Read Mid Grand Valley Dani Markus 3 Bible Online

Markus 3 - Mid Grand Valley Dani bible

Markus 3

¹Yabokane, at Yesus o it akhuni Yahudi meke sembayan egarekma ukisikhe. Ukisikhe hak, o etoma ap ageikhe iki ebelake lapelek meke welageikhe.

²Itithogon werekma ukisikhemo nen, it ap aperek inakla nen men apasukha, “Yogotak he, niniki 7 baga Allah hasik werlegat dogolik, at nen ap ithi hano hagasigin a? Dek a. Hagakhe halok he, Hat weak hagakhen, iluk, wene oba 'buok o,” iluk inileken waganhe lagoukha.

³Itithogon inileken waganhe korlek, at Yesus nen ap iki lapelek meke etnogo men yogokhikhe, “Hebe, melatluk, tumo ya eme o,” iluk yogokhikhemo

⁴melasi lageikhemo nen, it akhuni emenogo men yogeisasikhe, “Niniki 7 baga Allah hasik werlegat dogolik hano hagarinabusak a? Weak hagarinabusak a. Tilinabusak a? Inasusak a,” iluk yogeisasikhemo, inane dek huk agoukha.

⁵Inane dek agoukhama, at Yesus ileken hisilik lageikhesik akla nen, “Inobabut pirla-parlarek yi re!” iluk akla korlo atluk akla aga dageisikhe. Itithogon it inobasik akla aga dageikhe meke re, akla weak ageikhesik nen, ap etnogo men yogokhikhe, “Hiki walokhan,” iluk yogokhikhemo, iki walokhogon la'isikhemo nen arat hano ageikhe.

⁶Iki itithogon hano hagakhikhemo, it ap Farisi meke emenogo dukhisukhasik ibat Herodes agarumi inoba lagoukhasik nen, “Yesus nikithogon wasuok,” iluk inom abok palhukha.

⁷Itithogon hagatluk, yabokane, at Yesus agarumi ane waganhe lagoukha meke emenogo inomat he, i Galilea yekelekma etnogo aik oba lagoukha. Lagoukhama, akhuni nen, “Yesus yigithogon hagariogo, tigithogon hagariogo,” iluk abok ugunem, it akhuni o Galilea eloke meke doalegat inasuk holiluk inoporlik inoporlik lagunem, it akhuni o Yudea eloke meke men, o Yerusalem meke men, o Idumea eloke meke men, o i Yordan aik ilibagan meke men, o Tirus Sidon meke men, Yesus oba natogosi agoukha.

⁹Itithogon natogosi agoukhama, inebe doalegat u hano hagarinakhunem, it u inoba werek meke tha'bokhogonat nen, akhuni aperek higirisigik-hearisigik Yesus iniki hakhauwogoluk oba ukekhe lagoukha iti nen, at Yesus nen, at agarumi ane waganhe lagoukha meke emenogo men yogeisasikhe, “Akhuni doalegatma an nalilu kirlik-kerlek asisunogo nen, ku 'bugurlagat meke ageikhe an nobasik 'baniluk dogoni o,” iluk yogeisasikhe.

¹¹U itithogon hano hagarinakhe korlek, it mokat inobabut weak meke akhuni inakla ukiluk welagoukha meke nen Yesus ebe inileken halok nen, inelokhe thogoum isukhasik nen, inane kokhogon yogokhe dogolik, men ekhe lagoukha, “Allah a'but he, harat o,” iluk yogokhe lagoukha.

¹²Itithogon yogokhukha mekeat he, at Yesus nen men yogeisasikhe, “An Allah a'but, iluk nabok yogeisausak motok dek o,” iluk ane obatnerogon wenageisasikhe.

¹³Itithogon wenageisalok yabokane, at Yesus ebe tom oba dageisikhe. Dageiluk nen, “Ap inebe eta noba wisuak,” iluk akla apasikhe meke anek waisasikhemo, oba dageisukhama,

¹⁴inebe 12 nen meldisekhe dogolik, men yogeisasikhe, “Hit an ninom motok dogoluk nen, hano wene yogeisigik, mokat inobabut weak meke akhuni inakla ukiluk werekma, an nobatne wokhisaumo mukhogo ula'isigik, hano hagarinabik nekhe dogobageik nen la'inagagin o,” iluk meldisasikhe.

