Read Mid Grand Valley Dani Lukas 7 Bible Online

Lukas 7 - Mid Grand Valley Dani bible

Lukas 7

¹At Yesus nen akhuni doalegat emenogo wene itithogon tha'bokhogonat arat yogeisalok nen, o Kapernaum uki ageikhe.

²At uki ageikhemo, etoma ap tentara meke inoe kok ageikhe atuaneke etaiken hunik meke oba u motok weak nen, watlasusak negen welageikhe.

³Itithogon werekma, ap tentara meke inoe kok etnogo Yesus abok asuk holhikhesik nen, atuaneke etnogo hagasisuagaluk, ap inarluetek Yahudi meke aperek yogeisalok nen, “Yesus ayoko lani o,” iluk la'isikhe.

⁴Itithogon la'isasikhemo, it emenogo Yesus oba wagoukhasik nen, inane obatnerogonat men yogokhukha, “At ap tentara meke inoe kok iti akhuni nit meke akmutnisigik, at nenat o nit sembayan ogorekma haldinanhik, hagakhikhesikmo iti, at atuaneke iti u hagasi lausak o,” iluk itithogon yogokhukhama,

⁵

⁶Yesus ebe inom lagoukha. Uma lagoukhasik ukuogoluk horokhogon asi lagoukha hak, ap tentara meke inoe kok etnogo nen agarumi aperek wene Yesus yogosi loagaluk la'isa ageikhe. La'isa ageikhemo, it emenogo anek Yesus oba wagoukhasik nen, men yogokhukha, “Noe. Nit ninoe nen, At isok alomarogo wisunogo. An ap yekeregatma, at an naila ukisusak erlok dek o.

⁷Nen, an nen, at oba lausak iluk apigidegat o. Erlok dek o. We, at ane anek umo nen, an natuaneke yi hano asigin o.

⁸An meneke, nougi koktek meke inapma dogolik, inane holhik, nen an nagarumi tentara meke iti an napma dogolik, an nane holhik, hagakhorethekma nogo nen, an nen, at ageikhe, Lan o, iluk yogokhe halok lagarek. Nen ageikhe. Eme, iluk yogokhe halok he, wagaregat o. Nen, natuaneke ageikhe, Yi hagasin, iluk yogokhe halok he, hagakheregat o, iluk yokhesuagaluk la'inani agama wago,” iluk yogokhukha.

⁹Yogokhukhama at Yesus nen, men isikhe, “Ap iti nayuk e,” iluk, hogoratluk nen, elokhe dagakhogon akhuni doalegat oporlik lagoukha meke emenogo men yogeisasikhe, “Ap iti etaiken an noba hakotdekhe iti hakene, it akhuni Israel meke ageikhe inetaiken itithogon hakotdisinem hisegerek dek meke nayuk e,” iluk isikhe.

¹⁰Itithogon yogeisasikhemo, it yoko wagoukha meke emenogo inaila lagoukha hak, ap it inoe tentara meke atauneke meke etnogo arat hano ageikhesik werekma inileken ha lagoukha.

¹¹Itithogon hagatluk nen, yabokane at Yesus o ukul etaga Nain lagaluk lagunem, at agarumi ane waganhe lagoukha meke emenogo men, akhuni hetlake inebe motok doalegat men, oporlik lagoukha.

¹²Laga lagoukhasik, leget 'bakleget holagape palek oba asi lagoukha hak, elege ageikhe ebe arligat itago meke agosa thoge werekma watlageikhemo akhuni o ukul etnogo meke inebe doalegat elege warek o yerogo wolok agosa inom dukhi agunem

¹³ileken lageisasikhe. Lageisasikhesik ninoe Etagapogot nen, agosa etnogo ileken halok akmu ageikhesik nen, men yogokhikhe, “Neru. De aga 'buk o,” iluk yogokhikhesik nen,

¹⁴elege warek o yerogo wolok wagoukha etnogo alilu lageikhesik nen, iki hakhasikhe. Iki itithogon hakhasikhemo akhuni nen warek o yerogo wolok wagoukha meke emenogo huk agoukha. Huk agoukhama at Yesus nen elege warek etnogo yogokhe dogolik, men yogokhikhe, “Na'but yi! Hiluk asin, iluk yokhekhe lagei o,” iluk yogokhikhemo nen

¹⁵elege watlageikhe meke etnogo iluk ageikhesik hurek dogolik ane isikhe. Ane isikhemo Yesus nen elege etnogo agosa wogokhikhe.

