Read Mid Grand Valley Dani Lukas 1 Bible Online

Lukas 1 - Mid Grand Valley Dani bible

Lukas 1

¹Teofilus noe. Wene nit ninakerlekla nen hagatlageikhe etnogo, it wene ebe erlo baga nen hagatlarik wagunem inileken hasukhasik yakulisilik nekhe lagoukha meke nen yoknisasukha mothogon, it akhuni aperek inebe motok doalegat wene ebe holal waganuogoluk walhilik wagoukha.

³Itithogon walhilik wagoukha mekeat, an meneke, wene iti erlo baga nen hutukhogon yakulhe lagagisik nogo nen, hat wene yakulhikhukha meke iti eberogonat iluk apanok nen, wene ebe pilinerogo holal waganogo hoba la'isigiluk apekhe lagarik waganhe lagei yi o. Noe.

⁴

⁵Ap kok Herodes iti o Yudea eloke etagapogot werek oba, ap ageikhe etaga Zakharia, ebe ap Abia nen itago meke inom inebe Allah iteerek dogolik, at hasik hagakhe lagoukha meke welageikhe. Nen, at age ap Harun nen itago meke etaga Elisabet iti welageikhe.

⁶It age ipisak iti ninopase Etagapogot nen, “Yigithogon hagatno, tigithogon hagatno,” iluk, yakulnisigik, ninasuk wakhik, isikhe meke etnogo, motok mothogonat hagakhe lagoukhama, at Allah nen, “It iti inobabut hano motok,” iluk, ekagat ileken isekhe lageikhe.

⁷Mekeat he, at he Elisabet iti, ebe abirli nen eak ageikhe itakhigidek dogolik, agun ipisagat arat inarloka agoukhasik welagoukha.

⁸Itithogon inarloka atluk dogolik, iniki ageikhe baga, at Zakharia ebe inom, ap aperek inebe opakiat meke inom, Allah iteerek dogolik, it nen at Allah ai halekma ukiluk hagasusak erlok ageikhe. Erlok ageikhemo ukisukhasik, obasi hano meke Allah il oba tha hak nen hetu huni ukigin, iluk omatok thekerlogo walhasukha meke, at Zakharia oba mot ageikhemo hetu hunigiluk Allah ai halekma ukisikhe.

⁹

¹⁰Itithogon ukiluk hetu hunhe korlek, it akhuni inebe doalegat o silimo natogorlogo sembayan isi lagoukha.

¹¹Obasi hano etnogo meke hetu hunhunem, ninopase Etagapogot agot, malaikat Allah nen yoko usa'isa agarek meke ageikhe usa'ageikhesik obasi hano meke hetu hunhe lagoukha baga etnogo iniki ebeke Zakharia elokhoma melageikhemo ileken hasikhe.

¹²Ileken halok nen, akmaken lageikhesik nen ayuk ageikhemo,

¹³at malaikat etnogo nen, “Zakharia! Hayuk agun o. Hat sembayan ekhe lagan etnogo, Allah arat asuk holhe o. Hage Elisabet iti eak abat itasigin o. Itasumo nen etaga Yohanes thalino.

¹⁴At iti agosa akla nenat, Allah agoreke akla motok kerlekhogon itaklatluk, ninopase Etagapogot il oba ebe kok dogolik, anggur eken apusu inom, i hunu hunu palharek meke ageikhe inom, nikidek motok dogolik, akhuni Israel meke inebe doalegat inetaiken ninopase Etagapogot Allah oba hakotdiluk dogoagaluk, at nen inobabut hebelinabigin o. At itaklagunem akhuni inebe doalegat inakla arleken akhekhe korlek, hat meneke, hakla arleken akhigik, ebe hoba hotok igik, hagasigin o.

¹⁵

¹⁶

¹⁷Allah Agoreke ap Elia iti akla dogolik obatnerogo hagarik nekhe lageikhe meke iti, at Yohanes iti oba duk itluk, yekerugi inopase lak inom, dapukhogon 'bisigik, wene inasuk holu'buk meke it aperek wene holiluk mothogon hagakharek meke inobabut waganuagaluk hagarinakhik, inebe ninopase Etagapogot hasigat dogoagaluk karelogo 'bisigik, hagasigiluk, at tak itaklatluk itithogon hagarik nekhe dogogin o,” iluk yogokhikhe.

