Read Mid Grand Valley Dani Yohanes 19 Bible Online

Yohanes 19 - Mid Grand Valley Dani bible

Yohanes 19

¹“Barabas hisalnisan o,” iluk isukhama, at Pilatus yabokane ukisikhesik nen, Yesus tugi wasuagaluk wogeisasikhe.

²Itithogon wogeisasikhemo, it ap tentara meke nen ap koktek meke inakare-kare ikhegarek iti hak, arlok weak meke makona warogo Yesus ukuloak oba i'bigik, su elokhoken ki'bi-ki'bi warek hakene, ap koktek ikhegarek meke hakene meke i'bigik, hagakhukha.

³Itithogon i'bisukhasik inebe hobotha ukisi dogolik, men yogokhukha, “Akhuni Yahudi meke inoe kok etagapogot ninoe wa,” iluk yogokhe dogolik iniki agot tugi elokhoken dapuk wakhe lagoukha.

⁴Itithogon wasugun apasukha, at Pilatus etnogo yabokane it akhuni Yahudi meke 'birisa dukhi ageikhesik nen, men yogeisasikhe, “Warligi yi. Lakhani! At wene oba 'begepma pilinekhi meke re, at weak ageikhe hagakhemo higi motok dek iti hinilu asubageik nen iluk ulakhisa agei o,” iluk yogeisasikhemo,

⁵at Yesus arlok meke kare-kare negen etnogo ukuloak oba uguat, nen, su elokhoken ki'bi-ki'bi warek hakene etnogo uguat, dukhi ageikhemo, at Pilatus nen, “Ap yi hinileken 'bikhani!” iluk yogeisasikhemo,

⁶it ap Allah iteerek meke inougi koktek men, it ap Allah ai halek therogo welageikharek meke men, Yesus inileken hasukhasik inaneak kogat walhe dogolik, “At ebe o baga meldiluk watno o! O baga meldiluk watno o” iluk inane obatnerogonat yogokhukhama, at Pilatus nen, men yogeisasikhe, “An nen, at weak hagakhe meke ageikhe higi motok dek iti nen, hit hinekaerek hinoba dopok at ebe waganogo o baga meldiluk watno o,” iluk yogeisasikhemo

⁷it ap Yahudi meke emenogo nen, men yogokhukha, “At nen ekhe dogolik, An nebe Allah a'but, isikhe iti nen, wene Allah nen ninasuk wakhikhe wene, nit nen hagakhorek iti tak-tagat, nit nen ebe wasusak erlogat o. Halok he, wasusak apekhe lago,” iluk yogokhukha.

⁸Wene itithogon ugun apasukha, at Pilatus asuk holhikhesik nen, ebenageik ayuk motok ageikhe.

⁹Itithogon ayuk ageikhesik, Yesus wolok apuke o kok halekma etnogo ukisikhesik men yogokhikhe, “Hat hai erlo o koma,” iluk yogokhikhe mekeat, at Yesus nen oko igidek huk ageikhe.

¹⁰Ane igidek huk ageikhemo, at Pilatus nen yabokane men yogokhikhe, “Hat an nipisak wenekak usak ha'it a? An nen hat herle hisalogo here'agousak inom, nen, o baga meldageiluk hasusak inom, anat ite welagei iti, hat kokodek a?” iluk yogokhikhemo,

¹¹at Yesus nen he, men yogokhikhe, “At Allah nen, Hat nen wene akhuni inoba 'bigik, kokhik, hagakhe dogono, iluk hat iteerek 'bageilep dekma, hat nen wene noba 'banusak erlok degat o. Iti nen he, Hat weak hagakhen, iluk wene hoba herlekha'bugat negen werek mekeat, at ageikhe nen an nebe waganogo hat hiki baga 'bani aga meke iti anek he, weak hagakhe, iluk wene kok negen oba werek o,” iluk yogokhikhemo,

¹²at Pilatus asuk holhikhesik nen, Yesus herle hisalogo 'bigiluk walhasikhe mekeat, it ap Yahudi meke emenogo inaneak kogat walhe dogolik, men yogokhukha, “Ap tha nen, An nebe kok netagapogot, iluk ekaerek nen ekhe halok, ap kok Kaisar, Na'it, iluk apiliogo. Halok he, hat nen at ithi herle hisalogo ula'egen halok, hat ap Kaisar hipisak ekayo meke dek o. At inom weak meke apogo,” iluk yogokhukhama,

¹³at Pilatus asuk holhikhesik nen, Yesus ebe wolok dukhi ageikhesik nen, o sili etaga Helekit Talekma. It akhuni Ibrani meke inane baga, etaga Gabata ekhe lagoukhama etoma o perlago baga hurek dogolik, wene inoba 'bigik, kokhik, egarek oba hurek lageikhe.

