Read Mid Grand Valley Dani 1 Korintus 12 Bible Online

1 Korintus 12 - Mid Grand Valley Dani bible

1 Korintus 12

¹Nagarlak lak nerugi. Allah Agoreke nen woknisekherek wene iti hinokodek dogosak iti na'it.

²Hit alebat ninoe Etagapogot hinokodek werekma, obabut weak meke nen kaneke ane dek meke oba hakotdiluk dogoagaluk, komake heat wokhisik lalok nen, nonetdinagekhe lageikhe iti hinilu.

³Wene yi hinilurogo yokhisak. Akhuni Allah Agoreke inakla werekma, “At Yesus Allah nen weagatduak o,” iluk homan 'busak erlok dek o. Nen, Allah Agoreke inakla dek halok he, “Yesus an noe Etagapogot,” iluk usak erlok degat o.

⁴Ninobabut dopok asokhotek tomogat woknisekherek iti, Allah Agoreke opakiat meke nenat woknisekherek o.

⁵At ninoe Etagapogot ayabu asokhotek tomok hagatdisogorek iti, at ebe opakiat meke, ayabu hagatdisogorek o.

⁶Ayabu itithogon hagatdisekhe dogolik, niniki asokhotek tomok hagakhorek meke iti, ebe tha'bokhogonat hagasuagaluk, ninopase Allah opakiat meke nen ninebe tomok obatne woknisekherek o.

⁷Akhuni nen he, “It Allah Agoreke inakla werek,” iluk ekagat hutdinanuagaluk, at nen he, ninebe tha'bokhogon hanotninabuagaluk ninakla tomok kagalherek.

⁸At Allah Agoreke nen, at ageikhe wene kagoukhogon ekhe dogoagaluk wogokherek. Nen, at Agoreke iti nenat, at ageikhe yi wene ti wene ilu motok atluk yogeisoagaluk wogokheregat.

⁹Nen, at Agoreke opakiat iti nenat, at ageikhe etaiken Allah oba hakotdiluk motok dogoagaluk ninat wogokheregat. Nen, at Agoreke opakiat iti nenat, at ageikhe nen u hano hagarinakhe dogoagaluk obatne wogokheregat.

¹⁰Nen, at ageikhe yi meke ti meke elalinat hagakhe dogoagaluk wogokhik, at ageikhe nen Allah ane yogeisekhe dogoagaluk wogokhik, at ageikhe nen ekhe dogolik, “At iti Allah Agoreke akla dogolik hagariogo, igik, weak meke agoreke akla dogolik hagariogo, igik,” ekagat penakhe dogoagaluk wogokhik, at ageikhe nen inane okodek meke elalinat ekhe dogoagaluk wogokhik, at ageikhe inane inokodek meke isinem, at asuk holiluk nen, “Ebe yigithogon meke hasik ekhe,” iluk it inane baga mothogon yogeisekhe dogoagaluk wogokhik, inebe tomok wogeisekherek iti o.

¹¹Itithogon wogeisekherek iti, Allah Agoreke opakiat iti nenat akla apalok, yi hagakhik, ti hagakhik, hagakhe dogoagaluk inebe tomok mikirlogo wogeisekherek iti.

¹²Nit akhuni ninebe opakiat mekeat, niniki, ninisok, ninoba doalegat werek. Niniki ninisok ninoba yi meke ti meke doalegat werek meke re, dapukhogon ninebe opakiat iti hakene, at Kristus ebe itithogonat o.

¹³Nit ninebe tha'bokhogonat Yahudi meke inom, Yunani meke inom, inatuaneke meke inom, inasokneat welageikharek meke inom, at Kristus ebe opakiat meke ninom hunesuagaluk, at Agoreke nen ima usa'inanhikhe iti o. Nen, i elesi opakiat meke nokorek hak, at Agoreke opakiat meke ninakla 'bisikhe.

¹⁴Nit akhuni ninebe niniki opakiat iti anek 'buk. Niniki ninisok ninebe baga yi meke ti meke doalegat ninoba hunik werek o.

¹⁵Ninisok yi ane werek dogolepma re, at nen ekhe dogolik, “An nebe iniki 'buk. Ninat iti nen, inebe baga hunik welagei dek o,” iluk umo ane itithogon igin iti baga, ninebe baga hunik meke iti, asokneat dogosak apegep a? Erlok dek o.

¹⁶Ninasuk yi ane werek dogolepma, at nen ekhe dogolik, “An nebe inileken 'buk. Ninat iti nen inebe baga hunik welageidek o,” iluk umo ane itithogon igin iti baga ninebe hunik meke iti asokneat dogosak apegep a? Erlok dek o.

