Read Mid Grand Valley Dani La'isasikhe 5 Bible Online

La'isasikhe 5 - Mid Grand Valley Dani bible

La'isasikhe 5

¹At Barnabas nen itithogon 'bi ageikhe meke re, ap ageikhe etaga Ananias. Age Sapira ipisak nen inaagat ageikhe iteerekma it aperek inoba oko uang waganhukha.

²Waganhukhasik nen, Ananias iti age ipisak nen, “Itithogon hagasuok o,” iluk isukha meke age etnogo iluat werek korlek, agun nen uang emenogo ebetlake inekaerek hasik 'bakhalok, ebetlake anek it Yesus nen inebe inayoko 'biluk la'isasikhe meke emenogo inikimo 'bi ageikhe.

³'Bi ageikhemo, at Petrus nen, “Ananias. Iblis nen hakla kagalhemo Allah Agoreke nukhetdiluk agat oko ebetlake mikirlogo hekaerek hasik 'bakhalok wagan iti nenaluk.

⁴Agat iti hat nen it aperek inoba oko waganhidek werlek korlek, hat haagat mekeat. Meke re, it aperek wogeisegenma oko 'bega meke iti hat mekeat o. Meke re, wene hakla nen itithogon kagalogo hagakhen iti nenaluk. Hane hekalat egen iti, nit akhuni yoknisegen 'buk. At Allah at yogokhen o,” iluk yogokhikhe.

⁵Itithogon yogokhunem, wene iti, at Ananias asuk holhikhesik nen, abusak tunhogo wilageikhesik nen ebe watlageikhe. Watlageikhemo, it akhuni inebe tha'bokhogonat wene hagatlageikhe meke iti, inasuk holhukhasik nen inayuk kogat agoukha.

⁶Itithogon watlageikhemo, it elege thue meke ukisukhasik nen, ebe warek etnogo su yilogo nen wolok dukhisukhasik, agat hulelogo thali lagoukha.

⁷Warek wolok dukhisukhama, 3 jam hakene herlekha'bugat welagoukhasik nen, Ananias age wene hagatlageikhe etnogo okodegat welageikhesik akhirak ukisikhe.

⁸Ukisikhemo, at Petrus nen, “Agat hit meke etnogo oko re, yi bagaat wokhisega nogo a? Hanorogo yoknom,” iluk yogokhikhemo, at nen, “O. Iti bagaat woknisega,” iluk yogokhikhe.

⁹Itithogon yogokhikhemo, at Petrus nen, “Wene hit hagun hipisagat, Yigithogon hagasuok, iluk egesip nen ninopase Etagapogot Allah Agoreke obabut paluogoluk hagakhep iti nenaluk. Hagun ebe warek agatma thali lageikhasik, hat itithogonat wokharek dukhuogoluk holagapema inisok ane wageikha ithi,” iluk yogokhikhe.

¹⁰Itithogon yogokhe korlek eranogoat Sapira etnogo abusagat Petrus alilu tunhogo wilageikhesik nen ebe watlageikhe. Watlageikhesik werekma, it elege thue meke emenogo ukisukhasik, inileken halok nen, ebe warek wolok agun warek thaldi lagoukhama alilu thaldi lagoukha.

¹¹Itithogon hagatlageikhemo nen, it Allah a'buri meke tha'bokhogonat men, nen it akhuni aperek inasuk holhukha meke tha'bokhogonat men, inayuk agoukha.

¹²Akhuni doalegat emenogo inom dogolik, it Yesus nen inebe inayoko 'biluk la'isasikhe meke emenogo nen wene akhuni nen hutduagaluk hagasusak dek meke elalinat hagarinakhe lagoukha. Hagarinakhe dogolik, it Allah a'buri inebe tha'bokhogonat Allah ai halekma misohulak etaga Salomo thalekma opakimo natogokhe lagoukha.

¹³Natogokhunem, it akhuni doalegat emenogo nen hogorinakhe lagoukha meke re, it akhuni werlek meke nen it inoba uku inayugat welagoukha.

¹⁴Inayugat werek korlek, it Allah a'buri hagatlagoukha meke werekma nen, it ap dek, humi dek, inakla nen, “Ninoe Etagapogot eberogonat,” iluk inetaiken at oba hakotdiluk, it inom dapukhogon inebe motok doalegat aga lagoukha.

¹⁵Itithogon aga lagoukhama, it akhuni u warek meke aperek o perlago 'bisigik, aperek direka talogo 'bisigik, 'biluk nen, Petrus wagunem amukhak inoba mot aga halok the asuagaluk, holagarlem 'bisa aga lagoukha.

¹⁶Itithogon hagakhe korlek, it akhuni aperek inai Yerusalem aliluke meke eloma nen waga dogolik, it aperek u warek meke inom, mokat inobabut weak meke inakla ukiluk werekma thinuknuk aga lagoukha meke inom, wogosik inoba waga lagoukhaat. Wogosik wagunem inebe tha'bokhogonat hano hagarinakhe lagoukha.

