Read Mid Grand Valley Dani Markus 8 Bible Online

Markus 8 - Mid Grand Valley Dani bible

Markus 8

¹Itithogon hagakhukhama nen iniki pererlagat welagoukhasik nen, akhuni doalegat yabokane Yesus oba natogosi agoukha. Itithogon wagoukhasik hipiri motok dek ageikhemo, nena meke nau heat hagatlageikhe. Itithogon hagatlageikhemo at Yesus nen agarumi ane waganhe lagoukha meke emenogo waisasikhemo wagoukhama men yogeisasikhe,

²“Nagarumi. It akhuni doalegat yoma ninom niniki henagan oba noge ogosikmo nogo nen, inapiri motok dek agama, nena meke nugun heat hagatlagama werek iti nen, nakmu lak nen nakla weak aga.

³It hipiri nikidek werlegat inaila la'isaumo, it ebetlake inaila walegat nen wageikhasikmo, holagarlem lagunem ya kuak ta kuak launogo iluk,” iluk yogeisasikhe.

⁴Itithogon yogeisasikhemo at agarumi ane waganhe lagoukha meke emenogo nen men yogokhukha, “O limo akhuni inai halek motok dekma yoma, it inebe doalegat yoma hipiri roti meke ina'ithogon noagaluk, ebe koma meke waganogo melageisausak. Erlok dek o,” iluk yogokhukhama

⁵at nen, “Hit hipiri roti meke ageikhe meren hago welagap,” iluk hinok waganhikhemo it nen, “Dek o. Ebe 7 meke hago welago,” iluk yogokhukha.

⁶Itithogon yogokhukhama, at nen akhuni doalegat natogorlek welagoukha meke emenogo agat oba hureklasuagaluk yogeisasikhe. Yogeisasikhesik hipiri roti meke 7 nen eranogo ikimo waganhikhesik, Allah heagei warogo, iki nen hipiri roti meke eranogo kusogo akhuni doalegat emenogo supurisoagaluk, agarumi ane waganhe lagoukha meke emenogo wogeisasikhemo supurisasukha.

⁷Supurisasukhasik, ikan 'bugurlaktek meke pererlagat aperek welageikhemo, Yesus wogokhukhama, Allah heagei warogo itithogon supurisoagaluk yogeisasikhe.

⁸Itithogon yogeisasikhemo it nen supurisasukhama nen, ina'ithogon nasukha. Akhuni inebe doalegat iniki wenago 4.000 hakene nasukhasik, ato titurogo 'bisukhama Yesus agarumi nen mul yago 7 nen ukharlogo 'bisukha. Itithogon hagakhukhama nen, Yesus nen akhuni emenogo inailake la'isasikhe.

¹⁰La'isalok eranogoat, Yesus agarumi ane waganhe lagoukha meke emenogo inomat ku baga ukisukhasik ku warogo o Dalmanuta itali agoukha.

¹¹At Yesus lak o Dalmanuta itali agoukhama ap Farisi meke aperek Yesus inom wenekak ekhe dogolik obabut paluogoluk, oba wagoukhasik, men yogokhukha, “Hat hebe Allah nen la'agei agama wagan halok he, nit nen hutdaguok nen, hat nen elalin meke ageikhe hagasin ta,” iluk yogokhukha.

¹²Yogokhukhama at akla nen thet lugusogo nen, men yogeisasikhe, “Hit akhuni o yogotak welagap yoma nen ekhe dogolik, Nit nen hutdaguok nen hat nen elalin meke ageikhe hagasin ta, iluk yoknekhe lagap yoma, nenaluk. An nane eberogonat yokhisak, Hutdanubageik iluk an nen elalin meke ageikhe hagasigin motok dek o,” iluk yogeisasikhe.

¹³Itithogon yogeisalok nen, it akhuni emenogo o etoma here'isalok ku baga ukiluk ku warogo yabokane i aik ilibaganke italhukha.

