Read Mid Grand Valley Dani Lukas 3 Bible Online

Lukas 3 - Mid Grand Valley Dani bible

Lukas 3

¹Ap kok etagapogot Kaisar Tiberius iti akhuni Roma meke tha'bokhogonat at iki baga hagasik 15 tahun werek korlek iti hurliat, ap Pointius Pilatus iti o propinsi Yudea ebe gubernur welageikhe. Nen, ap Herodes iti ebe kok dogolik, o Galilea eloka etoma hagasik welageikhe. Nen, ap kok Herodes agot Filipus iti ebe kok dogolik, o Ituria etoma inom, o Trakhonitis etoma inom, hagasik welageikhe. Nen, ap Lisanias iti ebe kok dogolik, o Abilene etomaat hagasik welageikhe.

²Inougi koktek pemerintah hasik it eta werek korlek, Allah hasik, ap Hanas Kayafas ipisak Allah iteerek meke inougi kok welagoukha. Itithogon werek korlek, ap Zakharia a'but Yohanes etnogo o limo akhuni dekma etoma werekma, Allah nen wene ageikhe yogokhikhe.

³Itithogon yogokhikhemo, at Yohanes etnogo o Yordan eloke etoma ya ta nekhe dogolik, akhuni yogeisekhe dogolik, men ekhe lageikhe, “Wene hinoba meke Allah nen thagalogo degetduagaluk, hit weak hagakhe lagap meke iti thogotdisalok, hinobabut hebelatni. Hinobabut hebelasumo, an nen ima usa'inagakhe dogogin o,” iluk, yogeisilik nekhe lageikhe.

⁴Itithogon yogeisilik nekhe lageikhe iti, ap Yesaya, Allah ane yogeisekhe lageikhe meke etnogo nen ekhe dogolik, “Ap ageikhe o limo akhuni dekma etoma ane naik ekhe dogolik, Eiya. Ninoe Etagapogot wisiginmoke holak hanorogo yakhik, korlo meke mothogon yakhik, yakhe dogoni o, iluk waisiliogo.

⁵Hutla halok, punhogo tak-tagat digik, tom halok, ukuleken halok, tamelogo tak-tagat digik, holak korlo-arlo werek halok, moretdigik, hut arlo halok, enago 'bigik, hagakhe dogoni o.

⁶ Itithogon hagakhep halok, Allah nen akhuni tilninabigin meke ageikhe la'i agunem hinileken hugun o,” iluk, Yesaya nen holal waganogo 'bisikhe meke tak-tagat, at Yohanes nen itithogon yogeisilik nekhe lageikhe iti.

⁷Itithogon yogeisilik nekhe lageikhemo, it akhuni emenogo motok doalegat ima usa'inabuagaluk Yohanes oba natogosi aga lagoukha meke men yogeisekhe lageikhe, “Hit warlo pelal nen itago meke yomarani! Hit he, Allah akla aga apik dageigin etnogo hinoba 'bisinem lo erlok lugun iluk, tha nen husupi yokhisekhe. Erlok dek o.

⁸Halok he, hinakla ebetdiluk, weak hagakhe lagap meke here'isalok hinobabut eberogonat hebelaga iluk ekagat asuak nen mothogon hagakhe dogono o. Nen, hinakla nen, Abraham iti nit ninopase, iluk apugup o. At Allah nen Abraham a'buri negen hagatlasuagaluk helekit yi meke erlok hagasusagat o, iluk yokhisigi iti.

⁹O erlo dopok eken hano meke ikidek halok, mukhogo hetumo la'isagaluk pisue o omaken oba pakpakthek motok werek o,” iluk yogeisasikhe.

¹⁰Itithogon yogeisekhe lageikhemo, it akhuni doalegat emenogo nen, men yogokhukha, “Halok he, nit ninobabut nikithogon hagasusak?” iluk yogokhukhama,

¹¹at Yohanes nen, men yogeisasikhe, “Ap tha nen, inasu upu baga meke peretek werek halok he, at ageikhe asu dek meke ageikhe wogosusak o. Nen, hinapiri werek halok he, itithogonat yomageisausak o,” iluk yogeisasikhe.

¹²Itithogon yogeisasikhemo nen, it ap pemerintah hasik uang kino iluk waganharek meke Yohanes oba wagoukhasik, men isukha, “Nit meneke, ima usa'inanok nen iluk wago, noe. Nit ninobabut nikithogon hagakhe dogogun,” iluk, itithogon yogokhukhama,

¹³at Yohanes nen, men isikhe, “Hit nen oko waganhe dogolik, hinakla nen kagalogo ageikhe oba dukhogon waganhidek, weat, Yigithogon waganhe dogono, iluk yokhisega meke itiat mothogon waganhe dogono,” iluk yogeisasikhe.

¹⁴Itithogon yogeisasikhemo, it ap tentara meke wagoukhasik nen, men yogokhukha, “Nit meneke, ninobabut nikithogon hagakhe dogogun,” yogokhukhama, at Yohanes nen, “Akhuni inameke wokhisoagaluk hinane obatnerogon yogeisigik, hinekalat wene inoba 'biluk inauang horlageik, hagasusak motok dek o. At he, yabu hagakhe lagap tak-tagat, oko gaji wokhisiliogei iti, Erlok woknisega, iluk hinetaiken yamukhogonat waganhe dogono o,” iluk yogeisasikhe.

