Read Mid Grand Valley Dani Yohanes 14 Bible Online

Yohanes 14 - Mid Grand Valley Dani bible

Yohanes 14

¹At Yesus nen wene itithogon yogeisasikhesik nen, yabokane men yogeisasikhe, “Nagarumi. Hit hinakla nen, Eiye, iluk hinelabut hisik dogogup o. Hinetaiken Allah oba hakotdigik, an noba hakotdigik, hagakhe dogono o.

²An nopase aila etoma, o hit dogoumo oboluk doalegat thelek werek o. Itithogon dek dogolepma, an o hit dogoumo kareli ligin, iluk yokhisele dek o.

³An o etoma arat lalok hit hinaila arat karelogo 'biluk nen, an dogoginmo etoma ninom dogouok nen iluk, napuke wokhinabi isigin o.

⁴Nen, o an liginmo iti, holak ebe hit hiniluat o,” iluk yogeisasikhemo,

⁵at Tomas nen, men yogokhikhe, “Noe. O hat liginmo iti ninokodekma, holak iti nikithogon nen ninilu asusak o,” iluk yogokhikhemo

⁶at Yesus nen, men yogokhikhe, “Holak inom, ebe wene inom, inilugurinakherek inom, iti an nebeat o. At tha nen an noba wageidek halok, nopase werekma ukusak motok erlok dek o,” iluk yogokhikhesik,

⁷it tha'bokhogonat yogeisekhe dogolik, “Hit an nebe hinilu agap iti, an nopase hinilu asiginat o. Hinilu asigin iti, hurli yogotak hurli nen, at ebe hinilu ageik, hinileken higik, arat hekhe lagap o,” iluk yogeisekhe lageikhemo,

⁸at Filipus nen, men yogokhikhe, “Noe. Ninileken halok ninetaiken hapukhogon dogoagaluk, hat hopase iti ebe yakulnisan o,” iluk yogokhikhemo,

⁹at Yesus nen, men yogokhikhe, “Filipus nagot o. An o haganeat eloma nenat ninom welago mekeat he, hat nen an nebe hutdanhidek welaganma higi, e a? At tha nen an ileken neekhe iti, an nopaseat ileken hekhe o. Itithogon mekeat he, hat nen, Hopase iti yakulnisan o, iluk egen iti nikithogon nen egen.

¹⁰An nen nopase nipisak hunik, nen, nopase nen an nipisak hunik, welagorek iti, hat hutdekhe lagan dek a?” iluk yogokhikhesik it tha'bokhogonat yogeisekhe dogolik, “An nen wene yokhisegerek iti, an nakla nen kagalogo yokhisegerek 'buk. Dek o. An nopase nipisak hunik dogolik, an nane baga nen igik, niki baga nen hagakhik, hagakherek meke iti, at ekaerek nenat hagariogo o.

¹¹An nenat nopase nipisak hunik, nen, nopase nen an nipisak hunik, welagorek igi iti, eberogonat iluk, hit nen hutdini o. Iti hutdusak erlok dek halok he, an hagakhe lagei meke iti hinileken halok, hutdanini o.

¹²Tha nen etaiken an noba hakotdekhe halok, an hagakhe lagei meke iti, at nen hagakhe dogoginat o. An hagakhe lagei iti, herlekha'bugat negen meke re, an nopase oba ligin iti nen, at tha nen etaiken an noba hakotdiluk welagarek meke iti nen ebenageigat kokhogonat hagakhe dogogin o, iluk nane eberogonat yokhisigi o.

¹³Nen, at tha nen, yi meke ti meke an netaga palogo Allah kino yogokhe halok, an a'but nen hagakhunem, it akhuni nen nopase hogorasuagaluk, an nenat hagasigin o.

¹⁴Itithogon hagasigin iti nen, hit nen yi meke ti meke an netaga palogo kino yoknekhe dogono. Itithogon kino yoknekhep halok he, an nen hagasigin o,” iluk wene warisasikhe.

¹⁵At Yesus nen wene itithogon warisasikhesik nen, wene ageikhe men yogeisasikhe, “Hit an hinetaiken hunik halok he, an nen hit yigithogon hagakhe dogono, tigithogon hagakhe dogono, iluk yokhisekhe lagei meke iti hagakhe dogogun o.

