Read Mid Grand Valley Dani La'isasikhe 25 Bible Online

La'isasikhe 25 - Mid Grand Valley Dani bible

La'isasikhe 25

¹Ap Festus etnogo meldisukhama, o Kaisarea etoma wageikhesik nen, iki henagan welageikhesik nen, o Yerusalem lageikhe.

²Lageikhesik werekma, it ap Allah iteerek meke inougi koktek emenogo men, akhuni Yahudi meke inougi koktek inetaga werek aperek men, inom oba ukisukhasik nen, ukum Paulus oba 'bekhe lagoukha meke etnogo yogokhukha. Yogokhe dogolik, akla kageik-kagoukhogon hagakhukha.

³Itithogon hagakhukha iti, at kok agarumi nen Paulus ebe wolok o Yerusalem wisuogoluk wagunem, holagarlem wasuogoluk abok inane opakiat dapukhogon isukhasik nen, at yogokhe dogolik, “Hat hobabut hano nen, nit ninakla hanorogon Paulus ebe o Yerusalem yoma la'itno,” iluk inane liokhogon kino yogokhukha iti.

⁴Itithogon yogokhukha mekeat, at Festus nen, “At Paulus iki herle warek o Kaisarea etomaat dogoak o. Werekma, an yoma welageidek ibat ligin o.

⁵At nen hagasusak dek meke ageikhe hagakhemo halok, hit ap koktek yoma nen ukum oba 'bubageik nen iluk ninomat luok o,” iluk yogeisasikhe.

⁶Itithogon yogeisasikhesik, iki 8 hari nen a? 10 hari nen a. Inom o Yerusalem welagoukhasik nen, o Kaisarea wageikhe. Wageikhesik, hubenke, o akhuni ukum inoba 'bigik, kokhik, hagakhe lagoukhama hureklasi ukiluk, agarumi nen Paulus ebe wolok wisuagaluk yogeisasikhe.

⁷Yogeisasukhama lagoukhasik ebe wolok wagoukhama nen, it ap Yahudi meke o Yerusalem nen wagoukha meke emenogo Paulus ebe dagakhogon metek dogolik, yi ukum ti ukum akin meke doalegat oba 'bisukha. Itithogon mekeat, at weak ageikhe hagakhidek etnogo nen, “Eberogonat weak yigithogon hagakhunem ninileken hogo,” iluk yogosusak dek ageikhe.

⁸Itithogon dek ageikhemo, at Paulus nen ebe irlirlirogo men yogokhikhe, “Wene Allah nen nit akhuni Yahudi meke ninasuk wakhikhe wene etnogo ageikhe thagalogo thogotdilik weak hagakhik, o Allah ai halek etnogo weagatdigik, ninoe kok Kaisar o Roma meke etnogo ane thagalogo thogotdiluk ageikhe weak hagakhik, motok hagakhidek o,” iluk yogokhikhe.

⁹Itithogon yogokhikhemo, at Festus nen, akhuni Yahudi meke inakla hanorogo iluk, Paulus men yogokhikhe, “O Yerusalem etoma nen wene yi hasik an nil oba erlo herakhunem, eberogonat halok an nen ilokon wasik nen, ninom luok a? Ha'it a,” iluk yogokhikhe.

¹⁰Yogokhikhemo, at Paulus nen, “An yogotak wene inoba 'bigik, kokhik, hagakharekma yoma, ninoe kok Kaisar Roma meke ikimo welagei. Halok he, ukum noba 'bega meke yi, at werekma etoma nenat erlo herago ilokon wasuak. An nen it Yahudi meke weak ageikhe hagarinakhidek iti, hat hiluat o.

¹¹An nen ageikhe hagasusak dek meke hagakhik, weak hagakhunem inebe motok inakharek meke hagakhik, eberogonat hagatlema, Nasusak morat o. Natni, iluk ile. Meke re, it ap yoma nen wene noba dekmaat 'biliogei iti nen, it aperek nen, it ap yi inakla hanorogo iluk, an nebe it inikimo 'banusak erlok dek o. Noe Kaisar nenat wene iti erlo herago ilokon wasuak o,” iluk yogokhikhe.

¹²Yogokhikhemo, ap aperek at Festus inom dogolik, “Yigithogon hagasuok, tigithogon hagasuok,” iluk inom ekhe lagoukha meke inom nen, “Itithogon hagasuok,” isukhasik nen Paulus men yogokhikhe, “Hat nen, Wene yi, ap Kaisar nen erlo herago ilokon wasuak o, iluk egen iti nen, Kaisar oba la'agaginat o,” iluk yogokhikhe.

¹³Itithogon isukhasik nen, iniki pererlagat werekma nen, ap kok etagapogot Agripa eru Bernike ipisagat, ap Festus heagei wasuogoluk oba o Kaisarea wagoukha.

