Read Mid Grand Valley Dani Yohanes 21 Bible Online

Yohanes 21 - Mid Grand Valley Dani bible

Yohanes 21

¹At Yesus nen itithogon hagakhikhesik oba nen, i tiberias yekelekma, at agarumi ane waganhe lagoukha meke emenogo yabokane inelokhoma wisam ageikheat. Inelokhoma wisam ageikhe iti, wene ebe yigithogon.

²Iniki ageikhe itinem, at Simon Petrus etnogo men, Tomas etaga ageikhe Hulupmio Meke etnogo men, Natanael ai o Galilea eloke o ukul etaga Kana meke men, Zebedeus a'buri men, Yesus agarumi inebe pere meke men, natogokhukha.

³Itithogon natogokhukhasik nen, Simon Petrus etnogo nen, it ebetlake men yogeisasikhe, “An yogotak ikan wagani lagaluk,” iluk isikhemo, it ebetlake emenogo nen, “Nit ninomat luok o,” iluk isukhasik nen, inom lagoukhasik ku baga ukisukhasik lagoukha meke re, o yibako-hibako ikan opakiat halok ageikhe motok waganhidek.

⁴Itithogon waganhidegat werekma, o wi aga korlek, at Yesus lageikhesik, i aik oba metek welageikhe meke re, it agarumi ane waganhe lagoukha meke emenogo nen, “Ithi Yesus ebeat o,” iluk hutdigidek.

⁵Itithogon hutdigidek werekma, at Yesus nen men yogeisasikhe, “Warligi yi. Nagarumi. Ikan ageikhe waganhep a?” iluk yogeisasikhemo, it nen, “Motok dek o,” iluk yogokhukhama,

⁶at Yesus nen, men yogeisasikhe, “Hinayoge su ithi, ku abeleken hiniki ebeke mot-mot usa'ini. Itithogon usa'umo ikan waganugunat o,” iluk yogeisasikhemo inayoge su etnogo ima usa'isukhama ikan motok doalegat ukhat lageikhemo, lisogo lia'busak erlok dek ageikhe.

⁷Itithogon erlok dek ageikhemo dogolik, at Yesus agarumi meke ageikhe, at etaiken hunik meke etnogo nen, Petrus men yogokhikhe, “Petrus, ap ithi ninoe Etagapogot etnogoat o,” iluk yogokhikhe. At Yesus agot etnogo nen, “Ap ithi ninoe Etagapogot etnogoat o,” iluk Petrus yogokhunem asuk holhikhesik nen, asu itikmanke meke nokorlogo 'bisikhesik su nokorlek welageikhe meke ibat ikhasikhesik nen, ima pok usasikhe.

⁸Itithogon pok usasi korlek, Yesus agarumi ebetlake emenogo it welagoukhama nen hurli i yipitla walegat dek. Horogat 100 meter hakene iti nen, ikan doalegat yoge su apem hethokhogon etnogo lisogo wolok ku warogo i yipitla uki agoukha.

⁹Arat uki agoukhasik ku akla nen dukhi agoukha hak, ikan men, roti men, werago hetu eken oba dukthek werekma inileken hasukha.

¹⁰Itithogon inileken hasukhama, at Yesus nen, men yogeisasikhe, “Nagarumi. Ikan ket waganhep emenogo aperek wolok witni o,” iluk yogeisasikhemo,

¹¹at Simon Petrus etnogo ku akla ukisikhesik nen, ikan koktek motok ebe 153 nen yoge su apem hethokhogon etnogo lisogon wolok, i yipitla uki ageikhe. Ikan motok doalegat meke re, yoge su etnogo herlekha'bugat halok ageikhe li'bilageidek, hanoat welageikhe.

¹²Su itithogon wolok dukhi ageikhemo, at Yesus nen, men yogeisasikhe, “Nagarumi. Hipiri nuok nen witni o,” iluk yogeisasikhe. Itithogon yogeisasikhemo, it at agarumi emenogo nen, “Yi ninoe Etagapogot ebeat o,” iluk ekagat hasukhasik nen, at ageikhe nen, “Hat tha,” iluk hinok wokhausak inayuk ageikhemo thogotdisukha.

¹³Itithogon thogotdisukhasik werekma, at Yesus nen yabokane inoba horokhogon lageikhesik nen, roti etnogo waganhikhesik, it supurisalok, ikan etnogo itithogonat supurisasikhe.

¹⁴At Yesus itithogon hagakhikhe iti, at ebe watlageikhesik nen apuke iluk ageikhesik oba nen, iki pere baga agarumi inelokhoma wisam ageikhesik nen ageikhe yabokane wisam ageikhe itiat o.

