Read Mid Grand Valley Dani La'isasikhe 9 Bible Online

La'isasikhe 9 - Mid Grand Valley Dani bible

La'isasikhe 9

¹Itithogon hagakhe korlek, at Saulus etnogo akla aga dageiluk nen, akhuni ninoe Etagapogot ane waganhukha meke emenogo inasigiluk inabok palhe lageikhesik, it ap Allah iteerek meke inoe kok meke oba lageikhesik nen men yogokhikhe,

²“Noe. An o Damsyik dageiluk nen, it akhuni aperek Yesus ane waganhe dogolik oporlik liliogei meke aperek werek halok, humi dek, ap dek, heageinabiluk nen, iniki herle warogo wogosik Yerusalem yoma 'bisasik nen, it akhuni Yahudi meke o kota Damsyik etoma o sembayan egarekma tomok natogorliogei meke inobasik surat ageikhe waganogo woknom o,” iluk yogokhikhe.

³Itithogon yogokhikhemo wogokhikhemo nen, waga lageikhesik, o kota Damsyik etoma horokhogon ukigin hak, opaki hasigat pogot oba nen at aliluke a'bi'bal liarogo yasi usa'ageikhe.

⁴Yasi usa'agunem, at Saulus etnogo agat oba elokhoken thogoumhogo wilasi usasikhe. Usasinem, ane ka nen heat yogokhe dogolik, “Saulus. Saulus. Anat yi aik ti aik hagatnabigiluk muknarik nekhe lagan iti nenaluk?” iluk yogokhikhe.

⁵Itithogon yogokhikhemo, at Saulus nen, “Noe. Hat hebe tha?” iluk yogokhikhemo, at nen, “An Yesus. Hat nen yi aik ti aik hagatnabigiluk muknarik nekhe lagan meke etnogoat o.

⁶Hebe melatluk nen, o kota ithi lalok ukino. Ukisinem ap ageikhe nen, Hat itithogon hagatno, iluk yokhesigin meke werek o,” iluk yogokhunem,

⁷it ap at inom wagoukha meke emenogo inasuk holhukhasik nen, “Ap ebe ki nen ane ekhe,” iluk inileken hasukha meke, ebe dek nen inakmaken lageikhesik inane usak erlok dek ageikhemo huk agoukha.

⁸Itithogon werek korlek, at Saulus etnogo melatluk, ileken 'bekelageikhe meke re, yi meke ti meke ileken lakhausak motok erlok dek ageikhe. Itithogon erlok dek ageikhemo, iki hak-hak o Damsyik wolok ukisukha.

⁹Wolok ukisukhama, iki henagan dogolik, yi meke ti meke ileken higidegat, hipiri men, i men nikidek motok welageikhe.

¹⁰Werek korlek, o Damsyik etoma ap ageikhe ninoe Etagapogot Yesus ane waganhikhe meke etaga Ananias welageikhe. Werekma, ninoe Etagapogot nen, a'bikaka oba men yogokhikhe, “Ananias,” iluk ane hakhasinem, at nen, “O? Noe. Nebe yi welagei,” iluk isikhe.

¹¹Isikhemo, ninoe Etagapogot nen, men yogokhikhe, “Hebe metokhogon melatluk, holal etaga Mot holak iliogei itike lano. Lalok nen, o ap Yudas werekma uki lalok, hat nen, Ap etaga Saulus, ai Tarsus meke etnaga, yoma werek a? iluk hinok wogeisan o. At ebe sembayan iliogo etnaga.

¹²Sembayan itithogon isinem, at a'bikaka men hekhemo. Hat Ananias hebe, at oba uki lalok nen, ileken 'bekelasuagaluk hiki oba thebelhunem a'bikaka hekhemo etnaga,” iluk yogokhikhe.

¹³Itithogon yogokhikhemo, at Ananias nen, “I noe. Akhuni nen, Ap iti nen, hat ha'buri o Yerusalem meke yi aik ti aik hagarinabiogo, iluk inebe doalegat nen isinem abok nasuk holhirikmo nen,

¹⁴yogotak o yoma wiluk nen, akhuni hat hetaga palogo hayoko 'biliogei meke tha'bokhogonat, iniki herle wasuagaluk, it ap Allah iteerek inougi koktek emenogo nen yogokhama wagasik werek iti,” iluk yogokhikhe.

¹⁵Itithogon yogokhikhe mekeat he, ninoe Etagapogot nen, “Lan o. At nen akhuni itikmanke meke men, inougi inetagapogot meke men, akhuni Israel meke men, an netaga yogeisilik nekhe dogoagaluk, an nen ap iti ebe wenago ayoko 'bigima o.

¹⁶Itithogon ayoko 'bigirikmo at nen netaga itithogon yogeisilik nukhunem, at yi aik ti aik hekhe dogosak obaat hekhe dogogin meke, an nen yogosigin werek o,” iluk yogokhikhe.

