Read Mid Grand Valley Dani Yohanes 16 Bible Online

Yohanes 16 - Mid Grand Valley Dani bible

Yohanes 16

¹At Yesus nen wene itithogon yogeisasikhesik nen, yabokane ageikhe men yogeisasikhe, “Hit hinakla puk atluk, an nebe kolelogo here'aninogo iluk, wene iti tha'bokhogonat yokhisigi o.

²Akhuni nen o sembayan egarekma nen hit hiniki korlo lisogo ula'inagagunat o. Nen, yabokane it akhuni hit hinasugun meke inebe dopok inakla nen he, Allah hasik hano inakho, iluk, ugun meke weregat o.

³It nen itithogon hagathinabugun iti, an nopase nipisak ninebe inokodek iti nenat hagathinabugun o.

⁴Itithogon hagathinakha halok, hinakla nen, Wene yi, at nen alebat yoknisasikhe etnogo, arat hagatninabiogei yi, iluk hinakla ebesubageik nen iluk, wene iti tha'bokhogonat yokhisigi o,” iluk yogeisasikhe. At Yesus nen wene itithogon yogeisasikhesik nen, yabokane ageikhe men yogeisasikhe, “An hit ninom yoma welago iti nen, wene yi tha'bokhogonat hit hinayoko 'bekhe dogolik yokhisigidek welagagi mekeat he,

⁵yabokane, at an nebe la'ani ageikhe meke etnogo oba ligin meke re, hit aperek nen, Noe. Hat o koma ligin, iluk noba hinok wokneekhe lagap motok dek o.

⁶An nen wene yokhisigi iti nen, hit hinakla motok weak aga mekeat he,

⁷an nen wene ebe pakhogon yokhisak o. An ligin dek dogolepma, at hit yomakhisekhe dogogin meke iti hinoba wetlep dek mekeat he, an ligin iti nen, at iti an nen hinoba la'isigin o. Halok he, an ligin iti nen, hit hinobasik hano motok asigin, iluk eberogonat yokhisigi o.

⁸At iti ebe witluk nen, it akhuni agat oba meke nen hagakharek meke hasik thelekmarogo yogeisekhe dogolik, Hit hinakla ebekhe lagap iti, weak hagakharek meke hasik inom, mot hagakhe dogosak meke hasik inom, Allah nen wene inoba 'bigik, kokhik, hagakherek meke hasik inom, hinakla korlo ebekhe lagap o, iluk wene thelekmarogo yogeisasigin o.

⁹At witluk, Hit nen hinetaiken at Yesus oba hakotdigidek welagathep iti korlo, iluk thelekmarogo yogeisasigin o.

¹⁰Nen, ageikhe, an nopase werekma lagunem, hit hinileken neagun motok dek iti nen, at yomakhisekhe dogogin meke iti witluk, wene mothogo hagakhe dogosak meke hasik thelekmarogo yokhisasiginat.

¹¹Nen, ageikhe, Allah nen akhuni agat oba meke inoe kok etnogo wene oba 'biluk obatne degetdisikhemo werek iti nen, at yomakhisekhe dogogin meke iti witluk nen, Allah nen wene inoba 'bigik, kokhik, hagakherek iti hasik thelekmarogo yogeisasiginat o.

¹²An nen wene doalegat yokhisausak meke re, hit waganusak erlok dek aga o.

¹³Itithogon mekeat he, Allah Agoreke, ebe wene ekherek meke iti witluk nen, holak inokodekma inilu meke nen yakulisegarek iti hak, ebe wene tha'bokhogonat hutdubageik nen iluk yakulhisekhe dogogin o. Itithogon yakulhisekhe dogogin iti wene at akla nen kagalogo ekhe dogogin dek o. At he, at asuk holherek meke anek ekhe dogolik, yabokane hagatlasigin meke yokhisekhe dogoginat o.

¹⁴An nane yakulhisegerek meke iti, at nen waganiluk, hit yakulhisekhe dogogin iti, an hogotnakhe dogogin o.

¹⁵Yi meke ti meke nopase meke tha'bokhogonat, an meke iti nen he, Allah Agoreke iti an nane hologo waganiluk, hit yakulhisekhe dogogin iluk yokhisigi iti o,” iluk yogeisasikhe.

¹⁶At Yesus nen wene itithogon yogeisasikhesik nen, ageikhe men yogeisasikhe, “Niniki herlekha'bugat negen dogoluk nen, an nebe hinileken neagun dek o. Itithogon hinileken niigidek hiniki herlekha'bugat ageikhe dogoluk nen, yabokane hinileken neagun o,” iluk yogeisasikhemo inasuk holhukhasik nen,

¹⁷at agarumi ane waganhe lagoukha meke emenogo aperek nen, it-it wene ekhe dogolik men isukha, “At nen, Niniki herlekha'bugat dogoluk nen he, an nebe hinileken neagun dek o. Itithogon hinileken niigidek hiniki herlekha'bugat ageikhe dogoluk nen, yabokane hinileken neagun o, igik, An nopase oba ligin, igik, ekhe iti, wene ebe nikithogon meke hasik ekhe apegep?

