Read Mid Grand Valley Dani Lukas 24 Bible Online

Lukas 24 - Mid Grand Valley Dani bible

Lukas 24

¹Iniki 7 baga Allah hasik werlegat welagoukhasik, hubuluke hari Minggu baga huben siakhogonat it humi emenogo nen apusu tugurogo 'bisukha meke emenogo wolok nen, oila warek 'bisukhama etnogo wagoukha.

²Wagoukhasik inileken 'bikhasukha meke, oila thu helekit meke tetnokhogon larogo 'bisukha etnogo dipilogo la'isukhama thu hualek werekma inileken hasukha.

³Hasukhasik inebe oila ukisukha meke re, at ninoe Etagapogot Yesus warek ebe dekma inileken hasukha.

⁴Warek ebe dekma hasukhasik nen, “Yi nikithogon hagatlagama,” iluk inobakha palatluk inakla munini ebekhunem, ap inebe pere inasu a'bi'bal weak meke ugu, it humi inil oba eranogo ka nen heat inalilu melasi agoukha.

⁵Wagoukhama nen, it humi emenogo inayuk nen inut thomarek werekma, it ap pere eranogo nen humi emenogo men yogeisasukha, “Hit he, at iluk welagarek meke etnogo akhuni warek meke welageikharekma nenaluk herakhe lagap.

⁶At ebe yoma dek o. Allah nen ilugutdekhemo o.

⁷At alep hit hinom o Galilea dogolik, men yokhisekhe meke etnogo hinakla ebetni. At nen, An abat itaklasi agagi etnogo nasuagaluk nebe ap weak meke iniki baga 'banumo, o baga meldaniluk nasumo, niki pere warek dogoluk nen, niki ageikhe yi baga nen niluk asigin o, iluk yokhisasikhe etnogo hinakla ebetni o,” iluk yogeisasikhemo,

⁸it humi emenogo yabokane wene Yesus nen yogeisasikhe meke etnogo inakla ebekhukha.

⁹Inakla ebetdiluk, oila etoma nen inapuke uma lagoukhasik nen, it ap inebe 11 oba emenogo men, it inagarlak lak ebetlake emenogo men, pilinogo yogeisa agoukha.

¹⁰It humi emenogo inebe Maria ai Magdala meke etnogo men, Yohana men, Maria Yakobus agosa men, humi ebetlake emenogo inomat inebe tha'bokhogonat nen pilinogo Yesus agarumi la'isagaluk inayoko 'bisikhe meke emenogo yogeisa agoukha.

¹¹Itithogon yogeisa agoukha mekeat he, it emenogo eberogonat iluk inakla ebekhidek. Inekalat iliogei, iluk apasukha meke re,

¹²at Petrus etnogo anek, metokhogon melageikhesik dukhiluk, pirlirli oila warek 'bisukhama etnogo ileken 'bikha lageikhe. Lageikhesik ut thoma iluk ileken kolakhasikhe meke re, su kain lenan meke ebe warek yilogo 'bisukha meke etnogo anek nokorlek werekma hasikhe. Werekma ileken halok nen, “Yi nikithogon hagatlaga. Nayuk o,” iluk akla eberik uma wageikhe.

¹³O iti dikeneat Yesus agarumi ane waganhe lagoukha meke emenogo inebe pere o Yerusalem nen o etaga Emaus etoma, 3 jam hakene wageikharek oba wisuogoluk wagoukha.

¹⁴Waga dogolik, yi meke ti meke tha'bokhogonat hagatlageikhe meke emenogo abok pilinirik wagoukha.

¹⁵Wene abok pilinirik waga dogolik, at ageikhe nen, at ageikhe yogokhik, at ageikhe nen, at ageikhe yogokhik, ilik wagunem at Yesus inoado hakha ageikhesik inomat wagoukha.

¹⁶Inom wagoukha meke re, it ap eranogo nen ekagat hutdinogo iluk inileken agot ageikhemo, ebe ekagat hutdigidek.

¹⁷Hutdigidek wagunem, at Yesus nen, it eranogo men yogeisasikhe, “Hit hipisak holagarlemke laga dogolik, wene nena wene ilik wagap lagap,” iluk yogeisasikhemo inelokhoken damutdiluk huk agoukha.