¹⁵Hipiri itithogon arat nasukhama, at Yesus nen, Simon Petrus etnogo itema waganhe dogolik, “Simon Yohanes a'but nagot o. It hagarlai ebetlake yoma, an inetaiken hunik, erlok dek negen mekeat he, hat anek, an hetaiken hunik motok welagan a?” iluk yogokhikhemo, at Petrus nen, “I o, noe. An nen hat hebe nakmuat o,” iluk yogokhikhemo, at Yesus nen, men yogokhikhe, “Halok he, nako domba ena meke hanorogon therisik dogono o,” iluk yogokhikhe.

¹⁶Alebageik itithogon yogokhikhesik nen, yabokane ageikhe inom itema waganhikhe, “Simon Yohanes a'but nagot o. Hat nen an hetaiken hunik motok welagan a?” iluk yogokhikhemo, at nen, “I o. Noe. An nen hat hebe nakmuat welagei iti, hat hiluat o, noe,” iluk yogokhe lageikhemo, at Yesus nen, “Halok he, an nako domba meke hagasik dogono o,” iluk yogokhikhe.

¹⁷Iki pere baga itema waganhikhesik nen yabokane ageikhe waganhikhe, “Simon Yohanes a'but nagot o. Hat nen an nebe hakmu a?” iluk, Yesus nen itema iki pere baga waganhikhesik nen, yabokane dagakhogon ageikhe baga, “Hat an nebe hakmu welagan a?” iluk yogokhikhe iti nen, akla korlo ageikhemo, at nen Yesus men yogokhikhe, “Noe. Hat he, yi meke ti meke tha'bokhogonat hilu o. Halok he, an nen noe hebe nakmu welagei iti, hat hilu o,” iluk yogokhe lageikhemo, at Yesus nen, men yogokhikhe, “Halok he, an nako domba hanorogon therisik dogono o,” iluk yogokhikhe.

¹⁸Itithogon yogokhikhesik nen, wene ageikhe men yogokhikhe, “Alebageik, hat hebe elege dogolik, An o etoma ligin, iluk therlok hekaerek nen a'bethogon ikhalok laga lagagin mekeat he, yabokane hat hebe yaman agan halok, hiki walokhogon la'isinem, it aperek nen hat hiki herle a'bethogon watdageiluk nen, hat o lausak ha'itmo wokharik lugun o, iluk eberogonat yokhikhi o,”

¹⁹iluk wene itithogon yogokhikh iti, at Petrus yabokane itithogon hagarogo wasugun oba Allah hogorasugun meke hasik yogokhikhe iti. Itithogon arat yogokhikhesik nen, ageikhe men yogokhikhe, “An noporlik nekhe dogono o,” iluk yogokhikhe.

²⁰At Yesus nen wene itithogon yogokhikhemo, at Petrus elokhe hebenokhogon ileken apuke lakhasikhe meke, Yesus agot ageikhe etaiken hunik meke etnogo inoporlik wagunem lakhasikhe. At iti ebe alebat hipiri neke dogolik Yesus alilu horokhogon hurek dogolik, at nen, “Yesus noe. Tha nen noe Hetagapogot hasuagaluk yoko ligin,” iluk oba hinok wokhasikhe meke etnogo.

²¹At Petrus nen ap iti ileken lakhasikhesik nen, Yesus men yogokhikhe, “Noe. At ap ithi yabokane nikithogon hagasigin apegen,” iluk yogokhe lageikhemo,

²²at Yesus nen, “An nakla nen, ap ithi, ebe ilugat werekma, an yabokane wisigin nakla apigi halok he, hat nen hagasusak meke 'buk. An noba dopok o. Itithogon mekeat, hat anek, an noporlik nekhe dogono o,” iluk wene itithogon yogokhikhe meke iti,

²³it Yesus agarumi ane waganhe lagoukha meke nen, “Yesus nen, Nagot ithi ebe yabokane watlasigin motok dek o,” iluk ekhe thalek, abok wiadisukha. Meke re, at Yesus nen he, “An nagot ithi yabokane watlasigin motok dek o,” iluk igidek. At nen, “An nakla nen, ap ithi an yabokane wisigin iti bagaat ebe ilugat dogoak nakla apigi halok, hat nen hagasusak meke 'buk. An noba dopok o,” iluk wene iti meke hasik isikhe mekeat, itithogon isukha iti.

²⁴Wene Yesus agot ageikhe hasik isikhe iti, nebe anat o. An nileken hasigi meke nenat pakhogon yokhisau hak, holal waganogo 'bigi yi o. Wene iti an nileken hasigi meke nenat pakhogon yokhisigi eberogonat, iluk, nit tha'bokhogonat ninilu.

²⁵At Yesus nen yi wene ti wene aperek hagakhe lageikhe meke doalegat werek mekeat, wene tha'bokhogonat opakitek-opakitek pilin-palinhogo holal waganogo 'bilema re, o agat oba yoma obolukmo koma 'bu heat kerlekhogon hagatlatlep apigi o.