Read Mid Grand Valley Dani Yohanes 6 Bible Online

Yohanes 6 - Mid Grand Valley Dani bible

Yohanes 6

¹Itithogon yogeisekhe lageikhesik yabokane, at Yesus i yekelek Galilea, etaga ageikhe Tiberias egarek iti, aik ilibaganke italhikhe.

²I aik ilibaganke italhunem, alebat akhuni inoba u warek meke elalinat hagarinakhunem inileken hasukhasikmo nogo nen he, akhuni inebe doalegat doaldiluk, at oporlik lagoukha.

³Oporlik laga korlek, at Yesus agarumi ane waganhe lagoukha meke emenogo inomat dukhisukhasik, tom ukul oba dageisukhasik hurek lagoukha.

⁴Nen, eta mot-mot, it akhuni Yahudi meke nen, “Allah nen tilninakhikhe,” iluk inakla eberogo pesta etaga Paskah nekarek etnogo nausak oba arat hakok i ageikhe.

⁵Itithogon hurek lagoukhasik, at Yesus ileken aliluke lageisasikhe hak, akhuni doalegat natogosi agunem ileken lageisalok, Filipus men yogokhikhe, “Filipus. Akhuni doalegat ethoma hipiri noak nen, o koma meke oko palisa luok o,” iluk yogokhikhe.

⁶Itithogon yogokhikhe iti, at Yesus nen hagasigin meke ilu dogoligat, at Filipus obabut paligiluk yogokhikhe iti.

⁷Itithogon yogosigin apasikhe, at Filipus nen, men yogokhikhe. “Akhuni nen yabu iniki opakiat hasik hagakhunem iniki oko uang perak wogeisegarek iti meke nit nen 200 oba hipiri roti meke oko palisa laumo, akhuni yoma, 'bugurlak 'bugurlak eken waganhigik erlok nausak a? Erlok dek o,” iluk isikhemo

⁸at Yesus nen agarumi ane waganhe lagoukha meke ageikhe etaga Andreas, Simon Petrus etnogo agot nen, men yogokhikhe,

⁹“Noe. Yoma elege ageikhe hipiri roti jelai werago meke 5 oba, nen ikan pere meke inom hago werek mekeat he, akhuni motok doalegat yigirlikmo erlok nausak a? Erlok dek o,” iluk yogokhikhemo

¹⁰at Yesus nen agarumi emenogo men yogeisasikhe, “Nagarumi. Akhuni ethoma hurek lasuak nen, yogeisani o,” iluk isikhemo, pipuk erlo hunik doalegat talek werekma hureklarik lagoukhama, akhuni inebe doalegat meke re, ap anek inebe 5.000 oba iniki wenageinakhukha.

¹¹Itithogon hureklarik lagoukhama, at Yesus nen hipiri roti meke eranogo ikimo waganhikhesik nen, “Allah nopase,” iluk heagei warogo, akhuni doalegat hurek lagoukha meke emenogo supurisalok, ikan eranogo itithogonat supurisasikhe. Supurisasikhemo, it inakla nen, nelo apasukha meke re, hipiri ina'ithogon nasukha.

¹²Hipiri ina'ithogon nasukhama, at agarumi ane waganhe lagoukha meke emenogo men yogeisasikhe, “Hipiri nekasik ilugun titurogon 'bega meke ethoma alomatlasunogo iluk, natogorlogo opakimo 'bini o,” iluk yogeisasikhemo,

¹³hipiri roti jelai meke werago 5 baga emenogo nasukhasik nen, titurogon 'bisukha meke mul yago 12 meke eapem hetokhigik ukharlogo 'bisukha.

¹⁴Itithogon ukharlogo 'bisukhama, at Yesus nen ebe hutduagaluk elalinat hagakhikhe meke iti, it akhuni inileken hasukhasikmo nogo nen, men isukha, “Ap ageikhe nen Allah ane agat oba yoma yoknisasigin isukha etnogo eberogonat, ebe yiat o,” iluk isukha.