¹⁷Itithogon yogokhikhemo, at Ananias etnogo lageikhesik nen, uma ukisikhesik, iki Saulus oba thebelhe dogolik nen, men yogokhikhe, “Saulus, nagarlak. Ninoe Etagapogot Yesus, hat o yoma wisigiluk holagarlem oba wagunem, helokhoma melagama, hileken hegen meke etnaga nen, hat hileken 'bekelageik, Allah Agoreke hakla kerlekhogon uki ageik, hagasuagaluk la'ani agama wagei o,”

¹⁸iluk yogokhunem eranogoat, at ileken oba dekelek welageikhe meke etnogo eranogoat, 'bukakhogon usasikhesik nen, ileken hano ageikhe. Hano ageikhesik nen, ebe melageikhemo, ima usa'isikhe.

¹⁹Ima usa'isikhemo nen, hipiri nalok obatne ageikhe. At Saulus etnogo o Damsyik dogolik, akhuni ninoe Etagapogot Yesus ane waganhukha meke inom iniki pererlagat welagoukha.

²⁰Itithogon welagoukha itinemat, o it akhuni Yahudi meke sembayan ekhe lagoukhama ukisikhesik, wene Yesus hasik yogeisekhe dogolik, “At Yesus iti, ebe Allah a'burat o,” iluk yogeisekhe lageikhe.

²¹Yogeisugunem, it akhuni inasuk holhe lagoukha meke iti, inebe tha'bokhogonat inayuk ageikhesik nen, “Ap yi o Yerusalem dogolik, akhuni tha'bokhogonat at Yesus iti etaga palogo ayoko 'biliogei meke inebe motok wuleleken tagalogo degetdisagaluk hagakhe laga etnogo ebe yi dek nogo? Ebe yiat apigi. At yoma witluk nen, it Yesus etaga paliogei meke iti, iniki herle warogo, it ap Allah iteerek inougi koktek meke inoba wogosik lagaluk waga dek nogo? Nayuk e,” iluk hogorakhe lagoukha.

²²Hogorakhe korlek, at Saulus nen, ane obatnerogonat inakla kagalhe dogolik, men yogeisekhe lageikhe, “Allah nen, Ap ageikhe tilhinabuagaluk la'isigin, iluk abok yoknisasikhe etnogo ebe Yesus itiat o,” iluk wene pakhogon yogeisugunem, eberogonat ageikhemo nen, it akhuni Yahudi meke o Damsyik welagoukha meke etoma nen oko nena u heat inobakha palaga lageikhe.

²³Itithogon dogolik, iniki doalegat welagoukhasik nen, Saulus ebe wasuogoluk abok limago palhukha.

²⁴Itithogon abok palhukhama mekeat, it akhuni aperek nen Saulus husupi yogokhukhama at ilu ageikhe. Itithogon ilu werek korlek, ap emenogo nen at ebe leget 'bakleget ape palekma dukhisinem, wasuogoluk hibakone dikagane akorlem kagalek motok welagoukha.

²⁵Kagalek werek korlek, it akhuni Saulus ane waganhe lagoukha meke nen, o hibako iniki ageikhe baga, at ebe mul yago meke akla ukhatdiluk nen, o leget 'bakleget isade uanat halek oba ape ageikhe upu baga herlelek werekma ula'iluk nen, kupi kilogo leget akhane usa'isukha.

²⁶Itithogon usa'isukhama, at Saulus o etoma nen o kota Yerusalem usalok nen, it akhuni aperek Yesus ane waganhe lagoukha meke inom opakimo dapukhogon dogouogoluk walhasikhe mekeat he, it tha'bokhogonat nen, “At eberogonat Yesus ane waganhikhesik nen iliogo,” iluk hutdigidek nen, at ebe inayuk welagoukha.

²⁷Itithogon werek korlek, at Barnabas nen Saulus ebe waganhikhesik wolok nen, it ap Yesus nen inayoko 'biluk la'isasikhe meke emenogo inoba lageikhe. Wolok lageikhesik nen, men yogeisasikhe, “Dek o. Ap yi, holagarlemke laga dogolik, ninoe Etagapogot ileken hekhemo, at nen wene itithogon yogokhemo nen, at ebe o Damsyik dogolik, Yesus etaga palogo wene ayuk degat pakhogon yogeisekhe laga meke wolok wagei o,” iluk pilinogo yogeisasikhe.

²⁸Itithogon yogeisasikhemo, at it inom hano anek o Yerusalem ya ta nekhe dogolik, ayuk degat ninoe Etagapogot etaga palogo wene pakhogonat yogeisekhe lageikhe.

