Read Mid Grand Valley Dani Lukas 22 Bible Online

Lukas 22 - Mid Grand Valley Dani bible

Lukas 22

¹It akhuni Yahudi meke pesta etaga Paskah neke dogolik, eken roti hikherek meke akla usakharek meke akla usa'igidek meke werago nekarek oba horogat asi ageikhemo dogolik,

²it ap Allah iteerek meke inougi koktek inom, it Allah ane holal waganek iteerek meke inom, akhuni tha'bokhogonat inayuk nen, Yesus wene nikithogon oba 'biluk wasuok he, iluk abok palhe lagoukha.

³Itithogon abok palhe korlek, it Yesus agarumi inebe 12 oba emenogo meke, ageikhe etaga Yudas Iskariot etnogo akla Iblis ukisikhe.

⁴Ukisikhemo nen, at Yudas, it ap Allah iteerek meke inougi inom, Allah ai halek therogo welagoukha meke inom, inoba lageikhesik, “Yesus iti wasubageik nen, hinikimo nikithogon 'bigin he,” iluk inom abok palhe lagoukha.

⁵Abok palhe lagoukhasik, it ap emenogo inakla arleken akhekhe dogolik, “Oko uang hurli iti baga wokhesugun,” iluk abok yogokhukha.

⁶Abok yogokhukhama, at Yudas nen, “I o,” iluk yogeisasikhesik nen, “Akhuni inokodek werek korlek, Yesus asokneat hano iluk werekma, mera nen inikimo 'bigin he,” iluk abok akla dogolik wene munini ebekhe lageikhe.

⁷Yudas itithogon hagakho werekma, eken roti hisuagaluk akla usakharek meke akla usa'igidek meke werago neke dogolik, pesta Paskah hasik domba warogo nausak arat asi ageikhe.

⁸Arat asi ageikhemo, at Yesus nen Petrus Yohanes ipisak la'isekhe dogolik, men yogeisasikhe, “Nit pesta Paskah hasik domba ninom nuok nen, lalok werago tugurogo 'biluk dogono,” iluk itithogon yogeisasikhemo,

⁹it nen, “Nit nen yi meke ti meke o ki tugurogo 'biluk dogosak warlok nen egen,” iluk isukhama

¹⁰at Yesus nen, “Hit o kota etnogo uki lalok, ap ageikhe isoak agat meke hagarek meke baga i henatluk wagunem, hinom abuk asugun etnaga. Abuk atluk oporligat lano. Lagunem at aila ukekhe halok

¹¹ap ai iteerek meke iti baga hinok mek iluk waganino, At ninoe wene yakulnisiliogo meke etnogo nen men ekhe, An nagarumi nane waganiogei meke ninom pesta Paskah hasik domba warogo noagaluk, o kakok palek ki hak 'banhen, iluk hinok wagani lani, iluk la'inani agama wago, iluk itithogon yogokhunem,

¹²at nen o henaipu o hurli kogat palekma meke werago nausak oba oboluk motok hagarekma yakulhisagein etnaga re, etomaat yi meke ti meke tugurogo 'biluk dogono,” iluk nen la'isasikhe.

¹³La'isasikhemo, it ipisak lagoukha hak, at nen isikhe hagat, itithogon werekma 'bikha lagoukhasik nen, pesta Paskah hasik domba wakhukhasik nen werago tugurogo 'bisukha.

¹⁴Nausak oba arat asi ageikhemo nen, at Yesus nen agarumi la'isagaluk inayoko 'bisikhe meke ebetlake aperek inom lagoukhasik, inom nuogoluk hurek lagoukha.

¹⁵Hurek lagoukhasik, at nen men yogeisasikhe, “An yi aik ti aik hasi korlek nasugun iti, aban hagatnakhidek werek korlek, domba Paskah hasik yogotak nugun yi, nagarumi ninom nelo e, iluk, nakla warlok apekhe lagarik.

¹⁶Ninom yiat nalok yabokane, at Allah nen at apma 'bisalok ebe meke nugun iti aban werek korlek, yi meke ageikhe ninom nikidek dogogin o, iluk eberogonat yokhisigi,” iluk yogeisasikhesik,

¹⁷yabokane isoak eken apusu henago ikimo waganhikhesik, Allah heagei warogo, agarumi wogeisekhe dogolik, men yogeisasikhe, “Anggur eken apusu yi nalok an yabokane ageikhe nikidek dogoluk nen, hurli, at Allah nen apma 'bisagein iti hurli, yabokane nigin. Halok he, yi waganogo hinekaerek nen supurogo nilik lobageik nen iluk wokhisigi o,” iluk yogeisasikhe.