¹⁶Itithogon hagakhunem, hit yomakhisekhe dogolik, hinom motok dogobageik nen iluk, an nen nopase kino yogosumo, at nen at ageikhe usakhisasigin o. At iti ebe Allah Agoreke ebe wene yokhisekhe dogogin meke. Itithogon hinoba usakhisasumo, it akhuni agat oba meke nen, at iti ebe inokodegat. Nen, ebe inileken hugun degat, iti nen ebe waganusak erlok degat o. Itithogon mekeat he, hit anek he, at ebe hinom dogolik, hinakla motok dogogin iti nen, at ebe hinilu dogogun o.

¹⁸An meneke, hit hinebe yekerugi irlagakot meke negen thogotdinageiluk ligin dek o. Yabokane napuke 'bithisasiginat o.

¹⁹Niniki herlekha'bugat dogoluk nen, akhuni agat oba meke inileken neagun motok dek mekeat he, hit anek he, an nilugat dogogin, nen hit yabokane hinilugat dogogun iti nen, hinileken neagun o.

²⁰Itithogon hinileken neagun itinem, an nopase nipisak hunik welago, nen, hit an ninom hunik, nen an hit ninom hunik welago meke iti, hinilu asigin o.

²¹At tha nen, an nen, yigithogon hagakhe dogono, tigithogon hagakhe dogono, iluk yokhisigi meke iti, nane hologo hagakherek halok he, an nebe etaiken hunik meke at itiat o. Nen, nopase nen at iti etaiken hunigat o. Nen, an nen at iti netaiken hunik dogolik, nebe hutdanuagaluk yakulisigin o,” iluk yogeisasikhemo,

²²ap Yudas Iskariot etnogo 'buk. At he, Yudas ninat meke ageikhe nen, men yogokhikhe, “Noe.Hat hebe hutdaguagaluk, akhuni tha'bokhogonat yakulisigidek, nit anek yakulnisagein iti nenaluk nen,” iluk yogokhe lageikhemo,

²³at Yesus nen, men yogeisasikhe, “At tha nen, an nebe etaiken hunik halok he, nane hologo hagakhe dogogin o. Nane hologo hagakhe dogoumo, nopase nen at iti etaiken hunik dogogin o. Itithogon dogolik, an nopase nipisak ap iti oba witluk, at ninom motok dogogun o.

²⁴Nen, at tha nen, an etaiken hunik dek halok he, an nane hologo hagakherek dek itiat o. An nane hit holhe lagap iti re, an nane meke 'buk. An nopase la'ani ageikhe meke etnogo aneat o.

²⁵Wene iti an nebe hit ninom dogolik, yokhisekhe lagei. Meke re, an nopase nen at Agoreke hit yomakhisekhe dogoagaluk, an netaga baga usakhisasumo, at nen yi wene ti wene tha'bokhogonat yakulhisigik, an nen yokhisekhe lagei meke iti tha'bokhogonat hinakla ebethisigik, hagakhe dogogin o.

²⁷Halok he, hit hinetaiken hapukhogon dogoagaluk an netaiken hapukhogon welagarek meke wokhisalok ligin o. Iti akhuni agat oba meke nen wogeisegarek iti hak wokhisagein dek iti nen, hinelabut hisik dogolik hinayuk agup o.

²⁸An ligin mekeat he, yabokane napuke hinoba wisigin o, iluk yokhisigi etnogo arat hinasuk holhep apigi. An nebe hinetaiken hunik dogolepma, an nopase ebe kogat, nen, an nebe erlok dek iti nen he, an nopase oba ligin iti hasik hinakla arleken akhelep o.

²⁹Wene tha'bokhogonat yokhisigi iti ebe hagatlasigin halok, hit nen, Wene yoknisasikhe etnogo arat hagatlaga yi, iluk hutdiluk, hinetaiken an noba hakotdubageik iluk, wene iti ebe aban hagatlageidek werek korlek, abok tak yokhisigi o.

³⁰Akhuni agat oba meke inoe kok etnogo ebe wiriogo iti nen he, an wene doalegat yokhisagein dek o. At iti wisigin mekeat he, an at iki baga welageidek o.

³¹Itithogon mekeat he, an nopase netaiken hunik welagarek iti akhuni agat oba meke inilu asuagaluk, an nopase nen nasuk warogo yoknekherek mekeat hagakhe lagei o,” iluk yogeisasikhesik nen, “Nagarumi. Luok nen melatni o,” iluk yogeisasikhe.