Read Mid Grand Valley Dani La'isasikhe 17 Bible Online

La'isasikhe 17 - Mid Grand Valley Dani bible

La'isasikhe 17

¹At Paulus Silas ipisak o etoma nen, o Amfipolis nen Apolonia nen horlokhogon o kota Tesalonika wagoukha. O Tesalonika etoma, o akhuni Yahudi meke sembayan ekhe lagoukhama ageikhe halek welageikhe.

²Itithogon halek werekma, at Paulus o sembayan egarekma halek werek halok ukekhe lageikhe hagat, inoba ukisikhe. Ukisikhesik nen, 3 minggu baga sembayan etoma ekhe dogolik, wene Allah ane holal waganek etnogo baga inakla kagalogo hinok wogeisugunem it nen oko yogokhik, hagakhe lagoukha.

³Allah ane holal waganek etnogo baga thelekmarogo yogeisekhe dogolik, men yogeisekhe lageikhe, “At Kristus Allah nen la'isigin iluk isukha etnogo, yi aik ti aik hilik hilik watlatluk nen, iluk asigin, iluk isukha. It isukha iti hagat, at Yesus hagakhikhe wene abok yokhisekhe lagei meke yi, hagasusak tak-tagat hagakhikhemo. Allah nen la'isigin iluk isukha iti, ebe Yesus itiat o,” iluk yogeisasikhe.

⁴Itithogon yogeisasikhemo, it akhuni ebetlake nen, “Eberogonat,” iluk wene iti waganhukhasik, it Paulus Silas werekmake asi lagoukha. Iti hagat, it akhuni Yunani meke Allah ane waganhukhasik inebe Yahudi meke negen welagoukha meke doalegat it werekmake asi lageik, humi koktek meke inebe doalegat it werekmake asi lageik, hagakhukha.

⁵Inebe doalegat it Paulus Silas ipisak werekmake itithogon asi lagunem, it akhuni Yahudi meke ua palogo, it ap inobabut weak meke o silimo werlegat werekma inebe woginabiluk nen, inebe doalogo akhuni o kota Tesalonika etoma meke inakla kagalik laga lagoukhama, wene kogat woklageikhe. Itithogon hagatlageikhemo, at Paulus Silas ipisak iniki korlo lisogo akhuni doalegat inoba wogosik luogoluk, herageinabik, doaldiluk o ap Yason werekma o lasi lagoukha.

⁶O lakhe dogolik, Paulus lak inebe dek nen, Yason men, Allah a'buri ebetlake men, iniki korlo lisogo ap koktek pemerintah meke inoba wogosik wagoukha. Wogosik wagoukhasik nen, inane kokhogonat men yogeisasukha, “Ap o yi ai ti ai elokhoken weagatdilik liliogei meke emenogo yoma wageikhasikmo,

⁷at Yason yi nen woginakhemo. It ap iti nen, Ninoe Kok Etagapogot ninat Yesus werek o, iluk, ninoe kok Kaisar ane thogotdisiliogei o,” iluk yogeisasukha.

⁸Itithogon yogeisasukhama, it ap koktek pemerintah meke men, akhuni inebe doalegat emenogo men, inakla aga dageisikhe.

⁹Inakla aga dageisikhemo, it ap koktek pemerintah meke emenogo nen Yason lak nen oko wogeisoagaluk yogeisasukhama wogeisasukha. Wogeisasukhama inebe iniki herle hisalogo ula'isasukha.

¹⁰Itithogon ula'isasukhama, o hi ageikhemo, it Allah a'buri nen Paulus Silas ipisak o Berea la'isa agoukha. La'isa agoukhama wagoukhasik nen, o akhuni Yahudi meke sembayan ekhe lagoukhama ukisukha.

¹¹It akhuni Yahudi o Berea meke inobabut, akhuni o Tesalonika meke inakla puk welagoukha iti hak dek. At he, it wene inakla arlekenhogo waganhe dogolik, “Wene ekhe iti eberogonat a? Men a,” iluk, Allah ane holal waganogo 'bisukha meke etnogo hibiku-yogokuat etaga thalogo hutukhogon 'bikhekhe lagoukha.

