Read Mid Grand Valley Dani Yohanes 12 Bible Online

Yohanes 12 - Mid Grand Valley Dani bible

Yohanes 12

¹Wene itithogon isukhasik werek korlek, iniki 5 oba dogoluk nen, ageikhe baga pesta Paskah etnogo nuogoluk aban werek korlek, at Yesus o Betania ap Lazarus watlageikhesikmo nen ilugutdisikhe meke etnogo aila wageikhe.

²Wageikhemo, it akhuni etoma nen arini isakhukhama, he Marta nen hipiri wogeisekhe korlek, Lazarus men, akhuni inayoko 'bisukha meke men, Yesus inom nasukha.

³Itithogon nasi korlek, at he Maria nen apusu etaga narwastu obasi hano meke oko kogat palharek meke, setengah liter waganogo Yesus isok oba watdisikhesik nen, at Maria ekaerek isi baga kokhikhe. Itithogon hagakhikhemo, uma etnogo obasi motok yik-mikhogon hagatlageikhe.

⁴Itithogon hagatlageikhemo, at Yesus agarumi ane waganhe lagoukha meke ageikhe etaga Yudas Iskariot, yabokane Yesus wasuagaluk yoko lageikhe meke etnogo nen, men isikhe,

⁵“Apusu narwastu iti baga akhuni yabu iniki opaki hasik hagakhunem iniki oko opakitek wogeisegarek etnogo meke 300 waganiluk nen, it akhuni inameke dek meke supurisausak mekeat, apusu alomakhe iti nenaluk,” iluk, wene palhikhe.

⁶Itithogon wene palhikhe iti, akhuni inameke dek meke iti akmu nen isikhe 'buk. At agarlak lak inom tha'bokhogonat inauang ai heisogon meke hago dogolik, at ekaerek hasik limago horlekhe lageikhe iti nen wene itithogon isikhe.

⁷Itithogon isikhemo, at Yesus nen, men yogokhikhe, “He yi apusu watdanhe iti hasik, wenagakhe 'buk o. An yabokane nakhunem watlasumo nebe warek agatma thaldanuogoluk apusu watdanusak tak-tagat hago welagasik watdanhe o.

⁸Nen, it akhuni inameke dek meke iti, hit hinom motogat dogogun meke re, an anek he, hit ninom motok dogogun dek o,” iluk yogeisasikhe.

⁹At Yesus nen itithogon yogeisasikhesik werekma, akhuni nen, “At Yesus o Betania werek o,” iluk isukhama, it akhuni Yahudi meke inebe doalegat inasuk holhukhasik lagoukha. Itithogon lagoukha iti, at Yesus anek inileken huogoluk lagoukha 'buk. Mekeat he, Lazarus warek meke Yesus nen ilugutdisikhe etnogo ipisagat inileken hisauwogoluk lagoukha.

¹⁰Lagoukhama, it ap Allah iteerek inougi koktek meke emenogo nen, men isukha, “Lazarus warek meke Yesus nen ilugutdekhe iti nen, akhuni Yahudi meke inebe doalegat nit ninane here'isalok inetaiken Yesus oba hakotdiliogei,” iluk, Lazarus meneke wasuogoluk abok palhukhaat.

¹¹

¹²Itithogon isukhasik werek korlek, hubunke, it akhuni nen, “At Yesus o Yerusalem wisigiluk wiriogo,” iluk isukhama, it akhuni doalegat pesta Paskah nukunem natogokhukha meke emenogo inasuk holhukhasik nen,

¹³ tukhe eka hakene meke palhigik wolok, Yesus elokhoma amitmit luk-luk dukhekhe dogolik, men isukha, “Wa! Wa! Wa!” iluk u hak, “Hosana! Ninopase Allah Etagapogot nen nit akhuni Israel meke ninoe kok etagapogot la'agei agama wagan yi, at nenat hanothabuak o,” iluk etai warik warik dukhi agoukha.