²⁹Yogeisekhe dogolik, it aperek inebe Yahudi mekeat he, inane Yunani inane ekhe lagoukha meke wene yogeisugunem, it nen hinok waganhunem, oko yogeisigik isinem, ebe wasuogoluk walhekhe lagoukha.

³⁰Wasuogoluk walhekhe korlek, it Allah a'buri it-it inagarlak lak inerugi inom opakiat meke aperek nen, Saulus ebe o Kaisarea wolok wagoukhasik nen, etoma nen o Tarsus dageisuagaluk la'i agoukha.

³¹Itithogon hagakhukhama, yabokane nen, it akhuni Allah a'buri o propinsi Yudea meke men, o Galilea meke men, Samaria meke men, weagarinakhidek hogot walek motok welagoukha. Werekma, Allah Agoreke nen yomageisugunem, inetaiken horle ageik, ninoe Etagapogot inayukhogon welageik, hagakhe dogolik, inebe doalegat wiak-wayakhogon hagatlaga lagoukha.

³²Nen, at Petrus nen Allah a'buri meke o yi ai ti ai ileken hisilik laga lageikhe. Itithogon laga lageikhesik iki ageikhe baga, it Allah a'buri o Lida welagoukha meke ileken hisa usasikhe.

³³Usasikhesik nen, ap ageikhe etaga Eneas. O haganeat nen isok aborlok dek motok dogolik, mo dageigik usigik hagakhe korlek 8 tahun witik motogat welageikhe meke, itithogonat werekma, ileken hasikhe.

³⁴Ileken halok nen, men yogokhikhe, “Eneas nagarlak. Yesus Kristus nen hano hagathakhe o. Halok he, melatluk nen, hebe talogo noge ekhe lagan meke ethoma dikilogo 'bin o,” iluk yogokhe korlek, eranogoat metokhogon melageikhe.

³⁵Melageikhemo nen, it akhuni o Lida meke men, o Saron meke men, welagoukha meke tha'bokhogonat inileken halok nen, “Eberogonat,” iluk inobabut hebelatluk inelokhe dagakhogon ninoe Etagapogot wogokhukha.

³⁶O Yope etoma, he ageikhe etaga Tabita welageikhe. (Akhuni Yunani inane baga etaga Dorkas u hak, wam rusa etaga meke thalhukha.) At he iti, ninoe Etagapogot Yesus ane waganhikhesik, yi meke ti meke hano hagakhe dogolik, akhuni inameke dek meke yomageisekho motok welageikhe.

³⁷Itithogon hagakho werekma, itinem ebe u warek welageikhesik nen ebe watlageikhemo ebema i thobalogo henaipu 'bi dageisukha.

³⁸Itithogon 'bi dageisukhasik werek korlek, o Yope etoma nen, o Lida iti horogatma, it akhuni aperek nen, “Petrus ebe o Lida wagasik werek o,” iluk isinem, it akhuni Yesus ane waganhukha meke emenogo inasuk holhukhasik nen, it ap inebe pere Petrus ayoko loagaluk, men yogeisasukha, “Hit lalok Petrus men yogotno, Noe. Hebe erapigat welageidek ninom ibat luok o, iluk yogotno,” iluk lia'isa agoukhama dagei agoukhasik, yogokhukhama, at Petrus nen,

³⁹“I o. Halok he, usauwok ta,” iluk inom usasukha. Usasukhasik nen, Petrus ebe wolok henaipu inom dageisukha. Henaipu dageisukhasik werekma, it humi thoge meke at oba horokhogon natogosi agoukhasik, de aga dogolik, su akmanke meke dek, itikmanke uan meke dek, he Dorkas iluk oba inom dogolik, ikhogo 'bisasikhe meke inuguthasukha.

⁴⁰Inuguthasukhama, at Petrus nen inebe tha'bokhogonat ula'isalok, itibagal yukukhogon sembayan iluk nen, elokhe hebenokhogon warek etnogo wogokhikhesik nen, “Tabita. Melasin o,” iluk yogokhikhe. Yogokhunem, eranogoat ileken 'bekelageikhesik nen, Petrus ebe ileken halok melageikhesik aloke tagakhogon hurek lageikhe.

⁴¹Hurek lageikhemo, at Petrus nen iki hago meldiluk nen, it Allah a'buri aperek men, humi thoge meke emenogo men, waisasikhemo ukisukhama, “At ebe iluk aga yi,” iluk wogeisasikhe.

⁴²Wogeisasikhemo nen, wene hagatlageikhe iti, it akhuni o Yope etoma meke inebe tha'bokhogonat inilu agoukhasik nen, inebe doalegat inetaiken ninoe Etagapogot Yesus oba hakotdisukha.

⁴³Itithogon hakotdisukhama, at Petrus etnogo o Yope etoma dogolik, ap Simon 'bagei oado sapi oado karogo pugutdekhe lageikhe meke iti aila ipisak iniki doalegat welagoukha.