¹²Itithogon 'bikhekhe dogolik, akhuni Yunani meke, humi koktek men, ap doalegat men, inebe doalegat inetaiken Yesus oba hakotdisukha.

¹³Itithogon hakotdisukhama, akhuni nen inabok ekhe dogolik, “Paulus nen, Allah ane o Berea yogeisiliogo,” iluk isinem, it akhuni Yahudi meke o Tesalonika welagoukha meke emenogo inasuk holhukhasik wagoukha. Wagoukhasik nen, akhuni doalegat emenogo weak hagasuagaluk inakla kagalhe lagoukha.

¹⁴Itithogon hagakhunem, Silas Timotius ipisak, o etoma huk aga korlek, it Allah a'buri emenogo nen, Paulus anek, “Ibat lano,” iluk wolok i laut kok yekelek aliluke wagoukha.

¹⁵Itithogon wagoukhasik imake wolok o kota Atena wagoukha. Wagoukhasik inapuke o Berea luogoluk hagakhunem, at Paulus nen, “Silas Timotius ipisak noba ibat wisuak,” iluk wene warogo la'isasikhemo lagoukha.

¹⁶At Paulus, Silas Timotius ipisak therisik o kota Atena etoma dogolik, o etoma kaneke ai halek motok doalegat hagarek werekma ileken halok, akla motok weak ageikhe.

¹⁷Akla weak ageikhesik nen, hibiku-yogoku o akhuni Yahudi meke sembayan ekhe lagoukhama ukisikhesik, it Yahudi meke men, werlek meke Allah ane waganhukhasik Yahudi meke negen welagoukha meke men, at nen wene inakla kagalogo yogeisugunem, it nen at oko yogokhe lagoukha. Itithogon hagakhe dogolik, akhuni pasar oko waganharekma lalok, akhuni inom abuk atluk, at nen wene inakla kagalhunem, it nen oko yogokhe lagoukhaat.

¹⁸Itithogon ekhe dogolik, at nen it akhuni wene Epikuros wene hago dogolik it aperek yakulisekhe lagoukha meke men, wene Stoa wene hago dogolik, it aperek yakulisekhe lagoukha meke men, wene inakla kagalogo yogeisugunem, it nen oko yogokhik, it nen at yogokhunem, at nen oko yogeisigik, ekhe lagoukha. Itithogon ekhe lagoukha meke aperek nen, at Paulus hasik men isukha, “At he, wene ilu nogo? At okodek. Hemurlugat ilu dogoligat, ane anek motok doalegat yoknisiliogo,” iluk isukha. Itithogon isukhama, it aperek nen, at Paulus nen hano wene yogeisekhe dogolik, Yesus nen hagakhikhe wene yogeisigik, akhuni watlatlukmo nen Allah nen inilugurinakherek wene yogeisigik, ekhe lageikhe iti nen, men isukha, “Akhuni ninat meke inausa wene hasik yoknisiliogo he a,” iluk isukha.

¹⁹Itithogon isukhasik, it akhuni o Atena etoma inaierek meke tha'bokhogonat men, ap huso meke etoma welagoukha meke men, inobabut he, ninat meke hagakhidek, wene kerat wolok wagunem inasuk holhik, wene ebe pilinikhik, isi motok dogou warlok welageikharek iti nen, Paulus ebe wolok, akhuni o Areopagus wene 'bogokhogon palharekma etoma natogokhunem inoba wolok lagoukhasik, men yogokhukha, “Hat wene ket wolok wagatik yakulnisekhe lagan iti, nit ninasuk holhe dogolik, ninat meke apekhe lago iti nen, nit wene iti ebe nikithogon meke, iluk hutukhogon ninilu asusak warlogat,” iluk yogokhukha.

²⁰

²¹

²²Itithogon yogokhukhama, at Paulus ebe ap koktek o Areopagus etoma natogokhukha emenogo, inakla turlem melageikhesik nen, men yogeisasikhe, “Ap Atena meke yirani. Nougi nagarlak lak. Hit he,yi meke ti meke hasik hagasuogoluk, kaneke hinausa meke itiat hinetaiken hunik hinobabut palhe lagei.