¹⁶Inebe 12 nen meldisasikhe meke emenogo, inetaga yi: Simon etaga ageikhe Petrus thalhikhe meke etnogo men,

¹⁷Zebedeus a'buri Yakobus agot Yohanes ipisak inetaga nit ninane baga pogot ane ekherek hakene u hak, it inane baga Boanerges thalinakhikhe meke men,

¹⁸Andreas men, Filipus men, Bartolomeus men, Matius men, Tomas men, Alfeus a'but Yakobus men, Tadeus men, Simon, “O yoma ninaierek meke anek dogouok,” iluk ekhe lageikhe meke etnogo men,

¹⁹Yudas Iskariot Yesus wasuagaluk yabokane yoko lageikhe meke etnogo men, inebe eta meldisasikhe.

²⁰Itithogon meldisalok apuke aila usageikhemo, akhuni doalegat yabokane oba natogosi agoukhama, Yesus agarumi inom inapiri nikithogon nau heat hagatlageikhe.

²¹Itithogon hagatlageikhemo, akhuni aperek nen, “At etaiken hunu-hunu agasik werek iti,” ugunem, it Yesus agarumi inasuk holhukhasik, at ebe waganuogoluk wagoukha.

²²It waga korlek, it ap Allah ane holal waganek iteerek meke o Yerusalem nen dagei agoukhasik nen, men isukha, “Beelzebul mokat inobabut weak meke inoe kok etnogo Yesus oba dukthek werek o. Itithogon werekma nogo nen, at obatne baga mokat at agarumi negen inobabut weak meke akhuni inakla ukiluk werekma mukhogo ula'isiliogo o,” iluk isukha.

²³Itithogon isukhama, at Yesus nen akhuni doalegat emenogo waisasikhesik nen, wene oba lisogon men yogeisasikhe, “Iblis akhuni inakla ukiluk, ekaerek nen mukhogo erlok ula'akhausak nogo? Motok erlok dek o.

²⁴Nen, ap kok etagapogot opakiat meke agarumi apma hagasik welagarek inom it-it hurlitdakhalok inom weak dogogun halok, opakiat dogolik inobatne welagoukha hak dogogun dek. Erlok dek asugun o.

²⁵Nen, ap ageikhe a'buri inom hurlitdakhalok inom weak dogogun halok he, ap opakiat a'buri inom dogolik hano welagoukha hak dogogun dek. Weak asugunat o.

²⁶Iti hak, at Iblis ekaerek agarumi mokat inobabut weak meke inom hurlitdakhalok inom weak atlepma, welageikharek hak inobatne dogolep dek. Arat dek atlep o.

²⁷Nen, ap ageikhe obatne horleak meke iki herle warogo 'bigidek, aila ameke yi meke ti meke iniki abusak wagani ukusak erlok dek o. At he, iki herle warogo 'biluk anek, erlok wagani ukusak o,” iluk yogeisalok wene ageikhe men yogeisasikhe,

²⁸“Nane eberogonat yokhisak. Akhuni nen yi weak ti weak hagariogei meke men, inakla nen akhuni aperek meanetdisalok, inane baga nen inetaga weagatdisiliogei meke men, at Allah nen erlok thagalogo degetdisausak mekeat he,

²⁹Allah Agoreke iti inakla meanetdisalok etaga weagatdisi halok he, thagalogo degetdisausak dek o. Weak hagasugun iti hasik ukum inoba motok-motok dogogin o,” iluk yogeisasikhe.

³⁰Wene itithogon yogeisasikhe iti, it nen, “Yesus mokat obabut weak meke akla ukekhesik werek,” iluk isukhama nen, yogeisasikhe iti.

³¹Wene itithogon yogeisasikhesik werekma, at Yesus agosa men, agarumi men, wagoukhasik okutlu metek dogolik, Yesus dukhisuagaluk akhuni inoba wene yoko kola'isasukha.

³²Kola'isasukhama it akhuni doalegat Yesus alilu hurek welagoukha meke nen men yogokhukha, “Yesus, lakhan! Hat hagosa men, hagarumi men, herakhabik wageikhasik okutlu werek o,” iluk yogokhukha.

³³Yogokhukhama, at Yesus nen, “An nagosa nagarumi iti thani nogo,” iluk yogeisasikhesik,

³⁴akhuni at alilu hurek welagoukha meke emenogo ileken 'birisilik lageikhesik nen, men yogeisasikhe, “An nagosa, nagarumi hit yiat o.

³⁵Tha nen, at Allah akla apekherek meke mothogon hagakherek halok he, at iti an nagot, neru, nagosa, werek o,” iluk yogeisasikhe.