¹⁵Itithogon isukhama, at Yesus akla nen, “It iti witluk, an it inoe kok dogoagaluk inane inobatnerogon meldanugun higi,” iluk inobabut ekagat palhikhesik nen, o etoma here'isalok tom oba arligat dageisikhe.

¹⁶At Yesus ebe arligat dageisikhesik, agarumi ane waganhe lagoukha meke emenogo inoba wageidek aban werek korlek, o arat hi isikhemo, it anek i yekelek etnogo aik oba usa'agoukhasik nen, ku akla ukisukhasik, warogo o Kapernaum italuogoluk wagoukha.

¹⁷

¹⁸Itali agunem, hisakne aninirogon hubetha ageikhe iti nen, i hoklabu kok ageikhe.

¹⁹I hoklabu kogat hagakhe korlek, it emenogo ku warik turlem heisogo 5 kilometer a, 6 kilometer a, walegat asi agoukha hak, at Yesus etnogo i agoum obake holak isok 'bilik inoba mot-mot horogat wagunem, inileken lakhalok nen inayuk motok agoukha.

²⁰Inayuk motok agoukhama, at Yesus nen, men yogeisasikhe, “Nagarumi. Hinagorakma. An nebeat waga lagei. Halok he, hinayuk agup o,” iluk yogeisasikhemo,

²¹it inakla arlekenhogon Yesus ebe ku akla kola'uogoluk hagakhe korlek eranogoat, ku etnogo it nen i aik oba elaat italugun o, iluk inakla apasukhama eranogoat arat itali agoukha.

²²Itali agoukhasik oba nen, noge iluk hubuluke, it akhuni doalegat i aik ilibaganke 'bisalok wagoukha meke emenogo inakla nen, “Eiya. Hiam ku opakiat anek welaga meke re, at Yesus ebe inom dek. At agarumi ane waganiogei meke anek ku warogo italhunem ninileken hisogo,” iluk inakla apasukha. Itithogon ku ebe dek halogat isukha meke re,

²³yabokane ku ninat meke aperek akhuni o etaga Tiberias meke nen warik, ninoe Etagapogot Yesus nen sembayan Allah heagei warogo nen hipiri roti meke supurisasikhemo nasukha baga etnogo alilu itali agoukhasik werekma, inileken hasukha.

²⁴Inileken hasukhasik inakla nen apekhe dogolik, “Yesus ebe men, agarumi at ane waganiogei meke men, inebe dek yoma,” iluk, ku akla ukiluk, Yesus ebe herarik o Kapernaum itali agoukha.

²⁵It akhuni emenogo itali agoukhasik, at Yesus o Kapernaum werekma oba wagoukhasik nen, men yogokhukha, “Noe. Hat o yoma mera wagan,” iluk oba hinok wokhasukhama

²⁶at Yesus nen, men yogeisasikhe, “An wene ageikhe yokhisak. An nebe hutdanubageik iluk elalinat hagakhunem hinileken neegep etnogo nen heraknabik wagap 'buk. Dek o. Hipiri roti meke supusogon wokhisigima hina'ithogon nekep etnogo nenat heraknabik wagap hisigi o, iluk, eberogonat yokhisigi.

²⁷Hipiri hirli atluk dek asusak meke hasik yabu hagakhup o. At he, hipiri motok dogogin meke neke dogolik, iniluk motok dogosak meke iti, an nenat wokhisekhe dogoagaluk, nopase nen nayoko 'biluk la'ani ageikhemo, abat itaklasi agagi iti hasik yabu hagakhe dogono o,” iluk yogeisasikhe.

