Read Mid Grand Valley Dani La'isasikhe 1 Bible Online

La'isasikhe 1 - Mid Grand Valley Dani bible

La'isasikhe 1

¹Teofilus noe. An nen ebekeramat wene holal waganogo hoba la'i agagi iti, at Yesus nen yi meke ti meke hagakhik, yi wene ti wene yakulisigik, hagakhe lageikhe wene erlo baga hurli nen

²at opase nen ebe pogot oba wolok dageisikhe iti hurli, holal waganogo la'i agagi iti o. At ebe pogot oba aban dageigidek werek korlek, at agarumi wenago inebe inayoko 'biluk la'isagaluk hagakhikhe meke emenogo Allah Agoreke obatne baga inasuk wakhikhe.

³Yesus ebe watlageikhesik nen iluk atluk, iki 40 hari inom dogolik, at ebe thekekhogon hutduagaluk yi meke ti meke elalin doalegat hagakhe lageikhe. Itithogon hagakhe dogolik, at nen, “An nebe yi. Inileken hutukhogon neoak o,” iluk eran-alep inelokhoma melatluk inugurisigik, Allah apma dogogun wene yogeisigik, hagakhe lageikhe.

⁴Iniki ageikhe at agarumi inom opakimo natogorlek dogolik nen, men yogeisasikhe, “Yohanes nen ima usa'inageikhe lageikhe mekeat, hit hiniki doalegat welageidekma, Allah nen ima usa'inagu hak, at Agoreke hinoba usa'isigin iti, hinebe o Yerusalem yoma nen dukhugup. An nopase nen, It wogeisagein, iluk wene yokhisasikhe meke iti, an nen alebageik abok yokhisasigiat iti. Halok he, therogo dogono,” iluk wene warisasikhe.

⁶At Yesus nen wene iti yogeisasikhesik, at agarumi inom natogorlek dogolik, at oba hinok men waganhukha, “Noe. Haganeat nit Yahudi meke ninoe kok apma welagoukha iti hak, yabokane itithogon dogogun meke, yogotak ya bagaat 'binanigin a? Aban a,” iluk yogokhukha.

⁷Yogokhukhama, at Yesus nen men yogeisasikhe, “Wene egep iti,an nopase iteerek nen akla apasikhe tak-tagat hagatlasigin iti nen, hit nen, Hurli iti hurli baga dogoluk hagatlasigin, iluk hinilurogon dogosak erlok dek o.

⁸Itithogon mekeat he, Allah Agoreke hinoba usa'aga halok, hinobatne asigin. Hinobatne atluk nen, o kota Yerusalem nen, o propinsi Yudea nen, o Samaria nen, hurli o yi ai ti ai o ilugun ilugun elomaat laga dogolik, an yi meke ti meke hagarik nukhunem hinileken neegep meke etnogo, an nobasik yogeisilik laga dogono o,” iluk yogeisasikhe.

⁹Wene itithogon arat yogeisasikhemo nen, Allah nen at ebe pogot oba wolok dageisinem, inileken werek korlegat oisa nen thebelhikhemo, inileken yabokane higidek.

¹⁰Higidek dogolik, at Yesus ebe wolok dageisi korlek inileken pogot oba mot-mot liageik werekma eranogoat, ap inebe pere inasu kut meke yilik meke inalilu melasi usa'agoukha.

¹¹Melasi usa'agoukhasik nen, men yogeisasukha, “Hit akhuni o Galilea meke yirani. Hinileken pogot oba liageik welagap iti nenaluk. At Yesus hit yoma 'binageiluk pogot oba wolok dageisinem hinileken werek korlegat, pogot oba dageikhe iti hak, yabokane ebe itithogonat usa'isigin o,” iluk yogeisasukha.

¹²Itithogon yogeisasukhama, tom Zaitun oba etoma nen usa'agoukhasik nen, o kota Yerusalem walegat dek. Horogat satu kilometer hakene uki agoukha.

