Read Mid Grand Valley Dani Yohanes 4 Bible Online

Yohanes 4 - Mid Grand Valley Dani bible

Yohanes 4

¹Itithogon yogeisekhe lagoukhama, it nen, men isukha, “It akhuni inebe pererlagat negen Yohanes agarumi asuogoluk apma wagunem ima usa'isiliogo mekeat, it inebe doalegat Yesus agarumi asuogoluk apma wagunem ima usa'isiliogo,” iluk isinem, at Yesus nen, “Wene iti, it ap Farisi meke inasuk holha higi,” iluk ilu ageikhe.

²Itithogon isukha iti, at Yesus ebe nen, ima usa'isekhe lageikhe dek. At agarumi ane waganhe lagoukha meke emenogo nen ima usa'isekhe lagoukha mekeat isukha.

³Itithogon isinem, “Inasuk holha o,” iluk Yesus ilu ageikhesik nen, at o Yudea thogotdiluk o Galilea apuke dageigiluk dagei ageikhe.

⁴Itithogon dagei aga dogolik, holak ninat obake dek. Holak o Samaria obakeat dagei isusak mot ageikhemo dagei ageikhe.

⁵Dagei aga dogolik, o Samaria o ukul ageikhe etaga Sikhar horok horok ukuogoluk, agat ageikhe ap Yakub nen alebat a'but Yusuf wogokhikhemo etoma dagei ageikhe.

⁶O dikagane jam 12 oba dagei ageikhesik, at Yesus holak nen warek nogo nen, i ap Yakub agei hulelekma henakhe lagoukhama etoma hurek lageikhesik welageikhe.

⁷At etoma hurek werek korlek, agarumi ane waganhe lagoukha meke emenogo hipiri oko paluogoluk o ukul kokma etoma ukisukhama, at he Samaria meke ageikhe i henasigiluk dukhi ageikhe. Dukhi ageikhemo, at Yesus nen, men yogokhikhe, “Neru la'uk. An i ageikhe henago woknom o,” iluk, kino yogokhikhemo,

⁸

⁹it akhuni Yahudi meke akhuni o Samaria meke inom weak welagoukha iti nen, at he Samaria meke etnogo nen at Yesus men yogokhikhe, “Hat ap Yahudi meke. Nen, an he Samaria mekeat he, nenaluk, I henaknom, iluk kino yoknekhen?” iluk yogokhikhe.

¹⁰Yogokhikhemo, at Yesus nen at he etnogo men yogokhikhe, “Allah obabut hano nen werlegat okorlek wogeisekherek meke iti men, nen an nen, I ageikhe henago woknom, iluk kino yokhikhi iti, nebe men hutdanilenma, hat nen i ageikhe kino yoknekhunem, an nen i inilugurinakherek meke eberogonat wokhetle o,” iluk yogokhikhe.

¹¹Itithogon yogosigin apasikhe, at he etnogo nen, men yogokhikhe, “La'uk. Hat hageisoak dek. Nen, i hulelek yi wema elomaat meke re, hat nen i inilugurinakherek meke iti, koma meke henago woknisigiluk nen egen.

¹²I yi nit ninopa kok Yakub nen hulelhikhesik, at ebe men, a'buri men, ako men neke lagoukhasik nen, nit yabokane meke neke dogoagaluk woknisasikhe meke iti, hat hakla nen, At ebe erlok dek negen. Nen, an anek nebe kogat, iluk hakla apalok nen egen a?” iluk yogokhikhe.

¹³Itithogon yogosigin apasikhe, at Yesus nen, men yogokhikhe, “It akhuni i yi meke nasi halok, yabokane i abu asigin meke re,

¹⁴i an nen wogeisaumo nasi halok he, it inakla nen i elesi hakene hunak-hunak dukhisi motok dogogin iti nen, iniluk motok dogolik, it yabokane i abu aga dogogun motok dek o,” iluk yogokhikhe.