¹⁸Itithogon yogokhikhemo, at Zakharia nen, malaikat men yogokhikhe, “An nage nipisak arat ninarloka agosikmo, wene egen iti nikithogon hagatlasigin. Eberogonat hagatlasigin iluk nikithogon nilu asigin,” iluk isikhemo

¹⁹at malaikat etnogo nen, “An Allah il oba metek welagarek meke netaga Gabriel, iti nebe anat o. Hano wene yi yokhesuagaluk, at Allah nen yoko la'ani agama wagei o.

²⁰Itithogon wagarik wene yokhikhi mekeat he, eberogonat apigidek iti nen, hagatlasusak mot-mot oba hagatlasigin iti aban hagatlageidek werek korlek, hane motok palogo usalok hane igidek tetnokhogon dogoluk nen, yabokane wene iti tha'bokhogonat hagatlagunem nen, hane huak igin o,” iluk yogokhikhe.

²¹Itithogon yogokhe korlek, it akhuni okutlu sembayan isi welagoukha emenogo nen, “Zakharia etnogo okutlu motok dukhi ageidek Allah ai halekma motok huk werek iti nayuk e!” iluk itithogon ugunem,

²²Zakharia ebe dukhi ageikhesik nen, wenekak ageikhe motok yogeisigidek huk ageikhemo, it emenogo nen, “Ap yi Allah ai halekma nen a'bikaka ageikhe hekhemo higi,” iluk hutdisukha. Itithogon isinem, at etnogo ageikhe ane motok igidek, we iki pilin anek isi lageikhe.

²³Allah hasik hagasuagaluk it emenogo nen Zakharia yogokhukha etnogo, arat hagakhikhesik nen, uma lageikhe.

²⁴Aila lageikhesik iniki pererlagat welagoukhasik nen, age Elisabet etnogo elege akma ageikhe. Akma ageikhemo, “Nopase Etagapogot iti, an akmu nen akhuni ninom nekarli negen hekhe lagei etnogo dek asuagaluk hagatnakhe higi o,” iluk, uma dukhigidek uma limago motok werek korlek, thut 5 baga holelhikhe.

²⁵

²⁶He Elisabet etnogo eak akma werek korlek, thut 6 oba holelhikhemo, Allah nen malaikat pogot oba yoko la'isa agarek meke ageikhe Gabriel etnogo Galilea eloke, o ukul etaga Nazaret, etoma korlak etaga Maria, ap Yusuf Daud opa meke iti ipisak wene warek werekma oba la'i ageikhe.

²⁷

²⁸La'i ageikhemo, at malaikat horlak etnogo baga wageikhesik nen, men yogokhikhe, “Maria neru o! Allah nen hano motok meke wokhesigiluk hipisak welagap o,” iluk yogokhikhemo

²⁹at horlak Maria etnogo asuk holiluk, ayuk nen oageleke dik-dik hagakhe dogolik, “Heagei warogo yoknekhe iti nikithogon nen yoknekhe,” iluk akla nen ebekhikhe.

³⁰Itithogon ebekhe lageikhemo, at malaikat etnogo nen, “Maria neru o. Hayuk agun o. At Allah nen hebe akmu hagathakhesik oba hotok ekhe o.

³¹Lakhan, hat heak hakma atluk abat itasigin. Itatluk nen, etaga Yesus thalino.

³²Nen, elege iti arlue atluk kok agunem, akhuni nen, Allah Etagapogot kok welagarek etnogo a'but higi o, iluk ekhe dogogun. At opa Daud iti etagapogot dogolik, akhuni at nen hagasik welageikhe etnogo obolukmo, ninopase Etagapogot nen, at itiat meldigin o.

³³Yakub nen itago meke emenogo inoe Etagapogot at itiat apma ane holek motok dogogun o. Itithogon hagasik dogolik ebe huk ageidek Etagapogot motok dogogin o,” iluk itithogon isikhemo,

³⁴at horlak Maria nen, “An ap ninom noge igidekma, hat yoknekhen iti nikithogon hagatlasigin,” iuluk itithogon isikhemo,

³⁵at malaikat etnogo nen, “Allah Agoreke hoba duk i witluk nen, kunakma ukegarek hak, ninopase Allah Etagapogot obatneak iti apma 'bagagin o. 'Bagoumo, heak Allah arligat a'but itasumo nen, akhuni nen, At iti Allah a'but, iluk ekhe dogogun o.

³⁶Nen, lakhan hat hoe Elisabet etnogo ebe arloka aga mekeat he, eak abat akma agama o. It akhuni aperek nen, He iti ebe abirli o, iluk, abok egarek etnogo eak akma agasik thut 6 oba holelhemo yokhikhi o.

