Read Mid Grand Valley Dani Lukas 17 Bible Online

Lukas 17 - Mid Grand Valley Dani bible

Lukas 17

¹At Yesus nen itithogon yogeisasikhesik nen, at agarumi ane waganhe lagoukha meke emenogo wene ageikhe men yogeisasikhe, “Akhuni nen an kolelogo here'anuagaluk it aperek nen inakla kagalugun meke weregat o. Meke re, at tha nen inakla kagalhe werek iti at Allah nen ebe weagatdigin o.

²At iti nen it inebe 'bugurlaktek meke yi opakiat ageikhe an kolelogo here'anuagaluk akla kagalumo, an kolelogo hera'anhe halok, at akla kagalhe werek iti helekit kok meke arlokopma herle kilogo nen, i laut yekelekma po la'iselepma hano o.

³Halok he, hinebe irlirli waganogo, hinomarlok werekhogon dogono. Hit hinagarlak lak hinerugi ageikhe weak hagakho halok he, asuk watno. Asuk wakhe dogoumo, at obabut hebelaga halok he, weak hagakhe meke iti thagalogo degetdisano.

⁴Ap iti nen iniki opaki hasik, iki 7 baga eran-alep weak hagathabiluk nen, hibiku-yogoku iki 7 baga nen hoba witluk, Weagathakhi meke iti thogotdiluk nobabut hebelaga o, iluk yokhisi aga halok he, thagalogo degetdisekhe dogono o,” iluk yogeisasikhe.

⁵Itithogon isikhemo, it agarumi inayoko 'biluk la'isasikhe meke emenogo nen, “Ninoe a! Ninetaiken Allah oba hakotdogo meke etnogo horle asuagaluk ageikhe inom ninobatnetninabin o,” iluk yogokhukhama,

⁶at ninoe Etagapogot nen, “Ki'bi-ki'bi ai motok 'bugurlagat meke iti hak, hinetaiken an noba 'bugurlaktek anek hakotdiluk nen, O kok murbei yi yoma nen henokhogon i laut kok yekelekma eloma yaklasi lan o, iluk yogosugun halok he, hinane asuk holiginat o,” iluk yogeisasikhe.

⁷Itithogon yogeisasikhesik nen, yabokane wene ageikhe inom men yogeisasikhe, “Hit aperek hinatuaneke meke hinayabu waganhe dogoluk a? Hinadomba hago dogoluk a, aban uki aga korlegat, Hapiri ibat na me o, iluk yogosusak apegep? Dek o.

⁸Yigithogon egethep apigi, An napiri tak isago 'biluk, hipiri melageisekhe dogolik su ikharek meke etnogo ikhogo nen, an tak noagaluk woknikhunem nen, an arat niki halok he, hat nausak o, iluk egethep etnogo dek?

⁹Oe etnogo nen atuaneke etnogo, Yigithogon hagatno, tigithogon hagatno, iluk yogosigin meke etnogo anek hagakhe halok he, oe nen heagei wasigin nogo? Dek o.

¹⁰Hit iti hakeneat o. Yigithogon hagatno, tigithogon hagatno, iluk yokhisaumo iti arat hagatdiluk nen, men ekhe dogono. Dek o. Nit nen, hatuaneke dogolik hagasusak meke anek hagakho o. Oba dukhogon hagasumo heagei watninabusak meke hagakhidek o, iluk ekhe dogono o,” iluk yogeisasikhe.

¹¹Yabokane iniki ageikhe baga, at Yesus o Yerusalem usekhe dogolik, o Samaria usakhigik, o Galilea liakhigik, turlemke usasikhe.

¹²Usekhe dogolik, o ukul ageikhe uki lagunem, ap inebe 10 baga henako hakene inayuk meke inebema welageikhe meke nen inileken Yesus lakhasukhasik, inebe walegat eta melasi agoukhasik dogolik, men yogokhukha,

¹³“Yesus noe e! Hakmu nisan o,” iluk inane kokhogon isukha.

¹⁴Itithogon isukhama, at Yesus nen ileken lageisalok nen, men yogeisasikhe, “Hit he, ap Allah iteerek meke emenogo nen hinebemake inileken 'bikhisoak nen inugurisa lani o,” iluk yogeisasikhe. Itithogon yogeisasikhemo, it emenogo holagarlem laga korlegat, henako hakene inayuk meke emenogo dek ageikhe.

¹⁵Itithogon dek ageikhemo nen, ap emenogo meke ageikhe opakiat anek ileken oado baga usakhasikhe hak, henako hakene etnogo arat dek ageikhemo nen, apuke sugulogo waga dogolik, ane kokhogonat, Allah hogorarik wageikhe.

¹⁶Wageikhesik, Yesus apma elokhe thogoumhogo wilasi ageikhesik nen, heagei wakhikhe. Ap iti ai o Samaria meke.

¹⁷Itithogon heagei wakhikhemo, at Yesus nen, men yogokhikhe, “Ap inebe 10 baga emenogo inoba hano ageikha mekeat he, inebe 9 oba nen koma lageikha.

