Read Mid Grand Valley Dani Roma 14 Bible Online

Roma 14 - Mid Grand Valley Dani bible

Roma 14

¹Hinagarlak lak hinerugi inetaiken Allah oba hutukhogon hakotdigidek inetaiken aban werek meke iti, it inobabut he, “Yigithogon hagasusak, itithogon hagasusak,” iluk egarek meke iti hasik wenageisigidegat woginakhe dogono o.

²It inetaiken Allah oba hakotdiluk dogolik, yi meke ti meke yugunat neke dogosak, iluk apalok nekarek. Mekeat he, it aperek inetaiken aban meke, hipiri hipirika anek nekarek.

³It yugunat nekarek meke iti inebe Allah nenat woginakhemo. Halok he, it nekarek dek meke iti inakla nen, “It weak o,” iluk wene inoba 'busak dek. Nen, it nekarek meke iti nen, it nekarek dek meke iti inakla erlok degetdisausak degat o.

⁴Ap ageikhe inatuaneke mekeat he, hit nen, wene inoba 'busak a? “At yi weak hagakhe. Hureklatnek,” nen, “At iti hano hagakhe. Metek dogonek,” iluk it inoe kok iti nenat usak o. Meke re, metek dogoagaluk, ninoe Etagapogot nen yogeisausak erlok meke nenat yogeisaumo metek dogogun o.

⁵It aperek nen, “O yinem itinem yi meke ti meke hagasusak anek mekeat he, o yogotak yi dikene anek he, hagasusak dek,” iluk apasi korlek, it aperek nen, “O yinem itinem ipisak tak-tagat anek,” apegarek iti, inebe tomok inakla itithogon apekhe dogosak anek o.

⁶It nen, “O yogotak yinem anek he, yi meke ti meke hagasusak dek,” iluk egarek meke iti, ninoe Etagapogot hasigat apegarek o. Nen, it aperek yi meke ti meke yugunat nekarek meke iti, ninoe Etagapogot hasigat neke dogolik, Allah heagei wakharek iti. Nen, it nekarek dek meke iti, ninoe Etagapogot hasigat nikidek thogotdekhe dogolik, Allah heagei wakharegat iti.

⁷Ninebe tomok ninekaerek hasik anek niniluk welageik, watlageik, hagakhe lago 'buk.

⁸Nit niniluk welago halok, ninoe Etagapogot hasigat welago. Nen, watlasugun halok, at hasigat watlasugun o. Halok he, niniluk dogosak inom, watlasusak inom, at mekeat welago.

⁹Watlagoukha meke dek, niniluk meke dek, dapukhogon hasik, at Kristus ninoe Etagapogot dogeigiluk, watlageikhesik iluk ageikhe iti.

¹⁰Nagarlak lak nerugi. Nit ninebe tha'bokhogonat Allah nen ninitema waganiginmo lugun mekeat, hit hinagarlak lak hinerugi hinom hinetaiken Allah baga hakotdekhe lagap meke iti, nenaluk wene inoba 'bigik, hinakla meanetdisigik, hagakhe lagap?

¹¹ Allah nen men yogeisasikhe, “An hinopase Netagapogot niluk motok welagarek meke nen nane eberogonat yokhisak. Akhuni inebe dopok he, an napma ukitluk, it nen, Allah harat o, iluk inape baga dopok pakhogon yoknesugun o,” iluk yogeisasikhemo holal waganogo 'bisukha.

¹²Yabokane, ninebe dopok nen, “An yigithogon hagakhi, tigithogon hagakhi,” iluk, wene pilinerogo at Allah at yogosugun o.

¹³Iti nen, nit-nit nen, ageikhe wene oba 'bigik, ageikhe nen, ageikhe wene oba 'bigik, 'bekhe dogosak dek o. Nit nen, ninagarlak lak ninerugi ninom ninetaiken Allah oba hakotdekhe lago meke, weagarinakhik, inakla korlotdisigik, hagasunogo iluk, hinobabut hanorogo hagakhe dogono o.

¹⁴Yi meke ti meke nekarek meke iti ebe re, usak dek, iluk, an ninoe Etagapogot Yesus nipisak hunik dogolik nilu. Hutdigi. Meke re, at ageikhe akla nen, “Iti meke usa. Nausak dek o,” iluk apasi halok he, at hasik, nausak degat o.

¹⁵Nen, hat neketek meke iti nen hagarlak akla korlo aga halok he, ebe hakmurogo hagakhe lagan dek o. Hagarlak iti hasik Kristus watlageikhesikmo, hat nigin iti baga at ebe weagatdugun o.

¹⁶Allah apma dogolik, yi meke ti meke nikik, here'isigik, hagakharek iti ebe kok 'buk. Ebe kok he, Allah Agoreke inakla dogolik, Allah akla warlok meke mothogon hagakhik, inetaiken hapukhogon welageik, inakla arleken akhigik, hagakharek iti nen, hat hakla nen, “An hano hagakhe lagei,” iluk apekhe lagan meke, it akhuni aperek nen habok weak unogo iluk nen, itithogon hagakhe dogogun o.

¹⁸Hit Kristus atuaneke dogolik, itithogon hagakhe dogoumo, Allah akla hano ageik, akhuni inakla nen, “At hano,” iluk inakla apigik, ugunat o.

¹⁹Halok he, ninetaiken hapukhogon dogouogoluk, nit-nit ageikhe nen ageikhe etaiken horletdigik, ageikhe nen, ageikhe etaiken horletdigik, ninobatnerogon hagakhe dogouok o.

²⁰Hat neketek iti baga nen, Allah a'buri at nen hano hagarogo 'bisasikhe meke weagatdisagun o. Yi meke ti meke hano nausagat meke re, neke dogolik at ageikhe weagatdegen halok he, hat weagat hagakhen o.

²¹Hat nen, wam palek nikik, oken apusu nikik, yi meke ti meke hagakhik, hagakhunem nen, hagarlak heru ageikhe weak asigin iti nen, nikidek here'isekhe dogoumo hano.

²²Hat ageikhe hetaiken Allah oba hakotdiluk dogolik, “Yugunat erlok hagasusak o,” iluk, hakla kagalek iti, Allah il oba hekaerek hasik anek hagakhe dogono. Tha nen, “An hano hagakhe lagei,” iluk apekhe dogolik, wene ekaerek oba 'bakhigidek halok he, akla arleken akhagein o.

²³Itithogon mekeat he, tha nen etaiken Allah oba hutukhogon hakotdigidek dogolik, “Yi meke erlok nausak a? Nausak dek a,” iluk wene munini akla nen ebekhe dogolik nigin halok he, Allah nen wene oba 'bigin o. Inetaiken Allah oba hutukhogon hakotdigidek dogolik, yi meke ti meke hagasugun halok, weagat hagasugun o.