Read Mid Grand Valley Dani Lukas 8 Bible Online

Lukas 8 - Mid Grand Valley Dani bible

Lukas 8

¹At Yesus itithogon hagakhikhesik nen, welageidegat, yabokane hano wene Allah apma 'bisekherek wene etnogo, o ukul kok inom, o 'bugurlagat meke inom, yogeisilik nehke lageikhe. Yogeisilik nekhe dogolik, at agarumi inebe 12 emenogo inom,

²it humi aperek mokat obabut weak meke inakla ukilukmo mukhogo ula'isigik, inoba u meke hano hagarinakhik, haganeat hagarinakhikhe meke aperek men, inom nekhe lagoukha. Humi eta ageikhe, he Maria ai Magdala ekhe lagoukha meke, alebat mokat inobabut weak meke inebe 7 nen akla ukiluk werekma, at Yesus nen mukhogo ula'isasikhe meke iti men,

³nen, ageikhe he Yohana ap kok Herodes ameke yi meke ti meke iki baga dogolik hagakhe lageikhe meke etaga Khusa iti age men, he Susana men, nen ageikhe, it humi ebetlake doalegat men, inameke hago welagoukha baga Yesus agarumi inomat yomageisilik nekhe lagoukha.

⁴At Yesus o etoma werekma, akhuni motok doalegat o yi ai ti ai nen, at oba natogosi agoukhama, at nen wene oba lisogon men yogeisasikhe,

⁵“Ap ageikhe ai hilogo la'ekherek meke ai hilogo la'igiluk dukhisikhe. Dukhisikhesik la'ilik lagunem, ai aperek holagarlem usa'isikhe. Itithogon usa'isikhemo akhuni laga dogolik, inisok nen al debelogo 'bilik lagoukhama, thue hitluk nekherek meke wageikhesik tha'bokhogon haumhogo nasikhe.

⁶Nen, ai aperek helekit oba usa'isikhe meke re, ibat aku hurlelhikhesik nen, agat apusu dek nen puk ageikhe.

⁷Nen, ai aperek oka arlok weakma usa'isikhe. Usa'isikhemo oka arlok meke iti inom opakimo aku hurlelhikhesik, oka arlok weak meke iti kok aga dogolik, aku hano meke iti akurladap ageikhesik keken ageikhe.

⁸Nen, ebetlake agat mirlimo usa'isikhe meke re, hurlelhikhesik kok atluk, erlo tomok eken 100 oba nen irik lageikhe,” iluk yogeisasikhe. Itithogon yogeisalok ane kokhogonat ekhe dogolik, “Hinasuk holusak halok he, hanorogon holini o,” iluk yogeisasikhe.

⁹Itithogon yogeisasikhemo, at agarumi ane waganhe lagoukha meke emenogo nen, at Yesus men yogokhukha, “Hat nen wene oba lisogon yoknisegen iti, ebe nikithogon meke hasik egen,” iluk yogokhukhama,

¹⁰ at Yesus nen, men yogeisasikhe, “Allah nen apma 'bisekherek wene iti, at akla limago welageikhe meke iti, hit anek wene iti hinilu asubageik iluk pakhogon yokhisausak iluk, akla apasikhe mekeat he, it akhuni ebetlake iti, at Allah nen, Inileken hekhe dogogun meke re, hutukhogon hekhe dogogun dek o. Nen, inasuk holhe dogogun mekeat he, hutukhogon hutdekhe dogogun degat o, iluk isikhe iti tak-tak asuagaluk wene iti oba lisogonat yogeisekhe lagei o,” iluk yogeisasikhe.

¹¹Itithogon yogeisasikhesik, yabokane ageikhe men yogeisasikhe, “Wene oba lisogon yokhisigi etnogo ebe yi. Ai hilogo la'ilik lageikhe igi etnogo, ebe Allah ane itiat o.

¹²Holagarlem usa'isikhe iti ebe, it akhuni aperek Allah ane inasuk holharethekma nen, eberogonat iluk waganhunem, Allah nen inebe tilinabinogo iluk, Iblis wagarethek nen, wene inakla nen henogo wolok lagarek itiat o.

¹³Nen, helekit oba usa'isikhe iti ebe, it akhuni aperek Allah ane iti inasuk holharethek nen, inakla arleken akhekhe dogolik waganharethek nen, inetaikenma omaken yakhidek nen eberogonat iluk iniki pererlagat anek inakla apalok werekma, weak hagasuagaluk inakla kagali agunem, arat kobokhogon thogotdisalok dukhegarek itiat o.

