Read Mid Grand Valley Dani Roma 9 Bible Online

Roma 9 - Mid Grand Valley Dani bible

Roma 9

¹An nagarlak lak nerugi ninukuloak etaga opakiat meke weak werek iti nen, nakla weagat welageik, korloat welageik, hagakhe lagei. “Allah nen, an Kristus nipisak hunik welago meke iti kolelogo heredaniluk, it inobolukmo homan 'banilep e, apekhe lagei iti baga, it woginabilep e,” iluk Kristus nipisak hunik dogolik igi iti, eberogonat igi. Nekalat igi dek o. Allah Agoreke nen nakla dogolik, “Wene iti eberogonat,” iluk yoknekhik, nekaerek nakla nen meneke, “Eberogonat igi,” iluk apigik, egerek.

⁴It akhuni Israel meke ebe Israel Allah nen wenageinakhikhe meke iti nen, at a'buri asuagaluk woginakhik,at Ebe hogorakharek meke iti irat yakulisigik, wene warogo irat woginakhik, wene ninasuk wakhikhe wene etnogo irat wogeisigik, “An yigithogon hogotnakhe dogono,” iluk irat yakulisigik, “Yabokane itithogon hagathinabigin,” iluk abok irat yogeisigik, hagakhikhe iti.

⁵Nit ninopa lak nen, it nen itago meke. At Kristus ebe nit akhuni itaklagorek hak itaklageikhe iti, it meke nen itakhukha meke re, ebe Allah mekeat o. Yi meke ti meke tha'bokhogonat nen, wema baga negen mekeat he, at anek, upu baga siakhogon welagarek iti nen, at anek hogorakhe dogogun iti, ebeat asuak, iluk u hak, “Amin,” ekhe dogouok.

⁶Allah nen it abok yogeisasikhe iti, “Ebe dek aga,” iluk igi 'buk. It Israel nen itago meke iti tha'bokhogonat he, inebe Israel Allah nen wenageinakhikhe meke 'buk.

⁷ At Allah nen wene Abraham men yogokhikhe, “An nen Ishak nen itago meke anek hat ha'buri iluk ekhe dogogin o,” iluk yogokhikhe iti nen, Abraham nen itago meke tha'bokhogonat nen, Allah a'buri usak 'buk. Dek o.

⁸Itithogon isikhe iti ebe men iluk isikhe. Inebe nen itago meke iti, Allah a'buri usak 'buk. Allah nen abok yogeisasikhe meke halok, at a'buri usak o.

⁹ At Allah nen Abraham wene warikhikhe iti warekhe dogolik, men yogokhikhe, “An yabokane hoba wisusak tak-tagat wisigin o. Wagunem nen, he Sara eak abat itasigin o,” iluk yogokhikhe.

¹⁰Meke re, wene iti anek 'buk. At he Ribka eagei inopase Ishak ninopa opakiat iti nen ap inebe pere itaginakhikhe.

¹¹It ap inebe pere iti, inebe itaklageidek inobabut hano hagakhik, weak hagakhik, hagakhidek werek korlek, at Allah akla nen apalok witaberogo 'bisasikhe iti ebeat atluk dogoagaluk,

¹² inagosa Ribka wene men yogokhikhe, “Hat heagei itaginabigin iti, alebageik itaklasigin meke iti, ebe yabokane itaklasigin meke apma dogogin o,” iluk itithogon abok yogokhikhe. Itithogon yogokhikhe iti, it nen yi meke ti meke hagakhukha baga witaberinakhikhe 'buk. At Allah akla apalok witaberinakhikhe iti.

¹³ Wene iti hakene ageikhe men isikheat, “At Yakub iti nakmu. Mekeat he, at Esau iti na'it o,” iluk isikhemo, holal waganogo 'bisukha.

¹⁴Halok he, nit nen nikithogon ugun. At Allah obabut korlo hagakhikhe usak nogo? Motok dek o. Allah obabut mot.

¹⁵ At nen Musa men yogokhikhe, “An nenat nakmu meke halok nakmurinakhik, netaiken meke halok netaiken ageik, hagasigin o,” iluk yogokhikhe.

¹⁶Allah nen itithogon ekherek iti, akhuni inakla nen hano iluk apalok, it nen inobatnerogon hagatluk nen, akmurinakherek dek. At Allah obabut hano nenat akmurinabiluk inebe woginakharek iti.

¹⁷ At Allah nen kok Firaun men yogokhikhe, “An nen yi hasigat meldagagi o. Akhuni nen an nobatne inilu ageik, netaga o yi ai ti ai yogeisilik lageik, hagasuagaluk meldagagi o,” iluk yogokhikhemo Allah ane holal waganek etnogo baga holal waganogo 'bisukha.

