Read Mid Grand Valley Dani Lukas 12 Bible Online

Lukas 12 - Mid Grand Valley Dani bible

Lukas 12

¹Wene itithogon isi korlek, akhuni motok doalek-harluadek natogosi agoukhama, inebe motok kirlik-kerlekhogon nen, it aperek nen it aperek inisok ukut nen al debelogo 'bilik lagoukha. Itithogon hagakhe lagoukhama, at Yesus nen at agarumi ane waganhe lagoukha meke emenogo wene men tak yogeisasikhe, “Ap Farisi meke inobabut he, eken roti hisuagaluk, akla usakharek meke iti hakene dogolik, inoado baga anek hano thalek, inetaiken pere iti nen, weagathinabinogo iluk, hinobabut hebelogo dogono.

²Meke re, yi meke ti meke thebelek meke iti thelekmatdigik, himago werek meke iti inilurogon thelekmatdigik, hagasigin anek o.

³Itithogon hagasigin iti nen, hit o mummo dogolik ekhe lagap meke iti, o lia baga isinem tha'bokhogonat inasuk holugun o. Nen, uma dogolik hinane hok-hok inasukmo ekhe lagap meke iti, o warleke isiken oba dageiluk inane kokhogon yogeisugunem holugunat o,” iluk yogeisasikhe.

⁴Itithogon yogeisasikhesik, ageikhe men yogeisasikhe, “Nagarlak lak o! An wene yi hit hinobasik yokhisak o. Akhuni nen hinebe hinasugun iti hinayuk agup o. Hinoado itikmanke meke anek hinatluk nen, it nen yabokane ageikhe weagathinabusak erlok dek iti nen, hinayuk agup o.

⁵Meke re, hit tha hinayukhogon dogosak nogo. An nen yokhisak. At Allah nen hinebe hinatluk, yabokane hetu aikmo erlok la'inagusak werek itiat hinayukhogon dogono, iluk yokhisekhe lagei iti.

⁶Meke re, thue wurle iti oko meren palharek nogo. Ebe 5 meke oko uang sen motok 'bugurlagat pere meke baga waganharek apigi. Itithogon hagakharek mekeat he, at Allah nen thue iti opakiat halok ageikhe obarlikmatdigidek eberek motok welagarek o.

⁷Nen, hit hinisi hinukuloakma tha'bokhogonat, at Allah nen iki motok wenago welagarek o. At Allah nen thue wurle doalegat iti kok hakene apekherek 'buk. Hinebeat kok motok apekherek o. Iti nen hinayuk dekhogon dogono o” iluk yogeisasikhe.

⁸Itithogon yogeisasikhesik, ageikhe men yogeisasikhe, “Tha nen akhuni inil oba, Yesus iti an noe o, iluk pakhogon isi halok he, an abat itaklasi agagi etnogo nen meneke, it malaikat Allah nen yoko la'isa agarek meke emenogo inil oba, At yi an nagot o, iluk, it inobasik nane pakhogonat yogeisagein o.

⁹Meke re, tha nen, akhuni inil oba, Yesus iti an nokodek o, iluk la'belho halok he, an meneke, malaikat Allah nen yoko la'isa agarek meke emenogo inilhanem, At iti an nokodegat o, iluk, nane pakhogon yogeisageinat o.

¹⁰An abat itaklasi agagi etnogo nabok weak palho halok, weak hagasugun meke iti inebe tomok Allah nen thagalogo degetdisagein mekeat he, Allah Agoreke iti inakla meanetdiluk etaga weagatdugun meke iti Allah nen thagalogo degetdisagein motok dek o.

¹¹Hit hinitema waganuagaluk akhuni nen it akhuni Yahudi meke sembayan egarekma etoma men, it ap pemerintah meke inelokhoma etoma men, it ap inetagapogot inelokhoma men, wokhisik 'binagei lugun halok he, hinakla nen, Nit ninoado tilogo wene oko ki meke ugun, iluk hinelabut hikhup o.

¹²Itinem he, hit nen wene oko uagaluk Allah Agoreke nen, Yigithogon ini o, iluk, hinakla kagaligin meke werek o,” iluk yogeisasikhe.

