Read Mid Grand Valley Dani Roma 11 Bible Online

Roma 11 - Mid Grand Valley Dani bible

Roma 11

¹An nen wene ageikhe hinok waganik. An nebe re, Israel meke Abraham nen itago meke nukuloak etaga Benyamin meke welagei iti nen, at Allah nen a'buri Israel meke iti motok here'isasikhe apegep? Motok dek o.

²Allah nen a'buri haganeat nen wenageinakhikhe meke iti here'isasikhe dek o. Wene at Elia nen hagakhikhe wene holal waganek werek etnogo hinokodek nogo? At nen Allah nen it wene inoba 'bekhe dogoagaluk, men ekhe lageikhe,

³ “Allah Hetagapogot nopase. Ap hat hane yogeisilik nekharek meke emenogo, inakhik, o hat hadomba hunhekharekma etnogo misalhik, hagakhasik nen, an narligat anek here'anhasik, yabokane nasuogoluk heraknabiogeiat o,” iluk isikhemo,

⁴at Allah nen, Elia oko nikithogon yogokhikhe. Men isikhe apigi, “Ap inebe 7.000 nen kaneke etaga Baal apma ukiluk hogorakhidek meke an hasik wenageinakhigimo werek o,” iluk yogokhikhe.

⁵Iti hak, Allah obabut hano nen, wenageinakhikhe meke o yogotak ya inebe ato pererlagat weregat o.

⁶It akhuni nen hano hagakhukha baga, Allah nen inobabut palogo wenageinabilepma re, at obabut hano nen wenageinakhikhe iluk usak dek iti nen, it nen hano hagakhukha baga Allah nen inobabut palogo wenageinakhikhe 'buk. At obabut hano nen wenageinakhikhe iti.

⁷Halok he, nit nen wene nikithogon ugun? It akhuni Israel meke hano meke iteerek asuogoluk inobatnerogon hagakhe lagoukha mekeat he, ebe ite ageidek. It aperek inebe pererlagat Allah nen wenageinakhikhe meke hano meke iteerek aga korlegat, inebe kokmake inetaiken a'beretdisikhe.

⁸ Itithogon meke hasik Allah nen, men isikhe, “Inileken higik, inasuk holhik, hagasunogo iluk, inetaiken abisake negen hagarinakhigimo, yogotak itithogon werek o,” iluk isikhemo holal waganogo 'bisukha.

⁹Wene iti ipisak tak-tak, at Daud nen men isikhe, “Akhuni nen thue men, 'bagei men herle 'bilukmo wakharek hak, it iti thini kok isariogei iti baga inekaerek inebe hageinabuak o. Inebe nuk ageik, tunhogo horla usigik, hagasuak o.

¹⁰ Inileken haunogo iluk, puk asuak o. Akin meke inapot oak thomarek motok dogoak o,” iluk Daud nen isikhe.

¹¹An nen hinok ageikhe wokhinabik. Akhuni holal lagunem inisok a'bit dikhogon waregarek hak, it akhuni Israel meke weak agoukha iti, motok-motogat alomatlagoukha nogo? Motok dek o. It weak hagakhukha iti nen, Allah nen it akhuni itikmanke meke tilinakhikhe iti. Itithogon tilinakhunem nen, it Israel meke nen, “Nit tilninabuem,” iluk inoba ua palogo inobabut hebelasuagaluk hagakhikhe iti.

¹²It akhuni Israel meke weak hagakhukha iti nen, yi akhuni ti akhuni tha'bokhogonat eloma Allah nen hanorinakhikhe. It nuk agoukha iti nen, akhuni itikmanke meke iti kogat thaburakhukha. Halok he, yabokane it Israel meke inebe tha'bokhogonat Allah nen hanorinakhe dogolik, yi akhuni ti akhuni itikmanke meke eloma kokhogon hanorinabigin dek a? Hanorinabiginat o.

¹³Wene yi hit akhuni itikmanke meke yokhisak. Allah nen, an nayoko 'biluk hit itikmanke meke hinoba la'ani ageikhemo wagagisik hagakhe lagei iti nen, kok motok iluk hogorakhekhe lagei o.

¹⁴An nagarlak lak nerugi ninukuloak etaga opakiat meke, Allah nen aperek tilinabuagaluk, an nen itithogon hagakhe lagei iti baga, inakla aga dageiluk ua paluagaluk hagakhe lagei.

¹⁵Allah nen, it akhuni Israel meke inebe here'isasikhe iti baga, yi akhuni ti akhuni tha'bokhogonat eloma Allah inom dapulinakhikhe iti. Yabokane it woginakhunem nen nikitlasigin. Akhuni warek meke inilugurinabu hak woginabigin iti.

¹⁶Roti alebageik meke Allah ake 'bisagun halok he, ebe tha'bokhogonat Allah mekeat o. Nen, o erlo Allah ake 'bisagun halok he, ikilo'bak at mekeat o.

¹⁷O zaitun erlo hano meke werekma, ikilo'bak aperek palogo la'isalok nen, obolukmo o zaitun okama meke ikilo'bak palogo hunisisumo, erlo hunik dogolik apusu werek dogou hakene, hit iti, hinebe itikmanke meke Allah nen it Yahudi meke emenogo inoba hunogo 'binageikhemo hano welagap o.

