Read Mid Grand Valley Dani La'isasikhe 26 Bible Online

La'isasikhe 26 - Mid Grand Valley Dani bible

La'isasikhe 26

¹At Agripa nen, Paulus men yogokhikhe, “Wene hat hekaerek hasik yoknetnogoluk yokhikhi,” iluk yogokhikhemo, at Paulus iki baga heagei wakhikhesik men yogokhikhe,

²“Agripa noe. Wene it ap Yahudi meke nen ukum noba 'biliogei iti, noba dekmaat o, iluk nebe nirlirlirogo wene hat hil obaat yogotak igin yi, nakla arleken akhekhe lagei.

³Nit akhuni Yahudi meke hagakhorek meke iti men, wene ninane ninasokhotek ogorek meke iti men, tha'bokhogonat hat hilu iti nen, nane harat yokhesigiluk nakla arleken akhekhe lagei o. Halok he, yokhekhe korlek, hakla puk ageidek hasuk holek dogono, noe.

⁴An nebe elege baga nen akhuni ninukuloak opakiat meke ninom o kota Yerusalem dogolik nobabut erlo baga nen hagakhe lagagi meke iti, it akhuni Yahudi meke tha'bokhogonat inilu o.

⁵Nit Allah apma ukiluk dogolik hagakhe lago wene iti, it akhuni aperek Farisi meke inawene hago dogolik, yugunat hakene hagakhe korlek, an anek, motok a'bethogon hago dogolik hagakhe lagagi iti, it ap yoma haganeat nen inilu motok o. Halok it nen, Iti eberogonat hagakhe lageikhe mekeat ekhe, iluk yokhesusak he a? Ina'it he a.

⁶Yogotak ukum noba 'bega meke erlo herasuogoluk metek welagei yi, at Allah nen, Itithogon hanothinabigin, iluk ninopa lak wene warisasikhe wene iti, an nen, Eberogonat hanotninabigin o, iluk netaiken at oba eberek welagei iti hasik, ukum noba 'bega meke erlo herasuogoluk welago yi.

⁷Alebat nen, nit akhuni Yahudi meke ninukuloak etaga dopok 12 yoma tha'bokhogonat nen, Allah nen, Itithogon hanothinabigin, iluk wene warisasikhe iti, ebe hagarinabuagaluk, inetaiken Allah oba hakotdiluk dogolik, dikene hibako, at hogorakho motok welageikharek. An meneke, wene warisasikhe iti eberogonat hagatninabiginat o, iluk eberek welagei iti nenat, it ap Yahudi meke yi nen ukum noba 'biliogei yi, noe,” iluk at Agripa yogokhikhesik,

⁸yabokane it ap Yahudi meke yogeisekhe dogolik, “Nagarlak lak. Hit nen, Allah nen akhuni watlageikharek meke eberogonat inilugurinabigin, iluk, hutdu'buk iti nenaluk,” iluk yogeisasikhesik, Agripa men yogokhikhe,

⁹“An alep nen, Yesus ai Nazaret meke etaga iti dek asuagaluk yi meke hagakhik, ti meke hagakhik, hagakhe dogoginat o, iluk nakla apasigi.

¹⁰Itithogon hagakhe dogolik, alebat o Yerusalem dogolik, Allah a'buri iniki herle wasigiluk hagakhigimo nen, it ap Allah iteerek inougi koktek nen, I o. Hano, iluk surat woknikhukhama, Allah a'buri inebe doalegat iniki herle warogo 'bisigik, inebe inasuogoluk isinem, I o. Inasuogat, iluk igik, ekhe lagagi.

¹¹Itithogon ekhe dogolik, an o akhuni Yahudi meke sembayan egarekma dopok ukiluk, it inetaiken Yesus oba hakotdiluk welagoukha meke here'isoagaluk nane obatnerogon yogeisigik, yi aik ti aik hagarinakhik, hagakhe dogolik, nakla aga apik dageikhe dogolik, it aperek o walegat ilugun-ilugun etoma meke mugusik laga lagagiat,” iluk yogokhikhe.

¹²“Itithogon inasigiluk hagakhigimo, it ap Allah iteerek inougi koktek nen, Hano, iluk surat waganogo woknikhukhama, o kota Damsyik lagagi iti.

¹³Agripa noe. Itithogon o dikene holagarlem lagunem, mo a'bi'bal hakene re, erlok dek. A'bi'bal weak meke, an men, ap ninom lagagu meke men, pogot oba nen lia ninaliluke yasi usa'ageikhe.

¹⁴Itithogon yasi usa'agunem, nit tha'bokhogonat agat oba ninelokhe thogoumhogo usasugumo, at ageikhe nen ane yoknekhe dogolik, akhuni Ibrani meke ninane baga men isinem nasuk holhigi, Saulus. Saulus. Anat yi aik ti aik hagatnabigiluk muknarek nekhe lagan iti nenaluk. Sapi thegerluk ekat ka'belek meke baga ebe thakhugunem, Na'it, iluk ekaerek nen karlukhogon warekherek iti hak, hat hekaerek nen hebe itithogonat weagarakhekhe lagan o, iluk yoknikhikhe.

¹⁵Itithogon yoknikhikhemo, an nen, Eiye. Noe. Hat tha, iluk yogokhigi. Yogokhunem ninoe Etagapogot iti nen, An Yesus. Yi aik ti aik hagatnabigiluk muknarek nekhe lagan meke etnogoat o.