¹⁴Hurek lageikhe etanem, hubuluke pesta Paskah na luogoluk, yi meke ti meke tugurogo 'bisi korlek, jam 12 hakene dikene eketurlemat hurek lageikhe. Hurek lageikhesik, akhuni Yahudi meke men yogeisasikhe, “Warligi yi. Ap yi hit hinoe kok etagapogot yi hinileken 'bikhani!” iluk yogeisasikhemo

¹⁵it nen inaneak kokhogon walhe dogolik, “Ebe watno! Eba watno! O baga meldiluk watno o!” iluk yogokhukhama, at Pilatus nen, men yogeisasikhe, “An nen hit hinoe kok etagapogot yi, o baga meldiluk wasusak hano apekhe lagap a?” iluk yogeisasikhemo, it ap Allah iteerek inougi koktek nen, men yogokhukha, “Nit ninoe kok etagapogot Kaisar arligat o. Ageikhe dek o,” iluk yogokhukhama,

¹⁶at Pilatus nen Yesus ebe o baga meldiluk wasuagaluk wogeisasikhe. Itithogon wogeisasikhemo, Yesus ebe wolok dukhi agoukha.

¹⁷Wolok dukhisuogoluk nen, o Yesus ebe meldiluk wasugun meke etnogo ekaerek nen wolok loagaluk omorlo baga 'bisukhasik, o nit ninane baga, etaga Inukuloak Palegem werekma u hak, it akhuni Ibrani meke inane baga, etaga Golgota etoma wolok dukhi agoukha.

¹⁸Dukhi agoukhasik etoma nen Yesus ebe o baga turlem meldiluk nen, it ap pere ninat meke inom abel ebelak-ebelak meldisasukha.

¹⁹Itithogon meldisasukhama, at Pilatus nen, holal men iluk waganhikhe, “YESUS AI O NAZARET MEKE AKHUNI YAHUDI MEKE INOE KOK ETAGAPOGOT,” iluk holal waganogo wogeisasikhemo, o Yesus meldisukha etnogo ilugunmo upu baga tetnokhogon 'bisukha.

²⁰Holal iti, akhuni Ibrani meke men, Roma meke men, Yunani meke men, inane baga waganogo 'bisikhemo werekma, o kota nen Yesus o baga meldiluk wakhukha baga etoma walegat 'buk. Horogat iti nen, akhuni Yahudi meke doalegat holal waganek etnogo etaga thalhe lagoukha.

²¹Holal itithogon waganogo 'bisikhemo, it ap Allah iteerek inougi koktek nen Pilatus men yogeisasikhe, “Akhuni Yahudi meke inoe kok etagapogot iluk, holal waganhun o. At he, yigithogon waganin o. Ap yi nen ekhe dogolik, An akhuni Yahudi meke inoe kok netagapogot, ekhe, iluk waganino,” iluk yogokhukha mekeat he,

²²at Pilatus nen, men yogeisasikhe, “An holal waganhi meke itiat waganek dogoak o!” iluk yogeisasikhe.

²³Itithogon yogeisasikhemo, it ap tentara meke nen, Yesus ebe o baga meldisukhasik nen, asu nokorlek inebe tomok opakitek-opakitek horlauwogoluk, su ebe 4 oba nen mikirlogo 'bisukha. Nen, asu karek dek uanat, thalukhogon itikmanke ugu meke horlauwogoluk nen,

²⁴ it ap tentara meke nen it-it agekhe nen ageikhe yogokhe dogolik, “Su yi paluok dek o. At he, tha hak horlagein iluk omatok thekerlogo walhegarek hak, helekit hupurlekentek meke walhauwok o,” iluk isukha. Itithogon isukha iti, Allah ane holal waganogo 'bisukhama, men werek, “An nasu nokorlek supuregasik nen, nasu itikmanke meke horlauwogoluk helekit hupurlekentek meke walhasukha o,” iluk isukha meke holal waganogo 'bisukha meke werek tak-tagat, it ap tentara meke nen itithogonat hagakhukhama eberogonat ageikhe iti o.

²⁵Itithogon hagakhe korlek, Yesus agosa men, agosa agot men, he Maria ap Klopas age men, he Maria ai o Magdala meke etnogo men, o Yesus ebe meldisukhama alilu metek welagoukha.

