Read Mid Grand Valley Dani Yohanes 9 Bible Online

Yohanes 9 - Mid Grand Valley Dani bible

Yohanes 9

¹At Yesus ebe o etoma thogotdiluk laga dogolik, ileken 'bikhasikhe meke, ap ageikhe agosa akla nen ileken motok puk itaklageikhe meke hasikhe.

²Itithogon ileken hasikhemo nen, at agarumi ane waganhe lagoukha meke emenogo nen Yesus itema waganhukha, “Noe. Ap ileken puk ithi, erlo at ekaerek nen weak hagakhikhemo nen a? At he, erlo agosa opase nen weak hagakhukhama nen itithogon itaklageikhe a,” iluk yogokhe lagoukhama,

³at Yesus nen he, men yogeisasikhe, “Erlo ap yi men, agosa opase men, weak hagakhukha baga ileken puk itaklageikhe 'buk. Meke re, Allah nen ap yi hano hagakhunem akhuni nen inileken halok, at Allah nen hagakherek meke inilu asuagaluk itaklageikhemo o,” iluk yogeisasikhesik nen,

⁴ageikhe men yogeisasikhe, “Yabokane o mum asigin o. Itithogon mum agunem, akhuni nen yi meke ti meke hagasusak erlok dek asigin iti nen, at la'ani ageikhe meke hagakherek meke iti, o yogotak o lia werek korlek ya bagaat hagakhe dogouok o.

⁵An agat oba yoma dogolik, nebe o lia hak etnogo nen he, akhuni lia hagarinakherek o,”

⁶iluk itithogon arat yogeisasikhesik nen, wosi suphogon agat oba 'bisikhesik nen, iki nen agat inom 'bisi negen hagarogo nen ap etnogo ileken oba dabuldisikhe.

⁷Itithogon dabuldisikhesik nen, ap etnogo men yogokhikhe, “I Siloam yekelekma ili baga helokhoken thobali lan o,” iluk yogokhikhe. I iti nit ninane baga la'isikhe u hak etaga Siloam werekma yogokhikhe. Itithogon yogokhikhemo at etnogo lageikhesik, elokhoken thobalhikhemo ileken hano ageikhemo apuke wageikhe.

⁸Itithogon ileken hano atluk wagunem, it akhuni at agarlak lak meke men, it aperek ap etnogo alep ape kino weak isinem inileken hekhe lagoukha meke men, inileken hasukhasik nen, men isukha, “Eiye! Nayuk o. Ap yi, ebe hurek anek dogolik, ape kino weak ekherek meke etnogo dek a? Ap etnogoat o,” iluk isukhama,

⁹it akhuni emenogo aperek nen men isukha, “Ebe arat o,” igik, it aperek nen he, “At 'buk. Ninat mekeat he, at elokhoken hakene,” igik, isukhama at ekaerek nen he, “Eberogonat an nebeat o,” iluk yogeisasikhemo,

¹⁰it nen at oba hinok waganhe dogolik, “Nikithogon nen hileken hano aga,” iluk yogokhukhama,

¹¹at ap etnogo nen men yogeisasikhe, “At etaga Yesus egarek etnogo nen agat meke iki nen 'bisi negen hagarogo nileken oba dabuldanhesik men yoknekhe, I Siloam yekelekma ili baga helokhoken thobali lan o, iluk yoknekhemo, at nen yoknekhe hagat, lagarik arat thobalhima, nileken hano aga o,” iluk yogeisasikhemo,

¹²it nen at yogokhe dogolik, “Ap iti ebe koma werek?” iluk isukhama at nen, “An nokodek o,” iluk yogeisasikhe.

¹³Itithogon isikhemo, it nen, ap ileken puk meke etnogo ap Farisi meke inoba wolok lagoukha.

¹⁴Itinem, iniki 7 baga Allah hasik werlegat werek korlek, at Yesus nen agat meke 'bisi negen hagarogo ap ileken puk meke hano hagakhikhe.

