Read Mid Grand Valley Dani Lukas 11 Bible Online

Lukas 11 - Mid Grand Valley Dani bible

Lukas 11

¹Iniki ageikhe baga, at Yesus o ninmoat dogolik, sembayan ekhe lageikhe. Sembayan arat isikhemo nen, at agarumi ane waganhe lagoukha meke emenogo opakiat ageikhe nen, men yogokhikhe, “Noe. At Yohanes nen, at agarumi ane waganhe lageikha meke sembayan ekhe dogoagaluk yakulisekhe laga iti hak, nit meneke itithogonat sembayan ekhe dogoagaluk ageikhe yakulnisan o,” iluk yogokhikhemo,

²at Yesus nen, “Hit sembayan uogoluk halok he, yigithogon ekhe dogono, Ninopase. Hat hekaerek hetaga kogotdekhe dogoagaluk hagatninabi me o. Nit ninebe hat hapma dogoagaluk 'binani me o.

³Nit ninapiri hibiku-yogoku neke dogosak meke, erlokhogonat woknisekhe dogono o.

⁴It akhuni nen nit weak hagatninabiogei meke inebe dopok nit nen thagalogo degetdogo iti nen, nit nen weak hagakhe lago meke hat nen thagalogo degetdisano. Weak hagasuagaluk ninakla kagaliginmo etoma here'inanhidek piokthegat woknisik laga dogono, iluk sembayan ekhe dogono,” iluk yakulisasikhe.

⁵Itithogon yakulisasikhesik nen, agarumi ane waganhe lagoukha meke emenogo men yogeisasikhe, “Ap hit meke ageikhe hibakone eketurlem agarlak oba lalok yogokhe dogolik, Nagarlak e! An nagarlak ageikhe werlekma lagaluk nen, noba 'bitniilik lagaluk wagasik werek meke re, hipiri melageisusak meke dek agama nen, hat nen hipiri roti werago meke henagan halok ageikhe woknom o, iluk yogokhe halok he,

⁶

⁷at agarlak etnogo uma nen ane ulageik, An na'buri ninom thu latdiluk noge arat ogosikmo niniluk-ninalakhogon hagakhe 'buk. Na'it o. Nit noge isinem an niluk atluk wokhesusak, erlok dek o, iluk itithogon yogosusak apegen?

⁸Dek o. At iti akla nen, Nagarlak meke nen kino iliogo, iluk melageidek kamotdusak mekeat, at kino isi dogolik ekarli ageidek ane obatnerogon yogokhe dogoumo, at melatluk nen, at nen kino igin meke tak-tagat wogosiginat apigi.

⁹Iti hak, an wene ageikhe yokhisak. It akhuni inebe tomok nen Allah kino yogokhunem, at nen inebe dopok wogeisekherek anek iti. Nen, it aperek inebe dopok nen yi meke ti meke at oba herakhunem inebe dopok herakhegarek anek iti. Nen, it aperek inebe dopok nen thu ane puputhasinem, at nen inebe dopok thu hualisekherek anek iti. Iti nen, hit nen Allah kino yogokhe dogono o. Yogokhe dogoumo wokhisageinat o. Hano meke at oba herakhe dogono. Herakhe dogoumo, herasugunat o. Thu ane puputhekhe dogono. Puputhekhe dogoumo, at nen thu hualhisageinat o.

¹⁰

¹¹Hit aperek hina'buri nen, Ikan abu, isi halok, inopase lak nen ikan wogeisigidek obolukmo warlo pelal meke wogeisegethep nogo?

¹²E a, at he, Thueken abu, isi halok, warlo aik weak meke wogeisegethep nogo a? Degat o.

¹³Hit hinobabut weak hagakhethep mekeat he, ina'buri iti hano meke wogeisegarek hinilumo, hano meke wogeisegethep iti hakene, hinopase Allah pogot oba meke yogokhe dogolik, Hagoreke iti woknisan o, iluk, kino yogokhep halok, wokhisagein dek apegep? At nen wokhisageinat o,” iluk yogeisasikhe.

¹⁴Iniki ageikhe baga, at Yesus nen ap ageikhe mokat obabut weak meke akla ukisikhesik werekma, ane motok dek ageikhesik welageikhe meke ap iti akla nen mukhogo ula'isikhemo, ane huak isikhe. Itithogon ane huak isikhemo akhuni doalegat nen, “Eiye! Nayuk e,” iluk hogorakhukha.

