Read Mid Grand Valley Dani Roma 7 Bible Online

Roma 7 - Mid Grand Valley Dani bible

Roma 7

¹Nagarlak lak nerugi. Allah nen, “Yigithogon hagatno, tigithogon hagatno,” iluk ninasuk wakhikhe iti, akhuni inebe iniluk dogolik wene iti hago dogolik mothogon hagakhidek halok wene inoba agarek. Meke re, inebe watlago halok, wene inoba agarek dek iluk hinokodek nogo? Dek o. Hinilu meke anek yokhisekhe lagei o.

²It humi inaguni waganek meke, inaguni inebe iniluk werek korlek, wene Allah nen ninasuk wakhikhe wene iti baga, inom herle warek negen hano welageidek halok, wene inoba asusak. Meke re, inaguni watlagunem anek nen, herle warek hakene iti hisalaga halok, wene inoba asusak dek.

³He ageikhe nen, agun iluk werek korlegat ap ageikhe waganhe halok, akhuni nen, “Paramat hagariogo o,” iluk abok weak usagat o. Meke re, agun ebe watlaga halok he, wene Allah nen ninasuk wakhikhe wene iti baga herle warek negen welageikha iti, arat hisalaga iluk, ap ageikhe erlok waganusagat o. Waganhunem, “Param hagariogo,” usak dek o.

⁴Iti hak, nagarlak lak nerugi. Hit alebat, humi inaguni inom herle warek hakene welageikharek ogo iti hak, wene Allah nen ninasuk wakhikhe wene etnogo baga herle warek werekma, at Kristus ebe wakhukhama watlageikhe iti, hinomat watlaga dogolik, herle warek hakene welagagip meke iti arat hisalageikhe iti. Iti nen he, humi inaguni watlagunem ageikhe erlok woginabusak iti hak, hit Allah hasik hano hagakhe dogoagaluk, at Yesus watlageikhemo Allah nen ilugutdisikhe meke etnogo nen wokhinakhikhemo welagap o.

⁵Alebat, nit ninobabut akhuni inobabut ninikhogat welagagu. Itithogon dogolik, wene Allah nen ninasuk wakhikhe wene etnogo werek nen, ninoba agaken dageisinem nen, niniki ninisok ninebe a'birat nen weak hagakhunem ilugun oba, motok watlaga lagagu iti.

⁶Alebat wene Allah nen ninasuk wakhikhe wene etnogo baga herle warek negen welagagu meke, Kristus watlaga dogolik nit ninomat watlagagu iti baga, Allah nen herle hisalninakhikhemo welago. Yogotak he, Allah atuaneke dogolik, wene at nen ninasuk wakhikhe wene holal waganek meke ninileken anek 'bikhekhe dogolik, hagakhe lagagu iti hak, hagakhe lago dek mekeat he, Allah Agoreke nen ninobabut ket meke hagatninakho korlek, hagakhe lago.

⁷ Iti halok he, nit nen nikithogon ugun. Wene Allah nen ninasuk wakhikhe wene iti weak usak nogo? Motok dek o. Meke re, wene itithogon ninasuk wakhidek dogolepma re, weak hagakharek iti nikithogon nokodegat dogole o. Allah nen wene ninasuk wakhikhe iti wakhe dogolik, “Akhuni inameke, Warlok e, iluk hinakla apugup o,” iluk igidek dogolepma re, akhuni inameke meke, Warlok e, apegerek iti nokodegat dogole o.

⁸Iti nenat, wene Allah nen ninasuk wakhikhe wene iti baga, weak meke nen he, an weak hagasuagaluk, “Yi meke ti meke akhuni inameke, hakla nen, warlok akhan o,” iluk nakla kagalhe lageikhe. Wene Allah nen ninasuk iti wakhidekma, weak hagasusak he, ninokodegat welagagu.

⁹An alep he, wene Allah nen ninasuk wakhikhe wene iti nokodek dogolik, niluk hano welagei thalek welagagi. Meke re, wene ninasuk wakhikhe wene etnogo nilu agagisik oba nen, weak hagakharek iti meke obatne ageikhemo,

¹⁰an he, warek hakene hagatlagagi. Allah nen niluk dogoagaluk nasuk wakhikhe mekeat he, wene iti baga watlagagi hakene iti.