¹⁶Meke re, hebe melasin. An nebe helokhoma melasi agei yi. Hat hebe an natuaneke atluk dogolik, yogotak hileken neegen meke men, yabokane nebe helokhoma melagunem neagein meke men, akhuni aperek yogeisekhe dogonogoluk, hayoko 'bigi iti.

¹⁷Akhuni Yahudi meke men, it itikmanke meke men, hasuogoluk hagakhunem, an nen tilhakhe dogogin o. It itikmanke meke inileken puk werek iti 'bekelogo hagarinakhik, inebe o mummo werek iti inelokhe hebenogo lia baga 'bisa ageik, Iblis iki baga werek iti, Allah iki baga 'bisa ageik, hagatnok nen iluk inoba la'agagin o. La'agumo, it inetaiken an noba hakotdumo, it weak hagariogei meke iti, at Allah nen thagalogo degetdisigik, An na'buri iluk, inebe woginakhik, hagasigin o, iluk yoknikhikhe,” iluk yogokhikhe.

¹⁹Itithogon yogokhikhesik, ageikhe men yogokhikhe, “Iti nen, Agripa noe. Allah nen Yesus nelokhoma melasuagaluk la'i ageikhe meke iti, ane hologo hagakhe dogeigiluk nobatnerogo hagakho motok welagei.

²⁰Wene iti, ebekeram it akhuni Yahudi meke o Damsyik etoma welagoukha meke yogeisasigi. Yabokane o Yerusalem lalok dogolik, it etoma meke yogeisigik, o propinsi Yudea meke tha'bokhogonat yogeisigik, hagakhigisik, it itikmanke meke yogeisilik nekhe lagei. Itithogon yogeisilik nekhe dogolik, Weak hagakhe lagap meke here'isalok hinobabut hebelogo hinelokhe Allah wogotno o. Hinelokhe Allah wogotluk nen, hinobabut akhuni inobabut hebelatluk hagakharek hagat, hagakhe dogono o, iluk yogeisekhe lagei iti.

²¹Yogeisekhe lagei iti nenat, an Allah ai halekma ukiluk werekma, it ap Yahudi meke nen nebe ha'aniluk nasuogoluk hagakhukha.

²²Nasuogoluk hagakhukha mekeat, Allah nen haknarek motok werekma, an yogotak yoma metek dogolik hit ap koktek men, hinagarumi men, wene an nen yokhisekhe lagei yi. Wene yi haganeat nen, it ap Allah ane yogeisekhe lagoukha meke nen men, at Musa nen men, Yabokane itithogon hagatlasigin, iluk isukha mekeat yokhisekhe lagei o.

²³It nen, Kristus ebe watlatluk nen, at tak iluk atluk, wene liarinabigin wene iti, akhuni Yahudi meke yogeisigik, itikmanke meke yogeisigik, igin o, iluk isukhasik holal waganogo 'bisukha iti hagat, an nen ekhe lagei o,” iluk yogokhikhe.

²⁴At Paulus ebe irlirlirogo wene itithogon isikhesik ageikhe igin hak, at Festus nen ane kokhogonat, “Paulus! Hunu-hunu agan higi. Hat nen yi wene ti wene doalegat yakulhe lagan iti nen hunu-hunu asuagaluk hagathakhemo higi,” iluk yogokhikhe.

²⁵Itithogon yogokhikhemo, at Paulus nen, “Festus noe. An hunu-hunu agarik ekhe lagei dek o. Hano dogolik wene eberogonat yokhisekhe lagei o,” iluk isikhesik,

²⁶“Agripa noe. Wene yi tha'bokhogonat hat hilu iti nen, an hat hil oba nayuk dekhogon ekhe lagei. Wene iti, o limagoma hagatlageidek. Ekagat hagatlageikhe iti nen, wene iti ageikhe hat hokodek welagan, iluk nakla apekhe lagei dek o.

²⁷Agripa noe. Wene it ap Allah ane yogeisekhe lagoukha meke nen isukha iti, eberogonat iluk apekhe lagan dek nogo? Eberogonat iluk apekhe laganat o. An nilu,” iluk yogokhikhe.

²⁸Itithogon yogokhikhemo, at Agripa nen, “An nebe yogotak ya ibat Kristen meke asuagaluk, hat nen hagatnabigin iluk apekhe lagan a? Erlok dek o,” iluk yogokhikhe.

²⁹Itithogon yogokhikhemo, at Paulus nen, “Yogotak ya a? Dogoluk nen a. Hat men, hit aperek nane yogotak holhe lagap meke hinebe tha'bokhogonat men, an niki herle warek welagei yi hakene anek hinoba ageidek, an welagarek hak hagatlasubageik iluk Allah ayoko 'bekhe lagei o,” iluk yogokhikhe.

³⁰Itithogon yogokhikhemo, at etagapogot Agripa etnogo men, at kok gubernur Festus etnogo men, he Bernike etnogo men, it aperek inom hurek welagoukha meke tha'bokhogonat men, inebe melatluk

³¹dukhisukhasik nen, it-it ekhe dogolik, “Ap iti iki herle wakhik, ebe wakhik, hagasusak hakene weak ageikhe hagakhidekmaat o,” iluk isukha.

³²Itithogon isukhasik, at Agripa nen Festus yogokhe dogolik, “Paulus nen, Wene noba 'bega meke yi, at Kaisar nen erlo herago ilokon wasuak o, iluk igidek dogolepma, nit nen iki herle hisalilo,” iluk yogokhikhe.