Read Mid Grand Valley Dani Roma 16 Bible Online

Roma 16 - Mid Grand Valley Dani bible

Roma 16

¹He nineru Febe iti ebe hinilurogo yakulhisak. At obabut hanoma Allah a'buri o Kengkrea meke yomageisekherek meke hinoba waga iti,

²hit ninoe Etagapogot hinom hunik dogolik, Allah a'buri nen waganusak tak-tagat, at ebe waganubageik nen iluk yokhisigi o. At ameke yi meke ti meke dek halok he, hit meke aperek wogokhe dogono o. At nen akhuni doalegat yomageisigik, an nebe men yomakniigik, hagakhe lageikhesikmo, hit nen at ebe waganino o.

³Nen, ageikhe re, he Priskila agun Akwila ipisak ninom Kristus Yesus hasik hagakhe lagosik wageikha meke iti Paulus nen heagei wathinakhe iluk yogeisano o.

⁴It an tilnabuogoluk lagunem, inatlep iti nen, “Nakmu lak o,” iluk an anek heagei warinakhe lagei 'buk. It Allah a'buri itikmanke meke natogorliogei meke men, inebe tha'bokhogonat ninom nenat heagei warinakhe lago o.

⁵Allah a'buri it Priskila Akwila ipisak inaila natogorliogei meke inomat, “Paulus lak nen heagei wathinakha,” iluk yogeisanoat o. Nen, ageikhe re, ap Epenetus nakmu meke iti, “At nen heagei wathakhe,” iluk yogotnoat o. O Asia eloma, at iti tak etaiken Kristus oba hakotdisikhemo nen, it aperek yabokane hakotdisukha.

⁶He Maria hit hinobasik thet weak hagakhe lageikhe etnogo, “At nen heagei wathakhe,” iluk yogotnoat o.

⁷At Andronikus, Yunias ipisak, “At nen heagei wathinakhe,” iluk yogeisanoat o. It he, an ninom ninukuloak opakiat meke niniki herle ninom warek welagagusik. Akhuni doalegat negen Kristus nen inayoko 'biluk la'isa ageikhe mekeat he, inetagawerek irat o. It tak inetaiken Kristus oba hakotdisukhasikmo nen, an yabokane hakotdisigi iti.

⁸Nen, ageikhe, an nagarlak Ampliatus nipisak ninoe Etagapogot ninom hunik welago iti nen, ebe nakmu o. “At nen heagei wathakhe,” iluk yogotnoat o.

⁹At Urbanus iti ninomat Kristus hasik hagakhe lagagu meke iti men, Stakhis nakmu meke iti men, “At nen heagei wathinakhe,” iluk yogeisanoat o.

¹⁰At Apeles Kristus ipisak hunik dogolik obabut hupulik hagakhunem obabut hano paliogei meke iti, “At nen heagei wathakhe,” iluk yogokhik, Aristobulus a'buri iti, “At nen heagei wathinakhe,” iluk yogeisigik, inoat o.

¹¹At Herodion ap ninukuloak etaga opakiat meke iti, “At nen heagei wathakhe,” iluk yogotnoat. Nen, Narkisus a'buri ninoe Etagapogot inom hunik meke iti, “At nen heagei wathinakhe,” yogeisanat o.

¹²Nen, ageikhe re, humi Trifena Trifosa ipisak ninoe Etagapogot hasik yabu inobatnerogon hagariogei meke, “At nen heagei wathinakhe,” iluk yogeisigik, he Persis haganeat nen ninoe Etagapogot hasik ayabu motok kogat hagariogo meke iti nakmu o. “At nen heagei wathakhe,” iluk yogokhik, inoat o.

¹³At Rufus iti ninoe Etagapogot nen ayoko 'bisikhemo hogorakharek iti. At agosa iti, an nagosa hakeneat o. Eak ipisagat, “At nen heagei wathinakhe,” iluk yogeisanoat o.

¹⁴At Asinkritus men, Flegon men, Hermes men, Patrobas men, Hermas men, ninagarlak lak ninerugi Allah a'buri aperek it inom welageikharek meke tha'bokhogonat inomat men, “At nen heagei wathinakhe,” iluk yogeisanoat o.