¹⁷Itithogon hagarinakhunem, ilugun oba, it ap Allah iteerek meke inoe kok meke agarumi inebe tha'bokhogonat inom, it iti akhuni Saduki meke inane waganhe lagoukha meke nen, it Yesus nen inayoko 'biluk la'isasikhe meke emenogo itithogon hagakhunem inoba ua palhe lagoukha. Itithogon ua palhe lagoukhasik, inebe ha'isalok nen, o akhuni iniki herle warogo 'bisegarekma 'bisasukha.

¹⁸

¹⁹'Bisasukhama, werekma nen, malaikat ninoe Etagapogot nen yoko usa'isa agarek meke emenogo ageikhe hibako usa'ageikhesik nen, o akhuni iniki herle warek 'bisegarekma, thu larek meke hualogo nen inebe wogosik dukhi ageikhe.

²⁰Wogosik dukhi ageikhesik, at nen wene yogeisekhe dogolik, “Hit hinebe Allah ai halekma lano o. Lalok etoma ukiluk metek dogolik, wene hano wene hinebe hiniluk dogolik ket ninat hagakhe dogosak wene iti tha'bokhogonat yogeisa lano,” iluk yogeisasikhe.

²¹Itithogon yogeisasikhemo, inasuk holiluk, o wi aga korlek, Allah ai halekma ukisukhasik wene yakulisekhe lagoukha. Itithogon yakulisekhe korlek, it ap Allah iteerek meke inoe kok etnogo agarumi inom nen ap inarluetek Israel meke wene erlo pilinekhe lagoukha meke tha'bokhogonat, inayoko 'bisukhasik inebe natogotdiluk, inagarumi aperek nen, it Yesus nen inayoko 'biluk la'isasikhe meke iniki herle warek 'bisasukha meke etnogo wogosik wisuagaluk, o 'bisasukhama etnogo la'isasukha.

²²Itithogon la'isasukhama, it etnogo lagoukha meke, it ap Yesus nen inayoko 'biluk la'isasikhe meke etnogo iniki herle warek 'bisegarekma inebe dekma. Inebe dek nen inapuke wagoukhasik, it ap emenogo men yogeisa agoukha,

²³“O akhuni iniki herle warek 'bisegarekma etnogo, thu a'bethogon larek werek korlek, herle warek meke inebe dukhunogo iluk, ap holagapema thuam welageikharek meke emenogo inebe werekma lago. Lagosik ninebe ukogo meke, o akla it ap emenogo inebe dekma,” iluk yogeisasukha.

²⁴Yogeisasukhama it ap Allah ai halek therogo welagoukha meke emenogo men, Allah iteerek inougi koktek emenogo inom nen, “It ap Yesus nen inayoko 'biluk la'isasikhe meke emenogo nikithogon hagatlageikhama nen ega,” iluk inobakha palageikhesik, “Yabokane nikithogon hagatlasigin he,” iluk inayuk agoukha.

²⁵Itithogon inayuk agoukhasik werekma, ap ageikhe wageikhesik nen, “Warligi. Hit ap iniki herle warogo 'bisegep emenogo, Allah ai halekma metek dogolik, akhuni wene yakulisiliogei,” iluk yogeisasikhe.

²⁶Itithogon yogeisekhe lageikhemo, at ap kok Allah ai halek therogo welageikhe meke etnogo agarumi inom lagoukhasik nen, it ap Yesus nen inayoko 'biluk la'isasikhe meke emenogo wogosik wagoukha. Meke re, wogosik wisuogoluk inakla nen, “Akhuni doalegat nen Yesus agarumi inirlirli waganogo nit helekit oba ninasinogo,” iluk iniki korlo lirisalok wogosik wisu inayuk nen erogat wogosik wagoukha.

²⁷Wogosik wagoukhasik nen, ap wene erlo pilinekhe lagoukha meke emenogo inakla turlem meldisasukha. Itithogon turlem meldisasukhasik nen, at ap Allah iteerek inoe kok etnogo nen, wene men iluk yogeisasikhe,

²⁸“Hit nen ap iti etaga palogo nen wene yakulisugup o, iluk nit nen hinasuk hanorogon wakho etnogo mekeat he, hit nen wene iti wiakhogon yakulisekhe lagapma nen, akhuni o Yerusalem meke yoma tha'bokhogonat inilu aga iti, at ap iti wakha iti, wene nit ninoba 'buogoluk hagakhe lagap higi,” iluk yogeisasukha.

²⁹Itithogon yogeisekhe lagoukhama, it Petrus lak, Yesus nen inayoko 'biluk la'isasikhe meke emenogo nen, “Nit he, akhuni inane hologo hagasusak dek o. Allah ane itiat hologo hagasusak o.