¹⁴I yekelek etnogo aik ilibaganke italuogoluk, Yesus agarumi emenogo hipiri roti meke obarlikmatdiluk opakiat anek ku akla wolok italhukha.

¹⁵Italhukhasik Yesus nen inasuk warogo men yogeisasikhe, “It ap Farisi meke men, at Herodes men, eken hipiri roti meke hisuagaluk akla usakharek etnogo meke hakene werek iti baga weagathinabinogo iluk, hinobabut hebelogo dogono,” iluk inasuk wakhikhe.

¹⁶Inasuk itithogon wakhikhemo it-it ekhe dogolik, men isukha, “Nit hipiri roti meke dek iti nen ekhe higi,” iluk ekhe lagoukhama,

¹⁷at Yesus nen ekagat hutdisasikhesik nen, men yogeisasikhe, “Hit-hit ekhe dogolik, Nit hipiri roti meke ageikhe dek iti nen ekhe, iluk wene ekhe lagap iti nenaluk. Hit aban hinilu ageidegat hutdigidegat dogolik, hinetaiken kagalek dek a'birat welagap yoma re!

¹⁸Hit he, hinileken werek mekeat he, higidegat, hinasuk werek mekeat he, holhidegat dogolik hagakhe lagap yoma re! An nen hipiri roti meke ebe 5 nen kusogo akhuni doalegat 5.000 nen wogeisigi etnogo hinakla obarlikmatdegep a? It nen nekasik titurogo 'begama mul yago meke meren apem hethokhogon ukharlogo 'begep nogo,” iluk yogeisasikhemo, it nen, “Dua belas nen ukharlogo 'bogo apigi,” iluk yogokhukhama,

²⁰at nen ageikhe men yogeisasikhe, “Nen, an nen hipiri roti meke ebe 7 nen kusogo akhuni doalegat 4.000 nen wogeisigima nekasik titurogo 'bega meke mul yago meke meren apem hethokhigik ukharlogo 'begep nogo,” iluk yogeisasikhemo, it nen, “Tujuh nen ukharlogo 'bogo apigi,” iluk yogokhukhama,

²¹at nen, “Meke re, hit wene aban hutdigidek welagap yoma re!” iluk yogeisasikhe.

²²Yesus agarumi inom wene itithogon ilik ilik o Betsaida italhukha. Italhukhama it akhuni o etoma meke nen, ap ageikhe ileken puk meke Yesus nen iki hakhoagaluk oba wolok wagoukhasik nen, inane ina'buarek inane yogokhukha.

²³Yogokhukhama nen, at nen ap iti iki hago wolok o silimo nen leget itikmanke dukhisikhe. Wolok dukhisikhesik wosi ileken oba 'biluk, iki hakhekhe dogolik men yogokhikhe, “Yogotak hileken yi meke ti meke ageikhe lakhekhe lagan a? Dek a,” iluk hinok waganhikhemo

²⁴at ileken lakhalok nen, men yogokhikhe, “Akhuni lagunem hisigi mekeat he, inebe o hakene apigi,” iluk yogokhikhemo,

²⁵at Yesus nen yabokane iki ileken oba hakhasikhemo ileken tek-tek halok hano ageikhesik nen, yi meke ti meke hanorogo hasikhe.

²⁶Ileken hanorogon hasikhemo, at Yesus nen men yogokhikhe, “O ukul yabokane ukigidek piokthegat lan o,” iluk aila la'isikhe.

²⁷Itithogon hagatluk, at Yesus agarumi ane waganhe lagoukha meke emenogo inom, o etoma nen o kota Kaisarea ap Filipi nen kogotdisikhemo etoma aliluke o ukul 'bugurlagat meke aperek ebe dopok haklarik luogoluk dagei agoukha. Dagei aga dogolik agarumi emenogo inoba hinok waganhe dogolik men yogeisasikhe, “It akhuni yoma nen, an nebe hasik ekhe dogolik, tha iliogei nogo,” iluk yogeisasikhemo

²⁸it nen men yogokhukha, “Akhuni aperek nen, At ebe Yohanes ima usa'inakhe lageikhe meke etnogo, igik, it aperek nen, At ebe Elia igik, it aperek nen, At ebe ap Allah ane yogeisekhe lagoukha meke emenogo ageikhe igik, iliogei,” iluk yogokhukha.