¹⁶Itithogon hagakhikhemo, akhuni doalegat emenogo inayuk agoukhasik nen, Allah hogorakhe dogolik, men isukha, “Ap kok Allah ane yoknisekhe dogogin meke ageikhe ninakla winam aga o!” iluk igik, nen, it aperek nen, “Allah nen a'buri tilninabigiluk waga yi,” iluk igik, isukha.

¹⁷Itithogon isukhasik, wene hagatlageikhe meke iti, o Yudea yi ai ti ai etoma nen piokthek, o aliluke etoma Yesus abok motok wolok dukhisukhama wiagisikhe.

¹⁸Abok wolok dukhisukhama nen, it at Yohanes agarumi ane waganhe lagoukha meke emenogo nen, wene hagatlageikhe meke etnogo at Yohanes yogokhukhama asuk holhikhesik, at nen agarumi inebe pere waisasikhemo wagoukhama

¹⁹men yogeisasikhe, “Ap ageikhe wisigin ekhe lagoukha etnogo harat a? E a, at he, ap ninat meke ageikhe therogo dogogun a, iluk oba hinok wagani lani o,” iluk ninoe Etagapogot oba la'isa ageikhe.

²⁰La'isa ageikhemo, Yesus oba wagoukhasik nen, men yogokhukha, “Ninoe. At Yohanes ima usa'isekherek meke etnogo nen, Ap ageikhe wisigin iluk ekhe lagoukha etnogo harat a? E a, at he, ninat meke ageikhe therogo dogogun a, iluk, oba hinok wagani lani iluk la'inani agama wago,” iluk yogokhukha.

²¹Itithogon yogosi agoukhasik werek korlek itinem, at Yesus nen akhuni u warek meke inom, hinet wakhe lagoukha meke inom, hano hagarinakhik, mokat inobabut weak meke inakla ukisikhesik werekma mukhogo ula'isigik, inileken puk meke hano asuagaluk 'bekelogo hano hagarinakhik, hagakhe lageikhesik

²²Yohanes agarumi wagoukha meke emenogo men yogeisasikhe, “Hit nen, an yigithogon tigithogon hagakhunem hinileken niigik, wene isinem hinasuk holhik, hagakhep meke iti, at Yohanes hutukhogon yogosi lani o. Inileken puk meke 'bekelogo hano ageik, inae la'belek meke holak lageik, inoba u henako haneke inayuk werekma meke hagarinakhunem hano ageik, inasuk dogou meke huakhogon holhik, akhuni warek meke inilugurinakhik, it akhuni inameke dek meke hano wene yakulisigik, hagakhunem hinileken neegep etnogo hutukhogon yogosi lani o.

²³Yogotluk he, Tha nen etaiken pere dek here'anhidek dogogin halok, akla arleken akhekhe dogogin o, iluk yogosi lano o,” iluk yogeisasikhe.

²⁴Itithogon yogeisasikhemo, it Yohanes nen yoko la'isa ageikhe meke emenogo arat lagoukhama nen, yabokane at Yesus nen akhuni doalegat emenogo Yohanes hasik men yogeisasikhe, “Hit he, o limo akhuni dekma etoma nena meke hinileken 'bikhauwogoluk laga lagasip nogo. Hiteka yagareka hisakne nen hubethasinem lageik-wageik hagakho werekma 'bikha luogoluk laga lagasip a?

²⁵E a, at he, nena meke hinileken huogoluk laga lagasip. Ap ageikhe asu hano motok meke ugu werekma 'bikhauwogoluk laga lagasip a? Lakhani! Ap koktek inaila dogolik halogat inasu hano meke ikhigik, inameke yi meke ti meke doalegat hago welageik, hagakharek apigi!