¹⁸At Allah nen, “At yi nakmu,” iluk akla apekherek meke halogat, akmurakhik, nen, “At iti etaiken a'beretdisigin,” iluk akla apekherek meke halogat etaiken a'beretdisigik, hagakherek iti.

¹⁹Itithogon hagakherek iti nen, hat ageikhe nen an men yoknesusak apekhe lagei, “At Allah akla apalok hagakherek meke iti, tha nen, Na'it, iluk degetdusak nogo. Itithogon degetdusak erlok dek mekeat he, nenaluk wene ninoba 'biliogo,” iluk usak apekhe lagei.

²⁰Eiye! Nagot yi. At Allah ane isinem, hat hane oko dagakhogon yogosusak nogo? Erlok dek o. Akhuni nen isoak agat ka'bok meke hagakhunem he, agat ka'bok iti nen, at hagakhe werek iti yogokhe dogolik, “Hat nen an yigithogon nenaluk hagatnakhen,” iluk yogosusak nogo? Erlok dek o.

²¹Agat ka'bok iti opakiat mekeat he, at hagakhe werek iti iteeregatma, ageikhe hanorogo hagarogo 'bigik, ageikhe yugunat hagarogo 'bigik, hagasusak dek nogo? Hagasusagat o.

²²Iti hak, at Allah akla apekhe dogolik, “Akhuni an nen walinakhigi mekeat he, it aperek nakla aga liabiogei iti nen, weagarinabigiluk, nakla aga dageisikhe meke iti, it nen nobabut palhik, nobatne werek iti, inilu ageik, hagasuak o,” iluk obakhanini hapugutdiluk welagarek.

²³It iti hasik itithogon obakhanini hapugutdiluk dogolik, nit ninobasik men apiliogo, “It nakmu meke hanorinabigiluk ebekeram walinakhigi iti, hano motok hagarinabigin meke inilu asuak o,” iluk apekherek.

²⁴Itithogon apekherek meke iti, nit akhuni Yahudi meke anek wenakninakhikhesik ninayoko 'bisikhe 'buk. It itikmanke meke ninomat wenakninakhikhesik inayoko 'bisikheat o.

²⁵ Itithogon iluk at Allah nen wene ageikhe men isikhe, “Akhuni werlek meke an na'buri dek welagoukha meke re, an na'buriat o, iluk igik, inebe nakmurinakhidek meke, nakmuat o, iluk igik, igin o,

²⁶ An nen akhuni o ageikhe meke hasik, Hit he, an na'buri dek o, iluk isigi mekeat, yabokane it o etoma meke hasigat, O yoma an niluk welagarek meke na'buri o, iluk igin,” iluk isikhemo at Hosea nen holal waganogo 'bisikhe.

²⁷ Nen wene ageikhe Allah nen men isikhe, “Akhuni agat oba meke yoma wene ibat inoba motok 'bigin iti nen, akhuni Israel nen itago meke inebe lelaga i laut kok yekelek yipitlake welagarek iti hakene werek. Mekeat he, inebe herlekha'bugat anek tilinabigin o,” iluk isikhemo Yesaya nen holal waganogo 'bisikhe.

²⁹ Itithogon iluk Yesaya nenat wene ageikhe alebat men isikhe, “Ninopase Etagapogot obatneak etnogo nen, nit nen itago meke aperek here'isigidek motogat inakhe dogolepma, Sodom hakene ageik, Gomora tak-tak ageik, hagatlo o,” iluk Yesaya nen holal waganogo 'bisikhe.

³⁰Iti halok he, nit nen nikithogon ugun? Men usak. It akhuni itikmanke meke nen wene inoba meke Allah nen korogo wokhalok, inapuke inom hunogo 'bisoagaluk hagasusak meke inobatnerogon hagakhidek. Mekeat he, inetaiken Yesus oba hakotdisukhama, Allah nen wene inoba meke korogo wokhasikhesik, yabokane inapuke inom hunogo 'bisasikhe.

³¹Itithogon mekeat he, it Israel meke nen, Allah nen wene inoba meke korogo wokhasikhesik, yabokane inapuke at inom hunogo 'bisausak wene holek dogouogoluk walhasukha mekeat he, erlok dek ageikhe.

³²Nenaluk nen itithogon erlok dek ageikhe. Iti inetaiken Yesus oba hakotdigidek, inekaerek inakla apalok hagakhe lagoukha iti nenat o. Akhuni holagarlem laga dogolik helekit oba inisok a'bit dikhogon waregarek hak, nuk agoukha iti.

³³ Wene iti hasik Allah nen men isikhe, “Lakhani! An o Sion etoma helekit hakene ageikhe 'bigin o. 'Bumo helekit iti baga akhuni inisok a'bit dikhogon waralok wara laga dogogun o. Mekeat he, inetaiken at oba hakotdugun meke inekarli asugun motok dek o,”