Read Mid Grand Valley Dani La'isasikhe 8 Bible Online

La'isasikhe 8 - Mid Grand Valley Dani bible

La'isasikhe 8

¹At Stefanus ebe motogat wakhukha iti, at Saulus akla nen hano apasikhe. At Stefanus ebe wakhukha itinemat, it Allah a'buri o Yerusalem natogokhe lagoukha meke inebe yi aik ti aik weakhogon hagarinakhe korlek, it ap Yesus nen inebe inayoko 'biluk la'isasikhe meke emenogo anek, o Yerusalem werek korlek, Allah a'buri aperek inebe doalegat meke emenogo tha'bokhogonat lo o propinsi Yudea Samaria ya ta etoma thirlik-pirlikhogon ula'isasukha.

²Itithogon ula'isasukhama, it ap Allah ane hologo hagakhe lagoukha meke aperek nen, Stefanus etnogo ebe warek agat thalogo 'bisukhasik nen, uak de motok doalegat aga lagoukha.

³Allah a'buri itithogon ula'isekhe dogolik, at Saulus etnogo Allah a'buri meke wuleleken tagalinabigiluk inailake dopok ya ukigik, ta ukigik, hagakhe dogolik, ap dek, humi dek, iniki korlo lisogo wogosik, o akhuni iniki herle warogo 'bisegarekma 'bisa laga lageikhe.

⁴Itithogon hagarinakhe korlek, it thirlik-pirlikhogon lo lagoukha meke emenogo o yi ai ti ai laga dogolik, hano wene etnogo yogeisilik lagoukha.

⁵Itithogon yogeisilik laga dogolik, at Filipus o Samaira o kota kokma etoma wageikhesik nen, wene men yogeisasikhe, “Allah nen, Ap ageikhe tilhinabuagaluk la'isigin, iluk abok yoknisasikhe etnogo, ebe la'i agama wagasik itithogon hagakhe,” iluk abok yogeisekhe lageikhe.

⁶Wene yogeisekhe dogolik, it nen wene hutduagaluk mokat obabut weak meke akhuni inebe doalegat inakla ukiluk welagoukha meke inane kokhogonat ilik-ilik mukhogo ula'isigik, it aperek inebe doalegat inisok aborlok dek meke men, inisok la'belek meke men, hagarinakhik, elalinat hano hagarinakhe lageikhe. Itithogon hano hagarinakhe lageikhe iti nen, akhuni emenogo inebe tha'bokhogonat natogorlek dogolik, inileken halok, inasuk motok hutukhogon holhe lagoukha.

⁸Itithogon hano hagarinakhunem, it akhuni o Samaria meke etoma, inakla arleken motok kogat akhekhe lagoukha.

⁹O Samaria etoma ap hathale ageikhe etaga Simon welageikhe. Haganeat nen at ebe hathale dogolik usa meke hagakhe dogolik, “Kok hathale nebe anat o,” iluk isinem, it akhuni o Samaria meke emenogo nen, “Eiye! Nayuk e,” iluk, at ebe hogorakhe lagoukha.

¹⁰Hogorakhe dogolik, it akhuni koktek inom, keputek inom, tha'bokhogonat at ane hanorogon inasuk holhe lagoukha. Itithogon holhe dogolik, it nen, “Allah obatne motok kogat iluk iliogei etnogo, ebe yiat o,” iluk ekhe lagoukha.

¹¹Ap iti haganeat etoma nen usa meke hagakhe dogolik, inayugutdisinem, at ane hutukhogon inasuk holhe lagoukha iti.

¹²Itithogon mekeat he, at Filipus nen hano wene Allah nen apma 'bisekherek wene iti yogeisigik, Yesus Kristus etaga iti abok yogeisigik, hano wene iti ekhe lageikhemo, akhuni emenogo nen, “Wene iti eberogonat,” iluk waganhukha meke, ap dek, humi dek, ima usageinakhe lageikhe.

¹³At Simon ebe meneke inomat, “Wene iti eberogonat,” iluk waganhikhemo nen, ima usa'isikheat. Itithogon usa'isikhesik nen, akhuni wene hutduagaluk, Allah obatne baga hagasusak dek meke elalinat hagakhunem, at Simon iti Filipus oporlik motok nekhe dogolik, ileken halok nen, ayuk aga lageikhe.