¹⁴Nen, okama arlok weakma usa'isikhe iti ebe, it akhuni aperek Allah ane iti inasuk holharethek nenat, inakla nen, Eiye. Nikithogon hagasigin he, iluk, wene munini ebekhik, Ninameke doalegat dogolep e, iluk inakla ebekhik, agat oba inakla arleken akhausak meke oba ebekhik, hagakharek iti nen, inakla Allha ane iti eken horle ageidek lologo dek agarek itiat o.

¹⁵Nen, agat hanoma usa'isikhe iti ebe re, it akhuni aperek hano wene iti inasuk holharethek nen, inetaikenma motok hutukhogon horlegarethek here'isigidek hago motok dogolik, eken motok doalegat ikherek itiat o,” iluk yogeisasikhe.

¹⁶Itithogon yogeisalok nen, ageikhe men yogeisasikhe, “Akhuni nen isagal yibarlogo isoak abura thebelogo 'bigik, noge egarekma wema baga 'bigik, hagakharek dek. Akhuni uma ukekhe dogolik lia werekma ekagat hoagaluk, isagal yibarlogo isok tilik oba dukhogon 'begarek o.

¹⁷Itithogon 'bisinem, yi meke ti meke limago welagarek meke iti, winam ageik, wene inakla limago welagarek meke iti, thelekma 'bualogo 'bigik, hagasigin

¹⁸iti nen he, wene hinasuk holhe lagap meke iti, hanorogon hutdekhe dogono o. It akhuni inikimo hago werek meke iti, ageikhe oba lapelogo wogeisagein. Meke re, it aperek dek meke iti, inakla nen, Herlekha'bugat ya erlok werek, apiliogei meke iti tilogo horlagein o,” iluk yogeisasikhe.

¹⁹Itithogon yogeisekho werekma, at Yesus agosa men, agarumi men, at oba wagoukha meke, akhuni doalegat inom werek nen, at Yesus oba ukusak dek hagatlageikhe.

²⁰Itithogon hagatlageikhemo it akhuni aperek nen men yogokhukha, “Yesus! Hat hagosa men, hagarumi men, hat hoba wageikha meke okutlu werek o,” iluk yogokhukhama,

²¹at Yesus nen, men yogeisasikhe, “An nagosa nagarumi iti, akhuni Allah ane inasuk holharethek nen, mothogon hagakharek meke itiat o,” iluk yogeisasikhe.

²²Iniki ageikhe baga, at Yesus ebe inom, agarumi ane waganhe lagoukha meke emenogo inom, ku akla ukisukhasik nen, men yogeisasikhe, “I aik ilibaganke ita luok,” iluk yogeisasikhesik italhukha.

²³Italhe dogolik nen, at Yesus noge isikhe. Noge isi korlek, hisakne kogat hubetha ageikhemo, i hoklabu doalegat waga dogolik, i tiakhogon ku akla ukisikhemo, ku etnogo wurladakhogon usagaluk hagakhikhe.

²⁴Itithogon hagakhikhemo, it emenogo nen, at Yesus noge isinem lagoukhasik nen iluguthekhe dogolik, men yogokhukha, “Ninoe! Ninoe! Nit arat i lugun yoma,” iluk yogokhukhama, at Yesus iluk atluk melageikhesik nen, i hoklabu men, hisakne men, wenagakhikhemo palageikhesik motok hapuk isikhe.

²⁵Hapuk isikhemo, at Yesus nen agarumi emenogo men yogeisasikhe, “Hinetaiken noba hakotdiluk welagap meke etnogo, ka lagama nen ekhe lagap,” iluk, itithogon yogeisasikhemo it inayuk agoukhasik nen, it-it ekhe dogolik, “Eiye! Ap yi ebe tha apegep. Hisakne men, i hoklabu men, at ane baga, Dek asin, isinem, ane hologo dek aga iti nayuk o,” iluk hogorakhukha.

²⁶Itithogon iluk, yabokane at Yesus agarumi inom i Galilea yekelek aik ilibaganke o Gerasa etoma ku warogo itali agoukha.

²⁷Itali agoukhasik, arlo baga itali lagoukha hak, ap ageikhe ai ukul iti meke mokat obabut weak meke akla ukisikhemo welageikhe meke, at Yesus oba wageikhe. Ap iti haganeat nen mokat obabut weak meke hibiku-yogoku akla ukisinem, it akhuni aperek nen iki isok pisue omaken oba herle warogo 'bekhe lagoukha mekeat he, herle tirlip-tarlaphogon la'isalok, mokat etnogo nen wolok o limo akhuni dekma etoma laga lageikhesik, yabokane su ugurlek alwurlugat, at aila hanorogo welageidek oila warek meke 'bisegarekma etoma motok dogolik Yesus ebe wagunem ileken lakhasikhesik nen apma hureklasi ukiluk ane kokhogonat men yogokhikhe, “Yesus. Hat Allah Etagapogot a'but yi, an nikithogon hagatnabigiluk wagan,” iluk yogokhunem, at Yesus nen mokat etnogo dukhuagaluk yogokhikhemo, at etnogo nen, “Noe. Weagatnakhun o,” iluk ane a'buarek yogokhikhe.

