Read Mid Grand Valley Dani Roma 15 Bible Online

Roma 15 - Mid Grand Valley Dani bible

Roma 15

¹Nit aperek, ninetaiken Allah oba horlerogon hakotdiluk welago meke nen, ninekaerek hasik anek ninakla hanorogon hagakhidek, it aperek inetaiken abanma aborlok werek meke iti, yomageisekhe dogosak o.

² Allah ane baga wene men iluk holal waganogo 'bisukha, “Hat Allah wene aik dagok paik dagok yokhekha meke re, an noba hagatlaga o,” iluk holal waganogo 'bisukha iti hagat, at Kristus nen ekaerek hasik akla arleken akhekhe dogeigiluk hagakhe lageikhe dek. Iti nen, nit ninebe dopok nen, ninagarlak lak ninerugi inetaiken Allah oba hakotdiluk inetaiken horle atluk hano asuagaluk, inakla hanorogo hagakhe dogouok o.

⁴Allah ane holal waganek iti baga, ninobakhanini hapugutdiluk welageik, ninakla hano ageik, hagakhorek iti nen, “Hano asigin,” iluk Allah oba eberek dogoagaluk, nirat ninasuk warogo Allah ane baga haganeat holal waganogo 'bisukha iti.

⁵Hit hinetaiken, hinane, opakiat dogolik, ninoe Etagapogot Yesus Kristus opase Allah itiat hogorakhe dogobageik nen, at Allah akhuni inobabut inobakhanini hapugutdiluk dogoagaluk hagarinakhik, inakla hanorinakhik, hagakherek meke iti nenat, hit tha'bokhogonat hinetaiken opakiat, at Kristus Yesus obabut hakene hagathinabuak o.

⁷Akhuni nen at Allah hogorakhe dogoagaluk, at Kristus nen hit hinebe wokhinakhikhe hak, hit aperek nen it aperek woginakhik, it aperek nen hit aperek wokhinakhik, hit-hit wok-wok hagakhe dogono o.

⁸Wene iti hasik ageikhe yokhisak. At Kristus wageikhesik nen, it Yahudi meke emenogo inapma ukisikhe iti. Itithogon ukisikhe iti, Allah nen, “An nen itithogon hagarinabigin o,” iluk ninopa lak abok yogeisekhe lageikhe etnogo eberogonat ebeat ageik,

⁹ nen, it akhuni itikmanke meke nen Allah nen akmurinakhikhe iti nen hogorakhik, hagasuagaluk, Yahudi meke inapma ukisikhe iti. Wene iti hasik Allah ane baga holal men iluk waganogo 'bisukhama werek, “Iti nen, an it akhuni itikmanke meke inaklake inaklake dogolik hat hogothakhik, etai wakhe dogolik hetaga kogotdigik, hagakhe dogogin o,” iluk isikhemo holal waganogo 'bisukha.

¹⁰ Ageikhe men iluk holal waganek weregat, “Hit akhuni itikmanke meke it Allah a'buri at nen wenageinakhikhe meke hinom hinakla arleken akhekhe dogono o,” iluk isikhemo holal waganogo 'bisukhaat.

¹¹ Nen, ageikhe wene men isikhe, “Hit akhuni itikmanke meke tha'bokhogonat ninoe Etagapogot hogorakhik, hinukuloak etaga dopok nen at hogorakhik, hagakhe dogono o,” iluk isukhama holal waganogo 'bisukhaat.

¹² Nen ageikhe, at Yesaya nen men iluk holal waganogo 'bisikheat, “O mukharethekma nen erlo baga asi'bat dukhekherek hak, at Isai nen itago meke ageikhe winam asigin. Winam agunem nen, it akhuni itikmanke meke at apma dogolik, at nen hanotninabigin, iluk at oba eberek dogogun o,” iluk holal waganogo 'bisikhe.

¹³“Yabokane hano asigin,” iluk ninakla arleken akhogorek iti, erlo at Allah nenat hagatninakherek. Hit itithogon hinakla arleken kokhogon akhekhe dogoagaluk Allah Agoreke obatne baga hagathinabuak. Itithogon hagathinabuak nen, hinetaiken at oba hakotdisigip iti baga hakotdiluk werekma, at nen hinakla arleken motok akhekhe dogoagaluk hagathinakhik, hinetaikek hapugutdinagagik, hagasuak o.

¹⁴Nagarlak lak nerugi. Hit hinobabut hano motok dogolik, yi wene ti wene hinilu motogatma, hit-hit hinasuk wat-wat usak erlok welagap iti, an nilu o.

¹⁵Itithogon mekeat he, at Allah obabut hano nen an nayoko 'bisikhe iti nen,, wene ageikhe iti thuesika yi baga nayuk dekhogon ebethisigi iti.