¹⁸Huk agoukhasik nen, it eranogo, at ageikhe etaga Kleopas nen, men yogokhikhe, “Wene ahe yiat hagatlaga iti, it ap huso meke o Yerusalem witluk elanma hasik werek meke aperek tha'bokhogonat inilu mekeat he, hat yi anek hokodek welaganma higi,” iluk yogokhikhemo

¹⁹at Yesus nen, “Wene iti nikithogon hagatlaga meke egen,” iluk yogokhikhemo, it eranogo nen, men yogokhukha, “Ap etaga Yesus, ai Nazaret meke iti, ebe Allah ane yogeisekherek mekeat dogolik, Allah il oba, nit akhuni tha'bokhogonat ninil oba, wene yogeisigik, yi meke ti meke hagakhik, obatnerogo hagakhe laga mekeat he,

²⁰it ap Allah iteerek meke inougi koktek inom, nit ninougi koktek inom, wene oba 'biluk o baga meldiluk wasuagaluk iniki baga 'begama wakha o.

²¹Nit akhuni Israel meke, at nen tilninabigin iluk ninakla apekhe lago mekeat he, eiye! Itithogon arat hagatlagasikmo nen, niniki pere noge ogo yi o.

²²Nen, it humi nit meke aperek nen ninakmaken lagabi ageikhaat o. It iti huben siakhogonat oila warek 'begama wageikha meke re,

²³ebe warek etnogo dekma hega o. Ebe dek nen inileken halok lageikhasik wene yoknisekhe dogolik, Malaikat pogot oba meke nen, Dek o. At ebe iluk agama, iluk yoknisegama wago, iluk, itithogon egama ninakmaken laga o.

²⁴Nen, nit ninagarlak lak aperek oila warek 'begama iti 'bikha wageikha meke re, ebe dekma nen, Humi yoknisa lageikha etnogo eberogonat higi, iluk, Yesus ebe inileken higidek lageikhaat o,” iluk Yesus yogokhukha.

²⁵Itithogon yogokhukhama, at Yesus nen, “Eiye! Hinebe kepu a? Ap Allah ane yogeisekhe lagoukha meke emenogo nen wene tha'bokhogonat yogeisekhe lagoukha etnogo eberogonat iluk hit ibat hutdu'buk welagap yi re!

²⁶At Kristus Allah nen ayoko 'bisikhe etnogo, yi aik ti aik higidek hogorasusak a? Dek o. Hugunem nen hogorasusak o. Hit nen egep iti hagasusak tak-tagat hagakha o,” iluk yogeisasikhe.

²⁷Itithogon yogeisasikhesik nen, at ekaerek hasik Musa nen holal waganhikhe emenogo hurli nen logat, it ap Allah ane yogeisekhe lagoukha meke nen holal waganhukha emenogo, tha'bokhogonat hutukhogon pilinerogon yogeisasikhe.

²⁸Itithogon yogeisasikhesik, o Emaus wisuogoluk wagoukha etnogo arat asi agoukhasik nen, at Yesus holak piokthegat wisigiluk negen hagakhikhe.

²⁹Itithogon hagakhikhemo it ap emenogo nen, men yogokhukha, “A! O hi asigiluk, mo arat korokhogon laga yoma re, ninom yoma noge uok o,” iluk, hakhasukhama inom noge uogoluk uma ukisukha.

³⁰Ukisukhasik inom hipiri nuogoluk nen hurek lageikhesik hipiri roti meke ikimo waganhikhesik nen, Allah heagei warogo kusogo it emenogo wogeisasikhe.

³¹Itithogon hagakhunem, it emenogo alep inileken amukhak thalageikhe meke 'buka lageikhesik meke nen, ekagat hutdisukha. Ekagat hutdisukha meke re, at ebe it inakla nen ka laga heat nalageikhe.

³²Itithogon nalageikhemo, it-it men isukha, “Eiye! Holagarlem waga dogolik nen, wene Allah ane holal waganek meke pilinogo yoknisekhe korlek, ninakla arleken atluk ninakla kagouk ekhe etnogo dek?” iluk isukha.

³³Itithogon isukhasik nen, huk welageidegat, it etnogo ipisagat metokhogon melatluk inapuke o Yerusalem lagoukha. Lagoukha meke, at Yesus agarumi inebe 11 emenogo men, inagarlak lak hetnake men, inom natogotdiluk men ugunem hisa lagoukha,

³⁴“Yesus Simon elokhoma winam atluk ileken hekhe iti, Allah nen eberogonat ilugutdekhemo werek,” iluk wene pilinekhunem lagoukha.

