Read Mid Grand Valley Dani Lukas 14 Bible Online

Lukas 14 - Mid Grand Valley Dani bible

Lukas 14

¹Itithogon yogeisasikhesik, yabokane iniki 7 baga ageikhe, Allah hasik werlegat dogolik, Yesus ap Farisi meke inougi koktek meke opakiat ageikhe aila hipiri ipisak nuogoluk lageikhesik werekma, akhuni nen, at Yesus inileken hanorogon waganhe lagoukha.

²Itithogon inileken waganho werek korlek, ap ageikhe iki isok u ya hisik ta hisik welageikhe meke Yesus elokhoma eranogo mot-mot wageikhesik welageikhe.

³Werekma, at Yesus nen ap Allah ane holal waganek iteerek meke men, ap Farisi meke men, emenogo men yogeisasikhe, “Wene Allah nen ninasuk wakhikhe meke iti baga, at nen ekhe dogolik, Iniki 7 baga an hasik werlegat dogolik akhuni u warek meke erlok hano hagarinabusak isikhe a? Dek a,” iluk itithogon yogeisasikhemo,

⁴it emenogo nen wene oko igidek inane degat huk agoukhama, at Yesus nen ap etnogo iki hakhalok u hano hagakhikhesik nen, “Lan o,” iluk la'isikhe.

⁵La'isikhemo, ap etnogo laga korlek, at Yesus nen it emenogo men yogeisasikhe, “Allah hasik werlegat dogolik mekeat he, hit ageikhe hina'but a? Hinako sapi a, i agat hulelekma tun usekhe halok, ibat-ibat hiniki hago lia'busak dek nogo? Lia'busagat o,” iluk yogeisasikhemo nen,

⁶it ap emenogo nen wene oko yogosusak he, erlok dek ageikhemo inane motok igidek huk agoukha.

⁷Ap kok meke ageikhe nen akhuni inom hipiri opakimo nuogoluk inayoko 'bisikhe meke, ap koktek meke hurek lageikharekma anek hurek lagoukhasik werekma nen, at Yesus ileken 'birisalok, wene oba lisogon men yogeisasikhe,

⁸“Ap ageikhe age waganhe dogolik, pesta isago nuogoluk, hat ageikhe hayoko 'bekhe halok he, hat hebe yekerek hakene mekeat he, ap ageikhe kok meke hipisagat hinayoko 'bigin iti nen, ap koktek meke hurek lageikharekma hureklasi lagun o. Itithogonat hureklasi lalok werekma, ap kok meke hipisak hinayoko 'bigin meke etnogo wago halok he, at ap hinayoko 'bigin meke etnogo nen yokhekhe dogolik, Nagot yi re. Ap yi hat hobolukmo hureklasuak nen, hat hebe, iluk yokhekhe halok he, hat hekarli atluk ap werlek meke hurek lageikharekma hureklasi launogo nen, ap koktek meke hurek lageikharekma iti piokthek hureklasi lagun o.

⁹

¹⁰Ap tha nen ekaerek etaiken siatdakhagein halok he, Allah nen thebelogo 'bigin o. Nen, tha nen ekaerek etaiken thebetdakhagein halok he, yabokane Allah nen siatdigin iti nen, hat itithogon hayoko 'bisi halok he, ap werlek meke hurek lageikharekma hureklasi lausak o. Etoma hureklasi lalok werekma, ap hayoko 'bigin meke etnogo witluk nen, Nagarlak. Hat ap koktek meke hurek lageikharekma yoma hureklasi me o, iluk isi halok he, it akhuni tha'bokhogonat pesta isago hinom nuogoluk natogorlogo wisugun meke emenogo inilhanemat yokhugunem, it nen, Ap yi kok meke higi, iluk inileken ekagat 'bikheagun o. Halok he, ap werlek meke hurek lageikharekma etomaat hurek lasusak o,” iluk yogeisasikhe.

¹¹

¹²Itithogon yogeisalok nen, at Yesus nen ap ai iteerek inayoko 'bisikhe meke etnogo yogokhe dogolik, “Dikene a? Hiamaganekeke a, hat nen akhuni hinom hipiri opakimo isago nuogoluk halok he, hinom hunik meke inom, hagarlak lak eke inom hougi hageikhugi meke inom, ap koktek inikierek hinom welagathep meke etoma inom, inayoko 'bugun o. Itithogon hagakhen halok he, oko yabokane it ageikhe isakhe dogolik hat hayoko 'bumo, oko wokhesunogo.

¹³Meke re, hat itithogon isakhe dogolik halok he, it inameke dek inerlageik meke iti inom, inuak thagalek meke inom, initibagal weak meke inom, inileken puk meke inom, it itigirlik meke inayoko 'bekhe dogono.

¹⁴Itithogon inayoko 'bekhe dogoumo, it nen hat hayoko 'busak dek iti nenat, hat hakla arleken kogat akhagein o. It iti nen oko wokhesusak dekma iti, akhuni inetaiken mot meke watlatlukmo, Allah nen inilugurinabigin itinem, hat hagakhe dogogin meke oko, at Allah nenat wokhesigin o,” iluk yogeisasikhe.

¹⁵At Yesus nen itithogon yogeisasikhemo, akhuni hipiri nuogoluk hurek welagoukha meke emenogo, ap ageikhe nen asuk holhikhesik, Yesus men yogokhikhe, “It akhuni Allah apma 'bisekherekma dogolik hipiri nugun meke iti, inakla arleken akhekhe dogogun o,” iluk yogokhikhemo,

¹⁶at Yesus nen, men yogokhikhe, “Ap ageikhe thini kok isasigin iluk abok paliluk nen, akhuni motok doalegat inayoko 'bisikhe.