¹⁴Dukhi agunem, at Yesus wam keledai eak ket aban meke ageikhe waganhikhesik, apot oba yasuk lageikhesik ukisikhe. Ukisikhe iti, Allah nen haganeat men isikhemo holal yigithogon waganek werek,

¹⁵ “Hit akhuni o kota Sion welagathep meke hinayuk agup o! Hinoe kok etagapogot wam keledai eak ket aban meke apot oba yasuk latluk wiriogo ili hinileken lakhani o!” iluk isikhe tak-tagat hagakhikhe iti.

¹⁶Itithogon ukisikhe mekeat he, itinem, it at agarumi ane waganhe lagoukha meke emenogo nen, wene hagatlageikhe meke iti hutdigidek. Meke re, at Yesus watlageikhesikmo nen yabokane Allah nen ilugutdisikhesik kogotdisikhesikmo nen, inakla ebekhukhasik men isukha, “At hasik Allah ane holal waganek weregat o. Nen, wene iti holal waganek werek tak-tagat, it akhuni nen at obasik hagakhunem ninileken hogo,” iluk inakla ebekhukha.

¹⁷Nen, at Lazarus warek thalhukhasikmo nen, at Yesus nen waikhikhemo ebe iluk ageikhesik dukhi agunem, it akhuni inileken hasukha meke emenogo nen, it aperek yogeisekhe dogolik,

¹⁸“At Yesus ebe hutduagaluk elalin meke itithogon hagakhe,” iluk isukhama akhuni inebe doalegat inasuk holhukhasikmo nogo nen, Yesus elokhoma dukhi agoukha iti.

¹⁹Itithogon dukhi agoukha iti nen, it ap Farisi meke it-it wene ekhe dogolik, “Warligi yi. Yi akhuni ti akhuni tha'bokhogonat, at oporlik motok liliogei iti nen, nit nen hagakhe lago etnogo hagakhunem, ninane kok asigin apekhe lagap a? Motok dek o,” iluk isukha.

²⁰It akhuni pesta neke dogolik Allah hogorasuogoluk wagoukha iti, it ap Yunani meke aperek inom wagoukha.

²¹It ap iti wagoukhasik nen, ap Filipus ai o Galilea eloke ukul etaga Betsaida meke usa'ageikhesik werekma, oba wagoukhasik men yogeisasikhe, “Noe. Nit Yesus oba wisusak warlok nen wago o,” iluk isukhama,

²²at Filipus nen wene isukha meke iti, at Andreas yogosi lageikhesik ipisak nen yabokane Yesus yogosi lagoukha.

²³Itithogon yogosi lagoukhama, at Yesus nen, men yogeisasikhe, “An abat itaklasi agagi etnogo, nebe hogotnabugun oba arat asi aga o.

²⁴Nen, akhuni nen, gandum eken ai agatma yakhidekma, akhuni watlageikharek iti hak, oado alep meke hirli atluk ket meke hurlelhidek halok he, eken opakiat ai yasugun meke itiat dogogin o. Mekeat, eken iti agatma yatlukmo, akhuni watlageikharek hak, oado alep meke iti hirli atluk anek, yabokane ket meke hurleldiluk eken doalegat ikherek o,” iluk yogeisasikhe.

²⁵Itithogon yogeisasikhesik, wene ageikhe men yogeisasikhe, “At tha nen akla nen he, An nen agat oba yoma nebe niluk dogosak warlok, iluk apekherek halok he, yabokane ebe iluk motok dogosak meke hasik nuk asigin o. Mekeat he, ap tha nen akla nen, Agat oba yoma niluk dogosak na'it, iluk apekherek halok he, at iti yabokane ebe nuk asigin dek iluk motok dogogin o.

