, “It inakla itithogon apiliogei,” iluk eranogoat hutdisasikhesik men yogeisasikhe, “Hit hinakla itithogon apekhe lagap iti, nenaluk apekhe lagap.

⁹An nen ap iki isok aborlok dek meke yi, wene yogosusak he, alhe hakene ki apegep. Hat weak hagakhe lagan meke iti arat thagalogo degetdigi, iluk yogokhi iti alhe hakene meke yogokhi apegep a? E a, at he, Hebe melatluk nen, harlit eka talogo noge ekhe lagan meke yi horlalok lan o, iluk yogosusak alhe hakene apegep a? Dek o. Hebe melatluk lan, iluk yogosumo akinat o.

¹⁰Akin mekeat he, an abat itaklasi agagi etnogo agat oba yoma dogolik, akhuni yi weak ti weak hagakharek meke an nenat thagalogo degetdekhe dogoagaluk, Allah nen iteerek danhikhe meke iti hutdanubageik nen, yogosik,” iluk yogeisasikhesik, ap iki isok aborlok dek meke etnogo men yogokhikhe,

¹¹“Hebe melatluk nen, harlit eka talek yi horlalok haila lan o,” iluk la'isikhemo

¹²ap etnogo melatluk, eranogoat direka talek etnogo it ap emenogo tha'bokhogonat iniloba horlalok dukhisikhe. Itithogon dukhisi korlek, it akhuni emenogo tha'bokhogonat nen, men isukha, “Eiya! Nayuk o. Nit yoma alebat akhuni aperek nen yigithogon ageikhe hagakhunem hogorek dek meke hagakhe yi nayuk o,” iluk Allah hogorakhukha.

¹³Itithogon hagatdiluk yabokane, at Yesus i yekelek etnogo aik obake lageikhe. Lagunem he, akhuni doalegat at oba natogosi agoukhama, wene yakulisasikhesik lageikhe.

¹⁴Wene yakulisalok laga dogolik nen, ap Lewi, Alfeus a'but, kantor uang pemerintah hasik kino iluk waganhe lagoukhama hurek werekma ileken hasikhe. Ileken halok nen, “An noporlik eme o,” iluk yogokhikhemo, melatluk oporlik lageikhe.

¹⁵Lageikhesik nen, at Lewi aila Yesus ipisak ukisukhasik akhuni doalegat, it ap uang pemerintah hasik kino iluk waganhe lagoukha meke inebe doalegat inom, it aperek weak hagakhe lagoukha meke inom, Yesus oporlik lagoukhasikmo nogo nen, at Yesus ebe inom, at agarumi ane waganhe lagoukha meke emenogo inom, hipiri nuogoluk hurek lagunem, it inom nuogoluk hurek lagoukhaat.

¹⁶Itithogon nasi werekma, it ap Farisi meke Allah ane holal waganek iteerek meke aperek nen inileken kolageisasukha. It aperek weak hagakhe lagoukha meke inom, it ap uang pemerintah hasik kino iluk waganhe lagoukha meke inom, Yesus inom hipiri nukunem inileken kolageisalok, it ap Yesus agarumi ane waganhe lagoukha meke emenogo men yogeisasukha, “At Yesus ap uang pemerintah hasik kino iluk waganharek meke inom, it akhuni weak hagariogei meke inom, hipiri opakimo dapukhogon niliogei yoma nenaluk,” iluk yogeisasukha.

¹⁷Itithogon yogeisugunem, at Yesus asuk holhikhesik nen, men yogeisasikhe, “It akhuni inoba hano meke dokter lak nen u hagarinabuagaluk inayoko 'busak a? Dek o. Inoba u werek halogat it dokter lak inayoko 'busak o. Iti hak, an akhuni hano hagariogei meke inayoko 'bigiluk wagagi 'buk. Akhuni weak hagariogei meke iti inayoko 'bigiluk wagagi o,” iluk yogeisasikhe.