¹⁷Ninebe yi ninileken anek dogolepma, ninasuk nikithogon holhe dogolo. Nen, ninasuk anek dogolepma, obasi nikithogon palhe dogolo.

¹⁸Meke re, at Allah nen akla apalok nenat niniki ninisok ninebe yi meke ti meke ninebe baga werek yoma obolukmo tomok hunogo 'binanhikhemo ninebe opakiat meke welago yi.

¹⁹Ninebe yi, niniki iti anek dogolepma, ninebe nikithogon dogolo.

²⁰Meke re, niniki ninisok yi meke ti meke ninoba doalegat werek mekeat, ninebe opakiat o.

²¹Iti nenat, ninileken nen, niniki yogokhe dogolik, “An he, hat dekma hano dogole,” iluk usak erlok dek o. Itithogonat, ninukuloak nen ninisok yogokhe dogolik, “An he, hat dekma hano dogole,” iluk usak eerlok degat o.

²²Ninebe opakiat meke, niniki ninisok yi meke ti meke ninoba welagarek iti, ageikhe obatne dek hakene apogorek mekeat, iti hano motogat o. Dekma nikithogon hagakhe dogolo. Erlok dek o.

²³Nit niniki ninisok ninebe baga hunik welagarek meke iti, ageikhe elokhoken hano halok he, agouwak hagasusak dek. Meke re, ageikhe elokhoken weak halok, agouwak hagarogo 'bigik, ageikhe ninekarli asusak halok, limago 'biluk agouwak hanorogo hagarogo 'bigik, hagakhorek. Niniki ninisok yi meke ti meke ninebe baga hunik welagarek meke tha'bokhogonat ageikhe nen ageikhe akmurakhik, hagakhe dogoagaluk, at Allah nen ninebe agouwak hagarogo winametdinanhikhe. Winametdinanhe dogolik, niniki ninisok ninebe baga hunik welagarek meke tha'bokhogonat, agot lasunogo iluk, elokhoken weak halok, agouwak hagarogo hagakhik, hagakhe dogoagaluk, obolukmo tomok hunhigik 'binahikhe iti o.

²⁶Niniki ninisok yi meke ti meke ninebe baga hunik welagarek meke, ageikhe u nen hinet wakho halok he, ninebe abisakeat hinet wakhorek o. Nen, niniki ninisok yi meke ti meke ninebe baga hunik welagarek meke, ageikhe akhuni nen hogorakho halok he, ninebe abirat ninakla arleken akhogorek o.

²⁷Hit hinebe dapukhogon Kristus ebe hakeneat dogolik, hinebe tomok, at iki isok negen oba hunik welagap o.

²⁸At Allah nenat, a'buri ninobolukmo tomok 'binanhe dogolik, alebageik nit at ane yogeisilik nekhe dogoagaluk ninayoko 'bigik, ninoporlik at ane yogeisekhe dogoagaluk it aperek inayoko 'bigik, it inoporlik wene yakulisekhe dogoagaluk it aperek inayoko 'bigik, it inoporlik elalin meke hagakhe dogoagaluk it aperek inayoko 'bigik, it inoporlik akhuni aperek u warek meke hano hagarinakhe dogoagaluk it aperek inayoko 'bigik, nen, yi meke ti meke yomageisekhe dogoagaluk it aperek inayoko 'bigik, inougi koktek metek dogoagaluk it aperek inayoko 'bigik, akhuni o ya meke ta meke inane inokodek meke baga wene ekhe dogoagaluk it aperek inayoko 'bigik, ninebe tomok itithogon ninayoko 'bisikhe.

²⁹Nit tha'bokhogonat iti ninebe tomok, at ane wolok loagaluk ninayoko 'bisikhe meke welagorek nogo? Nit tha'bokhogonat Allah ane yogeisogorek meke nogo a? Nit tha'bokhogonat wene yakulisogorek meke nogo? Nit tha'bokhogonat elalin meke hagakhorek meke nogo?

³⁰Nit tha'bokhogonat akhuni aperek u hano hagarinakhorek meke nogo? Nit tha'bokhogonat akhuni o ya meke ta meke inane ninokodek meke baga wene elalinat yogeisogorek meke nogo? Nit tha'bokhogonat inane ninokodek meke isinem ninane baga mothogon ekhe lago meke nogo? Dek o.

³¹Iti nen, nagarlak lak nerugi. Allah Agoreke nen ninobabut tomok woknisekherek iti meke, ebe hano meke wokhisoagaluk hinobatnerogon hagakhe dogono. Wene yokhisigi iti erlok dek negen mekeat, hano motok hagakhe dogosak meke yakulhisak.