²⁶Nen, at tha nen an natuaneke dogolik, akla nen, An Yesus hasik hagakhe dogogin, iluk apekhe halok he, an dogoginmo etoma nipisagat motok dogouogoluk noporlik waga dogosak o. Nen, at tha nen an nobasik hagakhe dogogin meke iti, nopase nen at ebe alon haligin o, iluk nane eberogonat yokhisigi o,” iluk yogeisasikhe.

²⁷At Yesus nen wene itithogon yogeisasikhesik sembayan ageikhe men isikhe, “Nopase. Yogotakne netaiken weak motok murleliogo welagei yi nikithogon ik he? An nen yigithogon ik. Nopase. An yi aik ti aik higin iti, hat nen nebe tilnabin o, iluk yokhesusak meke re, itithogon hagatnabuagalugat wagagisikmo nogo nen, itithogon igin dek o, nopase.

²⁸Halok he, nopase, hat hetaga hekaerek nen kogotdakhan o,” iluk isinem pogot oba nen ane ekhe dogolik, men isikhe, “Arat kogotdakhigirik, yabokane kogotdakhageinat o,” iluk ane isinem,

²⁹it akhuni inebe doalegat etoma metek welagoukha meke nen, inasuk holhukhasik, it aperek nen, men isukha, “Pogot ane luk-luk iliogo,” igik, nen it aperek nen, “Dek o. It malaikat pogot oba yoko nekharek meke ageikhe nen ane hakhekhe o,” igik, isukha.

³⁰Itithogon ugun apasukhaat, at Yesus nen, men yogeisasikhe, “Ane isinem hinasuk holhep iti, an hasik 'buk. Hit hinobasigat ekhe o.

³¹Yogotak Allah nen, akhuni agat oba meke wene inoba 'bigik, kokhik, hagakhe dogolik, ap etagapogot agat oba meke etnogo mukhogo ula'isigik, hagasigin oba arat asi aga o.

³²An nebe agat oba yoma meldanumo, an nen akhuni tha'bokhogonat lit-lit wogosik nekaerek noba 'bisasigin o,” iluk yogeisasikhe.

³³Itithogon yogeisasikhe iti ebe re, “An yabokane akhuni nen itithogon meldaniluk nasugun,” iluk u hak isikhe.

³⁴Itithogon isikhemo, it akhuni doalegat emenogo nen, men yogokhukha, “Wene Allah nen ninasuk wakhikhe wene iti baga nen, nit akhuni tilninabuagaluk Allah nen Kristus la'isigin iti ebe witluk nen, iluk motok dogogin. Iluk isikhemo ninasuk holhorek mekeat he, hat nen ekhe dogolik, An abat itaklasi agagi etnogo akhuni nen agat oba yoma meldanugun, iluk ekhe lagan iti, ap ageikhe ebe abat itaklasi isigin isikhe iti ebe tha hasik isikhemo nen egen,” iluk yogokhukha.

³⁵Itithogon yogokhukhama, at Yesus nen, men yogeisasikhe, “An nebe o liarinakherek meke etnogo we niki herlekha'bugat ninom dogogun o. Halok he, at tha nen o hibako mummo laga halok he, O koma laga lagei heat, iluk okodegat liliogo iti nen, hit lagunem o mum asinogo, iluk, an o liarinakherek meke ninom werek korlek yaat lia baga laga dogoni o.

³⁶Hit hinebe an o liarinakherek meke na'buri asubageik nen, an ninom werek korlek yaat, nebe hutdaniluk hinetaiken noba hakotdekhe dogoni o,” iluk yogeisasikhe. Wene itithogon arat yogeisalok nen, at Yesus it here'isalok, ebe werlekmake limaklasi lageikhe.

³⁷At Yesus ebe it nen hutduagaluk elalin doalegat inil oba hagakhe lageikhe mekeat he, it nen, “At eberogonat,” iluk, ebe hutdekhe lagoukha motok dek o.