¹⁸

¹⁹Itithogon yogeisasikhesik, yabokane hipiri roti meke ikimo waganhikhesik nen, Allah heagei warogo nen ebe kusogo, agarumi supurisekhe dogolik, men yogeisasikhe, “Yi an nebeat o. [An nebe hit hinobasik nakhunem watlasigin iti, an noba eberek dogobageik nen, yigithogon neke dogono,” iluk yogeisasikhemo,

²⁰arat nasukhama nen, isoak eken apusu henago itithogonat wogeisekhe dogolik, “Yi re, an namebat o. Allah nen wene ket meke warogo wokhinabigin, isikhe etnogo hit hinobasik namep ulabogo nasugun iti baga, ebeat asigin o,” iluk supurogo wogeisasikhe.] Wogeisasikhesik men yogeisasikhe,

²¹“Nagarumi! Lakhani! An nasuagaluk yoko ligin meke ninom yoma hipiri o perlago baga opakimo neke lago.

²²Yoko laumo an abat itaklasi agagi etnogo at Allah nen, At wasuak, iluk akla apasikhe tak-tagat nasugun meke re, at an nasuagaluk yoko ligin meke iti anek he, nakmu e. Weak asigin o,” iluk yogeisasikhemo,

²³it-it men isukha, “Iti tha hak nen yoko ligin meke ekhe,” iluk nen, hinok-hinok ilik lagoukha.

²⁴Itithogon it-it hinok-hinok waganhe lagoukhasik nen, kok tha, iluk inane thagalhe dogolik, men isukha, “Hetagawerek hat a? An apigi,” iluk, at ageikhe nen igik, at ageikhe nen igik, inane thagalhukha.

²⁵Itithogon isinem, at Yesus nen it men yogeisasikhe, “It akhuni itikmanke meke iti inougi inetagapogot nen inagarumi hagasik dogolik inane obatnerogonat, Yi meke hagatno, ti meke hagatno, iluk yogeisigik, nen, it inagarumi nen, Ninoe iti hano haknisik werek, igik, egarek iti hak,

²⁶hit nen, itithogon hagasusak motok dek o. Halok he, hit meke ageikhe nen, An netagawerek dogole, akla apasi halok, at iti hinagorat asuak o. Nen, An nen hagasik dogole, iluk apasi halok he, hinatuanekeat asuak o.

²⁷Hit hinakla nen ap tha hak kok werek apegep. At ap hurek dogolik hipiri niliogo meke iti a? At he, atuaneke meke nen, at oe noagaluk wogosiriogo meke iti a. Dek o. Kok he, at hurek dogolik hipiri niliogo meke, itiat o. Itithogon meke re, an hit ninom dogolik hinatuaneke negen hagakhe lagei o.

²⁸Weak kogat hagatnakhe korlegat, hit yi anek, an here'anhidek ninom motok welago iti nen,

²⁹an nopase nen akhuni an napma hagasik dogoagaluk meldanhikhe iti hak, hit meneke akhuni an napma 'bisageinmo etoma hipiri nikik, i nikik, hagakhe dogolik, hinoboluk o perlago baga kogat hurek dogolik, akhuni Israel meke inukuloak etaga 12 oba emenogo ukum inoba 'bigik, kokhik, hagasubageik nen, iluk hirat meldinagagi o,” iluk yogeisasikhe.

³⁰

³¹Yesus nen itithogon yogeisasikhesik nen, ageikhe Petrus men yogokhikhe, “Simon! Simon! Hasuk holin! Gandum abubuleke hulogo thogotdisegarek iti hak, hit tha'bokhogonat itithogon, at Iblis nen hinebe hulhinabigiluk Allah kino yogokhemo at nen erlok iluk yogokhe mekeat,

³²hat hetaiken noba hakotdiluk welagan meke iti obatne dek asinogo iluk, hat hobasik an Allah ayoko arat 'bigima. Hobabut hebelagan halok he, hagarlak lak yoma hat nen inetaiken ago watdisekhe dogono o,” iluk yogokhikhe.

³³Itithogon yogokhikhemo, at Petrus nen, men yogokhikhe, “Noe o! O akhuni iniki herle warogo 'bisegarekma kola'agagik, hebe motok hakhik, hagathakho halok he, an nipisagat ninasuagaluk welagei o,” iluk yogokhikhe mekeat he,

³⁴at Yesus nen, “Petrus! Yogotak ayam ane aban igidek werek korlek, hat nen, Yesus iti nokodek o, iluk, hiki henagan oba la'beligin o,” iluk yogokhikhe.

