Read Mid Grand Valley Dani Yohanes 15 Bible Online

Yohanes 15 - Mid Grand Valley Dani bible

Yohanes 15

¹At Yesus nen wene itithogon yogeisasikhesik nen, yabokane wene ageikhe men yogeisasikhe, “O anggur erlo an nebeat o. Nen, ebe iteerek ebeat meke an nopaseat o.

²O ikilo'bak ebe tomok, an noba hunik dogolik eken ikhidek halok, 'bogokhogon la'igin mekeat he, ikilo'bak ebe tomok eken ikhe halok, aperek inom doalegat ikhe dogoagaluk oboseka palogo yorla yebeligin o.

³Nen, hit he, an nen wene yokhisegerek iti nen he, hinoboseka hakene palogo yorla yebelogo 'binageisikhemo welagap o.

⁴Itithogon hinoboseka hakene palek welagap iti, hit an ninom hunik, nen, an hit ninom hunik, dogouok o. O ikilo'bak iti, o erlo baga hunik dek halok, eken isusak motok erlok dek o. O ebe baga hunik halok, eken ikherek iti hak, hit an ninom hunik dogogun dek halok he, hano meke hagasusak erlok dek o. An nebe baga hunik halogat, hano hagasusak o.

⁵O ebe anat o. Nen, nikilo'bak hirat o. Hit an ninom hunik dek, we dekekthek dogolik, yi meke ti meke ageikhe hagasusak motok erlok dek iti nen, at tha nen an nipisak hunik, nen, an at nipisak hunik, dogogun halok he, at iti eken doalegat isu hak, hano meke kokhogon hagasigin o.

⁶Nen, o ikilo'bak palogo la'isegarek meke puk agunem, akhuni nen nomologo 'biluk hetumo po la'isugunem hetu nekerek iti hak, ap tha nen an nipisak hunik dek, dekekthek werek halok, itithogonat palogo la'umo hetu nigin o.

⁷Hit an ninom hunik dogolik nane hinakla werek halok, nena meke hit warlok meke an kino yoknisumo wokhisaumo horlagunat o.

⁸Hit hineken doalegat isu hak hano meke kokhogon hagasugun halok, akhuni nen an nopase hogorasugun o. Hit hinebe ebe nagarumi nane waganhe lagap meke dogolik, itithogonat hagakhe dogogun o,” iluk yogeisasikhe.

⁹At Yesus nen wene itithogon yogeisasikhesik nen ageikhe men yogeisasikhe, “Nopase nen an etaiken hunik welagarek iti hak, an nen hit netaiken hunik welagei o. Itithogon hit netaiken hunik dogeik nen, an ninom hunigat dogono o.

¹⁰Nen, an nopase nen, Yigithogon hagatno, tigithogon hagatno, iluk nasuk warogo yoknikhikhe meke iti, an nen at ane hologo hagakhunem, at nen an etaiken hunik welagarek iti hak, hit itithogonat, an nen hit hinasuk warogo, Yigithogon hagatno, tigithogon hagatno, iluk yokhisekhe lagei meke iti, hit nen an nane hologo hagakhe dogogun halok, an nen hit netaiken hunik dogogin o.

¹¹Nen, an nakla arleken akhegerek iti hak, hit hinakla arleken akhekhe dogolik, yabokane hinakla arleken motok kogat akhekhe dogobageik nen iluk, wene iti tha'bokhogonat yokhisigi o.

¹²Hit nen hagakhe dogobageik nen iluk, wene ebe yiat hinasuk warogo yokhisak, An nen hit netaiken hunik welagei iti hak, hit nen itithogonat hit-hit nakmu-hakmurogon dogobageik nen iluk yokhisigi o.

¹³It aperek inagarlak lak inetaiken hunik, erlok dek negen mekeat, ap ageikhe agarlak lak etaiken hunik nen, it inobasik watlasigin iti anek he, motok kogat o.

¹⁴Nen, an nen, hinasuk warogo, Yigithogon hagatno, tigithogon hagatno, iluk yokhisekhe lagei meke iti, nane hologo hagakhe dogogun halok he, hit an nagarlak lagat o.