¹⁵Itithogon hano hagakhikhe iti nen, it ap Farisi meke nen ap ileken puk meke etnogo oba itema waganhe dogolik, “Nikithogon nen hileken hano aga,” iluk isukhama, at nen he, “At etnogo nen agat meke 'bisi negen hagarogo nileken oba dabuldanhemo, thobali lageima, hano aga o,” iluk yogeisasikhemo,

¹⁶it ap Farisi meke aperek nen he, men isukha, “Niniki 7 baga Allah hasik werlegat dogosak iluk, wene palek meke iti thagalogo 'bekhesik hagakhe iti nen, at ebe Allah werekma nen wageikhe meke re, dek o,” iluk isukha mekeat he, it ap aperek nen, “At ebe weak hagakherek meke dogolepma, wene hutduagaluk elalin meke yigithogon hagasusak a? Dek o,” iluk it inakla itithogon inasokhotek tomok apasukhasik inaneak thagalogo inebe mikikhukha iti.

¹⁷Itithogon mikikhukhasik ap ileken puk meke hano hagakhikhe etnogo oba itema yabokane waganhe dogolik, “Hat nen, At nen nileken hano hagatnakhe iluk egen apigi. Halok he, hat nen ap iti abok nikithogon apekhe lagan,” iluk yogokhukhama, at nen he, “At ebe ap Allah ane yogeisegarek etnogo mekeat o,” iluk yogeisasikhe.

¹⁸Itithogon yogeisasikhe meke re, it ap koktek Yahudi meke nen ap yi alebat ileken puk welageikhe mekeat he, yogotak ileken arat hano agama, iluk hutdusak ina'it nen, ap etnogo agosa opase waisasukhama it wagoukhama nen, initema waganhe dogolik,

¹⁹“Hit nen, elege ileken puk itaklagama isigip etnogo, ebe yiat a? Halok he, yogotak ileken nikithogon nen hano aga?” iluk yogeisasukhama,

²⁰it nen yogeisekhe dogolik, “Ap yi re, ebe nit nen 'bogo meke ileken puk itaklageikhe, ekhe lago etnogo mekeat

²¹nikithogon nen hano aga nit ninokodek o. Nen, tha nen hano hagakhe, nit ninokodegat o. Halok he, at ebe ap. Yekerek 'buk. Ebe arlueat ha yoma re. At ekaerek hasik yokhisoak nen oba itema waganini o,” iluk yogeisasukha.

²²Itithogon yogeisasukha iti, it ap koktek Yahudi meke nen ekhe dogolik, “It akhuni inebe tomok nen, Ap yi re, Allah nen nit akhuni tilninabuagaluk la'isigin isikhe etnogo Kristus ebe yiat o, iluk pakhogon isi halok, o sembayan egarekma nen lisogo ula'uok o,” iluk wene palhukha meke werek iti nen he, ap iti agosa opase it ap koktek Yahudi meke inayuk nen,

²³men isukha iti, “At ebe re, ap. Yekerek 'buk. Ebe arlueat ha yoma re. At ekaerek yokhisoak nen oba itema waganini o,” iluk yogeisasukha iti.

²⁴Itithogon isukhama it nen ap alebat ileken puk itaklageikhesik welageikhe meke etnogo yabokane waekhukhama wageikhemo, men yogokhukha, “Ap iti ebe weak hagakherek meke nit ninilumo, hat hekaerek nen hane eberogonat Allah etaga hupuk palogo yoknisan o,” iluk yogokhukhama,

²⁵at nen men yogeisasikhe, “At ap iti ebe weak hagakherek meke a? Dek a. An nokodek mekeat he, an alebat nen nileken puk welagei meke re, yogotak ya hano agarik welagei iti anek an nilu o,” iluk yogeisasikhemo,

²⁶it nen, men yogokhukha, “At nen nikithogon hagathakhe? Hileken nikithogon hano hagathakhe,” iluk yogokhukhama,

²⁷at nen, men yogeisasikhe, “Wene haganeat arat yokhisigi mekeat, hinasuk holusak hina'it hagakhe dogolik nen, yabokane hinasuk holuogoluk ekhe lagap iti nenaluk. Hit at agarumi asusak warlok nen ekhe lagap a? E a,” iluk yogeisasikhemo,

²⁸it nen inane sagun yogokhe dogolik, “Hat at agot agatik ekhe lagan higi. Nit he, ap Musa agarumi welago o.

