Read Mid Grand Valley Dani Lukas 13 Bible Online

Lukas 13 - Mid Grand Valley Dani bible

Lukas 13

¹Itinem, it akhuni aperek nen Yesus yogokhe dogolik, men yogokhukha, “Akhuni Galilea meke Allah ako warogo hetu hunhunem eranogoat, ap kok Pilatus nen it inamep inom, Allah ako warekha meke amep inom, opakimo ulabogo inakhe o,” iluk yogosi agoukha.

²Itithogon yogosi agoukhama, at Yesus nen, men yogeisasikhe, “Hit hinakla nen, It ap o Galilea meke ebetlake tha'bokhobonat, weak herlekha'bugat negen hagakhe korlek, it itithogon inakhe iti anek weak kokhogon hagakhe lageikhama, inobabut nen inakhe, iluk apekhe lagap a?

³Dek o. An nen hit yokhisak. Hit weak hagakhe lagap meke iti thogotdisalok hinobabut hebelageidek halok he, it watlageikha hagat, hit itithogonat watlatluk nuk asugun o.

⁴Nen, hit hinakla nen, O Yerusalem i yekelekma Siloam etoma o helekit meke uanat perlarik dageisukhasikmo, misalogo usa'aga dogolik, inebe 18 oba al debelogo thebelinakhikhe etnogo re, it akhuni ebetlake tha'bokhogonat o Yerusalem welageikharek meke iti, weak herlekha'bugat negen hagakhe korlek, it al debelogo thebelinakhikhe iti anek, weak kogat hagakhe lagoukhama inobabut nen thebelinakhikhe apegep a?

⁵Dek o. An nen hit yokhisak. Hit weak hagakhe lagap meke iti, thogotdisalok hinobabut hebelageidek halok he, it watlageikha hagat, hit itithogonat watlatluk nuk asugun o,” iluk yogeisasikhe.

⁶Itithogon yogeisasikhesik nen, wene ageikhe oba lisogon men yogeisasikhe, “Ap ageikhe ayabumo o ara ai yago welageikhe. Ai yago werekma, Eken ikhemo a? Dek a, iluk ileken 'bikha lageikhe meke re, ebe ikhidekma.

⁷Ikhidekma 'bikha lageikhesik nen, atuaneke ayabu therogo welageikhe meke ageikhe men yogokhikhe, O ara yi eken ageikhe ikhemo a? Dek a, iluk 3 tahun oba waga lagei meke re, eken motok ikhidek. Halok he, agat alomarogon yago dogosak iti, mukhogo la'isan o, iluk yogokhikhemo,

⁸at atuaneke meke etnogo nen, men yogokhikhe, Noe! An nen yorla yebelhik, mogot palhik, dogeik nen, tahun yi baga mukhidek thogotduok o.

⁹Itithogon thogotdekhe dogoumo, tahun yabokane meke baga eken ikhe halok he, hano. Nen, eken ikhidek halok he, hat nen, Mukhogo la'isan o, iluk yoknetnok o, iluk yogokhikhe,” iluk Yesus nen yogeisasikhe.

¹⁰Itithogon yogeisasikhesik nen, iniki 7 baga ageikhe Allah hasik werlegat dogolik, at Yesus o it akhuni Yahudi meke sembayan egarekma ageikhe ukisikhesik wene yakulisugunem,

¹¹he ageikhe mokat obabut weak meke akla ukiluk dogolik, apot oak motok naguk iluk, mothogon melasusak motok erlok dek werek korlek, 18 tahun hagatlageikhe meke ageikhe etoma welageikhe.

¹²Etoma werekma at Yesus nen, he etnogo ileken lakhalok nen, ane hakhasikhemo wageikhemo nen, men yogokhikhe, “Neru e! Hat hoba u nen arat hano asigin. Herle hakene warogo welagan etnogo, arat hisalaga o,” iluk itithogon yogokhikhesik nen,

¹³iki thebelhe korlek eranogoat, he etnogo apot oak mot ageikhemo, melageikhesik, Allah hogorakhikhe.