¹³At Yesus nen itithogon yogeisugunem, it akhuni doalegat natogorlek welagoukha meke emenogo opakiat ageikhe nen, men yogokhikhe, “Noe. An noe nen nit ninopase watlaga dogolik, at iki 'biluk nit nipisak ninobasik 'biluk laga mekeat, nagarlak arligat horlekhesik werek iti, ageikhe mikirlogo woknisuak nen he, yogotno o,” iluk yogokhikhemo,

¹⁴at Yesus nen, men yogokhikhe, “Hinebe hulogo 'binageiluk hinameke dopok suputhisausak iti, an meldanhemo apegen a?” iluk itithogon yogokhikhesik

¹⁵akhuni doalegat emenogo men yogeisasikhe, “Akhuni inameke doalegat welagarek iti baga iniluk welageikharek dek o. Yi meke ti meke an meke anek dogolep, iluk inakla apekhe dogunogo iluk hinobabut hebelogo dogono o,” iluk itithogon yogeisasikhesik

¹⁶wene ageikhe oba lisogon men yogeisasikhe, “Ap kok meke ageikhe nen wen agat mirlimo hanoma ai yakhikhemo nen, ebe eken doalegat ikhikhemo,

¹⁷at ap etnogo akla nen, Ai yakhi meke ebe eken doalegat ikhe iti, ebe palogo 'biginmo oboluk dekma, nikithogon hagasigin, iluk akla ebekhe lageikhe.

¹⁸Akla ebekhe lageikhesik nen, Yigithogon hagasigin, iluk, men akla apasikhe, O halekma alep 'bekhe lageima yi misalogo nen, yabokane kok meke ageikhe haldiluk nen, an nameke men, yi meke ti meke ai yakhi meke eken palogo men, o etoma motok 'bekhe dogogin.

¹⁹Itithogon 'bakhalok werek korlek, nekaerek nen nasuk warekhe dogolik, Yogo. Mo dageigik, usigik, hagakhe korlek yi tahun ti tahun hasik nameke doalegat erlogat 'bakhigirikmo hano. Yogotak thet walogo dogolik, hipiri nikik, oken apusu nikik, neke dogolik nen, nakla arleken akhekhe dogogin o, iluk nekaerek nasuk warekhe dogogin, iluk apekhe lageikhemo,

²⁰at Allah nen, Ap yi, hetaiken motok dek yi re! Yogotak hibako yi arat hagurlagun kigikhogon ula'isasigin o. Ula'isa agunem, hameke motok doalegat natogorlogo 'bakhegen etoma tha ite asigin apegen, iluk itithogon yogokhikhe.

²¹Iti hak he, it akhuni Allah il oba ebeat meke waganhidek dogolik, it inekaerek meke anek natogorlogo 'bakhiliogei iti, iti ipisak tak-tak o,” iluk yogeisasikhe.

²²Itithogon yogeisalok, at agarumi ane waganhe lagoukha meke emenogo men yogeisasikhe, “An nen itithogon yokhisigi iti nen, hit hinakla nen, Niniluk dogouogoluk he, ninapiri ki meke nugun. Ninasu ki meke ikhe dogogun, iluk, hinelabut hisikhogon wene munini uan 'bero ebekhe dogunogo iluk yokhisigi o.

²³Nekarek meke iti 'bugurlagat mekeat he, kok he, hinebe hiniluk dogosak itiat o. Nen, su ikhegarek meke iti 'bugurlagat mekeat he, kok he, hinebe itiat o.

²⁴At thue kin obabut hagakherek meke hutdini o. At nen yi meke ti meke ai yakhik, eken palhik, hagakherek motok dek. Nen yabokane nausak meke eken palogo o halekma 'bakhekherekma motok dek mekeat he, at Allah nen apiri wogokherek. Meke re, at Allah thue iti alon halinakherek nogo? Dek o. Hit hinebeat alon halhinakhe dogolik hinapiri wokhisagein dek nogo? Wokhisageinat o.

²⁵Nen, hit aperek nen, An watlasusak arat itinem, 'bogokhogon watlageidek, herlekha'bugat ageikhe inom niluk dogole e, iluk wene munini uan 'bero ebesigin iti baga hiluk ageikhe inom dogogin nogo? Erlok dek o.

²⁶Halok he, hit nen yi meke ti meke wene herlekha'bugat meke hagasusak erlok dek nen dogoligat, kok meke iti hinelabut hisikhogon wene munini uan 'bero ebekhe lagap iti nenaluk.

²⁷O eken mirliken morlaken okake ikherek iti hutdini. Eken iti aban isigiluk, yabu dikhak yugulogo waganhik, yo negen dalogo su ikhik, hagakherek motok dek mekeat he, ap kok Salomo etnogo obake waganekma hogorakhe lagoukha iti elokhoken erlok dek o. Eken iti anek he, eken motok hano iti 'bikhani o!

²⁸Halok he, oka herleka o limo welagarek meke iti, yogotak hak, hano welagarethek nen, hubuluke hakene, hetumo hundisegarek mekeat, Allah nen inasu ikhasu hak eken motok hano hagarogo 'bisekherek iti hak, hit meneke hinasu i'binagagin dek nogo? Hinetaiken at oba hakotdiluk dogou'buk yi re!

