Read Mid Grand Valley Dani Yohanes 2 Bible Online

Yohanes 2 - Mid Grand Valley Dani bible

Yohanes 2

¹Itithogon hagakhe lagoukhasik, noge iniki pere iluk nen, iniki ageikhe baga nen he, o Galilea o ukul ageikhe etaga Kana iti, ap ageikhe age igikhunem Yesus agosa ayoko 'bisukhama etoma inom welagoukha.

²Etoma werekma, at Yesus agarumi ane waganhe lagoukha meke inom meneke, inayoko 'bisukhama lagoukhasik welagoukhaat.

³Lagoukhasik werekma, anggur eken apusu herelek meke tha'bokhogonat dek ageikhemo, Yesus agosa nen men yogokhikhe, “It anggur eken apusu herelek meke dek agama werek o,” iluk yogokhikhe.

⁴Itithogon yogokhikhemo, at Yesus nen, men yogokhikhe, “Nagosa o. An nen hagasusak oba aban horok asi ageidek werek korlek, hat nen an nenaluk yoknekhen,” iluk yogokhikhe.

⁵Itithogon yogokhikhe meke re, at agosa nen, at iteerek inatuaneke emenogo men yogeisasikhe, “At nen, Yigithogon hagatni, ekhe halok he, at igin meke itiat hagatno, nerugi,” iluk yogeisasikhe.

⁶It akhuni Yahudi meke nen haganeat etoma nenat hagakhe dogolik, yi meke ti meke men, inoba men, thobalogo anek hagakharek meke hasik isoak helekit meke herlelek koktek meke ebe 6 oba etoma 'bisukhama welageikhe. Isoak koktek dorom hakene iti ebe dopok akla i 100 liter hakene henasusak erlok welageikhe.

⁷Itithogon werekma, at Yesus nen it inatuaneke emenogo yogeisekhe dogolik, men yogeisasikhe, “Isoak koktek dorom hakene ethoma baga i henatni o,” iluk yogeisasikhemo, apem hethokhigik henakhukha.

⁸Itithogon apem hethokhigik henakhukhama, at Yesus nen it men yogeisasikhe, “Yogo. Henakhep meke iti ageikhe kelelogo ap kok pesta iteerek meke wogosi lani o,” iluk yogeisasikhemo wogosi lagoukha.

⁹It nen i kelelogo wogosi lagoukhasikmo nogo nen, i ebe itithogon meke, iluk inilu welagoukha mekeat he, ap kok meke etnogo anek he, “Koma nen wolok wageikha,” iluk okodek dogolik, i etnogo anggur eken apusuat hagatlageikhemo, ituk walhasikhe hak, hano motok nen ap he igikhukha werek etnogo ane hakhasikhe.

¹⁰Ane hakhasikhemo wageikhemo nen, men yogokhikhe, “Werlak! Akhuni tha'bokhogonat nen anggur eken apusu ituk hano meke alebageik wogeisugunem, ina'ithogon nasi halok, yabokane anggur apusu ituk erlok dek negen wogeisegarek meke re, hat anek he, anggur apusu ituk hano meke henago 'biluk welagatik nen yabokane winametdegen yi, nayuk!” iluk yogokhikhe.

¹¹At Yesus ebe hutduagaluk elalin meke ageikhe hagakhidekma alebageik hagakhikhe iti, o Galilea o ukul Kana dogolik hagakhikhe iti baga, at hogorakharek meke inilurogo yakulisasikhemo, it at agarumi ane waganhe lagoukha meke emenogo Yesus ebe hutdiluk, inetaiken at oba hakotdisukha.

¹²Itithogon arat hagatluk nen, at Yesus ebe men, agosa men, agarlai men, agarumi at ane waganhe lagoukha meke men, inom o Kapernaum lagoukha. Lagoukhasik nen, iniki pere negen anek welagoukha.

¹³Etoma werekma, it akhuni Yahudi meke nen, “Alebat at Allah nen tilninakhikhe,” iluk, inakla eberogo dogolik domba warogo pesta etaga Paskah hasik nausak oba arat hakok i ageikhemo, Yesus o Yerusalem usasikhe.