³⁷At Allah nen yi meke ti meke hagasusak erlok dek, dek o. Erlok hagasusak anek,” iluk yogokhikhemo

³⁸at Maria nen, “I o. An ninopase Etagapogot atuanekat o. Hat nen egen iti tak-tagat hagatnabuak o,” iluk isikhemo, at malaikat yoko wageikhe meke etnogo Maria thogotdiluk lageikhe.

³⁹Malaikat etnogo lageikhemo, at horlak Maria iki pererlagat welageikhesik nen, o Yudea usasikhesik etoma tom oba dageisikhesik,

⁴⁰ap Zakharia etnogo aila uki lageikhesik, he Elisabet etnogo heagei wakhikhe.

⁴¹Maria nen heagei wakhunem Elisabet asuk holhe korlek eranogoat, eak akla welageikhe meke etnogo aborlok luguthasikhe. Itithogon luguthekhe korlek, Allah Agoreke, he Elisabet akla kerlekhogon ukisikhe o.

⁴²Ukisikhemo, at he Elisabet etnogo ane kokhogonat, men isikhe, “Humi inebe doalegat werek korlegat he, Allah nen, Hano meke harat wokhigik, heak hakla iti hanotdigik hagakhemo.

⁴³Nen, hat hebe an noe Etagapogot agosa nen 'bitnea wagan yi nayuk o!

⁴⁴Hat nen heagei watnakhunem nasuk holhe korlegat, elege nakla meke nen akla arleken akhekhe dogolik luguthekhe o.

⁴⁵Nopase Etagapogot nen abok yokhikhikhe meke, ebeat asigin o, iluk, hetaiken Allah oba hakotdegen iti, hakla arleken kogat asigin o,” iluk yogokhikhe.

⁴⁶Itithogon yogokhikhemo, at horlak Maria nen, “Nopase Etagapogot iti an nakla nen hogorakhe lagei o.

⁴⁷Allah nen tilnakhe meke etnogo nen yigithogon hagatnakhemo nakla arleken kogat akhekhe lagei o.

⁴⁸An at atuaneke meke iti, inapma negen werekma ileken neekhe o. Hurli yogotak nen, akhuni tha'bokhogonat nen, Allah nen he, hano meke wogokhemo, iluk ekhe dogogun o.

⁴⁹At obatneak meke nenat, kok meke hagatnakhe o. At ekaerek arligat etaga werek dogoak o.

⁵⁰Akhuni tha'bokhogonat, haganeat nen itaklagoukha meke inom, ket itaklageikha meke inom, yabokane itaklasugun meke inom, at ebe inayuk werekma akmu nen hano hagarinakhe dogogin o.

⁵¹At iki obatneak iti baga, akhuni inakla nen inekaerek inakeke 'bakhiliogei meke iti motok mukhogo thirlik-pirlikhogon ula'isekhe o

⁵²Akhuni koktek inetagapogot welageikharek meke iti thebelogo 'bisekhe dogolik, it inetaga dek meke iti meldisigik,

⁵³akhuni inakla abu welageikharek meke iti hano meke ina'ithogon wogeisekhe dogolik, it inikierek inameke doalegat hago meke iti, ageikhe wogeisigidek werlegat la'isasikhe.

⁵⁴Haganeat ninopase Abraham inom, at nen itago meke tha'bokhogonat inom, motogat hanorinabigiluk abok yogeisasikhe etnogo tak-tak, at agarumi ap Israel meke inoba ebetluk akmu nen yomageisa aga yi o,” iluk isikhe.

⁵⁵

⁵⁶Itithogon isikhesik nen, at horlak Maria etnogo thut henagan negen, he Elisabet ipisak welageikhesik nen, yabokane aila apuke wageikhe.

⁵⁷At horlak Maria wageikhemo nen, he Elisabet etnogo eak itasusak horogat ageikhemo, eak abat itakhasikhe.

⁵⁸Itakhasikhemo, it akhuni inom welagoukha meke men, at oe agot emenogo men, “Ninopase Etagapogot iti nen motok akmu hekhesik nen hagakhe higi o,” iluk isukhasik nen, at ekaerek inom inakla arleken akhasukha.

⁵⁹Inakla arleken akhasukhasik, elege iti itaklageikhesik oba nen iniki 7 baga welagoukhasik nen hubuluke, elege etnogo oado aperlagap paluagaluk wolok wagoukha. Wagoukhasik nen, Elege yi opase etaga tak-tagat etaga Zakharia thaluok, iluk isukha meke,

⁶⁰agosa nen, “Dek o. Etaga Yohanes thalugun o,” iluk yogeisasikhe.