²⁶Nen, at agosa men, agarumi ane waganhe lagoukha meke ageikhe etaiken hunik motok welageikhe meke etnogo men, alilu itithogon metek werekma ileken hisasikhesik nen, at agosa yogokhe dogolik, “Nagosa. Hat heak ithiat o,” iluk yogokhikhesik,

²⁷at agot ane waganhe lagoukha meke ageikhe etnogo itithogon yogokhe dogolik, “Nagot. Hat hagosa ithiat o,” iluk isi korlek eranogoat Yesus agosa etnogo, at agot iti nen hago dogoagaluk aila wolok lageikhe.

²⁸Itithogon arat hagakhukhasikmo nen, at Yesus akla nen, “Yi wene ti wene tha'bokhogonat ilugun kobokhogon arat hagakhi,” iluk ilu nogo nen, Allah ane holal waganogo 'bisukha meke tak-tak asuagaluk, “An i abu,” isikhe.

²⁹Itithogon isikhemo, etoma isoak anggur eken apusu arle weak meke henago werekma, haki isiken hakene meke mago thukat oba hunogo nen Yesus apema lia'isukha.

³⁰Itithogon wogokhukhama, ituk walhasikhesik nen, men isikhe, “Arat hagakhi o!” iluk isikhesik nen, uroak konokhogon ebe arat watlageikhe.

³¹Itinem, hubuluke iniki 7 baga Allah hasik werlegat dogouogoluk hagakhukha. Meke re, Allah hasik werlegat hibiku-yogoku welageikharek hakene 'buk. Ninat kok meke dogouogoluk nogo nen, men isukha, “Niniki Allah hasik werlegat werek korlek it inebe o baga meldisega meke iti warek o bagaat dogosak nina'it,” iluk, ap warek iti inoak tamelogo 'biluk, kobologo usa'isa isuogoluk, it ap Yahudi meke nen, at Pilatus kino yogosi lagoukha.

³²Itithogon kino yogosi lagoukhama nen, it ap tentara meke emenogo wagoukhasik nen, it ap Yesus inom o baga meldisasukha meke emenogo ageikhe isok tamelogo 'bigik, ageikhe isok tamelogo 'bigik, hagakhukha.

³³Itithogon hagakhukhasik nen, Yesus inileken 'bikha lagoukha meke, arat watlageikhemo nen, isok tamelhidek kamotdisukha.

³⁴Itithogon tamelhidek kamotdisukha mekeat he, ap tentara emenogo meke ageikhe nen, thege baga Yesus abelekenma karlukhogon waknikhemo, thege elolake amep inom, i inom, dukhi ageikhe.

³⁵Itithogon hagatlagunem, ap ageikhe ileken welageikhe meke nen, hit hutdubageik nen iluk, at ileken hasikhe meke nen abok pakhogon iliogo iti. Nen, at nen meneke, “Eberogonat nileken hutukhogonat higirik abok pakhogon yokhisigi” iluk, at iluat o.

³⁶ Wene itithogon hagatlageikhe iti, Allah ane baga holal men iluk waganogo 'bisukhama werek, “At oak tameldugun motok dek o,” iluk isukha.

³⁷ Nen ageikhe, “At ebe thege baga karlukhogon watdiluk inileken hugun o,” iluk isukhama Allah ane holal waganogo 'bisukha meke werekma ebeat asuagaluk itithogon hagakhukha iti.

³⁸Itithogon hagakhukhama, ap Yusuf, ai o Arimatea meke, Yesus apma ukisikhesik, ap Yahudi meke ayuk nen, ane limago waganhe lageikhe meke iti nen, Yesus warek waganigiluk ap Pilatus kino yogosi lageikhe. Itithogon kino yogokhikhemo, at Pilatus nen, “I o. Hano,” iluk yogokhikhemo, at Yusuf nen Yesus warek etnogo wagani ageikhe.

³⁹Itithogon wagani ageikhemo, at Nikodemus, alebat hibako Yesus oba wageikhe meke etnogo nen, o mur eken apusu inom, o ageikhe apusu obasi hano meke inom, dapuk-hapukhogon hagarogo akin 30 kilo hakene wolok Yusuf ipisak wagoukha.

⁴⁰Ipisak itithogon wagoukhasik nen, it akhuni Yahudi meke nen warek thalinakharek hagat, apusu warogo su kain etaga lenan meke baga yilogo 'bisukha.

⁴¹At Yesus o baga meldiluk wakhukhama alilu etoma yabu oken yabu ageikhe welageikhe. Yabula etoma oila kerat elo herlelogo 'bisukhasik warek 'bisigidek meke welageikhe.

⁴²Itithogon werekma, hubuluke it akhuni Yahudi meke iniki 7 baga Allah hasik werlegat dogouogoluk, oila etnogo horogat nogo nen, warek etnogo oila iti 'bi lagoukha.