Read Mid Grand Valley Dani Markus 9 Bible Online

Markus 9 - Mid Grand Valley Dani bible

Markus 9

¹Itithogon yogeisasikhesik wene ageikhe men yogeisasikhe, “Hit ninom metek welagap yoma meke aperek watlageidek dogolik, Allah obatnerogo apma 'bisugunem hinileken arat hugun o, iluk eberogonat yokhisigi,” iluk yogeisasikhe.

²At Yesus nen wene itithogon yogeisasikhesik noge iniki 6 iluk nen, Petrus men, Yakobus men, Yohanes men, inarligat wogosik tom uan ageikhe baga dageisikhe. Dageisikhesik werekma, at ebe it inilhanem ninat hagatlageik,

³asu elokhoken ninat kut a'bi'baleak hagatlageik, hagakhikhe. Itithogon hagatlageikhe iti, akhuni agat oba yoma su thobalu inilu meke nen thobalhunem a'bi'bal hagatlagarek hak dek. Ninat a'bi'bal kureak hagatlageikhe iti.

⁴Itithogon hagatlagunem inileken lakhasukha re, at Elia Musa ipisak winam agoukhasik Yesus inom wenekak ugunem hisasukha.

⁵Itithogon hisasukhasik, at Petrus nen Yesus men yogokhikhe, “Noe. Nit o yoma hano welago higi. Halok he, nit nen orlisa henagan, hat hobasik ageikhe, Musa obasik ageikhe, Elia obasik ageikhe, haldinagagin o,” iluk yogokhikhe.

⁶Itithogon yogokhikhe iti, Petrus agarlak lak inom inayuk agoukhasik at nen wene nikithogon u heat, hutdigidek dogolik yogokhikhe iti.

⁷Itithogon isinem oisa thebelinabi ageikhesik, at Allah ane oisa etnogo akla nen, men yogeisasikhe, “An na'but netaiken hunik meke ebe ithiat o. Halok he, at ane holek dogono o,” iluk yogeisasikhemo,

⁸it Petrus lak inileken ibat mirlokhogon lakhasukha meke re, it aperek inom dekma. Yesus arligat anek werekma lakhasukha.

⁹Itithogon hagatlatluk tom oba nen usa'aga dogolik, at Yesus nen men yogeisasikhe, “An abat itaklasi agagi etnogo nebe nakhunem watlatluk nen, yabokane niluk ageidek werek korlek, an nebe ninat hagatlagunem hinileken neegep etnogo, akhuni aperek motok yogeisugup o. Yabokane niluk agei halok nen, yogeisausak o,” iluk inasuk warik warik, wogosik usageikhe.

¹⁰Inasuk wakhikhemo wene inakla waganhukha mekeat he, it-it ekhe dogolik men isukha, “Nakhunem yabokane niluk asigin iluk ekhe iti nikithogon hagasigin meke hasik ekhe,” iluk wene erlo herarik herarik usa'agoukha.

¹¹Itithogon ilik usa'aga dogolik, Yesus oba hinok men waganhukha, “It ap Allah ane holal waganek iteerek meke emenogo nen, Elia tak wisigin o, iluk iliogei iti nikithogon nen,” iluk hinok waganhukha.

¹²Hinok waganhukhama, at nen men yogeisasikhe, “At Elia tak witluk yi hagakhik ti hagakhik karelisigin, iliogei iti eberogonat mekeat he, an abat itaklasi agagi etnogo hasik wene holal yigithogon waganogo 'bisukhama werek, At ebe nina'it, iluk, here'isalok, yi aik ti aik motok weak hagarogo 'bugun o, iluk holal waganogo 'bisukhama werek iti nena hasik isukha apegep.

¹³Itithogon isukhama werek mekeat he, an nen ageikhe yokhisak. At Elia ebe arat wageikhe mekeat he, at obasik, Itithogon hagasugun, iluk holal waganogo 'bisukha tak-tagat, it akhuni nen itithogon hagasu warlok nenat weagatdisukha,” iluk yogeisasikhe.

¹⁴Yesus nen wene itithogon yogeisasikhesik agarumi ane waganhe lagoukha meke ebetlake emenogo inoba usa'agoukha meke, akhuni doalegat inalilu ebelak ebelak natogorlek dogolik, it ap Allah ane holal waganek iteerek meke emenogo inom wene palhunem inileken hisasukha.

¹⁵Inileken hisugunem, it akhuni doalegat emenogo nen inileken eranogoat hisalok nen, Yesus hogorarik pirlirliat heagei wasi agoukha.

¹⁶Heagei wasi agoukhama, at Yesus nen agarumi men yogeisasikhe, “Hit it hinom wene palhe lagap iti nena hasik palhe lagap,” iluk yogeisasikhemo

¹⁷it akhuni doalegat natogokhukha meke emenogo ap ageikhe nen men yogokhikhe, “Noe. An na'but yi mokat obabut weak meke akla ukekhesik werekma ane kut dek ageikhemo nen hoba wolok wagei o.