²⁶Halok he, etoma nena meke 'bikhauwogoluk laga lagasip. E a, at he, ap Allah ane yogeisegarek meke ageikhe werekma 'bikhauwogoluk laga lagasip a? Eberogonat itiat o. An nen yokhisak. It ap Allah ane yogeisekhe lagoukha meke aperek welagoukha mekeat he, it iti inetaga erlok dek negen. Mekeat he, at Yohanes iti anek he, etagapogot isiken negenat o.

²⁷ Wene at Allah nen men isikhe, Hat yabokane lanogoluk, hat holak ya'agekhe dogoagaluk, ap ageikhe ayoko 'biluk alebageik la'igima o, iluk isikhemo holal waganogo 'bisukha iti ebe re, at Yohanes hasigat isikhe o.

²⁸Halok he, an nen wene ageikhe yi yokhisak. Akhuni tha'bokhogonat inagosa lak nen itaginabik wagoukha mekeat he, inetaga dek anek. Mekeat he, Yohanes iti anek etaga werek o. Meke re, Allah apma 'biskherekma etoma, at Yohanes etaga dek negen werek mekeat he, it akhuni aperek inetaga dek meke iti inetaga werek negenat o,” iluk yogeisasikhe.

²⁹Itithogon yogeisasikhemo, it akhuni doalegat emenogo men, pemerintah hasik uang kino iluk natogorlogo 'begarek meke emenogo men, at Yohanes nen haganeat ima usa'isasikhemo nogo nen, wene Yesus nen yogeisasikhe meke iti inasuk holhukhasik, “Allah akla nen apekherek meke iti mot motogat o,” iluk isukha.

³⁰Itithogon isukha meke re, it ap Farisi meke men, it ap Allah ane holal waganek yakulisekhe lagoukha meke men, anek, Yohanes nen ima usa'isoagaluk lageidek dogolik Allah nen itithogon hagakhe dogoagaluk akla apasikhe meke etnogo ina'it nen thogotdisalok welagoukha.

³¹At Yesus nen wene ageikhe yogeisekhe dogolik, “It akhuni o yogotak ya baga werek, nena meke oba lisogon yokhisak. Ki hakene werek.

³²It inebe yi inom tak-tak. Yekerugi pasar oba oko waganharekma hurek dogolik, inagarlak lak inom inane la'igik-wa'igik ekhe dogolik, Nit nen etai hit wasuogoluk isa ula'ogo mekeat he, hit ekaka igidegat. Nen de asuogoluk de wene erlo ula'ogo meke re, hit nen de ageidegat, iluk egarek iti hakene hagariogei o.

³³At Yohanes ima usa'isekherek meke wageikhe iti, hipiri men, o anggur eken apusu men, nikidek wageikhesikmo nogo nen, hit nen, Mokat obabut weak meke akla ukekhesik werek o, iluk ekhe lagagip.

³⁴Meke re, an abat itaklasi agagi etnogo anek, hipiri men, anggur eken apusu men, yugunat nilik wagagisikmo nogo nen, hit nen, Lakhani! Ap yi re, hipiri men, anggur eken apusu men, oba la'buk nilik nekhe dogolik, ap pemerintah meke hasik uang kino iluk waganharek meke men, ap weak hagakharek meke men, hunetdakhalok niliogo yi 'bikhani? iluk yoknekhe lagap.

³⁵Itithogon mekeat he, at Allah akla kagalek dogolik hagakherek etnogo, it aperek nen hano apalok, itithogon mothogon hagakhe dogogun halok, iti morat iluk hutdugunat o,” iluk yogeisasikhe.

³⁶At Yesus nen itithogon yogeisasikhesik werekma, ap Farisi meke ageikhe etaga Simon, Yesus ipisak hipiri at aila nuogoluk ayoko 'bisikhe. Ayoko 'bisikhemo aila ukiluk ipisak hipiri nuogoluk, hurek lageikhe.

³⁷Hurek lageikhesik hipiri nasi werekma, he o ukul etoma meke ageikhe weak hagakherethekma abok akhuni inilu meke akhuni nen, “Yesus o ili dogolik hipiri niliogo,” iluk isukhama asuk holhikhesik nen, apusu obasi hano meke oko kogat palogo isoak helekit etaga pualam meke hagarek oba akla ukharlogo wolok wageikhe.