¹⁵Itithogon yogeisasikhemo, it akhuni emenogo nen inakla ebekhe dogolik, “Allah nen ap ageikhe tilninabuagaluk meldiluk la'isigin iluk, therogo welago etnogo, at Yohanes yiat a?” iluk inakla apekho werekma,

¹⁶at Yohanes nen men yogeisasikhe, “An nebe yekerek nobatne dek meke nen, we, ima anek usa'inagakhe lagei o. Meke re, at ageikhe kok obatneak meke yabokane wisigin o. At ebe witluk, at nen ima usa'inagu hak, Allah Agoreke inom, hetu inom, hinoba usa'inagei wisigin o. Ap ebe kok obatneak iti nen, at isok agot herle warek meke, an nebe yekerek meke nen hisalusak erlok dek o.

¹⁷Gandum eken abubuleke hulusak hasik, than oba huphogon la'igin meke, at iteerek meke ikimo werek iti. Karelusak oba tak-tak asi aga halok, hano meke halok, karelogo 'bekherekma hanoma 'bigik, abubuleke halok, karelogo hetu nagulasusak dekma etnogo baga la'isigik, hagasigin o,” iluk yogeisasikhe.

¹⁸Hano wene etnogo akhuni doalegat yogeisekhe dogolik, inasuk itithogon warik nekhe lageikhe.

¹⁹Inasuk itithogon warik nekhe dogolik, at kok etagapogot Herodes iti nen agot age etaga Herodias iti iki abusak waganhik, yi weak ti weak doalegat hagakhik, hagarik nekhe lageikhe meke hasik, at inomat asuk wakhikhemo,

²⁰at Herodes etnogo weak hagarik waga lageikhesik, yabokane oba dukhogon, Yohanes ebe iki herle warogo nen, o akhuni iniki herle warogo 'bisegarekma kola'isikhe.

²¹At Yohanes nen akhuni tha'bokhogonat ima usaginakhe dogolik, at Yesus ima usa'isikheat. Ima usa'isikhemo, at Yesus ebe nen sembayan isi korlek, pogot kagoukhogon

²²Allah Agoreke thue merpati yogeik negen hitluk oba duk i usa'ageikhe. Itithogon hagakhikhemo, pogot oba nen ane men isikhe, “Hat hebe an na'but netaiken hunik meke. Hat hobasik noba hotok ekhe o,” iluk isikhe.

²³At Yesus ebe umur 30 tahun ageihesik nen, yi meke ti meke hagarik nekhe dogeigiluk iki arat hakhasikhe. Nen, at ebe it akhuni nen, Yusuf a'but iluk apasukha. Nen, Yusuf iti, Eli a'but.

²⁴Nen, Eli iti, Matat a'but. Matat iti, Lewi a'but. Nen, Lewi iti, Malkhi a'but. Malkhi iti, Yanai a'but. Yanai iti, Yusuf a'but.

²⁵Yusuf iti, Matica a'but. Matica iti, Amos a'but. Amos iti, Nahum a'but. Nahum iti, Hesli a'but. Hesli iti, Nagai a'but.

²⁶Nagai iti, Maat a'but. Maat iti, Matica a'but. Matica iti, Simei a'but. Simei iti, Yosekh a'but. Yosekh iti, Yoda a'but.

²⁷Yoda iti, Yohanan a'but. Yohanan iti, Resa a'but. Resa iti, Zerubabel a'but. Zerubabel iti, Sealtiel a'but. Sealtiel iti, Neri a'but.

²⁸Neri iti, Malkhi a'but. Malkhi iti, Adi a'but. Adi iti, Kosam a'but. Kosam iti, Elmadam a'but. Elmadam iti, Er a'but.

²⁹Er iti, Yesua a'but. Yesua iti, Eliezer a'but. Eliezer iti, Yorim a'but. Yorim iti, Matat a'but. Matat iti, Lewi a'but.

³⁰Lewi iti, Simeon a'but. Simeon iti, Yehuda a'but. Yehuda iti, Yusuf a'but. Yusuf iti, Yonam a'but. Yonam iti, Elyakim a'but. Elyakim iti, Melea a'but.

³¹Melea iti, Mina a'but. Mina iti, Matata a'but. Matata iti, Natan a'but.

³²Natan iti, Daud a'but. Daud iti, Isai a'but. Isai iti, Obed a'but. Obed iti, Boas a'but. Boas iti, Salmon a'but. Salmon iti, Nahason a'but.

³³Nahason iti, Aminadab a'but. Aminadab iti, Admin a'but. Admin iti, Arni a'but. Arni iti, Hezron a'but. Hezron iti, Peres a'but. Peres iti, Yehuda a'but.

³⁴Yehuda iti, Yakub a'but. Yakub iti, Ishak a'but. Ishak iti, Abraham a'but. Abraham iti, Terah a'but. Terah iti, Nahor a'but.

³⁵Nahor iti, Serug a'but. Serug iti, Rehu a'but. Rehu iti, Peleg a'but. Peleg iti, Eber a'but. Eber iti, Salmon a'but.

³⁶Salmon iti, Kenan a'but. Kenan iti, Arpakhsad a'but. Arpakhsad iti, Sem a'but. Sem iti, Nuh a'but. Nuh iti, Lamekh a'but.

³⁷Lamekh iti, Metusalah a'but. Metusalah iti, Henokh a'but. Henokh iti, Yared a'but. Yared iti, Mahalaleel a'but. Mahalaleel iti, Kenan a'but.

³⁸Kenan iti, Enos a'but. Enos iti, Set a'but. Set iti, Adam a'but. Adam iti, Allah a'but.