²⁹Hinakla nen he, Ninapiri men, ninagei men, ki meke nugun iluk, iti mekeat kogotdiluk hinelabut hisik dogogup o.

³⁰Itithogon hagakharek iti tha'bokhogonat, it akhuni itikmanke meke nen iti meke kogotdiluk herarik nekharek mekeat, hit yi anek he, yi meke ti meke dek nen hinerlageik negen welagathep iti, hinopase Allah iluat welagarek o.

³¹At Allah apma ukiluk dogogun it meke kogotdugun halok, hit yi meke ti meke iti oba dukhogon wokhisageinat o.”

³²“Halok he, hit Allah a'buri domba hakene opakimo hulogo ukiluk welageikharek meke hinebe herlekha'bugat meke yi, nagarlak lak nerugi o! Allah nen hit at apma 'binageigiluk akla apekhesik werek iti, hinayuk agup o.

³³Hit hinameke it oko palogo uang waganigin meke emenogo it akhuni inameke dek meke iti supurisani o. Supurisalok nen, uang ai motok weak agarek dek meke waganogo 'biluk, ukharlogo 'bekhe dogou hak, hinameke hano motok dek asigin dek meke, it ap inil agasabu weak meke nen iniki abusak himasi ukigik, warlo nen palhik, hagakherek motok dekma pogot oba etoma ukharlogo 'binaguagaluk la'akhekhe dogono o.

³⁴Hinameke hinetaiken hunik meke etoma natogorlek werekma, hinetaiken etomaat dogogin o,” iluk yogeisasikhe.

³⁵Itithogon yogeisasikhesik nen, yabokane yogeisekhe dogolik, “Ap kok meke humi iginakhunem lalok isago nalok wagunem, agarumi atuaneke meke therogo inobabut hebelogo werekma, at apuke witluk thu puputhasinem ibat hualhegarek hak, hit meneke, hinasu hanorogon ikhogo nen hinageisagal yibarlogo 'biluk dogono o.

³⁶

³⁷At kok etnogo atuaneke meke emenogo inoe therogo werekma ebe waga dogoumo nen, inakla arleken motok akhagun o. Itithogon therogo werekma witluk nen, at inoe etnogo asu it inasu hakene ikhogo, at agarumi emenogo isago etnogo noagaluk inebe opakimo dapukhogon huretdisalok nen, at nen melageisagein, iluk yokhisigi.

³⁸Itithogon hagasigin iti re, at ebe o hibako eketurlem wisigin a? O wi asigiluk hagakhe korlek wisigin a. It therogo werekma inoba wagunem, inakla arleken kogat akhagun o.

³⁹Wene yi hinakla eberek dogono. Ap ai iteerek meke ageikhe akla apekhe dogolik, O yogotak hibako jam iti baga an naila yoma ap ageikhe iki abusak waganigiluk ukisigin, iluk ilu dogolik ai thuam dogolepma re, o pin talogo iki abusak wagani ukilep dek o.

⁴⁰Iti hak, hit hinakla nen, At itinem wisigin, iluk apigidek akhirak werek korlek, an abat itaklasi agagi etnogo, arat wisigin iti, hit hinebe karelogo dogono o,” iluk yogeisasikhe.

⁴¹At Yesus nen itithogon yogeisasikhemo at Petrus nen men yogokhikhe, “Noe! Wene oba lisogonat egen iti re, nit ninobasik anek egen a? At he, akhuni tha'bokhogonat ninom hasik egen a,” iluk yogokhikhemo,

⁴²at ninoe Etagapogot Yesus nen, men yogokhikhe, “Ap kok meke ageikhe atuaneke therisik dogolik, inapiri nausak meke wogeisausak tak-tagat wogeisekhe dogoagaluk, at atuaneke meke ageikhe ayoko 'bisinem, at akla kagalek dogolik obabut oe ane igin meke tak-tagat hagakherek iti tha apegep. At iti oe iti nen, meldiluk lagarek o.

⁴³Meldiluk lagunem, atuaneke etnogo itithogon mothogon hagakhunem, at oe etnogo apuke ileken 'bikha aga halok, atuaneke etnogo akla arleken motok akhagein o.

⁴⁴Itithogon hano hagakhunem, 'bikha witluk, oe etnogo nen, An nameke yoma tha'bokhogonat hat hiki baga dogoak, iluk meldigin o, iluk eberogonat yokhisigi.