¹⁴Usasikhesik nen, Allah ai halekma ukisikhe hak, it akhuni oko palharek meke, sapi inom, domba inom, thue merpati yogeik hakene inom, oko palhik, it aperek etoma hurek dogolik uang okokhik, hagakhunem at ileken hisasikhe.

¹⁵Itithogon hagakhunem ileken hisekhe lageikhesik, herle kupi meke tugi hagarogo nen sapi inom, domba inom, la'bisoko tugi warogo Allah ai halekma nen mukhogo ula'isigik, meja o perlago baga uang okokhe lagoukha meke emenogo abel dagak-pagakhogon la'isigik, inauang emenogo agat oba thirlik-pirlikhogon hagatdigik, hagakhikhe.

¹⁶Hagakhe dogolik, it ap thue merpati yogeik hakene oko waganhe lagoukha meke emenogo wenageisekhe dogolik, men yogeisasikhe, “Thue yoma horlalok dukhi lani o. An nopase ai halekma yoma, yi meke ti meke oko palharekma hakene palhe lagap yi, itithogon hagasusak motok dek o,” iluk wenageisasikhe.

¹⁷ Itithogon wenageisasikhemo, it at agarumi ane waganhe lagoukha meke emenogo inakla nen, “Alebat it ap aperek nen Allah ane baga holal waganogo 'bekhe dogolik, men isukhama werek etnogo, Allah nopase, hat hai halek netaiken hunik motok nen, nakla aga motok dageiliogo, iluk holal waganhukhama werek apigi,” iluk inakla ebekhukha.

¹⁸Yesus nen it ap emenogo itithogon yogeisasikhemo, it ap koktek Yahudi meke nen Yesus ebe wenagakhe dogolik men yogokhukha, “Hat nen hagakhen yi re, iteerek dogolik hagasusak oba hagakhenma iluk, hutdaguok nen, elalin meke ageikhe hagasin ta,” iluk wenageikhukha.

¹⁹Itithogon wenageikhukhama, at Yesus nen, men yogeisasikhe, “Dek o. Allah ai halek yi misalini o. Arat misalumo, an nen yabokane niki pere baga halhe dogoluk nen, niki ageikhe baga yi nen arat haligin o,” iluk yogeisasikhe.

²⁰Itithogon yogeisasikhemo it ap koktek Yahudi meke emenogo nen, men yogokhukha, “A! Allah ai yi aban halhe korlek 46 tahun welago mekeat he, hat nen, Niki pere baga halhe dogoluk nen, niki ageikhe yi baga arat haligin, iluk egen iti erlogat haluksak iluk egen a? Erlok dek o,” iluk yogokhukha.

²¹Itithogon yogokhukha meke re, Yesus nen wene Allah ai halek hasik isikhe iti, o halek meke hasik isikhe 'buk. At ekaerek ebe hasigat isikhe o.

²²Wene itithogon yogeisasikhesik yabokane watlageikhesik nen iluk ageikhemo, it ap at agarumi ane waganhe lagoukha meke emenogo nen, “Wene yi alebat yoknisugunem ninasuk holhugu meke,” iluk inakla ebekhukhasik nen, Allah ane holal waganek meke inom, wene Yesus nen yogeisasikhe meke etnogo inom, hutdisukhasik inakla nen eberogonat apasukha.

²³Itithogon isukhasik werek korlek, o Yerusalem it akhuni Yahudi meke domba warogo pesta Paskah nasi korlek, at Yesus etoma inom dogolik ebe hutduagaluk, elalin meke hagarik lageikhe iti nen, akhuni doalegat inileken hasukhasik nen inetaiken at oba hakotdisukha.

²⁴Itithogon inetaiken at oba hakotdisukha meke re, at Yesus ekaerek anek nen, it inebe tha'bokhogonat inobabut ilu iti nen, “Eberogonat woknabugun” iluk etaiken it inoba hakotdigidek welagaikhe.

²⁵Akhuni inakla at ilu motok welagarek iti nen, akhuni aperek nen, “It aperek inobabut yigirlik,” iluk, at yogosusak motok erlok dek o.