²³An o hit hinai ukul yoma nekhe dogolik, o usa hagakhe lagapmake nileken hilik nekhe dogolik, kaneke ageikhe ai halekma ako warogo 'bisegethepma etoma holal men iluk oba waganek werekma nileken higi, Yi walhenak ninokodek meke hasik o, iluk holal waganek werekma higi. Hit hinokodek dogolik hogorakhe lagap iti ebe re, an nen hanorogo yakulhisak.

²⁴Allah nen, o agat yoma walhigik, yi meke ti meke tha'bokhogonat walhigik, hagakhikhesik nen, pogot agat iteerek kok welagarek iti. Itithogon halok, at ai akhuni iniki nen halharek meke etoma akla at Allah dogosak erlok dek o.

²⁵Nit akhuni tha'bokhogonat, at nenat ninebe ninilugutninakhik, thet woknisigik, yi meke ti meke woknisigik, hagakherek iti nen, yi meke ti meke at erlageik iluk nit akhuni nen wogosusak erlok dek o.

²⁶At Allah nenat, yi akhuni ti akhuni o inaila tomok dogoagaluk, o hurli 'bigik, Tahun iti baga dogoluk, it baga dek asuak, iluk hurli 'bigik, akla tak apasikhesik nen, yi akhuni ti akhuni inukuloak etaga tomok tha'bokhogonat wialarik loagaluk, erlo baga, ap opakiat walhasikhe.

²⁷Itithogon walninakhikhe iti, akhuni inileken puk meke nen yi meke ti meke iniki hak herakharek hak, akhuni ninukuloak etaga tomok nen at Allah ebe herakhik, ninilu ageik, hagasuagaluk walninakhikhe iti. Meke re, at ebe walegat welagarek 'buk. Ninebe tomok ninalilu horok yaat welagarek o.

²⁸It aperek nen itithogonat iluk men isukha, At Allah obatne baga ebe ninom hunik niniluk dogolik, holak oba lageik, yi meke ti meke hagakhik, hagakhoat welago, iluk isukha. Itithogonat etai ap hit meke nen men iluk isukhaat, Nit tha'bokhogonat, at a'buri welago, iluk isukha iti.

²⁹Nit itithogon at a'buri welago halok he, at ebe hakene nit akhuni nen ninakla apalok, niniki nen kaneke emas meke, perak meke, helekit meke, hagarogo hagasusak dek higi, iluk hutdusak o.

³⁰It alebat Allah ebe inokodek dogolik, inobabut weak hagakhe korlegat, at nen obakhanini hapugutdiluk here'isekhe lageikhe. Itithogon mekeat, yogotak yaat nen, Yi akhuni ti akhuni tha'bokhogonat o itinem initema waganogo wene inoba 'bigik, kokhik, mothogonat hagasuak, iluk ap ageikhe wenago 'biluk ayoko 'bekhemo werek iti nen, nit akhuni weak hagakhe lago meke here'isalok ninobabut hebelasuagaluk yoknisiliogo iti. Halok he, nit nen, Wene itithogon hagasigin iti, eberogonat, iluk nit tha'bokhogonat hutduagaluk, ap iti ebe watlageikhesikmo nen, opase nen apuke ilugutdisikhemo werek o,” iluk yogeisasikhe.

³¹

³²“At watlageikhesikmo nen, ilugutdisikhemo werek o,” iluk yogeisugunem, inasuk holhukhasik, it aperek nen, Paulus obato agoukha. Nen, it aperek nen, “Wene egen iti, nit ninasuk yabokane holuagaluk hibike halok yoknisausagat o,” iluk yogokhukha.

³³Itithogon yogokhukhama, at Paulus it o etoma thogotdiluk dukhisikhe.

³⁴Itithogon thogotdiluk dukhisikhe mekeat, it akhuni aperek at oba lapeli lagoukhasik nen, “Wene iti eberogonat,” iluk inetaiken Yesus oba hakotdisukha. It iti ageikhe etaga Dionisius, it ap kok o Areopagus iti inom natogokhe lagoukha meke. Nen, he ageikhe etaga Damaris, nen, it aperek inomat itithogon inetaiken Yesus oba hakotdisukha.