¹¹Allah nen ninasuk wakhikhe wene iti baga, weak hagakharek iti nakla kagalogo nen, nukhetdanhikhesik nen, nebe nakhikhe iti.

¹²Wene Allah nen ninasuk wakhikhe wene iti, Allah aneat o. “Yigithogon hagasusak dek, tigithogon hagasusak dek,” iluk ninasuk wakhikhe wene iti ebe tomok at aneat o. Wene iti mot hano motok isikhe o.

¹³Halok he, wene iti hano motok isikhe meke iti nen an nebe watlagagi nogo? Motok dek o. Weak hagakharek iti nenat o. Weak hagakharek iti nen, hano meke iti baga warogo 'banhikhemo, ekagat ageikhe. Wene Allah nen ninasuk wakhikhe iti bagaat, inobabut weak hagakharek iti motok weak, iluk ekagat hagatlageikhe iti.

¹⁴Wene Allah nen ninasuk wakhikhe wene iti, at Agoreke nen yoknisasikhemo nogo nen, hano motok, iluk ninilu. Meke re, an nobabut akhuni inobabut inikhok mekeat welagei. Weak hagakharek iti meke nen apma 'banigiluk oko palogo negen woknahikhemo welagei.

¹⁵Iti nen an nakla nen, “Yi meke ti meke hano meke hagatle,” iluk warlok apegerek meke iti, ebe hagakherek dek. Mekeat he, na'it apegerek meke itiat hagakherek iti nen he, an hagakhe lagei meke iti hutdigidek welagei o.

¹⁶An nakla nen warlok apegerek meke dek. Na'it apegerek meke hagakhe lagei iti, “Wene Allah nen ninasuk wakhikhe wene itiat hano,” iluk u hagat hagakhe lagei o.

¹⁷An nobabut itithogon hagakhe lagei iti, an nen hagakhe lagei 'buk. Weak hagakharek meke nakla dogolik hagariogo.

¹⁸Mothogon hagasigiluk warlok apegerek mekeat he, ebe an nen hagasusak erlok dek o. Iti re, an nobabut nen, hano meke ageikhe hagakherek 'buk. Nobabut akhuni inobabut meke inikhogat dogolik hagakhe lagei, iluk nilu o.

¹⁹Hano meke hagasigiluk apegerek mekeat he, ebe hagakhe lagei dek. Weak meke hagasigiluk apigidek mekeat he, iti mekeat hagakhe lagei.

²⁰Nakla nen warlok apigidek. Na'it apegerek meke hagakhe lagei halok he, an nebe nen hagakhe lagei dek higi. Weak hagakharek meke nakla welagarek meke iti nenat hagariogo.

²¹An nobabut hagakherek igi iti re, men hekhe lagei. Hano hagasigiluk isinem nen, weak hagasusak anek hagatnakherek o.

²²An nakla nen, “Wene Allah nen ninasuk wakhikhe wene iti hano,” iluk apegerek mekeat he,

²³niki nisok nebe a'birat, ninat meke hagakhe dogolik, wene Allah nen ninasuk wakhikhe wene etnogo nakla nen hano apegerek meke iti thebeligiluk hagakherek. Niki nisok nebe a'birat yoma weak anek hagakherek iti nen, nebe weak hagasuagaluk herle warogo negen 'banherek iti.

²⁴An nekaerek nakla re, wene Allah nen ninasuk wakhikhe wene iti holek dogogin apegerek mekeat he,nobabut akhuni inobabut inikhogat dogolik hagakharek iti nen yoknekhunem ane holek welagarek iti. Itithogon welagarek iti nen, nebe motok nasigin iti, eiye, nakla weak. Tha nen tilnabigin? Ninoe Etagapogot Yesus Kristus hagakhikhe iti baga tilnabigin iti nen, “Nopase Allah,” iluk heagei wakhe lagei o.