¹⁴Itithogon hagakhikhemo, ap ageikhe o sembayan egarekma etoma inoe kok welageikhe meke iti nen, men isikhe, “Yesus iti niniki 7 baga Allah hasik werlegat werek korlek, he iti u hano hagakhe iti nenaluk hagakhe,” iluk akla aga nen akhuni doalegat emenogo men yogeisasikhe, “Yi hagakhik, ti hagakhik, hagakhe dogosak iti, iniki 6 oba iti bagaat hagakhe dogosak o Halok he, hiniki iti bagaat u hinoba meke hagathinabuagaluk waga dogono. Meke re, Allah hasik werlegat dogolik wisusak dek o,” iluk itithogon yogeisasikhemo,

¹⁵at ninoe Etagapogot nen, ap etnogo men yogokhikhe, “Hit hinoado baga anek hano thalek dogolik, hinetaiken pere meke yi re! Hit hinebe tha'bokhogonat niniki Allah hasik werlegat dogolik meke re, hinako sapi a, keledai a, ai halekma nen, thu hualogo herle hisalogo ula'isalok nen, i noagaluk wogosik lagathep dek nogo? Wogosik lagathebat o.

¹⁶Iti hakene, he Abraham nen itago meke yi Iblis nen herle warogo hago werek korlek, 18 tahun hagatlaga meke yi, niniki Allah hasik werlegat dogolik herle hisalogo 'busak dek nogo? Hisalogo 'busagat o,” iluk wene itithogon yogokhikhemo,

¹⁷it ebetlake Yesus ina'it welagoukha meke emenogo tha'bokhogonat inekarli agoukha. Meke re, it akhuni aperek inebe doalegat emenogo tha'bokhogonat nen, at Yesus hagakhe lageikhe iti tha'bokhogonat hasik, inakla arleken motok akhekhe lagoukha.

¹⁸Itithogon inakla arleken akhasukhama, at Yesus nen, men yogeisasikhe, “Allah nen apma 'bisekherekma iti, nena meke hakene. An nen nena meke oba lisogo yokhisak,” iluk yogeisasikhesik nen, ageikhe men yogeisasikhe,

¹⁹“Allah nen apma 'bisekherek iti ebe ki'bi-ki'bi ai hakene o. Ap ageikhe nen ki'bi-ki'bi ai ageikhe waganogo wen waganekma hilogo la'isikhemo re, aku dukhisikhesik nen, erlo o hakene kogat hagatlageikhemo, ikilo'bak obake thue hitluk nekharek meke nen inai hali ageikhe iti hagat o,” iluk yogeisasikhe.

²⁰Itithogon yogeisasikhesik nen, yabokane ageikhe men yogeisasikhe, “Allah apma 'bisekherek iti ebe re, nena meke oba lisogon yokhisak.

²¹Iti re, eken roti hisuagaluk akla usakharek meke iti hakeneat o. He ageikhe nen gandum eken tamelek tepung wul hakene etnogo meke 40 kilo walhalok 'biluk, eken roti hisuagaluk akla usakharek meke iti akla usa'iluk abel dagalogo hagakhikhemo, ebe motok hikhikhe iti hagat o,” iluk yogeisasikhe.

²²Itithogon yogeisasikhesik nen, yabokane at Yesus o Yerusalem usekhe dogolik, o ukul kokma ukigik, 'bugurlagatma ukigik, wene yakulisilik usasikhe.

²³Itithogon yakulisilik usasinem, ap ageikhe nen, men yogokhikhe, “Noe! Allah nen tilinabigin iti inebe doalegat a? Pererlagat a,” iluk yogokhikhemo at Yesus nen it akhuni etoma welagoukha meke emenogo men yogeisasikhe,

²⁴“It akhuni doalegat, holagape herlekha'bugat ukuogoluk walhagun mekeat he, erlok dek asigin iti nen, hit holagape herlekha'bugat iti baga ukubageik nen, hinobatnerogo hagakhe dogono, iluk yokhisekhe lagei.