¹⁷Inayoko 'bisikhesik, ebe arat isa'iluk nen, atuaneke ageikhe yogokhe dogolik, Thini isago yi arat nausak aga o. Halok he, akhuni inayoko 'bigi meke emenogo wisuak nen, woginabi lan o, iluk la'isikhe.

¹⁸La'isikhemo, yogeisilik lagunem, it akhuni emenogo tha'bokhogonat ina'it nen inane 'bitokhogon ekhe dogolik, at ageikhe nen, An wen ageikhe oko palhirikmo nen, nileken 'bikha lagaluk. Halok he, isago nugun iti, an wisigin dek o. Nagarlak e, iluk yogokhikhe.

¹⁹Nen, at ageikhe nen, An sapi oarliken waganek meke 10 oba peretek dopokhigik oko palhi meke nileken 'bikha lagaluk. Halok he, isago nugun iti, an wisigin dek o. Nagarlak e, iluk yogokhikhe.

²⁰Nen, at ageikhe nen, An nage ket waganhirikmo etnogo nen, isago nugun iti, an nasusak erlok dek o. Nagarlak e, iluk yogokhikhe.

²¹Inane itithogon anek ilik lagoukhama, at atuaneke etnogo nen oe etnogo yogosi ageikhe. Yogosi ageikhemo, at oe iteerek etnogo akla aga kogat dageiluk, men yogokhikhe, O kota yi, holak kokmake, 'bugurlagatmake laga dogolik, akhuni inerlageik meke men, inuak thagalek meke men, inileken puk meke men, initibagal weak meke men, wogosik wetno o, iluk yogokhikhe.

²²Itithogon yogokhikhemo, at ap etnogo lalok wageikhesik nen, oe etnogo men yogokhikhe, Noe o. Yoknekhen etnogo wogosik wagei mekeat he, o ebelake motok thelek werek o, iluk yogokhikhe.

²³Itithogon yogokhikhemo, oe etnogo nen atuaneke etnogo yogokhe dogolik, men yogokhikhe, Halok he, thini isakhigi meke yi, it akhuni alebageik inayoko 'bigi meke iti nasusak motok dek o, iluk yokhikhi o. Halok he, akhuni o kota yi itikmanke, holak kokmake, 'bugurlagatmake, yugunat liliogei iti an naila yoma o kerlekhogon ukisuak nen, hane obatnerogonat woginabi lalok 'bisa ukitno o, iluk yogokhikhe,” iluk Yesus nen yogokhikhe.

²⁴

²⁵Akhuni motok doalegat, at Yesus oporlik laga lagoukhama nen, at Yesus elokhe hebenokhogon it akhuni wogeisalok nen,

²⁶“Hit hinagosa hinopase lak men, hinagugi hina'buri men, hinougi hinagarumi men, hit hinekaerek hinebe iti men, tha'bokhogonat, Motok na'it o, iluk, apigidek dogolik, an nagarumi asuogoluk napma ukisusak erlok dek o.

²⁷O meldiluk inakharek meke etnogo hinago tomok wolok nen, an noporlik wisugun dek halok he, an nagarumi asuogoluk napma ukisusak erlok degat o.

²⁸Hit aperek nen o uanat helekit meke obarluk halusak hinakla apekhe lagap halok, o ebe tirliphogo halusak meke uang erlok werek a? Dek a, iluk hiniki wenakhidek, we yugunat halhethep apegep? Dek o.

²⁹Oko hasik iti hiniki wenakhidek halhe halok he, o herlaga la'iluk mekeat, o ebe tirliphogon halusak erlok dek aga halok, it akhuni nen inileken hekhe dogolik, Ap iti o herlaga la'ekhe mekeat he, tirliphogo halusak erlok dek agama thogotdekhe o, iluk hinobato asunogo.

³⁰

³¹Nen, iti hakene ageikhe, ap kok etagapogot ageikhe nen wim abok ula'iluk ap kok ageikhe inom yabi luogoluk nen, ebe tak yamukhogon hurek latluk nen, An nagarumi inebe 10 ribu ya re, at ap kok ili agarumi inebe 20 ribu iti inom erlok yabusak a? Erlok dek a, iluk akla ebekhidek, we, piokhogonat yabi lageikharek nogo?

³²Dek o. Inakla ebekhe dogolik, Yabusak erlok dek, iluk apekhe halok, it thili meke emenogo aban walegat nen waga korlek, Wim yabusak dek o, iluk, Ninom dapuluok nen, oko nena meke wokhisausak, iluk yoko la'isegarek apigi.

³³Iti hak, hit aperek hinameke yi meke ti meke thogotdisigidek dogolik an nagarumi asuogoluk napma ukusak erlok dek o,” iluk yogeisasikhe.

³⁴Itithogon yogeisasikhesik, ageikhe men yogeisasikhe, “Mayu iti hano o. Meke re, aik dek aga halok he, nena meke baga aik weregerasusak?

³⁵Dek o. Mayu aik dek meke iti re, ai yagoma 'bigik, agat mirli asuagaluk wen isap wakhik, hagasusak motok dek nen, po la'isegarek o, iluk yokhisigi meke iti hinasuk holusak halok, hanorogon holini o,” iluk yogeisasikhe.