²⁸Itithogon yogeisekhe lageikhemo, it nen at men yogokhukha, “Noe. Allah akla apekherek meke hagakhe dogouok nen, nit ninobabut nikithogon hagakhe dogogun?” iluk, oba hinok waganhukhama,

²⁹at Yesus nen, men yogeisasikhe, “Allah akla apekherek meke hit nen hagasusak iti ebe yiat o. An Allah nen la'ani ageikhemo wagagi meke yi, hinetaiken noba hakotdusak itiat o,” iluk yogeisasikhemo,

³⁰it nen men yogokhukha, “Hebe hutdaguagaluk, elalin meke ageikhe hagakhunem ninileken 'bikhealok, ninetaiken hoba hakotduok nen, ebe ki meke hagasigin. Ageikhe nikithogon hagasigin.

³¹ Nit ninopa la o limo akhuni dekma dogolik, hipiri nau hak, etaga manna meke neke lagoukha iluk, Allah ane holal men iluk waganek werek, It inapiri neke dogoagaluk, at nen pogot oba meke usabi aga lageikhe, iluk holal waganek werek hagat, neke lagoukha,” iluk yogokhukha.

³²Itithogon yogokhukhama, at Yesus nen, men yogeisasikhe, “An nen wene eberogonat meke ageikhe yokhisak. Hipiri pogot oba nen usakhisa aga lageikhe iti re, at Musa nen 'buk. Dek o. At he, hipiri ebe meke iti, nopase nen an nebe akhuni agat oba meke inilugurinakherek meke pogot oba nen usa'agagi itiat wokhisekherek o,” iluk yogeisasikhe.

³³

³⁴Itithogon yogeisasikhemo, it nen, men yogokhukha, “Noe. Hipiri iti meke woknisekho motok dogono o,” iluk yokhukhama,

³⁵at Yesus nen, men yogeisasikhe, “Hipiri inilugurinakherek meke iti, an nebeat o. Ap tha nen noba wageik, etaiken noba hakotdigik, hagasigin halok he, hipiri abu ageik, i abu ageik, hagakhe dogogin dek o.

³⁶Meke re an nen wene alebat yokhisigi hagat, hinileken neekhe lagap mekeat he, hinetaiken noba hakotdusak hina'it o.

³⁷Meke re, an pogot oba nen usa'agagi iti, an nekaerek nakla nen kagalogo hagasigiluk usa'agagi 'buk. At la'ani ageikhe meke akla apekherek meke itiat mothogon hagasigiluk usa'agagi iti nen he, akhuni an nopase nen woknekherek meke inebe tomok noba wagunem, an nen, Hit an noba wisusak dek, iluk wenageisagein motok dek o.

³⁸

³⁹Nen, at akla apekherek meke an nen hagasuagaluk la'ani ageikhe iti, ebe yi, At nen akhuni an woknekherek meke tha'bokhogonat ageikhe naldigidegat, o ilugun hurli baga, an nenat inilugurinabuagaluk

⁴⁰nopase akla apekherek o. Nen, nopase itithogon akla apekhe dogolik, akhuni nen Allah a'but nebe yi inileken niigik, inetaiken noba hakotdigik, hagakhe halok, inebe dopok iniluk motok dogoagaluk, o ilugun hurli baga, an nen inilugurinabuagaluk akla apekherek o,” iluk yogeisasikhe.

⁴¹Nen, at Yesus nen itithogon yogeisekhe dogolik, “Hipiri roti pogot oba meke iti, an nebeat usa'agagi o,” iluk yogeisasikhe iti nen, it ap Yahudi meke nen, at abok kurlu-kurlu palhe dogolik,

⁴²“At yi etaga Yesus, ap Yusuf a'but. Nen, at opase agosa ninilu mekeat, at nen ekhe dogolik, An nebe pogot oba nen usa'agagi, iluk ekhe iti nikithogon nen ekhe apegep,” iluk isukhama,

⁴³at Yesus nen, “Hit-hit nabok kurlu-kurlu nabok palhe lagap iti, palhe 'buk o.