¹⁴Itithogon hagakhukhama, akhuni nen, “Akhuni o Samaria meke Allah ane waganha o,” iluk ekhe lagoukhama, it ap Yesus nen inayoko 'biluk la'isasikhe meke emenogo, o Yerusalem dogolik, inasuk holhukhasik nen, Petrus Yohanes ipisak akhuni Samaria meke inoba la'isa agoukha.

¹⁵La'isa agoukhama wagoukhasik nen, akhuni o etoma meke nen, “Allah ane eberogonat,” iluk waganhukha meke, ninoe Etagapogot Yesus etaga palogo ima anek kerat usa'inakhukhama, Allah Agoreke aban inoba usa'ageidek welageikhe iti nen, Allah nen Agoreke wogeisoagaluk ayoko 'bisukha.

¹⁷Itithogon Allah ayoko 'bekhe dogolik, iniki inoba thebelisugunem nen, Allah nen Agoreke wogeisasikhemo horlasukha.

¹⁸Itithogon horlasukhama, at Simon ileken hisasikhesik nen, akla nen, “Akhuni it ap Yesus nen inayoko 'biluk la'isasikhe meke nen, iniki inoba thebelisugunem anek, Allah Agoreke wogeisausak higi,” iluk apasikhesik nen, Petrus Yohanes ipisak oko wogeisoagaluk, uang inoba wolok wageikhe.

¹⁹Wolok wageikhesik, men yogeisasikhe, “An niki akhuni aperek inoba thebelisugunem, Allah nen Agoreke itithogonat wogeisugunem horlekhe dogoagaluk, an ninomat iteerek asuok nen, obatne iti woknitni,” iluk kino yogeisasikhe.

²⁰Itithogon yogeisekhe lageikhemo, at Petrus nen, “Hat hakla nen, Allah obabut hano nen woknisekherek meke iti, hat nen oko 'biluk ite asusak apegen a? Erlok dek o. Itithogon apegen iti nen, hat hauang ithi horlalok nen, weakma etomaat motok nuk akha lano.

²¹Allah il oba hakla motok weak ebekhe lagan iti nen, nit hagakhe lago iti, hat ninom ite asusak dek o.

²²Hat hobabut it aperek inoba ua palhe lagan iti, wam a'busal arle negen hakla kerlekhogon werek. Werekma, weak hagasigiluk hakla ebekhe lagan iti nen, herle negen warogo hakharek werek iti, hobabut hutdagagi. Weak hagasigiluk egen iti, thogotdiluk, hobabut hebelasin. Hebelasumo hat hakla weak apegen iti ninoe Etagapogot nen thagalogo degetduagaluk ayoko 'bino o,” iluk yogokhikhe.

²⁴Itithogon yogokhikhemo, at Simon nen, men yogokhikhe, “Hit egep iti hak, an noba asinogo iluk, an nobasik ninoe Etagapogot ayoko 'bino o,” iluk yogeisasikhe.

²⁵Itithogon yogeisasikhemo, it Petrus Yohanes ipisak nen, wene inilu meke pakhogon yogeisekhe dogolik, ninoe Etagapogot ane yogeisekhe lagoukhasik, o etoma nen, hano wene iti, o Samaria ukul doalegat ya yogeisigik, ta yogeisigik, inapuke o kota Yerusalem lagoukha.

²⁶O kota Yerusalem lagoukhasikmo, malaikat ninoe Etagapogot nen yoko usa'isa agarek meke ageikhe usa'ageikhesik nen wene Filipus yogokhe dogolik, “Hebe metokhogon, holak o Yerusalem nen o Gaza i aputmo mot-mot usegarekmake, akhuni inebe dekmake itike usano,” iluk yogokhikhemo, metokhogonat usasikhe.

²⁷Usasinem, ap ai Etiopia meke ageikhe, apuke aila usagaluk holagarlemke usa lageikhe. Ap iti he o Etiopia meke kok etaga Kandake iti nen, at meke yi meke ti meke hago dogoagaluk, ikimo 'bisikhemo nen, kok welageikhe meke. At ebe kogat dogolik, Allah apma ukiluk, sembayan o Yerusalem i dagei ageikhe. Dagei ageikhesik nen,

²⁸yabokane apukeat aila usasigiluk, kereta oto hakene kuda nen lisogo wolok lagarek etnogo meke baga hurek usekhe dogolik, wene Allah ane at Yesaya nen yogeisekhe lageikhesik, holal waganhikhe meke iti etaga thalik thalik usasikhe.