²⁸

²⁹

³⁰Itithogon yogokhikhemo, at Yesus nen ap etnogo oba hinok waganhe dogolik, men yogokhikhe, “Hat hetaga tha,” iluk yogokhikhemo, ap etnogo mokat inobabut weak meke doalegat akla ukiluk welagoukha iti nen he, “Netaga opaki doalek u hak, Legiun,” iluk yogokhikhe.

³¹Itithogon yogotluk nen, it mokat inobabut weak meke emenogo mukhogo kilinmo herle warogo usa'isegarekma usa'isaunogo iluk inane ina'buarek inane Yesus yogokhukha.

³²Etanem, o etoma tom obake wam motok doalegat konak nasi werekma, it mokat inobabut weak meke emenogo Yesus men yogokhukha, “Wam eloma inakla ukhatlasi luok nen, la'inanin o,” iluk, inane ina'buarek yogokhukha. Itithogon yogokhukhama, at Yesus nen, “I o. Laniat o,” iluk yogeisasikhemo,

³³it mokat inobabut weak meke emenogo, ap etnogo akla nen dukhi lagoukhasik, wam emenogo inakla ukhatlasi lagoukhama, motogat i kat oba lumhogo, i kok yekelekma usa lagoukha.

³⁴Itithogon hagatlageikhemo, it ap wam therogo welagoukha meke emenogo inileken hasukhasik nen, pirlirli, umake yoko lagoukhasik nen, o ukul kokma inom, 'bugurlagatma inom, wene hagatlageikhe meke etnogo motok pilin-palinhogo yogeisa lagoukha.

³⁵Itithogon yogeisa lagoukhama nen, it akhuni nen, “Nikithogon hagatlagunem nen ega,” iluk, inileken huogoluk Yesus oba wagoukha meke, ap mokat inobabut weak meke akla nen dukhisikhe meke etnogo obabut hebelageikhesik asu ugu Yesus apma hurek werekma inileken hasukhasik, inayuk agoukha.

³⁶Inayuk agoukhama, it akhuni aperek Yesus nen hagakhunem inileken hasukha meke nen, men yogeisasukha, “Ap mokat obabut weak meke ukisikhesik welaga etnogo itithogon hano hagakhe,” iluk motok pilin-palinhogon yogeisasukha.

³⁷Itithogon yogeisasukhama, it akhuni o ukul Gerasa meke men, o aliluke meke men, inebe tha'bokhogonat inayuk weak agoukhasik nen, Yesus men yogokhukha, “Yesus. Hat hebe ninom yoma dogosak dek. Lan o,” iluk yogokhukha. Itithogon yogokhukhama, at Yesus ku akla ukiluk ku warogo apuke wageikhe.

³⁸Wisigiluk hagakhunem, ap mokat inobabut weak meke akla ukisikhesikmo mukhogo ula'isikhe meke etnogo nen, men isikhe, “Noe. Nipisagat nekhe dogouok nen, luok o,” iluk, ane a'buarek ane Yesus yogokhikhe meke re, at Yesus nen, “Dek o,” iluk aila la'ekhe dogolik,

³⁹“Haila lan o. Lalok nen, Allah nen hagathakhe meke iti pilinerogo yogeisilik nekhe dogono o,” iluk, itithogon asuk warogo la'isikhemo ap etnogo aila lageikhesik nen, “Yesus nen itithogon hagatnakhe o,” iluk, pilinerogo it akhuni o ukul kokma etoma meke wene tha'bokhogonat yogeisilik nekhe lageikhe.

⁴⁰At Yesus ebe apuke i aik ilibaganke nen itali ageikhemo it akhuni inebe doalegat nen, at ebe therogo werekma heagei warogo waganhukha.

⁴¹Itithogon waganhukhama, ap ageikhe etaga Yairus, o akhuni Yahudi meke sembayan egarekma inoe kok meke, a'but horlak opakiat itago meke ebe itaklageikhesik oba umur 12 tahun hagatlageikhe hak, u nen horogat watlasigiluk hagakhe lageikhemo, Yesus oba wageikhesik apma itibagal yukukhogon heagei wakhe dogolik, men yogokhikhe, “Noe. An naila luok o,” iluk, ane a'buarek ane yogokhikhe. Itithogon yogokhikhemo, Yesus at ipisak luogoluk lagunem, akhuni motok doalegat oporlik kerlek-kerlek lagoukha.