³⁵At Yesus nen itithogon yogokhikhesik nen, at Petrus agarlak lak ebetlake inom dapukhogon men yogeisasikhe, “An nen, hit hinauang eret inom, hinasuke inom, hinasepatu inom, wolok lagup o, iluk la'inagagi etnogo nen, hit yi meke ti meke erlok degat welagagip a?” ilukk yogeisasikhemo, it nen, men yogokhukha, “Dek o. Erlogat welagagu o,” iluk yogokhukhama

³⁶at Yesus nen, men yogeisasikhe, “Meke re, yogotak anek hinauang eret men, hinasuke men, werek halok he, horlalok laniat o. Nen, hit aperek karok wim yakharek meke etnogo dek halok he, hinasu itikmanke ikherek meke oko palogo karok oko palino.

³⁷ An hagatnabugun meke hasik holal waganogo 'bekhe dogolik, At iti akhuni inobabut weak hagakharek meke inom thabakhogon iniki wenageinakha o, iluk isukha iti, an noba tak-tak hagatlasusak mekeat yogotak hagatlarik wiriogo iti nen yokhisigi o,” iluk yogeisasikhemo,

³⁸it nen, men yogokhukha, “Noe. Nit meke karok wim yakharek meke etnogo pere werek yi 'bikhan?” iluk inuguthasukhama, at Yesus nen, “Iti erlok werek o,” iluk yogeisasikhe.

³⁹Itithogon yogeisalok inom, dukhisukhasik nen, o kota etnogo thogotdiluk nen, at Yesus tom Zaitun ukul oba dageikhe lageikhe etnogo hagat, dageisinem, at agarumi ane waganhe lagoukha meke emenogo oporlik dageisukha.

⁴⁰Arat dageisukhasik nen, men yogeisasikhe, “Weak hagasuagaluk hinakla kagalisinogo iluk, sembayanat ekhe dogoni o,” iluk yogeisalok nen,

⁴¹at ebe asokneat 'bogokhogon horogat helekit po la'usak tak-tagat lageikhesik nen, itibagal yukukhogon sembayan ekhe dogolik,

⁴²men isikhe, “Nopase o! Hat nen hano apegen halok he, an weagatnabugun meke iti tilnabino,” iluk u hak, “Eken apusu henago noagaluk woknesugun iti, hat nen an noba nen wokhano. Meke re, an nakla apekhe lagei meke iti dek o. Hat hakla apegen meke itiat hagatnabino o,” iluk yogokhikhemo, [

⁴³it malaikat Allah nen yoko la'isekherek meke ageikhe pogot oba nen oba usa'ageikhesik nen, etaiken ago wakhikhe.

⁴⁴Etaiken ago wakhikhe meke re, akla motok weak dogolik yabokane sembayan ane akinhogon ekhe dogolik, dikhak mep hakene tik-tik agat oba usageikhe.]

⁴⁵Sembayan iluk melageikhesik, agarumi emenogo inoba wageikhe meke, it emenogo inakla motok weak ageikhemo nogo nen, noge isi werekma hisa ageikhe.

⁴⁶'Birisa ageikhesik nen, men yogeisasikhe, “Hit nenaluk noge ekhe lagap. Weak hagasuagaluk hinakla kagalisinogo nen, hinebe melatluk sembayan ekhe dogoni o,” iluk yogeisasikhe.

⁴⁷At Yesus nen itithogon isi korlek eranogoat, at agarumi inebe 12 emenogo meke ageikhe etaga Yudas etnogo, yoko lageikhesik nen ap doalegat wogosik wageikhesik nen, at tak Yesus ape tharluk heagei wasigiluk, oba wageikhe.

⁴⁸Wageikhemo, at Yesus nen, men yogokhikhe, “Yudas! An abat itaklasi agagi etnogo, akhuni nen hutdaniluk nasuagaluk, hat nen heagei hape tharluk warogo nebe iniki baga 'bigiluk wagan a?” iluk yogokhikhemo,

⁴⁹it ap Yesus inom welagoukha meke emenogo nen, it wagoukha meke emenogo inileken hisalok inakla nen, Itithogon hagasugun higi, apasukhasik, Yesus men yogokhukha, “Noe! Nit karok oba inasuok a? Dek a,” iluk, hinok waganhe dogolik eranogoat,

⁵⁰Yesus agot ageikhe nen ap Allah iteerek meke inoe kok atuaneke ageikhe wasigiluk yigilabethasikhe meke re, asuk ebeke anek motok karok oba tha'bokhogon la'isikhe.

⁵¹Itithogon tha'bokhogon la'isikhe mekeat he, at Yesus nen, “Huk huk! Arat o,” iluk, ap etnogo asuk iki hakhalok nen, hunetdisikhe.

⁵²Itithogon hunetdisikhesik at Yesus nen, it ap Allah iteerek inougi koktek inom, it Allah ai halek therogo welageikharek meke inom, it ap inarluetek inom, at ebe hakhauwogoluk wagoukha meke tha'bokhogonat men yogeisasikhe, “Ap iki abusak waganhunem hageinabi ageikharek hak, hit nen an itithogonat haknabuogoluk karok inom, payuk inom, wolok wagap yi re!