¹⁵It akhuni inatuaneke meke iti, inougi hagakharek meke inokodek iti nen, an nen hurli yogotak yi baga nen, Hit an natuaneke, iluk yokhisagein dek o. Yi wene ti wene nopase nen yoknikhikhe meke tha'bokhogonat yokhisekhe lagei iti nen, Nagarlak lak, iluk yokhisekhe lagei iti o.

¹⁶Hit nen an wenaknakhigip 'buk. Dek o. An nen hit wenakhinakhigi iti, o eken ikherek iti hak, motok dogogin meke hagasi lobageik nen iluk, hinebe wenakhinakhigisik meldinagagi. Iti baga, nena meke, hit warlok meke an netaga palogo nopase kino yogosugun halok he, at nen wokhisageinat o.

¹⁷Nen, an nen wene hinasuk warogo yokhisigi iti, Hit-hit nakmu-hakmurogon dogono o, iluk yokhisigi itiat o,” iluk yogeisasikhe.

¹⁸At Yesus nen wene itithogon yogeisasikhesik nen, yabokane ageikhe men yogeisasikhe, “It akhuni agat oba meke nen ina'it motogat hagathinakha halok he, alebageik an tak ina'it motok hagatnakhukha etnogo hinakla ebetno o.

¹⁹Hit hinebe akhuni agat oba meke dogolepma re, it akhuni agat oba meke nen he, It nit ninagarumi, iluk inetaiken hunik hagathinabilep mekeat he, hit hinebe it akhuni agat oba meke werekma wenakhinakhigisik nen wokhinakhigisikmo hinebe it meke welagap 'buk. Iti nen, ina'it motok hagathinabiogei o.

²⁰Nen, ap kok ageikhe inapma negen werek korlek, at atuaneke meke kok negen welagarek dek o, iluk yokhisasigi etnogo hinakla ebetni o. It nen an weagatnakha halok he, hit itithogonat weagathinabugunat o. Nen, it nen an nane hologo hagakha halok, hit hinane hologo hagasugunat o.

²¹Itithogon mekeat he, it nen, at an la'ani ageikhe meke etnogo ebe inokodek iti nen, It yi at agarumi, iluk, wene yokhisigi iti tha'bokhogonat hagathinabugun o.

²²An wagagisik, wene tha'bokhogonat iti it yogeisigidek dogolema re, it weak iluk wene inoba 'biluk dogolep dek apigi o. Mekeat he, yogotak, wene yogeisa agei iti nen, it nen, An weak hagakhidek, iluk, wene inoba meke nokorlusak erlok degat aga o.

²³At tha nen an motok a'iretdanhe halok, an nopaseat motok a'iretdekheat o.

²⁴It akhuni aperek nen hagakharek motok dek meke, yi wene ti wene inil oba hagakhe lagagi etnogo hagakhe dogole dekma re, It weak, iluk ile dek o. Itithogon mekeat he, an nen wene iti tha'bokhogonat hagakhunem inileken neasukhasik nen, an nopase nipisak ina'it motok hagatninabiogei o.

²⁵ Itithogonat meke re, Allah nen, Yigithogon hagatno, itithogon hagatno, iluk inasuk wakhikhe meke iti baga, ane yigithogon holal waganek werek, Wene erlo dekmaat, it nen an motok ina'iretdanhukha, iluk isikhemo, holal waganogo 'bisukha meke iti ebeat asuagaluk itithogonat hagariogei o.

²⁶Hit yomakhisekhe dogoagaluk Allah Agoreke ebe wene yogeisoagaluk wagarek meke iti, an nen nopase werekma nen hit hinoba la'i agunem, at nen an nabok pakhogon yokhisekhe dogogin o.

²⁷At nen an nabok itithogon isi korlek, hit meneke, an hit ninom ebekeramat nen welagagusikmo iti nen, hit nen an nabok pakhogon yogeisekhe dogogunat o,” iluk yogeisasikhe.