³⁰Hit nen Yesus ebe hiniki hakhegesip o baga meldiluk wakhepma etnogo, at Allah ninopa lak nen apma ukiluk hogorakhe lagoukha meke etnogo nenat apuke ilugutdekhemo werek o.

³¹Ilugutdekhemo werek iti, akhuni Israel meke weak hagariogei meke iti here'isalok inobabut hebelasumo, Allah nen it weak hagakharek meke iti thagalogo degetdisagaluk, Yesus ebe ilugutdekhesik nen, at ebe ninoe Etagapogot dogolik tilninakhe dogoagaluk alilu meldisikhemo werek iti.

³²Itithogon hagakhe iluk nit ninileken hutukhogon hogosik nen, Eberogonat, iluk pakhogon yokhisekhe lago. Akhuni Allah ane hologo hagakhorek meke, at Agoreke woknisekherek iti ninom nenat wene iti yokhisekhe lago,” iluk yogeisasikhe.

³³Itithogon yogeisasikhemo, it inakla aga dageiluk ap Yesus nen inayoko 'biluk la'isasikhe meke emenogo inasuogoluk hagakhukha.

³⁴Inasuogoluk hagakhukha mekeat he, ap ageikhe it Farisi meke inawene hago dogolik, it inom wene erlo pilinekhe lagoukha meke etaga Gamaliel. Ap iti wene Allah nen inasuk wakhikhe wene etnogo yakulisugunem, akhuni tha'bokhogonat nen, “At hano,” iluk inane hanorogon yogokhe lagoukha meke. At iti melageikhesik nen, men yogeisasikhe, “Ap iniki herle warek meke yi, elanma hasik itikmanke dogoak nen ula'isani,” iluk yogeisasikhe.

³⁵Itithogon yogeisasikhemo ula'isasukhama nen, at nen wene men yogeisasikhe, “Hit ap Israel meke nagarlak lak. Ap iti nikithogon hagarinabugun apegep. Hinakla hanorogon ebetdiluk nen hagasusak o.

³⁶Alebat, ap ageikhe etaga Teudas melageikhesik nen, Kok anat o, iluk isikhemo, ap inebe doalegat 400 hakene at apma ukiluk oporlik nekhe lagoukha. Itithogon ukisukha meke re, at ebe wakhukhama, agarumi at apma ukiluk oporlik nekhe lagoukha meke iti thirlik-pirlikhogon lo lagoukhama, at nen, Itithogon hagasuok, iluk ekhe lageikhe wene iti degat ageikhe.

³⁷Dek ageikhemo, yabokane koktek pemerintah meke nen akhuni inebe iniki wenageinabuogoluk hagakhunem, ap ageikhe ai Galilea meke, etaga Yudas melageikhe. Melageikhesik akhuni doalegat inakla kagalhikhemo, at apma ukiluk oporlik nekhe lagoukhaat. Meke re, at ebe wakhik, agarumi apma meke ukiluk oporlik nekhe lagoukha meke thirlik-pirlikhogon mugisigik, hagakhukha iti.

³⁸Halok he, wene yogotak yi hasik, an nen wene ageikhe hinasuk wasik. Hit nen ap iti yigithogon tigithogon ageikhe hagarinakhup. Wene it nen yakulisekhe dogolik hagarinabiogei iti, erlo akhuni nen halok he, wene iti dek asigin o. Meke re, wene iti erlo Allah at halok he, hit nen it inobatne degetdisausak erlok dek asigin o. Itithogon erlok dek agunem, hit nen Allah ebe hinom yabusak hakene hagatlasinogo nen, thogotdisani o,” iluk inetaiken thebelhikhe.

³⁹

⁴⁰Inetaiken thebelhikhemo, it ap Yesus nen inayoko 'biluk la'isasikhe meke emenogo waisasukhama ukisukhama tugi inakhukhasik nen, “Yesus iti etaga palogo, wene yabokane itithogon yogeisekhe dogogup,” iluk inasuk warogo ula'isasukha.

⁴¹Ula'isugunem, it ap wene erlo pilinekhe lagoukha meke emenogo here'isalok dukhisukhasik nen, Yesus agarumi emenogo it-it ekhe dogolik, “Allah nen, Hit Yesus etaga hasik akhuni nen, Hit weak, iluk wenakhisaumo erlok, iluk akla apekhe tak-tak wenaknisega iti hano,” iluk inakla arleken akhalok dukhisukha.

⁴²Dukhisukhasik, it emenogo nen Allah ai halekma ukigik, akhuni inailake ukigik, hagakhe dogolik, “Allah nen, Ap ageikhe nen akhuni tilhinabuagaluk ayoko 'biluk la'isigin, isikhe etnogo, ebe Yesus Kristus itiat o,” iluk Yesus nen hagakhikhe wene, hano wene etnogo thogotdigidek hunik-hunigat yakulisigik, yogeisigik, nekhe lagoukha.