¹⁵Itithogon hogorakhukha mekeat he, it aperek nen, men isukha, “At Yesus iti mokat inobabut weak meke inoe kok etaga Beelzebul etnogo obatne baga mokat at agarumi negen inobabut weak meke akhuni inakla ukiluk werekma mukhogo ula'isiliogo,” iluk isinem,

¹⁶it aperek nen, at Yesus obabut paluogoluk, men yogokhukha, “Hat hebe Allah nen la'agei agama wagan halok he, nit nen hutdaguok nen, hat nen elalin meke ageihe hagasin ta,” iluk yogokhukha.

¹⁷Itithogon ekhe lagoukhama, at Yesus nen it inakla apasukha meke ekagat hutdisalok, men yogeisasikhe, “Ap koktek inetagapogot inagarumi inapma hagasik welageikharek obake dopok, it-it inom mikirlogo hurlitdakhalok, inom weak dogogun halok he, erlok dek asugun o. Nen, ap inebe dopok ina'buri inom hurlitdakhalok inom weak dogogun halok, itithogonat weak asugunat o.

¹⁸Meke re, hit nen an yoknekhe dogolik, Mokat inobabut weak meke inoe etaga Beelzebul iti hoba dukthek werekma at obatne baga mokat obabut weak meke ageikhe akhuni inakla ukiluk werekma mukhogo ula'isekhe lagan, iluk yoknekhe lagap iti, at Iblis iti ekaerek agarumi inom mikirlogo hurlitdakhalok inom weak dogolepma, at agarumi hagasik welagarek meke nikithogon obatne dogolep. Erlok dek o.

¹⁹Iti hak, an nen mokat inobabut weak meke inoe etaga Beelzebul iti obatne baga mokat inobabut weak meke ageikhe akhuni aperek inakla ukiluk werekma mukhogo ula'isekhe lagei halok he, hit hinagarumi nen tha obatne baga mokat mukhogo ula'isiliogei apegep. Hinagarumi nen itithogon hagariogei iti baga, it nen, Wene at Yesus hasik egep iti, korlo egep o, iluk wene hinoba 'bu hak hagariogei o.

²⁰Meke re, an nen Allah obatne iti baga mokat obabut weak meke iti mukhogo ula'isikhe lagei halok he, Allah apma 'bisagein iti arat hinoba hakok asi agama o.

²¹Ap ageikhe obatne werek meke nen asikhe arege nomologo 'bakhalok aila thuam dogogin halok he, ameke yi meke ti meke tha'bokhogonat hano karelek dogogin o.

²²Mekeat he, ap ageikhe at obatne hakene dek. At he, obatne otok weak meke ap etnogo aila ukitluk, ebe obatne degetdigik, asikhe arege oba dukthek dogogin meke etnogo tilhe dogolik, ameke yi meke ti meke emenogo waganogo motok it aperek supusogo wogeisagein o.

²³Nen, tha nen ebe an werekmake ageidek halok he, at iti an nipisak wim palek mekeat o. Nen, tha nen an nipisak natogorinakhe lago dek meke halok he, at iti nenat mukhogo ula'isiliogo o,” iluk yogeisasikhe.

²⁴Itithogon yogeisasikhesik nen, wene ageikhe men yogeisasikhe, “Mokat obabut weak meke iti akhuni inakla nen dukhekherethek nen, An naila komake dogeik nen lak he, iluk, thet walogo dogosak oba oboluk herarik, o limo werlelekma i motok dekma etoma nekherek nekherek herakherek motok dek nen men ekherek, An naila alebageik welageimo etnogo napuke lalok nen ukigin o, iluk wagarek.

²⁵Wagarethek ukhekherek, o etnogo motok amumul ulabogo karelek werekma 'bikhagarethek nen

²⁶yabokane apuke dukhi lagarethek, mokat aperek at obabut hakene dek. At he, inobabut motok weak meke inebe 7 inayoko lagarethek wogosik witluk nen, ap iti akla ukegarethek welageikharek o. Itithogon ukiluk werekma, ap iti alebageik nen, obabut hano negen welageikhe mekeat he, yabokane obabut motok weagat hagatlagarek o,” iluk yogeisasikhe.

²⁷Wene itithogon arat yogeisasikhemo nen, it akhuni doalegat emenogo meke, he ageikhe nen ane kokhogon Yesus men yogokhikhe, “Hat hagosa hebe itakhakhikhesik irlak hunethakhikhe meke etnogo akla arleken akhekhe dogoak o,” iluk itithogon yogokhikhemo,

²⁸at Yesus nen, men yogokhikhe, “At iti anek dek o. It aperek Allah ane iti inasuk holiluk mothogon hagakhe dogogun halok he, inakla arleken motok akhekhe dogoagat o,” iluk yogokhikhe.