⁴⁵Mekeat he, at atuaneke meke iti akla nen ebekhe dogolik, Noe etnogo ibat wiriogo dek iti, dogoluk nen wisigin higi, iluk, at oe atuaneke aperek ap dek, humi dek, tugi inakhik, hipiri men, anggur eken apusu men, oba la'buk nalok ilugun oba, anggur eken apusu iti nen ebe hunu-hunu palhik, hagakhe dogolik, at nen,

⁴⁶Noe etnogo o itinem, jam iti baga wisigin, iluk motok okodek akhiragat werekma, oe kok etnogo 'bikhatluk nen, atuaneke etnogo karok oba ebe motok warogo nen, it akhuni aperek inetaiken Allah oba hakotdigidek meke 'bisekherekma etoma obolukmo la'igin o.

⁴⁷Ap atuaneke meke ageikhe akla nen, An noe nen, Itithogon hagarogo 'banilep, iluk akla apekherek meke ilu dogoligat, hagarogo 'bisigidek dogogin halok he, ap iti tugi u werek wasi isigin o.

⁴⁸Mekeat he, atuaneke meke ageikhe akla nen, An noe nen, Itithogon hagarogo 'banilep, iluk akla apekherek meke okodek dogolik itithogon hagarogo 'bisigidek tugi u weak wasusak morat weak hagakhe halok, tugi 'bugurlagat negen wasi isigin o. Akhuni inebe tomok doalegat wogeisagein meke iti, ekaerek waga dogolik doalegat kino igin o. Nen, yi meke ti meke kokhogon iniki baga dogoagaluk meldisagein meke iti, yabokane, Kokhogon woknitni, iluk igin o,” iluk yogeisasikhe.

⁴⁹Itithogon yogeisasikhesik nen, yabokane men yogeisasikhe, “An he, o agat oba yoma hetu kola'isagaluk wagagisikmo iluk, hetu iti ibat amulok yibatlatnek, iluk apekhe lagei.

⁵⁰Akhuni yoma ima usa'isiliogei hak, an yi aik ti aik hagatnabugun meke re, aban werek korlek, nakla weak motok welagei.

⁵¹Hit hinakla nen, At agat oba yoma wageikhe iti, akhuni agat oba meke yoma dapulhinabigiluk wageikhe, iluk apegep a? Dek o. An he, hurli palogo 'bisagaluk wagagi, iluk yokhisekhe lagei o.

⁵²O yogotak hurli nen, ap ageikhe a'buri inom inebe 5 inai opakimo meke dogolik, it-it inom agorogo atluk, inebe henagan nen, inebe pere inabok palhik, nen, inebe pere nen, dagakhogon inebe henagan eranogo inabok palhik, hagasugun o.

⁵³Inom itithogon agorek dogolik, opase nen a'but ipisak weak ageik, a'but nen opase ipisak weak ageik, agosa nen eak ipisak weak ageik, eak nen agosa ipisak weak ageik, akhoan nen, agalho ipisak weak ageik, agalho nen akhoan ipisak weak ageik, itithogon inom weak arik lugun o,” iluk yogeisasikhe.

⁵⁴Itithogon yogeisasikhesik nen, akhuni inebe doalegat emenogo wene ageikhe men yogeisasikhe, “O mo korok i lagarekma eloma nen oisa ageikhe dagei ago halok, Ihi! Miso wisigin, iluk egethep hak, miso arat wagarek.

⁵⁵Nen, o hisakne i aputmo mot-mot eloma nen wago halok, Ihi! O hibi dageigin, iluk egethep hak, arat hibi agarek o.

⁵⁶Hit hinoado baga anek hano thalek hinetaiken pere yi re! Pogot agat elokhoken hutdiluk nen, Itithogon hagatlasigin, iluk, hinetaiken ekerlekhogon dogolik, obabut ekagat palhethep mekeat he, o yogotak welago ya baga yigithogon hagatlasigin, iluk hutdigidek welagap iti nenaluk,” iluk yogeisasikhe.

⁵⁷Itithogon yogeisasikhesik, wene ageikhe men isikhe, “Wene hinekaerek nen ilokon warogo moretdekhe lagap dek nenaluk.

⁵⁸Ap ageikhe hipisak agorek meke nen wene erlo pilinekharek meke inoba wokharik lalok, it ap iti nen hebe polisi wogeisaumo, it nen he, iniki herle warogo 'bisegarekma etoma kola'agei launogo nen, aban holagarlemke laga dogolik, etaat hipisak wene thagalogo degetdino.

⁵⁹Nen, thagalogo degetdigidek halok he, hiki herle warogo kola'agoumo oko 'bogokhogon motogat wogokhidek halok he, etoma nen herle hisalogo ula'agousak motok degat o, iluk yokhisigi,” iluk yogeisasikhe.