¹⁸Itithogon dogolik, hit nen, it inebe ikilo'bak palek meke hakene iti hasik, “It weak. Nit hano o,” iluk hogorakhekhe dogogup. O erlo nen, ikilo'bak kererakherek iti. Nen, ikilo'bak nen, erlo kererakherek dek iti hakene, it erlo meke nen, hit ikilo'bak meke kerethinakharek o.

¹⁹Meke re, hit nen, “Allah nen, nit o erlo baga hunogo 'binanisigiluk nen, it palogo la'isasikhe iti,” iluk ekhe lagap iti.

²⁰Itithogon mothogon apekhe lagap mekeat he, hinakla ebetni. It inetaiken Allah oba hakotdigidek nen palogo la'isasikhe. Meke re, hit anek he, hinetaiken Allah oba hakotdisigip iti nen wokhinakhikhemo welagap iti. Halok he, hinekaerek nen hogorakhigidek, hinayukhogon dogono

²¹It nen, o ikilo'bak erlo ebe baga hunik meke akmurinakhidek palogo la'isasikhe iti. Halok he, hit akmuthinabiluk here'inagusak a? Dek o.

²²Allah obabut he, obabut enago inom, anini weak inom, welagarek iti 'bikhani! It alomatlagoukha meke hasik, obabut anini weak iti. Nen, hit at oba enago meke hinom hunik dogogun halok he, oba enago iti. Meke re, itithogon hunik dogogun dek halok he, hit itithogonat palogo la'inagagin o.

²³It nen, inetaiken Allah oba hakotdigidek werek iti, yabokane hakotdugun halok, at Allah nen hunogo 'bisausak erlok welagarek iti nen, yabokane hunogo 'bisasiginat o.

²⁴O zaitun okama meke ikilo'bak palogo nen, uma meke baga hunisusak erlok dek mekeat he, hunisisu hak, hit nen, hunogo 'bisa ageikhemo welagap iti. Nen, o zaitun ikilo'bak ebe baga hunik meke palogo la'isalok, yabokane obolukmo hunogo 'bisu hagat, it hunogo 'bisa wisumo erlok o.

²⁵Nagarlak lak nerugi. Wene Allah akla wene yi hinokodek dogosak iti, an na'it. Hit hinekaerek nen, “Nit wene ninilu o,” iluk hogorakhaunogo iluk, wene yi yokhisak. It akhuni Israel meke inetaiken a'bet iti, we elanma hasigat werek o. Nen, yabokane it akhuni itikmanke meke ukisugun meke hurli erlok uki ageikha halok he,

²⁶ Allah nen akhuni Israel meke tha'bokhogonat hanorinabigin o. Wene itithogon iluk nen, at Allah nen men isikhemo ane baga holal waganek werek, “Tilinakherek meke ebe re, o Sion nen wisigin o. Witluk nen, it Yakub nen itago meke nen an inayuk dek dogolik weak hagariogei meke iti, korogo degetdigin o.

²⁷ Nen, weak hagariogei meke iti thagalogo degetdisekhe dogolik, wene yigithogon warogo woginabigin o,” iluk isikhemo holal waganogo 'bisukha.

²⁸It Israel meke hano wene waganusak ina'it nen Allah inom weak agoukha iti, hit itikmanke meke hanothinabuagaluk inom weak agoukha. Meke re, Allah nen wenageinakhikhesikmo nen, inopa lak Allah inom hunik iti nen inebe akmu o.

²⁹At Allah obabut hano nen yi meke ti meke woknisigik, ninebe wenakninakhik, hagatluk nen, yabokane ane ninat ageikhe ekherek dek.

³⁰Hit alep Allah ane hologo hagakhidek welagagip. Mekeat he, yogotak it Israel meke Allah ane hologo hagakhidek oba, hit hinebe akmuthinakhikhe iti o.

³¹Itithogonat yogotak it hinomat akmuthinabuagaluk, hit hinebe akmuthinakhikhe iti baga, yogotak it Allah ane hologo hagakhidek welageikharek iti.

³²At Allah nenat, akhuni weak hagakhunem iniki herle yabokane hisaluogoluk warogo 'bisegarek iti hak, akhuni inebe tha'bokhogonat akmurinabigiluk nen, inebe tha'bokhogonat at nen at ane hologo hagakhidek nen 'bisasikhe iti.

³³At Allah meke kokhogon woknisigik, akla motok kagalek welageik, wene motok ilu welageik, hagakherek iti nayuk o. At nen wene ilukun wakherek meke, nit akhuni ninilu asusak a? At nen yi meke ti meke hagakherek meke, nit nen hutdusak a?

³⁴ Wene iti hasik holal yigithogon waganogo 'bisukhama werek, “Ninopase Etagapogot akla tha ilu. At he, tha nen asuk wasusak nogo.

³⁵ Nen, tha nen yi meke ti meke at wogotluk, Oko woknom, iluk yogosusak nogo,” iluk isukhama holal waganek werek iti.

³⁶Erlo baga, yi meke ti meke tha'bokhogonat, at Allah nenat walhasikhemo, at iki baga welagarek. Dogoluk nen, ilugun oba, at nenat hagasigin. Halok he, at anek hogorakho motok dogouok o, iluk igi iti, ebeat asuak u hak, Amin, igi iti.