²⁹Itithogon yogokhikhemo, akhuni motok doalegat Yesus oba natogosi agoukhama, at nen men yogeisasikhe, “Hit akhuni o yogotak welagap meke yoma hinobabut weak anek hagakhe lagap o. Hit nen, Nit hutdaguok nen, hat nen elalin meke ageikhe hagasin he, iluk, yoknekhe lagap meke re, an nebe hutdanubageik iluk, an nen elalin ninat meke ageikhe hagasigin motok dek o. At Yunus nen akhuni hutduagaluk elalinat hagakhikhe iti hak anek an nen yabokane ageikhe hagakhunem hinileken neagun o.

³⁰At Yunus iti akhuni o Niniwe meke etoma wene hutduagaluk ebe welageikhe iti hak, an abat itaklasi agagi etnogo, hit akhuni o yogotak welagap meke yoma nen nebe hutdanuagaluk welagei o.

³¹Haganeat at he kok etagapogot ai o i aputmo wema eloma walegat etoma nen at ap kok Salomo iti akla kagalek motok dogolik hagakhe lageikhe meke asuk holigiluk wageikhe. Meke re, ap kok Salomo iti ebe erlok dek negen. Meke re, at yogotak werek yi anek he, kogat o, iluk, o ilugun hurli baga Allah nen akhuni ukum inoba 'bigik, kokhik, hagasigin itinem, at he kok iti melatluk nen, hit akhuni o yogotak welagap meke yi men yokhisagein, Hit weak, hinekarli, iluk yokhisagein o.

³²Nen, at Yunus iti nen it akhuni o Niniwe meke etoma Allah ane yogeisekhe lageikhemo, inobabut hebelatluk, yi weak ti weak hagakhe lagoukha meke thogotdisasukha o. Meke re, at Yunus iti etaga dek negenat o. Nen, at yoma werek yi anek he, motok kogat o, iluk, o ilugun hurli baga Allah nen akhuni ukum inoba 'bigik, kokhik, hagasigin itinem, akhuni o Niniwe meke etoma inebe melatluk, hit akhuni o yogotak welagap meke yi men yokhisagun, Hit weak, hinekarli, iluk yokhisagunat o,” iluk yogeisasikhe.

³³Itithogon yogeisasikhesik, “Akhuni aperek nen, isagal yibarlogo nen, aburarekma wema baga limago 'bigik, isoak abura thebelogo 'bigik, 'begarek motok dek. At he, yibarlogo akhuni uma ukekhe dogolik o lia werekma inileken ekagat hoagaluk, o isok tilik oba 'begarek.

³⁴Ninebe hasik isagal yibarlek hakene, ninileken itiat werek o. Hinileken iti hano halok he, hinebe abisakeat motok liaat dogogun o. Mekeat he, hinileken iti weak werek halok he, hinebe iti o mum hikhakthekma hakene dogogun o.

³⁵Iti halok he, hinakla o lia hakene meke werek iti mum asinogo iluk, hinobabut hebelogo dogono.

³⁶Nen, hit hinebe abisakeat, o mum hakene ageikhe dek, lia motok anek welagap halok he, isagal yibarlek dogolik hinoba yabo lagarek hak, hinebe abisakeat lia dogogun o,” iluk yogeisasikhe.

³⁷Yesus nen wene iti arat yakulisekho werekma, ap Farisi meke ageikhe nen Yesus men yogokhikhe, “An werekma hipiri nipisak na luok nen eme o,” iluk ayoko 'bisikhe. Ayoko 'bisikhemo, lageihesik aila ukisukhasik nen, hipiri nuogoluk hurek lagoukha.

³⁸At Yesus iki bagake horakhidegat hipiri nagaluk hurek lageikhemo nen, ap Farisi meke etnogo nen ileken halok, “Eiya! Nayuk e!” iluk akla nen wene palhikhe.

³⁹Itithogon apasikhemo at ninoe Etagapogot Yesus nen men yogokhikhe, “Hit ap Farisi meke hinageisoak iti men, hinapiring iti men, itikmanke anek hanorogo thobalhe lagap mekeat he, aklake akhuni inameke hiniki abusak horlegethep meke iti men, yi weak ti weak hagakhethep meke iti men, hinakla motok doalegat kerlekhogon werek iti korlo o!

⁴⁰Eiye! Hit iti hinebe kepu hagakhe lagap. Ninoado itikmanke hagarogo 'binanhikhe meke nenat, ninakla hagarogo 'binanhikhe dek nogo? At Allah nenat hagarogo 'binanhikhe apigi.

⁴¹Halok he, hit meke yi meke ti meke piring akla temerogo 'bekhe lagap meke iti, akhuni inameke dek meke supusogo wogeisegep halok he, hit hinobasik yi meke ti meke tha'bokhogonat thobalek dogou hak hano dogogin o.