⁵³Hibiku-yogokuat Allah ai halekma an hit ninom dogolik haknakhidek welagasip meke re, yogotak yi anek, o mum ite welagarek meke etnogo obatne agama nen, hit nen haknabusak tak-tak oba arat wagap yi o,” iluk yogeisasikhe.

⁵⁴At Yesus nen itithogon yogeisasikhemo, it nen at ebe hakhasukhasik nen, ap Allah iteerek inoe kok meke etnogo aila wolok lagunem, at Petrus etnogo yabokane inoporlik huyo'bo walegat lageikhe.

⁵⁵Itithogon laga lageikhesik, ap kok etnogo agokutlu akhuni hetu mokaldiluk thogei isakhekho hurek werekma, inakla hurek lageikhe.

⁵⁶Hurek werekma hetu amulok yago dageisinem, at horlak inatuaneke ageikhe ileken Petrus lakhasikhesik nen, ileken oba durlu dogolik men yogeisasikhe, “Ap yi meneke, at Yesus inom welageikha mekeat o,” iluk yogeisasikhemo

⁵⁷at Petrus nen la'belhe dogolik, men yogokhikhe, “Dek o. Horlak yi! Ap iti ebe an nokodek o,” iluk yogokhikhe.

⁵⁸Itithogon yogokhikhesik oba nen, welageidegat, ap ageikhe nen Petrus ileken halok nen, men yogokhikhe, “Hat yi, it mekeat apigi,” iluk yogokhikhe mekeat, at nen, “Noe. An dek o,” iluk yogokhikhe.

⁵⁹Itithogon yogokhikhemo yabokane satu jam hakene welagoukhasik nen, ap ageikhe nen ane obatnerogon it akhuni emenogo men yogeisasikhe, “Ap yi ebe Galilea mekeatma, eberogonat Yesus inom nekhe lageikha mekeat o,” iluk yogeisasikhemo,

⁶⁰at Petrus nen, “Noe! Hat egen iti, nikithogon meke egen. An nokodek o,” iluk isi korlek eranogoat ayam ane isikhe.

⁶¹Isikhemo nen, Yesus elokhe hebenokhogon ileken Petrus lakhugunem, at Petrus akla nen, men apasikhe, “Eiye! Yesus nen an yoknekhe dogolik, O yogotak thue ayam ane aban igidek werek korlek, hat nen, Yesus nokodek o, iluk,, hiki henagan oba la'belnabigin, iluk yoknekhe meke etnogo ebe arat la'belhi yi,” iluk akla ebekhikhe.

⁶²Akla ebetdiluk itikman dukhisikhesik nen, de motok kogat etaiken hisogo de ageikhe.

⁶³At Petrus itithogon de aga korlek, it ap Yesus ebe hago welagoukha meke emenogo nen inane sagun yogokhik, tugi wakhik, hagakhukha. Itithogon hagakhe dogolik,

⁶⁴ileken labetdiluk nen, “Tha nen hakhe nogo. Yoknisan ta!” iluk yogokhik,

⁶⁵inane doalegat sagun ekarli wakhik, ekhe lagoukha.

⁶⁶Itithogon yogokho werekma o wi isikhemo nen, ap Yahudi inarluetek emenogo men, Allah iteerek meke inougi koktek meke men, ap Allah ane holal waganek iteerek meke men, natogokhukha. Natogokhukhasik nen, wene Allah ane hasik erlo pilinekharekma etoma werekma, Yesus wolok inoba ukisukhama

⁶⁷it nen men yogokhukha, “Allah nen Kristus ayoko 'biluk la'isigin isikhe etnogo harat a? Hat halok he, yoknisan o,” iluk yogokhukhama, at Yesus nen, men yogeisasikhe, “An nen yokhisugunem he, eberogonat iluk hinakla hutdugun a?

⁶⁸Nen, an nen hinok wokhisugunem, oko yoknisugun a? Dek o,” iluk yogeisasikhesik, ageikhe men yogeisasikhe,

⁶⁹“Hurli yogotak yi nen, yabokane an nopase Allah obatneak yi meke ti meke hagasusak anek etnogo iki ebeke kogat hurek dogogin o,” iluk yogeisasikhemo,

⁷⁰it tha'bokhogonat nen, men yogokhukha, “Halok he, hat Allah a'but a?” iluk yogokhukhama, at Yesus nen, “Hit hinekaerek nen egep itiat o,” iluk yogeisasikhemo,

⁷¹it nen, men yogokhukha, “Akhuni nen at weak hagakhunem inileken hega meke nen wene pakhogon uagaluk nenaluk therisik dogogun nogo. Wene at ekaerek nen ekhe meke arat ninasuk holho ha yoma re!” iluk isukha.