⁴⁴An nopase la'ani ageikhe meke etnogo nen, akhuni lit-lit an noba wogosik wageidek halok, noba wisusak erlok dek o. At nen, it aperek lit-lit wogosik wagunem noba wisugun halok, o ilugun hurli baga, an nen inilugurinabiginat o.

⁴⁵ Wene iti hasik it ap Allah ane yogeisekhe lagoukha meke emenogo nen holal waganogo 'bekhe dogolik men isukha, It akhuni tha'bokhogonat Allah nenat wene yakulisagein o, iluk, holal waganogo 'bisukha iti hagat, akhuni an nopase ane inasuk holiluk, at nen yakulisugunem yakulha halok, inebe tomok an noba wageikharegat o.

⁴⁶Wene yokhisigi yi re, it akhuni opakiat ageikhe nen, an nopase iti inileken hasukha iluk yokhisigi 'buk. Dek o. At he, an narligat Allah werekma nen wagagi meke yi anek, nopase nileken hasigi o.

⁴⁷Ap tha nen etaiken an noba hakotdekhe halok he, iniluk motok welageikharek meke iteerek agasik werek o, iluk, eberogonat yokhisigi o,” iluk yogeisasikhesik nen,

⁴⁸wene ageikhe men yogeisasikhe, “Hipiri inilugurinakherek meke iti, an nebeat o.

⁴⁹Hit hinopa lak o limo akhuni dekma dogolik hipiri nau hak, manna iti meke neke lagoukha meke re, inebe watlarik wagoukhaat.

⁵⁰Itithogon watlarik wagoukha meke re, hipiri ebe meke pogot oba nen usa'ageikhe iti. Itithogon usa'ageikhesikmo, tha nen hipiri iti meke nasi halok, at ebe watlageidek iluk motok dogogin o.

⁵¹Hipiri inilugurinakherek meke pogot oba nen usa'ageikhe iti re, an nebeat o. Hipiri an nen wogeisagein meke iti, tha nen nasi halok, at ebe iluk motok dogogin o. Akhuni agat oba meke iniluk dogoagaluk an nebe it inobasik watlasigin iti, an nebeat wogeisagein o,” iluk yogeisasikhe.

⁵²Itithogon yogeisasikhemo, it ap Yahudi meke emenogo nen, it-it wene palhe dogolik, wene men isukha, “Warligi yi. Ap yi ebe meke nit noagaluk nikithogon woknisagaluk nen yoknisekhe apegep,” iluk isukhama,

⁵³at Yesus nen, “An nen wene ageikhe yokhisak o. An abat itaklasi agagi etnogo nebe nikik, namep nikik, hagakhe lagap dek halok, iniluk motok welageikharek meke, hit iteerek ageidek welagap o, iluk eberogonat yokhisigi.

⁵⁴Meke re, tha nen an nebe nikik, namep nikik, hagariogo halok, iniluk motok dogogun meke iteerek atluk werekma, o ilugun hurli baga an nen ilugutdigin o.

⁵⁵An nebe inom, namep inom, iti re, hinapiri hinagei ebe mekeat o.

⁵⁶Tha nen an nebe nikik, namep nikik, hagariogo halok he, at nen an nipisak hunigat, nen, an nen, at nipisak hunigat, dogogun o.

⁵⁷An nopase iluk motok welagarek meke nen la'ani ageikhemo wagagi etnogo, at iluk welagarek iti nen an niluk welagarek hak, tha nen, an nebe neke halok, an niluk welagarek iti nen, at ilugat dogogin o.

⁵⁸Nen, hipiri pogot oba nen usa'ageikhe meke yi, hit hinopa lak neke lagoukha meke inebe watlaga lagoukha iti hakene dek mekeat he, ap tha nen hipiri ebe meke yi nasi halok, iluk motok dogogin o,” iluk yogeisasikhe.

⁵⁹Wene Yesus nen itithogon yogeisasikhe iti, at ebe o Kapernaum o akhuni Yahudi meke sembayan egarekma wene yakulisekhe dogolik yogeisasikhe.