⁶¹Itithogon yogeisasikhemo, it emenogo nen, “Hoe hagot inetaga itithogon dekmaat, etaga Yohanes thalhen iti nenaluk thalhen” iluk, itithogon isukhasik

⁶²elege etnogo opase Zakharia etnogo iniki pilin yogokhe dogolik, “Etaga ki thalusak?” iluk,

⁶³itithogon itema waganhukhama, at Zakharia nen, “Helekit meke holal waganharek iti meke ageikhe woknetni,” iluk iki pilin isikhemo wogokhukhama, “At etaga Yohanes o,” iluk, holal waganhikhe. Holal waganhikhemo akhuni doalegat emenogo nen, “Nayuk o!” iluk hogorakhukha.

⁶⁴Hogorakhe korlek eranogoat, Zakharia etnogo ane motok huak iluk nen, ane ekhe dogolik, Allah heagei wakhe lageikhe.

⁶⁵Itithogon hagakhikhemo, it akhuni inom welagoukha meke emenogo inayuk motok agoukha. Inayuk atluk, wene hagatlageikhe meke etnogo abok o Yudea tom oba meke etoma motok pilin-palinhogon yogeisilik lagoukhama wene iti kok arik lageikhe.

⁶⁶Itithogon hagatlageikhemo inasuk holhukhasik, “Allah nen obatnerogon kogotdekhemo higi,” inileken halok, inakla ebekhe dogolik, “Yekerek werek yi arlue atluk, nikithogon hagatlasigin,” iluk ekhe lagoukha.

⁶⁷At Yohanes opase Zakharia etnogo Allah Agoreke akla kerlekhogon ukisikhemo Allah wene ekhe dogolik, men isikhe,

⁶⁸“Nit akhuni Israel meke iti ninopase Etagapogot Allah nen ileken nisa agasik tilninakhemo iti nen, arat hogorakhe dogouok o.

⁶⁹Tilninabuagaluk at atuaneke Daud nen itago meke obatne werek meke meldekhemo werek yi o.

⁷⁰Itithogon hagakhe iti, it ap muk haganeat meke Allah nenat ekaerek hasik wenago 'bisasikhemo wene yogeisekhe lagoukha meke nen yogeisekhe dogolik,

⁷¹It akhuni aperek ninom wim palek meke inikimo nen tilninakhik, it akhuni tha'bokhogonat ninebe motok ina'it nisiliogei meke inikimo nen tilogo 'binanhik, hagasigin o, iluk, ekhe lagoukha etnogo tak-tagat hagatlageikhe.

⁷²At nen ninopa lak iti akmu nen hanorinabigin iluk abok isikhe etnogo ebe hagarinakhik, Itithogon hagathinabigin iluk, wene ekaerek nen abok yogeisasikhe etnogo ebe hagakhik, hagasigin o, iluk, nakla eberek dogogin o, iluk yogeisasikhe. Itithogon hagasigin o, iluk ninopase Abraham hupuk palogo yogokhikhe hak hagasi aga yi.

⁷³

⁷⁴It akhuni ninom wim palek meke inikimo nen tilogo, ninayuk ageidek niniluk dogolik, Allah ileken werek korlek nit weak hagakhidek, at hasik anek mothogon hagakhik, hagakhe dogoagaluk hagasi aga yi.

⁷⁵

⁷⁶Nen, hat na'but yi nen, ninoe Etagapogot wisiginmoke holak yakhe dogoagaluk, hat alebageik yoko laga dogolik, akhuni yi weak ti weak hagariogei meke Allah nen he, wene inoba meke thagalogo degetdisalok tilinabigin iti wene hat nen yakulisaumo inilu asigin iti baga, hat habok ekhe dogolik, Kok upu baga welagarek meke ane yogeisilik liliogo etnogo ebe yi o, iluk, ekhe dogogun.

⁷⁷

⁷⁸Ninopase Allah iti ninebe akmutdinaniluk nen, o mo huben yago wagarek hak, mo upu eloma nen ninoba la'i aga dogolik,

⁷⁹O mummo dogolik watlasusak iti ninayuk, iluk apiliogei etnogo o lia hagarogo 'bisigik, ninobakhe palek ninayuk werekma, Holak yi baga hinetaiken hapukhogon lani iluk, yoknisigik, igin o,” iluk Zakharia nen isikhe.

⁸⁰Nen, at a'but etnogo ebe arlue atluk etaiken motok horle ageikhesik, akhuni Israel meke aban inoba lageidek dogolik, o limo akhuni motok dekma etoma welageikhe.