¹⁸Mokat obabut weak meke iti akla ukekherethek nen, ebe agat oba tunhogo usa'isinem apemake wosirlagap kirlik-kerlekhogon waga korlek aik kirlidik mak-mak, iki isok motok lapik-lapokhogon watlagarek o. Iti nen, hat hagarumi hane waganharek meke yoma nen mukhogo ula'uagaluk inayoko 'bigi meke re, it nen nikithogon mukhogo ula'u heat hagatlaga,” iluk yogokhikhe.

¹⁹Yogokhikhemo at nen it akhuni emenogo men yogeisasikhe, “Hit akhuni o yogotak welagap meke yi, hinetaiken noba hakotdigidek welagap yi re! Hit nen nakla pugurakhe korlek an nobakhanini hapugutdiluk niki meren oba ninom dogogun nogo. Yekerek ithi an noba wolok witni o,” iluk yogeisasikhemo oba wolok wagoukha.

²⁰Wolok wagoukhama mokat obabut weak meke etnogo ileken Yesus hasikhesik eranogoat yekerek etnogo iki isok dik-dik hagarogo tunhogo agat oba usa'isikhemo apemake wosirlagap kirlik-kerlekhogon waga korlek, ebe dipik-dipik hagakhe lageikhe.

²¹Itithogon hagakhe lageikhemo at Yesus nen yekerek etnogo opase oba hinok waganhe dogolik men yogokhikhe, “Yekerek yi yigithogon hurli ki hurli nen hagakhe,” iluk isikhemo, at nen he, men yogokhikhe, “Hurli ebe yekerek oba nen hagakherek mekeat o.

²²At mokat obabut weak meke iti nen, yekerek yi ebe wasigiluk hetumo kola'igik, ima usa'igik, hibiku-yogokuat walhekho motok welagarek o. Meke re, hat nen erlok hagasusak halok he, hakmu atluk u ithi hagatnisan o,” iluk yogokhikhe.

²³Itithogon yogokhikhemo, at Yesus nen men yogokhikhe, “Hat nen, Erlok hagasusak halok he, hagasin, iluk yoknekhen iti nenaluk. Akhuni inetaiken Allah oba hakotdiluk yi meke ti meke erlok hagasusak anek o,” iluk yogokhikhemo,

²⁴eranogoat, yekerek etnogo opase nen, “I noe. Netaiken ebelake Allah oba hakotdiluk welagei mekeat he, netaiken ebelake oba hakotdigidek iti re, hat nen hagatnabin o,” iluk ane kokhogon yogokhikhe.

²⁵Yogokhunem, akhuni aperek pirlirliat oba natogosi agunem, at Yesus ileken lageisalok, mokat obabut weak meke etnogo wenagakhikhe. Wenagakhe dogolik, “Hat mokat hobabut weak meke yi nen, yekerek yi ane kut degetdigik, asuk dogourogo 'bigik, hagakhe lagan iti, akla nen dukhi lan o. Dukhi lalok yabokane akla ukisusak motok dek o, iluk yokhikhi itiat o,” iluk wenagakhikhemo

²⁶mokat obabut weak meke etnogo ane kogat ilik ilik yekerek etnogo akla ukiluk welageikhe meke oageleke dik-digithekhe dogolik dukhi agunem, yekerek etnogo warek meke hakene hagatlageikhemo, it akhuni doalegat emenogo inakla nen watlaga thalek, men isukha, “Ebe watlaga yi,” isukha.

²⁷Itithogon isukha mekeat he, at Yesus yekerek etnogo iki hago meldisikhemo melageikhe.

²⁸Melageikhemo at Yesus uma ukiluk werekma, at agarumi ane waganhe lagoukha meke emenogo oba ukiluk, inom inarligat dogolik men yogokhukha, “Nit nen at mokat obabut weak meke iti mukhogo ula'usak erlok dek iti nikithogon nen,” iluk oba hinok waganhukha.

²⁹Hinok waganhukhama, at nen men yogeisasikhe, “Mokat obabut weak iti meke, yi baga walhigik, iti baga walhigik, hagasumo mukhogo ula'usak erlok dek o. Sembayanat umo anek he, erlok mukhogo ula'usak o,” iluk yogeisasikhe.

³⁰Itithogon yogeisasikhesik, at Yesus nen wene agarumi ane waganhe lagoukha meke emenogo anek, holak o Galilea eloke laga dogolik yakulisilik lagaluk, men yogeisasikhe, “Yesus etnogo yi waga o, iluk, akhuni aperek inilu asunogo nen yogeisugup. Na'it,” iluk yogeisasikhesik, wene men yakulisilik lageikhe, “An abat itaklasi agagi etnogo, ap nen yoko lalok it ap aperek iniki baga 'banumo nasugun o. Itithogon nakhunem niki pere warek dogoluk nen, niki ageikhe baga yi niluk asigin o,” iluk yakulisilik lageikhe mekeat he,

³¹

³²it nen wene iti naldisukhasik hinok waganu inayuk nen thogotdisukha.