¹⁵Itithogon yogosigin apasikhe at he etnogo nen, men yogokhikhe, “La'uk. An i abu nen i yi henasi ageidek dogeik nen, i hat nen egen iti woknom o,” iluk kino yogokhikhe.

¹⁶Itithogon yogosigin apasikhe at Yesus nen, men yogokhikhe, “Hat hagun hipisak yoma wisubageik nen, waesi lan o,” iluk yogokhikhe.

¹⁷Itithogon ekhe lageikhemo, at he etnogo nen, men yogokhikhe, “An nagun dek u,” yogokhikhemo at Yesus nen, men yogokhikhe, “An nagun dek egen iti eberogonat egen o.

¹⁸Hat hagun ageikhe waganhik, thogotdiluk ageikhe waganhik, inebe 5 woginakhigitik nen, yogotak ap ageikhe hipisak welagap iti, hat hagun 'buk. Hat egen iti wene eberogonat ege,” iluk yogokhikhe.

¹⁹Itithogon pakhogon yogokhe lageikhemo, at he etnogo nen, men yogokhikhe, “Eiye. La'uk. Hat hebe, eberogonat Allah ane yogeisegetek meke higi, iluk arat hutdagagi o.

²⁰Nen, nit ninopa lak nen, tom yi baga dogolik Allah hogorakhe lagoukha mekeat he, hit Yahudi meke nen he, Allah o werlekmake hogorasusak dek o. O Yerusalem etoma anegat hogorasusak o, iluk egethep iti,” iluk itithogon yogokhikhemo,

²¹at Yesus nen, men yogokhikhe, “He yi neru e. Wene yokhesigin yi eberogonat apano. O tom yi baga men, o Yerusalem men, etoma anek Allah hogorakhe dogosak 'buk. Hit Allah hogorasusak tak-tak oba, o yabokane ageikhe wi igin meke weregat o.

²²Allah nen akhuni tha'bokhogonat tilinabigiluk, nit akhuni Yahudi meke nen wene yakulisoagaluk ninayoko 'bisikhe iti nen he, nit Yahudi meke nen Allah ebe ninilu meke hogorakhe lago mekeat he, hit anek ebe hinokodek mekeat hogorakhethep iti o.

²³Itithogon Allah ebe hogorakharek mekeat he, it akhuni nen yabokane Allah hogorakhe dogolik ninat negen hogorasugun meke weregat o. At Allah akla nen, An Nagoreke nen, Allah ebe iti hakene, iluk yakulisugunem mothogon eberogonat hogotnakhe dogoak, iluk, akla apekherek iti nen, yogotak ya nen itithogon hogorakhe dogosak o.

²⁴Allah ebe Agoreke meke iti nen, at hogorasuogoluk Agoreke inom hunik dogolik eberogonat hogorasusak mekeat hogorasusak o,” iluk yogokhikhe.

²⁵Itithogon yogokhikhemo, at he etnogo nen, men yogokhikhe, “Mesias akhuni tilninabuagaluk Allah nen kok etaga Kristus iti la'isigin. La'i agunem ebe witluk yi wene ti wene tha'bokhogonat nit yakulnisekhe dogogin iluk an nilu o,” iluk yogokhikhe.

²⁶Itithogon yogosigin apasikhe, at Yesus nen, men yogokhikhe, “Ap egen iti ebe, an nipisak wenekak ekhe lago nebe yiat o,” iluk yogokhikhe.

²⁷Wene itithogon isinem, at Yesus agarumi ane waganhe lagoukha meke emenogo inapuke dukhi agoukha hak, Yesus he meke ipisak wenekak isinem, inileken hisalok nen, “Nayuk e,” iluk, hogorakhukha mekeat, it emenogo aperek nen hinok wogeisekhe dogolik, “He yi. Hat nena meke warlok nen wagan,” iluk igik, “Yesus. Hat he yi hipisak wenekak nenaluk ekhe lagap,” igik, yogeisigidek thogotdisukha.