¹⁸Yabokane, iniki ageikhe baga, at Yohanes agarumi ane waganhe lagoukha meke men, it ap Farisi meke inagarumi inane waganhe lagoukha meke men, sembayan uogoluk, hipiri nikidek werlegat welagoukha. Itithogon werek korlek, it akhuni aperek Yesus oba wagoukhasik nen, men yogokhukha, “Yesus. It Yohanes agarumi ane waganiogei meke inom, it ap Farisi meke inagarumi inane waganiogei meke inom, sembayan uogoluk hipiri nikidek werek korlegat he, hat hagarumi hane waganiogei meke ethoma anek he, itithogon hagakhidek hipiri niliogei iti nenaluk,” iluk yogokhukha.

¹⁹Itithogon yogokhukhama, at Yesus nen he, men yogeisasikhe, “Ap ageikhe age waganhe dogolik, at agarlak lak erugi inayoko 'bigin meke inom dogolik wam inom, hipiri inom, nikidek werlegat dogosak nogo? Dek o. Ap iti inom dogolik, itithogon nikidek werlegat dogosak dek.

²⁰Mekeat he, ap iti agarlak lak erugi 'bisalok ebe wolok lugun oba weregat o. Itithogon wolok laumo itinem anek he, it iti iniki ageikhe hipiri nikidek werlegat dogogunat o,” iluk yogeisasikhe.

²¹Itithogon yogeisasikhesik ageikhe men yogeisasikhe, “Akhuni nen, su alep iriogei meke li'bilaga halok, kain ket meke baga 'bugukakharek dek. Itithogon 'bugukakho halok he, kain ket meke dikikhogon hagatlaga dogolik, su iti kogat li'bilarik lausak o.

²²Iti hak, akhuni nen anggur eken apusu kerat herelogo isoak domba oado meke haganeat hagarek meke akla baga henakharek dek. Itithogon henasumo nen, isoak iti suphogo apusu tialogo alomatlageik, isoak weak hagatlageik, hagatlasunogo iluk, anggur eken apusu ket meke herelogo isoak ket meke baga henakharek o,” iluk yogeisasikhe.

²³Akhuni Yahudi meke iniki 7 baga Allah hasik werlegat welageikharek etnogo baga ageikhe at Yesus ebe inom, agarumi ane waganhe lagoukha meke emenogo inom, gandum ai yagomake laga dogolik, agarumi nen gandum eken palik palik lagoukha.

²⁴Palik lagoukhama, it ap Farisi meke nen, Yesus men yogokhukha, “Lakhan! It yi niniki 7 baga Allah hasik werlegat dogolik, Itithogon hagasusak dek, iluk wene palek werek mekeat paliogei yi nenaluk,” iluk wene palhukha.

²⁵Itithogon wene palhukhama, at Yesus nen, men yogeisasikhe, “Ap Daud agarumi oporlik lagoukha meke inom hipiri dek nen nonaik 'bisasikhemo, at nen hagakhikhe meke Allah ane baga holal waganek werek etnogo hit nen etaga thalhidek welagap a? Etaga thalhethebat o.

²⁶At Daud nen, ap Abyatar it ap Allah iteerek meke inoe kok dogolik Allah ai halekma Allah hasik hagakhunem oba ukiluk, roti Allah hasik 'bisegarek meke yugunat nausak motok dek. It Allah iteerek meke anek nausak iluk wene palek mekeat he, at Daud nen nasikhesik, agarumi oporlik lagoukha meke emenogo wogeisasikhemo nasukhaat, iluk holal waganek werek etnogo etaga thalhidek welagap nogo?” iluk yogeisasikhesik wene ageikhe men yogeisasikhe,

²⁷ “Allah nen he, Hiniki 7 baga an nobasik werlegat dogono o, isikhe iti, wene iti kogotdigiluk inebe winametdisasikhe 'buk. Akhuni inebe kogotdisalok nen, Hiniki 7 baga an nobasik werlegat dogono o, iluk inebe hasigat isikhe iti o.

²⁸Itithogon isikhe iti nen, niniki 7 baga Allah hasik werlegat welagorek iti, iteerek an abat itaklasi agagi nebe yiat o,” iluk yogeisasikhe.