²⁹Itithogon yogokhukhama at nen, “It nen itithogon iliogei mekeat he, hit anek he, an nebe hasik, tha ekhe lagap nogo,” iluk yogeisasikhemo, at Petrus etnogo nen, “Hat hebe Kristus nit tilninabuagaluk Allah nen la'isigin iluk abok yoknisasikhe etnogoat o,” iluk isikhemo,

³⁰at nen agarumi tha'bokhogonat yogeisekhe dogolik, “An nebe hasik ekhe iti, hit nen akhuni ageikhe motok yogeisugup o,” iluk inasuk wakhikhe.

³¹At Yesus nen itithogon inasuk wakhikhesik wene yabokane ageikhe men yogeisasikhe, “An abat itaklasi agagi etnogo, it ap inarluetek men, Allah iteerek meke inougi koktek men, Allah ane holal waganek iteerek meke men, inom nen an nebe ina'it atluk yi aik ti aik doalegat hagatnabiluk, nebe nasugun o. Nasumo nebe niki pere warek dogoluk nen, niki ageikhe baga yi, niluk asigin o,” iluk

³²agarumi emenogo pakhogon yogeisasikhemo at Petrus nen, Yesus ebe asokneat wolok lageikhesik men yogokhikhe, “A! Hat egen itithogon ugun o!” iluk asuk wakhikhemo

³³at Yesus nen agarumi ane waganhe lagoukha meke aperek emenogo ileken hebenokhogon lageisalok nen, Petrus men iluk wenagakhikhe, “Hat Iblis higi. Allah akla apekherek meke tak-tak ebekhidek, akhuni nen apegarek hak ebekhe lagan yi re! Hat hebe nelokhoma yoma dogogun. Horla lan o,” iluk wenagakhikhe.

³⁴Wenagakhikhesik, akhuni doalegat emenogo inom, agarumi ane waganhe lagoukha meke emenogo inom, waisasikhemo wagoukhama men yogeisasikhe, “At tha nen an noporlik nekhe dogeigiluk halok he, obabut ekaerek etaiken hunik hasik hagakherek meke iti, Na'it, iluk here'isalok, o baga meldisalok inakharek meke iti ago mekeat wolok an noporlik nekhe dogeigiluk wisuak o.

³⁵Tha nen, An nebe niluk dogosak warlok, iluk ebe irlirli horlagein halok he, watlatluk nuk akhagein o. Mekeat he, tha nen, an nebe hasik men, hano wene yi hasik men, watlasigin halok he, ebe tilagein o.

³⁶Itithogon mekeat he, tha nen, yi meke ti meke agat oba meke tha'bokhogonat iteerek asigin mekeat he, ebe nuk asigin halok, at nen, An ageikhe erlok thaburogo 'bakhigi, usak nogo? Motok dek o.

³⁷Ebe nuk asigin iti, obolukmo nena meke ipisak okosusak nogo. Erlok dek o.

³⁸Akhuni yoma inobabut weak dogolik Allah ane inom dopokhogon welageidek, yi weak ti weak hagariogei meke iti hinomat dogolik, it inilhanem tha nen, An Yesus agot, igik, an nane iti yogeisigik, u re, ape ekarli halok, an abat itaklasi agagi etnogo yabokane nopase hogorakho motok welageikharek hak hagatlatluk, it malaikat Allah ekaerek hasik yoko usa'isa agarek meke emenogo ninom witluk, At yi an nagot, iluk nane pakhogon u re, nekarliat asigin o,” iluk yogeisasikhe.