³⁸Wolok wageikhesik uma ukisikhesik nen, Yesus isok ukutmo oporlik horok-horok wageikhesik nen, etoma metek dogolik de aga lageikhe. De agunem il apusu Yesus isok oba usa'isikhemo nen, isi baga yabokane hokhikhe. Hokhikhesik isok oba heagei ape tharluk wakhikhesik nen, apusu obasi hano meke wolok wageikhe etnogo Yesus isok oba watdisikhe.

³⁹Itithogon hagakhunem, ap Farisi meke nen, Yesus ipisak hipiri nuogoluk ayoko 'bisikhe meke etnogo akla nen men apasikhe, “Ap yi Allah ane yogeisekherek meke dogolepma re, He yi weak hagakherek meke nen iki hakneekhe, iluk ekagat hutdilep o,” iluk itithogon akla apasinem,

⁴⁰at Yesus nen, men yogokhikhe, “Simon. An wene ageikhe yokhesigin,” iluk yogokhikhemo at nen, “Noe. Yoknom o,” iluk yogokhikhemo,

⁴¹at Yesus nen, men yogokhikhe, “Ap inebe pere meke, ap ageikhe auang elanma hasik wogeisekhe lageikhe meke nen wogeisasikhemo inoba palegeke welageikhe. Ageikhe uang kok meke 500 ribu rupiah hakene. Nen, ageikhe 50 ribu rupiah hakene inoba palegeke welageikhe.

⁴²Itithogon werekma, it nen oko wogosusak erlok dek ageikhemo nen, uang waganhukha meke holal waganek iti, at kok etnogo nen therlelogo here'isalok nen, Werlegat horlegep o, iluk yogeisasikhe. Itithogon hagakhikhemo, ap inebe pere eranogo tha hak nen inoe kok etnogo akmurakhikhe apegep?” iluk yogokhikhemo

⁴³at Simon nen, “At ap ageikhe uang doalegat negen oba palegeke welageikhe mekeat, Werlegat horlegen o, iluk yogokhikhe iti nen, akmurakhikhe,” iluk yogokhikhemo, at Yesus nen, “Egen itiat o,” iluk yogokhikhe.

⁴⁴Itithogon yogokhikhesik nen, at Yesus nen elokhe hebenokhogo he etnogo wogokhikhesik nen, men yogokhikhe, “Simon. He yi hileken hegen a? Dek a. An hat haila uki agei mekeat he, hat nen, Hisok oba hosin, iluk, i ageikhe woknekhen dek. Meke re, he yi anek, il apusu nisok oba usakhesik nen, isi baga hotnakhe o.

⁴⁵Nen, hat nen heagei hape tharluk watnakhen degat o. Meke re, he yi anek, an uki agei hurli nen, nisok oba heagei ape tharluk watnakho motok werek o.

⁴⁶Nen, hat nen an nukuloak oba apusu ageikhe watdanhen dek mekeat he, he yi anek apusu obasi hano meke nisok oba watdanhe o.

⁴⁷Itithogon hagakhe iti nen, an nen hat ageikhe yokhesik o. At he yi nen weak doalegat hagakhe laga mekeat he, at akla nen, Yesus nen thagalogo degetdekhemo, iluk kokhogon akmutnakhe iti baga ekagat hagatlaga o. It akhuni weak herlekha'bugat hagariogei meke, Allah nen thagalogo degetdisinem, herlekha'bugat negen inakmurinakharek o,” iluk yogokhikhesik

⁴⁸at he etnogo men yogokhikhe, “Weak hagakhe lagan meke iti, arat thagalogo degetdigi o,” iluk yogokhikhe.

⁴⁹Itithogon yogokhikhemo, it akhuni Yesus inom hurek dogolik hipiri nasukha meke emenogo, it-it yogeisekhe dogolik, men isukha, “Akhuni weak hagariogei meke thagalogo degetdisiliogo yi, ebe tha hak nen degetdisiliogo apegep,” iluk isi korlek

⁵⁰at Yesus nen, he etnogo yogokhe dogolik, men yogokhikhe, “Hat hetaiken noba hakotdegen iti nen tilhakhi o. Halok he, hakla hanorogon haila lan o,” iluk la'isikhe.