¹⁵At Filologus, he Yulia ipisak, Nereus eru ipisak, Olimpas inomat, Allah a'buri it inom welageikharek meke tha'bokhogonat inomat, “At nen heagei wathinakhe,” iluk yogeisanoat o.

¹⁶Nen, ageikhe re, hinebe Allah a'buri welagap iti, heagei hinape tharluk wat-wat ilik lano. Allah a'buri Kristus agarumi o yi ai ti ai natogorliogei meke nen, “Heagei wathinakho,” iluk yoknekhama nen yokhisigiat o.

¹⁷Nagarlak lak nerugi. Hinakla kagalogo wene ageikhe yi nane nobatnerogon yokhisak o. It akhuni aperek yabokane witluk nen, wene alebageik yakulhisasukhama waganhigip meke here'isalok nen, hinebe mikirlogo 'binagagik, hinakla weagathinakhik, hagakho halok he, hinobabut hebelogo dogolik, inane hinasuk hokhidek, mirlokhogon here'isekhe dogono o.

¹⁸It iti, ninoe Etagapogot Kristus apma dogolik, at hasik hagariogei 'buk. We, inekaerek inakla warlok meke hagariogei o. Itithogon hagakhe dogolik, inane hano igik, enago igik, ekhe dogolik, it akhuni aperek inobabut, “I o,” anek egarek meke iti nukhetdisiliogei iti.

¹⁹Meke re, hit Allah ane hologo hagakhe lagap meke iti, it akhuni tha'bokhogonat nen hinobabut ekagat paliogei iti nen, an nakla arleken akhekhe lagei o. Hit hano wene hasik hinakla kagalek welageik, weak meke hasik hinokodek welageik, hagasumo hano. An nakla warlok.

²⁰At Allah akhuni inetaiken hapugutdekherek meke etnogo nen, at Iblis iti hinisok nen al debelogo here'isoagaluk ibat hinapma 'bisigin werek o. Ninoe Etagapogot Yesus obabut hano etnogo nen thethisik dogoak o.

²¹At Timotius an nagarlak nipisak Allah hasik hagakhe lago meke etnogo nen, “Heagei warinakhi o,” iluk yoknekhemo nen yokhisigi o. Ap nit meke Lukius men, Yason men, Sisipater men, yoma nen, “It heagei warinakho,” iluk yoknekhama nen yokhisigiat o.

²²An Tertius Paulus ane isi korlek holal yi waganhi meke nen,ninoe Etagapogot ninom hunik dogolik heagei wathinakhiat o.

²³At Gayus nen an nebe woknakhik, Allah a'buri tha'bokhogonat woginakhik, hagakhe meke iti nen heagei wathinakheat o. At Erastus o ukul kok yoma hasik uang bisinem hago welagarek meke iti nen heagei wathinakheat o. Nen, ninagarlak Kwartus nen heagei wathinakheat o. [

²⁴Ninoe Etagapogot Yesus Kristus obabut hano etnogo nen, hakhisik dogoak, iluk, “Ebeat asuak,” u hak, “Anin, igi iti,”]

²⁵Allah hogorakhe dogouok o! An nen hano wene Yesus Kristus hagakhikhe wene yokhisasigi hak, at Allah obatneak etnogo nen hinetaiken horlethinakhe dogosak erlok o. Wene Allah akla wene iti, muk haganeat nen limago welageikhe meke re, yogotak Allah nen thelekmatdisikhemo werek o.

²⁶Iti re, it ap at ane yogeisekhe lagoukha meke emenogo nen holal waganogo, thelekmatdisukhama werekma an nen yokhisasigi iti. Yi ap ti ap inukuloak etaga dopok tha'bokhogonat wene iti inasuk holiluk inetaiken Yesus oba hakotdiluk ane hologo hagakhe dogoagaluk, at Allah ikhok motok welagarek meke etnogo nenat, “Wene yi akhuni inilu asuak o,” iluk isikhe.

²⁷At Allah arligat akla motok kagalek welagarek o. At Yesus Kristus hagakhikhe hasik Allah hogorakho motok dogouok o, iluk, “Ebeat asuak,” iluk u hak, “Amin,” igi iti.