³³At Yesus nen agarumi wene itithogon yakulisilik laga lageikhesik o Kapernaum lalok uma ukisikhe. Ukisikhesik agarumi emenogo men yogeisasikhe, “Hit nen holagarlem waga dogolik, wene nena wene palik wagap,” iluk hinok waganhikhe. Itithogon hinok waganhikhe meke re,

³⁴it holagarlem laga dogolik, “Kain hetagapogot hat nogo? An o,” igik, wene palhe lagoukhasikmo nogo nen, inane igidek huk agoukha.

³⁵Huk agoukhama at hurek lageikhesik, agarumi inebe 12 emenogo, “Horokhogon ya witni o,” iluk yogeisasikhemo wagoukhama men yogeisasikhe, “Hat ageikhe it ap yoma inoe hetagapogot asusak warlok halok he, inebe tha'bokhogonat inagot atluk inatuaneke asusak o,” iluk yogeisasikhe.

³⁶Itithogon yogeisasikhesik, yekerek 'bugurlagat meke ageikhe 'bi ageikhesik, inelokhoma meldisikhesik agamo waganhikhesik it emenogo men yogeisasikhe,

³⁷“Tha nen yekerek yi hakene meke opakiat ageikhe an nobasik waganhe halok he, an nebeat woknabigin o. Nen, tha nen an nebe woknabigin halok he, an nebe woknabigin 'buk. Nopase la'ani ageikhe meke etnogo ebeat waganigin o,” iluk yogeisasikhe.

³⁸Itithogon yogeisasikhemo nen, at Yohanes nen men yogokhikhe, “Yesus noe. Ap ageikhe nit ukiluk ninom nekhe lago dek meke nen mokat obabut weak meke akhuni inakla ukiluk werekma hat hetaga palogo mukhogo ula'isugunem ninileken hogosik nen, at ebe nit ninom nekhe lago dek meke iti nen, Hat itithogon hagakhe 'buk o, iluk wenagakho,” iluk yogokhikhe.

³⁹Itithogon yogokhikhemo, at nen men yogokhikhe, “Tha nen nit wenaknisiliogo dek halok he, at iti nit werekmake mekeat o. Halok he, wenagasusak dek o. Tha nen an netaga palogo hagasusak dek meke elalinat hagatluk, dagakhogon an nabok weak palusak dek o,” iluk yogeisasikhesik, ageikhe men yogeisasikhe,

⁴⁰

⁴¹“An nane eberogonat yokhisak. At tha nen, It Kristus agarumi meke, iluk, i henago wokhisagein halok he, Allah nen oko wogosusak meke iti, horligidek nuk asigin degat, oko horlageinat o,” iluk yogeisasikhe.

⁴²Itithogon yogeisasikhesik ageikhe men yogeisasikhe, “Tha nen yekerugi 'bugurlagat yi hakene opakiat ageikhe etaiken an noba hakotdiluk werekma kolelogo here'anuagaluk akla kagaligin oba an kolelogo here'anhe halok, at akla kagalhe werek iti helekit kok meke arlokopma herle kilogo i laut yekelekma po la'iselepma hano o.

⁴³Hiniki nen weagathinabusak hagatlaga halok, hiniki ebelake tekhogo la'isalok, hiniki ebelake anek dogolik akhuni iniluk motok welageikharekma etoma ukumo hano o. Meke re, hiniki pere werekma, hinebe weakma, [hetu nagulageidek ineken watlageidek inoba 'bisi motok welagarekma] etoma laumo weak iluk, hiniki ebelake palogo la'isano.

⁴⁴

⁴⁵Hinisok nen weagathinabusak hagatlaga halok, ebelake palogo la'isalok, hinisok ebelake anek dogolik akhuni iniluk motok welageikharekma etoma ukumo hano o. Meke re, hinisok pere werekma hinebe hetu nagulageidek ineken watlageidek inoba 'bisi motok welagarekma etoma po la'inagumo weak o, iluk, hinisok ebelake palogo la'isano.

⁴⁶

⁴⁷ Hinileken nen weagathinabusak hagatlaga halok, hinileken ebelake hemelogo la'isalok ebelake anek dogolik Allah apma ukumo hano. Meke re, hinileken pere dogogun halok, weakma hetu nagulageidek ineken watlageidek inoba 'bisi motok welagarekma etoma po la'inagumo weak iluk, hinileken ebelake hemelogo la'isano o.

⁴⁸

⁴⁹Wam Allah waretluk, mayu hilharek iti hak, akhuni inebe dopok Allah hasik hano dogoagaluk hetu inoba 'bigin werek o.

⁵⁰Mayu iti hano mekeat he, aik dek aga halok, nena meke baga aik weregerasusak apegep. Dek o. Mayu iti hinakla hago dogolik, akhuni aperek hinom dapukhogon dogono,” iluk yogeisasikhe.