¹⁸It ap inebe Yahudi meke inapuke wageidek huk aga korlegat, ap huso meke yi anek Allah hogorasigiluk apuke suguluk waga yoma re!” iluk yogeisasikhesik nen,

¹⁹at ap wageikhe etnogo men yogokhikhe, “Eberogonat hagatnabigin, iluk hetaiken noba hakotdegen iti baga arat hano agan o. Halok he, hebe melatluk haila lan o,” iluk la'isikhe.

²⁰Itithogon la'isikhemo yabokane, it ap Farisi meke nen, men isukha, “At Allah nen, o meranem at apma 'binani isigin,” iluk hinok waganhukhama, at Yesus nen, men yogeisasikhe, “At Allah apma 'binageiluk wisigin iti re, akhuni nen ageikhe hutduagaluk elalin meke ageikhe inil oba hagakhidek werek korlegat wisigin o.

²¹At Allah nen apma 'bisagein iti, arat hinakerlekla asi aga iti nn, it akhuni nen, Yoma werek yi 'bikhatni! igik, Etoma werek ili 'bikha lani! igik, aban igidek werek korlegat wisigin o,” iluk yogeisasikhe.

²²Itithogon yogeisasikhesik nen, at agarumi ane waganhe lagoukha meke emenogo men yogeisasikhe, “An abat itaklasi agagi etnogo hibiku-yogoku yabokane ninom motok dogogun meke re, aban werek korlek, hit hinakla nen, Niniki opaki hasik ninileken helo e, iluk itithogon apagun mekeat he, hinileken niigidek dogogun oba weregat o.

²³It akhuni nen, At etnogo ebe yoma werek. 'Bikhatni, igik, Ebe etoma werek etnaga 'bikha lani, igik, isi halok, hinakla nen, Eberogonat apalok hinileken 'bikha lageik, inoporlik lageik, hagakhup o.

²⁴An abat itaklasi agagi etnogo wisigin he, o yabok yibathekhe dogolik pogot erloke erloke eloma motok lia arik lagarek iti hak, wisigin o.

²⁵Nen, itithogon hagatlasigin mekeat he, iti aban hagatlageidek werek korlek, akhuni yogotak werek meke yoma nen woknakhidek here'aniluk nen, yi aik ti aik hagatnabugun o.

²⁶It akhuni haganeat ap Nuh werek oba eta hagakhe lagoukha tak-tagat, an abat itaklasi agagi etnogo yabokane itithogon hagakhunem wisigin o.

²⁷Nuh werek korlek, it akhuni etoma inapiri nikik, eken apusu nikik, ap nen humi woginakhik, it aperek igisigik, hagakho werekma, ap Nuh etnogo ku akla ukisikhemo, i thaluk-thaluk waga dogolik, it akhuni emenogo tha'bokhogonat i nen hotnokhogon inakhikhe.

²⁸Iti hak, ap Lot werek korlek hagakhe lagoukha iti hak hagasugun o. Eta tak-tak, it akhuni etoma inapiri nikik, eken apusu nikik, yi meke ti meke oko palhik, waganhik, inayabu horligik, inai haligik, hagakhe korlek,

²⁹ap Lot etnogo o Sodom here'isalok dukhi lageikhemo, Allah pogot oba nen miso hetu meke men, belerang hotali hakene obasi weak meke men, usa'i ageikhemo, it akhuni emenogo inebe tha'bokhogonat inakhikhe.

³⁰Iti hakene re, an abat itaklasi agagi etnogo yabokane thelekmaat wisigin itinem he, itithogonat hagatlasigin o.

³¹Eta tak-tak, an wagunem, tha nen inameke uma 'biluk nen, ebe o warleke baga dageiluk werekma, ebe usatluk ameke uma werek meke iti wagani ukusak erlok dek o. Piokhogon loak. Nen, tha nen ebe wen atom werekma yabokane apuke uma wisusak erlok degat o. Piokhogon loak.

³²Ap Lot age hagatlageikhe iti hinakla ebetni o.

³³Tha nen ekaerek ebe irlirli horlagein halok he, yabokane ebe nuk akhagein o. Meke re, tha nen ebe irlirli horligidek nuk akhagein halok he, ebe tiligin o.

³⁴Itinem he, ap inebe pere hibako ipisak henaipu noge isinem, ageikhe waganhik, ageikhe kamotdigik, hagasigin o.

³⁵Nen, humi inebe pere gandum eken werasugoluk thagalhunem ageikhe waganhik, ageikhe thogotdigik, hagasiginat o. [Nen, ap inebe pere wen atom werekma, ageikhe waganhik, ageikhe thogotdigik, hagasiginat o, iluk yokhisigi,]” iluk ekhe lageikhemo,

³⁷at agarumi ane waganhe lagoukha meke emenogo nen, men yogokhukha, “Noe! Hat egen iti o koma hagasugun meke egen,” iluk yogokhukhama, at Yesus nen, men yogeisasikhe, “O ageikhema warek werek halok he, thue warek nekarek meke iti etoma natogosi lagarek o,” iluk yogeisasikhe.