⁴²Eiye! Hit ap Farisi meke Allah nen weagathinabigin o. Hit nen, Allah ebe inetaiken hunik welageikharek iti men, akhuni aperek inobasik mothogon hagakharek iti men, hagakhe dogosak werek korlegat, itithogon hagakhidek dogolik, dibo eka hakene men, hite hakene men, wulebeka hakene men, hiniki wenago 10 asi agunem, opakiat ageikhe Allah hasik 'bisekhe lagap iti, wene ebe abelma meke iti hano hagakhe lagap meke re, wene kok meke hagakhe dogosak meke hagakhidek here'isekhe lagap iti korlo o!

⁴³Eiye! Hit ap Farisi meke Allah nen weagathinabigin o. O akhuni Yahudi meke sembayan egarekma ap koktek meke inobolukmo hit thelekmarogon hureklasi ukigik, nen, o pasar oba yi meke ti meke oko waganharekma etoma akuni nen heagei hanorogon wathinabuagaluk ukigik, hagakhe dogosak iti anek warlok welagathep iti.

⁴⁴Hit hinebe re, men hakene welagap. Akhuni watlagunem agatma thalinakharethek, inetai ekerlogo hurli 'bigidek here'isegarekma, akhuni inokodek dogolik inisok nen thebelogo 'bilik lageikharek hak, hit itithogon weak werek korlegat, akhuni inokodek dogolik hinom welagathep iti nen, eiye! Allah nen weagathinabigin o,” iluk yogeisasikhe.

⁴⁵Itithogon yogeisasikhemo, ap Allah ane yakulisekhe lageikhe meke ageikhe nen, Yesus men yogokhikhe, “Noe. Hat egen iti nit ninomat ninekarli watdinanhen higi!” iluk isikhemo,

⁴⁶at Yesus nen, “Hit ap Allah ane holal waganek yakulisegethep meke yi re, eiye! Allah nen weagathinabiginat o. Hit nen wene akin weak iti apigidegat, akhuni inoba 'bekhe dogolik, akin meke iti hiniki opaki hasik yomageisa'buk dogolik, inoba 'bekhe lagap yoma re!

⁴⁷Hinopa lak nen ap Allah ane yogeisekhe lagoukha meke inakhe lagoukha. Nen, hit hinebe it nen itago meke dogolik, it iti inoak thalinakhukhama o halogo 'bisekhe lagap iti. Eiye! Allah nen weagathinabigin o.

⁴⁸Hinopa lak nen ap Allah ane yogeisekhe lagoukha meke inakhukha etnogo, hit nen inoak thalinakhukhama o halogo 'bisehe lagap iti, Ninopa lak hagakhukha iti morat hagakhukha, iluk u hagat hagakhe lagap iti.

⁴⁹Itithogon hagakhethep iti nen, at Allah akla kagalek motok etnogo nen ekhe dogolik, An nen it ap an nane yogeisegarek meke men, inayoko 'biluk la'isa agarek meke men, it akhuni aperek inoba la'isa agunem, it nen inebe ebetlake inakhik, ebetlake yi aik ti aik hagarinakhik, hagasugun o, iluk isikhe tak-tagat,

⁵⁰pogot agat walhasikhe hurli nen ebekeram Habel oe nen amep ulabogo wakhikhe nen, logat it ap Allah ane yogeisekhe lagoukha meke inarik inarik, hurli ap Zakharia Allah ai halekma, o at ako warogo hetu hunekhe lagoukhama turlem heisogon amep ulabogo wakhukha iti hurli, inamep usakhikhe iti tha'bokhogonat hit akhuni yogotak welagap meke yi hinoba 'bigin o.

⁵¹

⁵²Halok he, hit ap Allah ane holal waganek yakulisegethep meke yi, uma thu hualogo ukuogoluk walhegarek hak, it akhuni aperek yi wene ti wene inilu asuogoluk walhugunem, hit nen kunci tilogo hago dogolik hinekaerek hinilu asuogoluk yakulhidek dogolik, it aperek yakuluogoluk hagakhunem, hit nen, Yakulusak dek o, iluk wenageisegethep iti nen, eiye! Allah nen weagathinabigin o,” iluk itithogon yogeisalok nen

⁵³o etnogo here'isalok itikman dukhi lageikhemo, it ap Allah ane holal waganek iteerek meke men, ap Farisi meke men, inakla aga at oba 'bekhe dogolik, “At Yesus iti ane igin oba wene, 'biluk ebe wasuok,” iluk itema kogat waganhik, heerlekha'bugat waganhik, hagakhe dogolik inileken waganhe lagoukha.