¹³Uki agoukhasik, uma etoma ukisukhasik nen, o henaipu welagoukhama etomaat dageisukhasik welagoukha. It iti inebe Petrus men, Yohanes men, Yakobus men, Andreas men, Filipus Tomas ipisak men, Bartolomeus Matius ipisak men, Alfeus a'but Yakobus iti men, Simon, “O yoma ninaierek meke anek dogogun,” iluk ekhe lageikhe meke iti men, Yakobus a'but Yudas iti men, inom welagoukha.

¹⁴It inebe eta inom, humi aperek inom, Yesus agosa Maria inom, Yesus agarumi oporlik meke inomat, inebe tha'bokhogonat inetaiken opakiat dogolik, sembayan isi motok welagoukha.

¹⁵Itinem, Allah a'buri aperek inom inebe 120 hakene natogorlek dogolik, at Petrus inakla melageikhesik nen, wene men yogeisasikhe,

¹⁶“Nagarlak lak nerugi. At Yudas etnogo, nit ninom yabu hano hagakhe dogoagaluk Yesus nen ayoko 'biluk meldisikhemo, nit ninom hano welagosik mekeat he, haganeat wene Allah Agoreke nen at Yudas hasik isikhemo, at Daud nen holal waganogo 'bisikhe meke werekma, at Yudas nen ap nen Yesus ebe hakhoagaluk wogosik waga iti, hagatlasusak obaat hagatlaga iti,” iluk yogeisasikhe.

¹⁸(At Yudas weak hagakhikhe iti hasik, isok oko wogokhukhama, agat oko palhe lageikhesik etoma lalok elokhe thogoum warekhe dogolik, elabut suphogon dukhisikhesik watlageikhe.

¹⁹Itithogon watlageikhemo, akhuni o Yerusalem welagoukha meke inebe tha'bokhogonat inasuk holhukhasik iniluk atluk, agat iti hasik nit ninane baga amep usasikhe baga u hak, it inane baga etaga Akeldama thalhukha.)

²⁰ Itithogonat, at Petrus nen men yogeisasikhe, “Etai holal waganek etaga Mazmur etnogo baga men isukha, O at werekma aila tho bon asuak. Ap ageikhe at aila etoma inebe degat dogoak o, iluk holal waganhukha. Nen, ageikhe men isukhaat, At ebe iteerek welagarek meke iti ap ageikhe horloak o, iluk isukha.

²¹Halok he, nit ninom nekhe dogoagaluk, ap ageikhe melduok. Ap meldusak iti, hurli at Yohanes ima usa'inakhe lageikhe iti hurli nen, ninoe Etagapogot Yesus ninom hibiku-yogoku oporlik nekhe lagosik, hurli Yesus opase nen nit ninakla nen kigilogo pogot oba wolok dageisikhe iti hurli, nit ninom nekhe lago meke halok, Yesus iluk aga iti eberogonat. Ninileken hogosik, iluk ninom yogeisilik nekhe dogoagaluk, melduok o,” iluk yogeisasikhe.

²³Yogeisasikhemo nen, it nen, “Ap yi melduok a? Ap yi melduok a,” iluk inebe pere inetaga isukha. Ap ageikhe etaga henagan, Yusuf igik, Barsabas igik, Yustus thalogo igik, ekhe lagoukha meke. Nen, ap ageikhe Matias iti.

²⁴Inetaga isukhasik, Allah ayoko 'bekhe dogolik, “Ninopase. Yudas hat hane yogeisilik nekhe dogoagaluk ayoko 'bisigin mekeat he, at nen thogotdiluk watlasusak tak-tagat watlagama, obolukmo ap inebe pere yi, hat nen ap ki hak ayoko 'begen. Hat akhuni inebe tha'bokhogonat inetaiken hilu iti. Halok he, Ap ebe yi ayoko 'bigi, iluk, hat nen yakulnisan o,” iluk yogokhukha.

²⁶Itithogon yogokhukhasik, “Ap yi melduok a? Yi melduok a,” iluk omatok tha oba mot-mot asigin inetaga thalogo walhasukhama, Matias etnogo baga mot-mot ageikhe. Mot-mot ageikhemo, it ap Yesus nen inebe inayoko 'biluk la'isasikhe meke emenogo inebe 12 meke 11 ageikhemo nen, suguluk 12 asuagaluk Matias inom dogoagaluk meldisukha.