¹⁶An nebe at Kristus Yesus apma dogolik akhuni itikmanke meke woginabuagaluk nayoko 'bisikhemo, at Allah akla hanorogo Agoreke iti baga it inebe Allah hasik 'bisagaluk, at ane hano wene iti yogeisilik nekhe lagei o.

¹⁷Kristus Yesus nipisak hunik dogolik, Allah hasik hano hagakhe lagei o, iluk hogorakhausak erlok o.

¹⁸An nen wene ninat wene u nayuk. It akhuni itikmanke meke Allah nen apma 'bisoagaluk, at Kristus nen nayoko 'biluk wene igik, iki nen hagakhik, hagarik wageikhe iti nayuk degat igin.

¹⁹At ebe hutduagaluk yi meke ti meke hagakhik, hogorasuagaluk yi meke ti meke elalinat hagakhik, obatnerogon hagakhikhe. Allah Agoreke etnogo obatne bagaat hagakhikhe iti. Hagakhe korlek, an he, o Yerusalem eloma nen dagak-pagak piokthek o Ilirikum eloma, at Kristus wene hano wene iti hutukhogon yogeisilik wagei.

²⁰ Wene itithogon iluk holal yigithogon waganogo 'bisukhama werek, “It akhuni aperek, at abok holhidek meke inileken higik, nen, it wene holhidek meke nen hutdigik, hagasugun o,” iluk holal waganogo 'bisukha tak-tagat yogeisilik waga dogolik, it akhuni aperek nen, o herlaga 'bilukmo an nen o ebe halu hak halunogo iluk, an nakla warlok nen, akhuni Kristus etaga inasuk aban holhidekma eloma hano wene yogeisilik wisigiluk apasigi.

²²Wene itithogon yogeisilik nekhe lagei iti nen, hibiku-yogokuat hit nileken hisilik hinoba wisigiluk hagakhunem he, erlok dek ariogo.

²³Meke re, an o yoma dogolik hagasusak meke arat hagakhi o. Halok he, o haganeat eloma nenat hit nileken hisilik hinoba wisigiluk nakla apasigisikmo re, yogotak arat wisigin o.

²⁴Yogotak o Spanyol laga dogolik, hit hinobake haklarik wisigiluk nakla apekhe lagei o. Hit 'bithisa agei halok he, ninom niki herlekha'bugat nakla hanorogon dogoluk nen, hit nen o Spanyol eloma la'anumo lausak apekhe lagei o.

²⁵It akhuni o Makedonia meke men, Akhaya meke men, inakla eberogo it meke natogorlogo it akhuni Allah a'buri inameke dek meke o Yerusalem welageikharek meke iti 'bisega meke werek iti nen, yogotak an nen wolok yomageisagaluk o Yerusalem ligin o.

²⁷It akhuni Yahudi meke nen it itikmanke meke inebe hano asuagaluk Allah ane wogeisasukhasikmo nen, it nen yabokane dagakhogon yi meke ti meke agat oba meke yomageisausak tak-tagat itithogon inakla kagalogo 'bisega o.

²⁸Itithogon arat 'bisega meke iti, an nen it Yerusalem meke arat wogeisa lagei halok he, o Spanyok lagaluk waga dogolik, hinoba haklarik wisigin o.

²⁹An arat 'bithisa agei halok he, at Kristus nen hit hinobasik woknikhikhe meke tha'bokhogonat wokhisa isigin apigi.

³⁰Nagarlak lak nerugi. Ninoe Etagapogot Yesus Kristus itiat iluk, nit-nit nakmu-hakmu dogoagaluk Allah Agoreke nen hagatninakherek etnogo baga, an hasik ninom sembayan Allah ayoko ninobatnerogon 'bekhe dogouogoluk yokhisigi o.

³¹It akhuni o Yudea meke inetaiken Yesus oba hakotdigidek meke nen nebe iniki hakneaunogo iluk, Allah nen tilnabuagaluk inom, nen, akhuni Allah a'buri o Yerusalem meke hasik natogorlogo 'bisega meke iti, wolok yomageisa lagunem nen, hano waganuagaluk inom, sembayan hanorogon ekhe dogono o.

³²O Yerusalem lalok nen, at Allah akla nen hano apekhe halok he, an nakla arleken akhilik akhilik hinoba wisigin o. Witluk ninom dogolik, thet walagein iti o.

³³Allah nen akhuni inetaiken hapugutdekherek meke etnogo, hit tha'bokhogonat hakhisik dogoagaluk, hagakhe dogolik, “Ebeat asuak,” u hak, “Amin,” iluk igi iti.