³⁵Lagoukhasik, it inebe pere eranogo nen holagarlem waga dogolik Yesus inom hagakhukha meke inom, hipiri kusogo melageisugunem ebe hutdisukha meke etnogo inom, motok pilinerogon yogeisasukha.

³⁶Wene etnogo aban pilinogo isinem, at Yesus ebe ka nen heat inakla melageikhesik nen, “Nagarumi. Hinagot akma,” iluk heagei warinakhunem,

³⁷it emenogo inakmaken lagoukhasik nen, “Yi mokat a?” iluk inayuk agoukha.

³⁸Inayuk motok agoukhama, at Yesus nen it agarumi men yogeisasikhe, “Hit nen, nenaluk hinayuk atluk eberogonat apigidek hinetaiken pere welagap.

³⁹An nebeat o. Niki nisok yoma hinileken 'bikhani! An he, nino men, noak men, werek iti hak, it mokat iti itithogon motok dek. Halok he, hiniki hakniigik, hinileken niigik, hagakhe dogolik, Yesus ebeat, iluk hinakla apani o,” iluk,

⁴⁰itithogon yogeisekhe dogolik, at iki isok emenogo inugurisasikhe.

⁴¹Itithogon inugurisugunem, it emenogo nen, “Eiye!” iluk hogorakhe dogolik, inakla arleken nen, eberogonat iluk aban hutdigidek werekma, at nen it emenogo yogeisekhe dogolik, “Hit hipiri ageikhe yoma 'begepma a? Dek a,” iluk yogeisasikhemo,

⁴²it nen ikan werago palek meke ageikhe wogokhukhama,

⁴³at nen waganhikhesik, it emenogo inil obaat nasikhe.

⁴⁴Nalok nen, it emenogo men yogeisasikhe, “An hit ninom dogolik yokhisekhe dogolik, An hagatnabugun meke holal Musa nen waganhik, ap Allah ane yogeisekhe lagoukha meke emenogo nen waganhik, it aperek nen buku Mazmur oba waganhik, holal waganogo 'bisukha iti tak-tagat, an arat hagatnabugun, iluk yokhisekhe lagei etnogo ebe arat hagatlaga yi o,” iluk,

⁴⁵Allah ane holal waganek hutduagaluk, it emenogo wene inetaiken kagalogo yogeisasikhemo hutdisukha.

⁴⁶Itithogon inetaiken kagalogo yogeisekhe dogolik, “Allah nen Kristus ayoko 'biluk la'isigin isikhe meke holal men iluk waganek werek, Yi aik ti aik hilik-hilik watlatluk nen, iki pere warek dogoluk iki ageikhe baga yi nen, watlatluk lageikharekma nen iluk asigin o, iluk holal waganek werek.

⁴⁷Nen, ageikhe men iluk holal waganek weregat, Hit akhuni weak hagakhe lagap meke iti, here'isalok hinbabut hebelagap halok he, Allah nen thagalogo degetdigin o, iluk, at etaga palogo wene ekhe dogolik, erlo o Yerusalem hurli nen yogeisilik, logat hurli o yi ai ti ai akhuni inukuloak etaga dopok motok yogeisilik laga dogono, iluk Allah ane holal waganek weregat o.

⁴⁸Wene holal waganek werek iti hak, ebe hagatlaga meke hit hinileken hegep meke nenat, it akhuni yogeisilik laga dogono.

⁴⁹Nen, an nopase nen hit wokhisagein, iluk abok yokhisasikhe etnogo, yogo. An nenat hinoba usa'isasigin o. Meke re, Allah obatne pogot oba nen hinoba aban usa'i ageidek werek korlek ya re, hinebe o kota yomaat dogono,” iluk wene warisasikhe.

⁵⁰At Yesus nen wene itithogon warisasikhesik, it agarumi emenogo o kota kokma nen wogosik dukhisikhesik, o Baitania etoma lageikhe. Lageikhesik, iki lia'iluk nen, “Allah nen thethisik dogolik hanothinakhe dogoak o,” iluk heagei warinakhikhe.

⁵¹Itithogon heagei warinakhe korlek eranogoat, it eta werek korlek, Allah nen, at ebe lekhogon pogot oba wolok dageisikhe.

⁵²Itithogon dageisinem, it agarumi emenogo initibagal yukukhogon hogoratuluk nen, inakla arleken kokhogon akhilik, o Yerusalem inapuke wagoukha.

⁵³Wagoukhasik, o Allah ai halekma anek dogolik, Allah hogorakho motok welagoukha.