³⁸ It itithogon hagakhe lagoukha iti, ap Yesaya Allah ane yogeisekhe lageikhe meke nen ekhe dogolik, men isikhe, “Allah Hetagapogot meke, nopase. Nit nen hat hane yogeisugunem, tha nen wene iti eberogonat iluk hutdisikhe nogo. Hat hiki obatne inileken hoagaluk elalin meke hagakhetek etnogo ebe hagakhunem, tha nen ileken halok hutdisikhe nogo. Dek o,” iluk isikhe meke holal waganek werek iti, ebeat asuagaluk, itithogon hagakhe lagoukha iti.

³⁹At Allah nen itithogon hagarinakhikhe iti nen, it itithogon eberogonat iluk hutdigidek hagakhe lagoukha, iluk Yesaya nen ageikhe men isikhe,

⁴⁰ “At Allah nen, it inileken nen hutukhogon halok, inakla ebetdiluk inobabut hebelatluk, an napma wagunem, an nen it hano hagarinabinogo iluk, an nenat it inileken pugutdisigik, inakla pugutdisigik, hagatdisigi o,” iluk isikhemo, Yesaya nen holal waganogo 'bisikhemo werek iti.

⁴¹At Yesaya nen wene itithogon isikhe iti, at Yesus yabokane hagakhunem ebe hogorasugun meke hasik ileken hasikhesik nen, at abok isikhe iti.

⁴²Wene itithogon isikhemo holal waganek werek mekeat he, it ap koktek Yahudi meke aperek inebe doalegat, inetaiken Yesus oba hakotdisukha mekeat, it nen yigithogon hagakhe lagoukha, “It ap Farisi meke nen o sembayan egarekma nen niniki korlo lisogo ula'inaninogo,” iluk, “Ninetaiken Yesus oba hakotdogo,” iluk akhuni inil oba pakhogon ekhe lagoukha dek.

⁴³It iti Allah nen hogorinabuagaluk hagakhe lagoukha dek o. Akhuni nen hogorinakhe dogou warlok nen hagakhe lagoukha iti.

⁴⁴It itithogon hagakhe lagoukha mekeat he, at Yesus nen ane kokhogon men yogeisasikhe, “At tha nen etaiken an noba hakotdigin halok he, an noba hakotdigin 'buk. Dek o. At he, an la'ani ageikhe meke etnogo oba etaiken hakotdigin o.

⁴⁵Nen, at tha nen, ileken an neekhe halok he, an la'ani ageikhe meke etnogoat ileken hekhe o.

⁴⁶Nen, it akhuni inetaiken an noba hakotdugun meke tha'bokhogonat, o mum oba dogunogo iluk, liarinabigiluk an nebe liarinakherek meke agat oba yoma usa'agagi o.

⁴⁷An agat oba yoma usa'agagi it, akhuni wene inoba 'bigiluk usa'agagi 'buk. At he, inebe tilinabigiluk usa'agagi iti nen, at tha nen an nane asuk holiluk nen, nane hologo hagakhidek halok he, an nenat wene oba 'bigin 'buk. Dek o.

⁴⁸At he, at iti an nebe woknabu a'irat, nen nane hanorogon waganusak a'irat, iti nen, at iti wene oba 'bigin meke werek o. Wene oba 'bigin iti, o ilugun hurli baga karelinabigin iti nen, an nen wene yokhisekhe lagei iti bagaat wene oba asigin o, iluk itithogon yokhisekhe lagei iti,

⁴⁹an nakla nen kagalogo yokhisekhe lagei 'buk. Dek o. An nen yokhisoagaluk an nopase la'ani ageikhe meke etnogo nenat nasuk warogo, Yigithogon in, tigithogon in, iluk yoknekhe korlegat yokhisekhe lagei o.

⁵⁰Nen, at nen wene ninasuk warogo, Yigithogon hagatno, tigithogon hagatno, iluk ninasuk warogo yoknisekherek iti nit niniluk motok dogoagaluk yoknisekherek, iluk an nilu o. At nopase nen wene yokniriogo mekeat yokhisekhe lagei o,” iluk yogeisasikhe.