²⁸Itithogon yogeisigidek werek korlek, at he etnogo ageisoak etoma here'isalok, pirlirli o ukul kokma ukisikhesik akhuni etoma meke wene men iluk yogeisilik nekhe lageikhe,

²⁹“Ap ageikhe nen an yi hagakhik, ti hagakhik, hagakhe lagei meke tha'bokhogonat pakhogon motok yoknekhe meke ebe eta werek o. At ebe Kristus Allah nen tilninabuagaluk la'isigin meke etnogoat a? Ninat a? Hinileken hobageik nen witni o,” iluk yogeisilik lageikhe.

³⁰Itithogon yogeisilik lageikhemo, it akhuni emenogo o ukul kokma etoma nen dukhi agoukhasik Yesus ebe 'bikha isuogoluk oba wagoukha.

³¹'Bikha isuogoluk aban waga korlek, Yesus agarumi ane waganhe lagoukha meke emenogo nen men yogokhukha, “Noe. Hat hipiri tak nan o,” iluk inane hathigik yogokhukha.

³²Itithogon yogosugun apasukha at Yesus nen men yogeisasikhe, “Napiri an meke werek mekeat he, ebe ki meke, hit hinokodek o,” iluk yogeisasikhemo,

³³at agarumi ane waganhe lagoukha meke emenogo nen it-it hinok waganhe dogolik, men isukha, “Akhuni nen yi meke ti meke ageikhe at noagaluk wogosi ageikhama nen ekhe he a?” iluk isukha.

³⁴Itithogon isukhama at Yesus nen, men yogeisasikhe, “At an la'ani ageikhe meke etnogo akla apekherek meke tak-tagat hagakhe lagei iti inom, an hagasuagaluk nayoko bisikhe meke iti yabu ilugun thirliphogon hagasigiluk hagakhe lagei iti inom, an napiri itiat o.

³⁵Nen, hit nen ekhe dogolik, Thut henagan dogoluk nen ageikhe baga halok eken ugu arat palugun o, iluk egethep mekeat he, an nen wene ageikhe yokhisak.Ai yago meke hinileken lakhani o! Eken ugu horle agasik palusak tak-tagat werek o.

³⁶Ebe arat palho halok he, ap ageikhe ai yakherek meke inom, nen, ageikhe eken palherek meke inom, ipisak inakla arleken akhoagaluk, yogotak at ageikhe eken paliogo meke iti oko horliliogoat o. Oko horliliogo iti ebe re, eken palogo natogorlogo 'begarek iti hak, akhuni iniluk motok dogoagaluk natogorlogo 'bisiliogo itiat o.

³⁷Wene yi, inane dagakhogon ekhe dogolik, At ageikhe nen ai yakhik, at ageikhe nen eken palhik, hagakharek iluk iliogei iti eberogonat o.

³⁸It aperek nen yabu thet weakhogon waganha meke, hit nen thet degat eken palubageik iluk hinayoko 'biluk la'inagagi iti. It nen yabu thet weak halok, ebe winametdega meke, hit nen eken palhe dogobageik iluk la'inagagi o,” iluk yogeisasikhe.

³⁹Nen, at he etnogo uma ukisikhesik, wene men yogeisasikhe, “At ap iti nen, an yi hagakhik, ti hagakhik, hagakhe lagei meke tha'bokhogonat pakhogon motok yoknekhe,” iluk yogeisilik nekhe lageikhe iti baga, akhuni o Samaria meke etoma inebe doalegat inetaiken Yesus oba hakotdisukha.

⁴⁰Itithogon hakotdisukhasik nen, yabokane Yesus oba dukhi agoukhasik, men yogokhukha, “Hat ninom yoma dogouok o,” iluk hakhasukhama, inom etoma iniki pere welagoukha.

⁴¹Yesus inom etoma dogolik, alep inebe pererlagat negen inetaiken at oba hakotdisukha mekeat, yabokane wene at ebe nen yakulisugunem, inasuk holhukhasik nen, inebe motok doalegat inetaiken at oba hakotdisukhasik,

⁴²he etnogo men yogokhukha, “Yogotak nit ninetaiken at oba hakotdogo yi, wene hat nen yoknisegen iti baga anek ninetaiken at oba hakotdogo 'buk. Dek o. At he, at ebe nen wene yoknisugunem ninekaerek nen ninasuk tomok holhik, Akhuni agat oba meke tha'bokhogonat tilinakherek meke ebe yiat o, iluk hutdiluk ninilu ageik, hagakho iti baga nen ninetaiken at oba hakotdogoat o,” iluk yogokhukha.