²⁹Nen, ap Musa hasik anek, wene Allah nenat yogokhikhe, iluk, nit ninilu mekeat he, ap iti hasik anek, ebe o koma nen waga meke, nit ninokodek o,” iluk ekhe lagoukhama

³⁰at nen, men yogeisasikhe, “Eiye! Nayuk o. Ap iti nen, an nileken hano hagatnakhe mekeat, hit nen, At ebe o koma nen waga meke nit ninokodek, iluk ekhe lagap iti, nayukhogonat ekhe lagap o.

³¹Akhuni weak hagakharek meke Allah nen inane asuk holherek motok dek iti, nit ninilu o. Akhuni Allah inayukhogon dogolik, at akla apekherek meke mothogon hagakharek meke halok, inane Allah asuk holherek o.

³²Nen, akhuni haganeat ebekeram erlo baga nen yogotak hurli, akhuni aperek inileken puk itaklatlukmo nen yabokane hano hagarinakhukha, iluk ninasuk holhorek motok dek o.

³³Ap iti Allah nen la'i ageidek dogolepma re, at nen yi hagakhik, ti hagakhik, hagakherek itithogon hagakhe dogolep dek o,” iluk yogeisekhe lageikhemo,

³⁴it nen he, men yogokhukha, “Hat hobabut weagat itaklagagitik, weak motok hagakhetek mekeat, hat nen wene nit yakulnisausak a? Motok erlok dek o,” iluk yogokhukhasik nen, o sembayan egarekma nen iki korlo lisogo leget itikmanke ula'isukha.

³⁵Akhuni nen, “It nen ap etnogo leget abel itikmanke ula'ega,” iluk isukhama, at Yesus asuk hokhikhesik oba nen, yabokane ap etnogo ipisak abuk agoukhasik, men yogokhikhe, “Ap ageikhe ebe abat itaklasi isigin, isukha etnogo, ebe hutdiluk nen hetaiken at oba hakotdegen a?” iluk yogokhikhemo

³⁶at nen, men yogeisasikhe, “Ap iti ebe tha o, noe. An nen ap iti ebe hutdiluk nen netaiken at oba hakotdik nen, yakulnom o,” iluk yogokhikhemo,

³⁷at Yesus nen, “Hat hileken arat neegen etnogo yogotak nipisak wenekak ekhe lago nebe yiat o,” iluk yogosigin apasikhe,

³⁸at nen, men yogokhikhe, “Yogotak arat hutdagagirik netaiken hoba hakotdigi o, noe,” iluk itibagal yukukhogon Yesus hogorakhikhe.

³⁹Itithogon hogorakhikhemo, at Yesus nen, men yogokhikhe, “An nen akhuni aperek inileken puk meke hanorinakhik, it aperek inileken hano meke pugutdisigik, hagakhe dogeigiluk nebe agat oba yoma usa'agagi o,” iluk isinem,

⁴⁰it ap Farisi meke aperek etoma dogolik inasuk holhukhasik nen, men isukha, “Hat hakla nen, It inileken puk, iluk apekhe dogolik yoknisegen a? Dek o,” iluk yogokhukhama,

⁴¹at Yesus nen he, men yogeisasikhe, “Hit hinileken puk dogolepma, hit weak iluk wene hinoba 'bilep dek o. Meke re, hit nen, Nit ninileken hano hekhe lago, iluk ekhe lagap iti nen Allah nen, Hit weak, iluk, wene hinoba 'bekhemo werek o,” iluk yogeisasikhe.