⁶⁰At Yesus nen wene itithogon yogeisasikhemo, it at agarumi ane waganhe lagoukha meke emenogo aperek inebe doalegat wene iti inasuk holhukhasik nen, men isukha, “Wene ekhe iti re, akin werekma, tha hak nen waganigin apegep? Erlok dek o,” iluk isukha.

⁶¹Itithogon at ebe yogokhidek isukha mekeat he, at Yesus nen, “Wene igi etnogo hasik nagarumi nen ua palogo wene paliogei higi” iluk inobabut ekagat palhikhesik nen, men yogeisasikhe, “Wene yokhisigi meke yi nen, At nina'it, iluk kolelogo thogotdanuogoluk hagakhe lagap a?

⁶²An abat itaklasi agagi etnogo alebat welagagimo yabokane napuke dageisinem hinileken nealok nen, hinakla nikithogon apagun.

⁶³Allah Agoreke nen akhuni inilugurinakherek o. Nen, akhuni agat oba meke inobatne baga ageikhe hagasusak erlok dek o. Meke re, wene an nen yokhisekhe lagei iti, Allah Agoreke nenat ekherek meke nogo nen he, akhuni inilugurinakherek wene yokhisekhe lagei o.

⁶⁴Wene iti baga inilugurinakherek mekeat he, hit hetnake yoma eberogonat iluk hinetaiken an noba hakotdigidek welagap higi,” iluk yogeisasikhe. Itithogon yogeisasikhe iti, it aperek inetaiken at oba hakotdigidek meke inom, at ageikhe nen Yesus ebe wasuagaluk yoko ligin meke inom, it ap iti itithogon hagasugun, iluk at keram nenat ilu welageikhesikmo nogo nen, wene itithogon yogeisasikhe iti.

⁶⁵Itithogon yogeisasikhesik nen, wene ageikhe men yogeisasikhe, “Itithogon iluk, an nen, Akhuni Allah nen inakla kagalhidek halok, an noba wisusak erlok dek iti nen, wene itithogon yokhisigi o,” iluk yogeisasikhe.

⁶⁶Wene itithogon yogeisekhe lageikhemo, it akhuni at ane holek welagoukha meke emenogo inebe doalegat Yesus ebe thogotdisalok dukhisukhasik nen, yabokane oporlik nekhe dogouogoluk, oba wageidek huk asi agoukha.

⁶⁷Akhuni aperek itithogon oporlik lageidek huk agoukhama, at Yesus nen agarumi 12 emenogo men yogeisasikhe, “Hit meneke, itithogonat here'aniluk dukhuogoluk apekhe lagap a?” iluk yogeisasikhe.

⁶⁸Itithogon yogeisekhe lageikhemo, at Simon Petrus etnogo nen, men yogokhikhe, “Eiye. Noe. Ninebe niniluk motok dogosak hasik meke wene re, hat nen yoknisekhe lagan ha yoma re. Hat here'agaluk ap tha baga lausak apegen. Dek o.

⁶⁹Nit nen, ninoe hat Allah ekaerek hasik meldageiluk, eberogonat at nen la'agei ageikhemo ilu, hutdagagosik ninetaiken hat hoba hakotdiluk welago,” iluk itithogon yogokhikhemo,

⁷⁰at Yesus nen men yogeisasikhe, “An nen hit hinebe 12 oba yi wenakhinakhigi dek nogo? An nenat wenakhinakhigi mekeat, hat opakiat ageikhe Iblis mekeat welagan o,” iluk yogeisasikhe.

⁷¹Wene itithogon isikhe iti, ap Yudas, Simon Iskariot a'but hasigat isikhe. At ap iti ebe Yesus agarumi inebe 12 emenogo mekeat he, yabokane Yesus ebe wasuagaluk yoko lageikhe iti meke hasik isikhe iti.