²⁵Nen, o etoma ap ai iteerek meke iti melatluk, thu tetnokhogon lakhe dogoumo nen, hit itikman metek dogolik, thu puputhekhe dogolik, Noe! Thu hualnisan, iluk yogosugun meke re, at nen, Hit hinebe an nokodek o. Koma nen wagap, iluk yokhisugunem,

²⁶hit nen yogokhe dogolik, Ninai ukul dopok nekhe dogolik, hipiri ninom isago nikik, i nikik, wene yakulnisigik, hagakhe lagagin meke etnogo, iluk yogosugun mekeat,

²⁷at nen, Hit o koma nen wagap. Hinebe an nokodek o. Hit weak hagakhe lagap meke noba uki agup o. Hit ya nenat piokthegat lani o, iluk yogkhisagein werek o.

²⁸Itithogon yokhisaumo, hit itikmanke dogolik, ap Abraham men, Yakub men, Ishak men, ap ebetlake Allah ane yakulisekhe lagoukha meke emenogo men, Allah apma hanoma etoma werekma, hinileken kolageisagun o. Nen, hit anek, thu larogo ula'inagoumo thikmanke etoma dogolik, hinaik kirlidik makhik, di ago de ago hagakho motok dogogun o.

²⁹Nen, it akhuni upu elomake nen, wema elomake nen, ima elomake nen, upu elomake nen, Allah apma 'bisekherekma etoma isago nuogoluk natogosisugun o.

³⁰Meke re, lakhani! It akhuni o yogotak inetaga werek meke iti, yabokane inetaga dek asigin o. Nen, it aperek yogotak inetaga dek werek meke iti yabokane inetaga werek asigin o,” iluk yogeisasikhe.

³¹Wene itithogon aban yogeisekhe korlek, it ap Farisi meke aperek Yesus oba wagoukhasik nen, men yogokhukha, “Ap Herodes nen hasigiluk habok paliogo iti, o yoma dogosak dek. Lo o werlekma lan o,” iluk yogokhukhama

³²at Yesus nen, men yogeisasikhe, “Ap yeke helo yeke obabut hakene iti, wene yi ibat yogosi lani o. An he, o yogotak men, hubuluk men, mokat obabut weak meke akhuni inakla ukiluk werekma mukhogo ula'isigiku, u warek meke halok, hano hagarinakhik, hagakhe dogoluk nen, aheke halok, an yabu hagasigiluk wagagi meke ilugun arat tirliphogonat hagasigin o.

³³Itithogon hagasigin meke re, ap Allah ane yogeisegarek meke iti, werlekma inasusak dek o. Yerusalem etomaat inasusak iti nen, an yogotak men, hubuluk men, aheke men, etoma laga dogosak tak-tagat higi o.

³⁴Eiye! Hit akhuni o Yerusalem eke yi nakmu lak e! Hit nen ap Allah ane yogeisegarek meke inebe inakhik, ap Allah nen inayoko 'biluk hinoba la'isa agarek meke helekit oba tamuk-hamukhogon inakhik, hagakhethep iti nakmu lak e! Thue ayam eagei a'bikha akla natogorlogo 'bisekherek iti hak, an hibiku-yogokuat hit o yoma welagathep meke tha'bokhogonat itithogonat natogorlogo 'bisagaluk nakla apegerek mekeat, hit nen, Nina'it, egethep iti nakmu lak e!

³⁵Iti nen, Alah nen hinebe here'inagumo, hinai halek iti o tho'bon wumat hagatlasigin o. Hurli yogotak nen, hit nen, an nebe hinileken niigidek dogoluk nen, hit nen yabokane, Ninopase Etagapogot Allah nen la'agei agama wagan yi, at nenat hanothabuak o, iluk yoknesugun iti hurli hinileken neagun o,” iluk yogeisasikhe.