⁴²

⁴³Lagunem, he ageikhe amep wago motok werek korlek 12 tahun hagatlageikhe meke, it dokter lak nen hano hagasuagaluk ameke tha'bokhogonat wogeisekhe lageikhe mekeat, it nen hano hagakhidek werek korlek, amep etnogo palageidek wago motok welageikhesik,

⁴⁴akhuni doalegat emenogo lagunem, Yesus oporlik lageikhesik, asu ilugun iki hakhekhe korlek amep eranogoat dek ageikhe.

⁴⁵Iki itithogon hakhasikhemo, at Yesus nen, men isikhe, “Tha nen iki hakneekhe,” iluk isikhemo it akhuni doalegat emenogo inebe tha'bokhogonat nen, “An dek o,” iluk isukhama, at Petrus nen, “Noe! Akhuni motok doalegat ageikhe nen herlekhogon la'igik, ageikhe nen herlekhogon la'igik, waga dogolik nogo nen, hat hoba dikhogonat wageikha o,” iluk yogokhikhe.

⁴⁶Itithogon yogokhikhemo at Yesus nen, men isikhe, “Dek o. At ageikhe nen iki hakneekhemo, an nobatne elalin hagarinakherek etnogo meke nakla nen akhuni inoba kigikhogon dukhekhe higi o,” iluk yogokhikhe.

⁴⁷Yogokhikhemo, at he etnogo akla nen, “Arat hutdanhe higi o,” iluk, ayuk ageikhesik nen, oageleke dik-dik Yesus oba wageikhesik nen, apma itibagal yukukhogon men yogokhikhe, “An yigithogon nen hasu niki hakhigi o. Itithogon niki hakhugunem eranogoat hano agei yi,” iluk, akhuni emenogo inil oba motok pilinogo yogokhikhe.

⁴⁸Itithogon yogokhikhemo, at Yesus nen, men yogokhikhe, “Neru e! Hetaiken noba hakotdegen iti nen hano agan o. Halok he, hakla hanorogonat lan o,” iluk la'isikhe.

⁴⁹Itithogon yogokhe korlek eranogoat, o akhuni Yahudi meke sembayan egarekma inoe kok etnogo aila nen agot ageikhe yoko wageikhesik nen, Yairus men yogokhikhe, “Noe. Ha'but horlak etnogo arat watlagama nen wagei o. Halok he, ninoe kok wene yakulnisekherek meke ithi isok alomarogo hipisak luogoluk oba tiolusak dek,” iluk yogokhikhe.

⁵⁰Itithogon yogokhikhemo at Yesus asuk holhikhesik nen, Yairus etnogo men yogokhikhe, “Yak e. Hayuk agun o. Hetaiken noba hakotdegen halok he, ha'but horlak iti hano asigin o,” iluk yogokhikhesik nen,

⁵¹Yairus aila lagoukha. Lagoukhasik nen, akhuni aperek emenogo okutlu dogoagaluk yogeisalok nen, Petrus men, Yohanes men, Yakobus men, horlak etnogo agosa opase men, inebe eta anek wogosik uma ukisikhe.

⁵²Ukisukha hak, akhuni motok doalegat horlak etnogo warekma dogolik, uak de ageik, inetaiken warigik, hagakhunem ukisikhesik at Yesus nen, men yogeisasikhe, “De agup o. Horlak yi watlageidek noge iliogo,” iluk yogeisasikhemo,

⁵³it nen, Horlak iti arat watlaga, iluk inilumo nen Yesus obato kogat agoukha.

⁵⁴Obato kogat agoukhama, at Yesus nen horlak etnogo iki hago meldekhe dogolik, men yogokhikhe, “Neru. Hiluk asin o!” iluk yogokhe korlek eranogoat

⁵⁵agurlagun dukhisikhe meke yabokane ukisikhemo, ebe arat iluk ageikhesik melageikhe. Melageikhemo, at Yesus nen, “Apiri ageikhe noak nen wogotni o,” iluk yogeisasikhe.

⁵⁶Itithogon yogeisasikhemo, at horlak etnogo agosa opase nen, “Nayuk o!” iluk, hogorakhukha mekeat, at Yesus nen, men yogeisasikhe, “Hagakhunem hinileken neegep meke iti, akhuni motok yogeisugup o,” iluk inasuk wakhikhe.