⁴³At Yesus iki pere etoma inom welagoukhasik nen, o Galilea arat dagei ageikhe.

⁴⁴Dagei ageikhe iti, at Yesus ekaerek nen ekhe dogolik, “Ap Allah ane yogeisegarek meke iti, inekaerek inaila meke inoe inagot nen inalon halinakharek motok dek o,” iluk, alebat yogeisasikhe mekeat,

⁴⁵it akhuni o Galilea meke o Yerusalem pesta Paskah hagakhunem usasukhasik werekma, Yesus nen yi meke ti meke hagakhunem inileken hasukhasikmo nogo nen, at ebe dagei agunem heagei warogo waganhukha.

⁴⁶At Yesus ebe itithogon heagei warogo waganhukhama, alebat i meke anggur eken apusu hagakhikhe baga o Galilea ukul etaga Kana etnogo wageikhe. Wageikhesik werekma, ap kok pemerintah meke ageikhe, aila o Kapernaum meke, a'but oba u warek welageikhe.

⁴⁷Werekma akhuni nen, “Yesus etnogo o Yudea nen Galilea dagei agasik werek o,” iluk isukhama asuk holhikhesik oba wageikhesik nen, men yogokhikhe, “Noe. An na'but oba u watlasusak motok werekma, hat lalok nen hagasi lanogoluk hayoko wagei o,” iluk yogokhikhemo,

⁴⁸at Yesus nen, ap kok etnogo men yogokhikhe, “Hit akhuni yoma hinobabut, an nen hit hinilu asuagaluk elalin meke ageikhe hagakhunem hinileken nealok anek, hinetaiken noba hakotdusak hisekhe lagei. Elalin meke hagakhidek halok hinetaiken noba hakotdusak dek hisekhe lagei yi re!” iluk yogokhikhemo,

⁴⁹ap kok etnogo nen yogokhe dogolik, “Noe o. An na'but ebe aban watlageidek werek korlek etaat hagatnok nen luok o,” iluk yogokhikhemo

⁵⁰at Yesus nen, men yogokhikhe, “Hapuke lan o. Ha'but iti oba u arat dek atluk iluk asigin o,” iluk yogokhikhemo, ap etnogo akla nen apekhe dogolik, “Wene yoknekhe iti eberogonat yoknekhe higi,” iluk, etaiken Yesus oba hakotdiluk lageikhe.

⁵¹Itithogon akla ebetdiluk holagarlem aban lagunem, at atuaneke aperek wene wolok wagoukha hak inom abuk agoukhasik nen, men yogokhukha, “Hat ha'but etnogo u arat dek agama nen wago,” iluk yogokhukhama,

⁵²at nen it inoba hinok waganhe dogolik, men yogeisasikhe, “O mo ka baga nen u dek aga,” yogeisasikhemo, it nen men yogokhukha, “Hiamagane dikene jam satu tak-tak oba agaken etnogo arat dek aga o,” iluk yogokhukhama,

⁵³at elege opase etnogo nen akla ebekhe dogolik, “Hiamagane dikene o mo eta tak-tagat, at Yesus nen, Ha'but u dek asigin o, iluk, yoknekhe tak-tagat u dek agama,” iluk, akla ebetdiluk lageikhesik nen, at ebe men, a'buri men, inebe tha'bokhogonat inetaiken Yesus oba hakotdisukha.

⁵⁴At Yesus ebe o Yudea nen Galilea alep dagei ageikhesik akhuni nen ebe hutduagaluk elalin meke alep ageikhe hagakhikhesik oba nen, yabokane dagei ageikhesik, ageikhe hagakhikhe iti.