¹⁴Wagoukhasik iniki aperek inom etoma werekma, at Festus etnogo nen, wene Paulus hasik Agripa men yogokhikhe, “Ap Feliks nen ap ageikhe iki herle warek here'isikhe meke yoma werek.

¹⁵Werek korlek, an o Yerusalem lageima, it ap Yahudi meke Allah iteerek inougi koktek men, inarluetek men, inom noba wageikhasik nen, an nen ap iti ukum oba 'biluk ebe wasuagaluk yoknekha.

¹⁶Yoknekha meke re, an nen oko men yogeisigi, Nit akhuni Roma meke hagakhorek he, ap ageikhe wene oba 'bisinem, it wene oba 'bugun werek nen ap iti ebe yogokhunem, at nen oko it yogeisigidekma, inebe inasuagaluk wogeisausak dek, iluk yogeisigi.

¹⁷Itithogon yogeisigirik, inebe ninom yoma wagosik, niniki welageidegat, hubenke nagarumi nen ap iti o akhuni ukum inoba 'bigik, kokhik, hagakharekma wolok wisuagaluk yogeisigi.

¹⁸Itithogon yogeisigima, lageikhasik ebe wolok wageikhama, at ebe turlem meldiluk, it ap emenogo melatluk nen, motok weak hagakhe meke ukum oba 'bugun apigi meke, itithogon oba 'bigidek.

¹⁹'Bigidek meke re, it nen inopase Allah oba inetaiken hakotdiluk dogolik inane inasokhotek egarek meke hasik ukum ageikhe oba 'bigik, ap ageikhe etaga Yesus iti, ebe watlageikhe mekeat, at Paulus nen, Yabokane apuke iluk ageikhesik werek o, iluk ane obatnerogon iliogo iti nen ukum oba 'bigik, hagakha o.

²⁰Ukum itithogon oba 'bega meke iti, an wene iti hasik hutdigidek. Nobakha palagama nen, an nen Paulus men yogokhi, O Yerusalem lalok nen, wene yi erlo herago, an nen ilokon wasik nen, luok a? Ha'it a, iluk yogokhi.

²¹Yogokhima, at Paulus nen, Wene yi at Kaisar nen erlo herago ilokon wasuak nen niki herle waregat here'aninok o, iluk ekhemo, an nen nagarumi men yogeisigi, At Kaisar oba la'usak aga halok, la'iginmo, iki herle waregat hago dogono, iluk yogeisigima werek,” iluk yogokhikhe.

²²Yogokhikhemo, at Agripa nen, “Ap iti ane an nasuk dopokhogon holusak warlok o,” iluk yogokhikhemo, at Festus nen, “Halok he, huben halok at ane hasuk holinok o,” iluk yogokhikhe.

²³Yogokhikhemo, hubenke ap Agripa he Bernike ipisak hogorinakhe korlek, it ap tentara inougi koktek men, ap o etoma meke inetaga werek meke men, inom o ukum inoba 'bigik, kokhik, 'begarekma etnogo ukisukha. Ukisukhama, at Festus nen agarumi nen Paulus ebe wolok wisuagaluk yogeisasikhe.

²⁴Yogeisasikhemo lagoukhasik ebe wolok wagoukhama, at Festus nen, “Agripa noe. Nen, hit ap aperek ninoba uki agap meke yoma hinom, nagarlak lak nerugi. Ap yi hinileken hegep yi, it akhuni Yahudi meke o Yerusalem nen, yoma nen, inebe tha'bokhogonat nen, an yoknekhe dogolik, Ap yi iluk dogosak dek. Wasusak o, iluk inane kokhogonat iliogei.

²⁵It nen itithogon iliogei mekeat, an nen wene iti erlo herakhi meke re, at nen weak ageikhe eberogonat hagakhunem, ukum inoba 'biluk inebe inakharek tak-tagat ageikhe hagakhe dekma higi. Mekeat, at ekaerek nen, Ukum yi ap Kaisar nen erlo herago ilokon wasuak, iluk ekhemo, Kaisar oba la'igiluk igi iti.

²⁶Meke re, wene at oba 'bega meke iti erlo herakhunem, an nen hutdigidek nobakha palagama wene iti hasik holal waganogo ninoe kok Kaisar oba nikithogon la'usak heat agama nen, nagarlak lak. Hit tha'bokhogonat men, ebe kok hak noe Agripa men, hinom nen ukum Paulus oba 'bega meke iti, erlo herakhunem, an hutdiluk holal thekekhogon waganogo la'igin iluk nakla apigirik nen at ebe hinoba wolok wagei yi.

²⁷Itithogon hagakhi iti, wene erlo herago nen, Itigithogon hagakhemo, iluk holal thekekhogon waganhidekma, at iki herle warogo la'usak nen, erlok dek apigirik nen at ebe wolok wagei iti,” iluk yogeisasikhe.