²⁹Itithogon etaga thalik usasi korlek, at Allah Agoreke nen Filipus yogokhe dogolik, “Kereta oto hakene iti usasinem ae hakha lalok oba horokhogon lan o,” iluk yogokhikhe.

³⁰Itithogon yogokhikhemo, at Filipus pirlirli oba usasikhe hak, ap etnogo nen wene Allah ane Yesaya nen yogeisekhe lageikhesik, holal waganogo 'bisikhe meke etnogo etaga thalhunem nen, asuk holhikhe. Asuk holhikhesik nen, men yogokhikhe, “Noe. Etaga thalhe lagan iti, wene ebe hutdekhe lagan a? Dek a,” iluk yogokhikhemo,

³¹at nen he, “Wene iti ebe tha nen hutukhogon yoknisumo nen hutdusak,” iluk yogokhikhesik, “Hat nipisak usauwok nen, ya hureklasi dagei me o,” iluk ayoko 'bisikhe.

³²Ayoko 'bisikhemo, oba hureklasi dageisikhesik ileken 'bikhasikhe hak, ap etnogo holal men iluk waganekma etaga thalhunem hasikhe, “At he, domba wasuogoluk wolok lageikharek iti hak, wolok lageikha o. Wolok lalok, domba eak isi paluogoluk hagakhunem, ane degat huk welagarek iti hak, at iti ane ageikhe igidek ape dopolek huk aga.

³³ At ekarli wakhik, irlirli waganhidek weakhogon hagarogo 'bigik, hagakhe lageikha iti. Itithogon hagakhe dogolik, wakhunem watlatluk ebe agat oba yoma welageidek iti nen, akhuni aperek nen at nen itago meke hasik inabok ekhe dogosak dek aga o,” iluk holal waganogo 'bisikhemo werekma etaga thalhe lageikhe iti.

³⁴Itithogon etaga thalhe lageikhesik, ap etnogo nen Filipus men yogokhikhe, “Wene yi, at ap Allah ane yogeisekhe lageikhe meke iti nen isikhe iti, at ekaerek hasik isikhe a? At he, ap ageikhe hasik isikhe a. Hat nen wene hutukhogon yoknom, nagarlak,” iluk yogokhikhe.

³⁵Itithogon yogokhikhemo, at Filipus nen hano wene Yesus hagakhe lageikhe wene yakulisigiluk, wene erlo holal waganek iti baga nen pilinerogo yogorik usasikhe.

³⁶Yogorik motok holagarlem usekhe dogolik, i werekma usasukhasik, ap kok etnogo nen, “I werek yi 'bikhan. An ima usa'anusak apekhe lagei. E a? At he, ki meke aban welagei apegen,” iluk yogokhikhemo, [

³⁷at Filipus nen, “Noe. Hetaiken opakiat dogolik, Yesus oba hakotdegetik welagan halok he, ima usa'agousagat o,” iluk yogokhikhemo, at ap etnogo nen, “At Yesus Kristus iti, eberogonat Allah a'burat o, iluk nakla apigi,” iluk yogokhikhe.]

³⁸Itithogon yogokhikhesik nen, atuaneke meke nen kereta oto hakene kuda nen lisogo wolok usasikhe meke iti eranogo huk asuagaluk yogokhikhesik, Filipus ipisagat i aik oba usasukhasik, ima ukiluk usa'isikhe.

³⁹Ima usa'isikhesik, yipitla dukhi agunem, at Allah Agoreke nen, Filipus etnogo hapokhogon wolok o ninmo 'bi ageikhemo, at ap kok etnogo nen Filipus ebe yabokane ileken higidek. Itithogon higidek meke re, akla arleken akhilik holagarlemke usasigiluk usasikheke etnogo piokthek usasikhe.

⁴⁰Nen, at Filipus Allah Agoreke nen hapokhogon wolok o Asdod etoma 'bi ageikhemo dogolik, obabut hebelageikhesik, o etoma nen o ukul emenogo tha'bokhogonat umake ya ukigik, ta ukigik, wene hano wene yogeisilik, o kota Kaisarea dagei ageikhe.