¹⁸An niki herlekha'bugat anek dogogin, iluk ekhe iti, ebe nena hasik yoknisekhe apegep? Nit hutdogo motok dek o,” iluk isukha.

¹⁹Itithogon isukhama, at Yesus nen, “It yi wene an noba hinok wokneauwogoluk iliogei higi,” iluk ekagat hutdisasikhesik nen, men yogeisasikhe, “Nagarlak lak. Niniki herlekha'bugat dogoluk nen, an nebe hinileken niigidek dogogun o. Nen, hiniki herlekha'bugat ageikhe dogoluk nen yabokane an nebe hinileken neagun o, iluk yokhisigi iti hasik hit-hit ekhe lagap a?

²⁰Yabokane hit hinakla nen di ago, de ago, ugun mekeat, it akhuni agat oba meke inakla arleken akhagun o. Itithogon meke re, hit hinakla weak dogogun meke iti, yabokane hano agunem hinakla arleken motok akhagun o, iluk, eberogonat yokhisigi o.

²¹He ageikhe eak itasigin tak-takma hinet weak wasusak oba hinet weak wakharek mekeat he, eak etnogo arat itakhekherethek nen, Neak arat itakhigi, iluk akla arleken motok akhekhe dogolik, hinet weak wakherek etnogo obarlikma agarek o.

²²Hit itithogonat. Yogotak hinakla weak welagap meke re, yabokane an ninom abuk asugun itinem, hinakla arleken kogat akhgun o. Nen, hit hinakla arleken iti, it akhuni aperek nen degetdugun motok dek o.

²³Hurli iti hurli arat asi lalok nen, hit nen wene ageikhe an noba hinok wokneagun motok dek o. Halok he, an nen wene ageikhe yokhisak, Hit nen yi meke ti meke an netaga palogo nopase kino yogosugun halok he, at nen wokhisageinat o, iluk eberogonat yokhisigi.

²⁴O alebat nen hurli yogotak hurli, an netaga palogo yi meke ti meke ageikhe kino igidek welagapma o. Halok he, hinakla arleken kogat akhobageik nen, at kino yogokhe dogono. Itithogon yogokhe dogoumo, wokhisekhe dogoginat o,” iluk yogeisasikhe.

²⁵At Yesus nen wene itithogon yogeisasikhesik ageikhe men yogeisasikhe, “Wene tha'bokhogonat iti, wene oba lisogon anek yokhisekhe lagei mekeat he, yabokane nopase abok ekhe dogolik, oba lisogon yokhisagein dek o. Pakhogon anek yokhisagein oba weregat o.

²⁶Hit nen, Yesus ebe Allah werekma nen wageikhe meke, iluk, hutdanhe dogolik, hinakmutdanhigip iti nen, nopase nen hit akmuthinakheregat o. Hit hinobasik an nen nopase kino yogosigin iluk yokhisekhe lagei dek o. O itinem he, hit hinekaerek nen an netaga palogo nopase kino yogosugun o.

²⁸An nebe Allah werekma nen akhuni agat oba meke inoba usa'agagi mekeat, yogotak it agat oba yoma 'bisalok nopase oba napuke dageigin o,” iluk yogeisasikhemo,

²⁹at Yesus agarumi ane waganhe lagoukha meke emenogo nen, men yogokhukha, “Noe. Yogotak hat nen wene oba lisogon yoknisigidek. Pakhogon anek yoknisegen o.

³⁰Hat nen, akhuni aperek nen wene ageikhe hinok wokhiigidek halok he, wene ebe hokodek 'buk o. Hat yi wene ti wene tha'bokhogonat hilu anek heogo o. Hat hebe eberogonat Allah nen la'agei ageikhemo wagagin, iluk yogotakne hutdagago o,” iluk yogokhukha.

³¹Itithogon yogosugun apasukha, at Yesus nen, “Yogotakne arat hutdanhep a?” iluk yogeisasikhe.

³²Itithogon yogeisasikhesik nen, ageikhe men yogeisasikhe, “Hit tha'bokhogonat thirlik-pirlikhogon mukhisaumo, an narligat here'aniluk hinailake tomok lo lugun oba aban welago meke re, yogotak arat asi aga o. Hit itithogon thirlik-pirlikhogon lamo, an nopase nipisak dogogun iti nen, narligat dogogin dek o, iluk eberogonat yokhisigi o,” iluk yogeisasikhesik,

³³ageikhe men yogeisasikhe, “Hit an ninom hunik dogolik, hinakla hapukhogon dogobageik nen iluk, wene iti tha'bokhogonat yokhisigi o. Hit akhuni agat oba meke nen yi aik ti aik hagathinakhe dogogun o. Meke re, akhuni agat oba meke arat obatne degetdisigima iti, hinayuk dekhogon dogono,” iluk yogeisasikhe.