Read Mid Grand Valley Dani 1 Korintus 13 Bible Online

1 Korintus 13 - Mid Grand Valley Dani bible

1 Korintus 13

¹An nen akhuni inukuloak etaga tomok aperek inane baga igik, malaikat Allah nen yoko usa'isa agarek meke emenogo inane baga igik, ekhe dogolik mekeat he, akhuni inebe nakmurogon dogogin dek halok he, an mo ane pukhasinem ane dirlok-dirlok igik, detan-detan igik, ekherek hak ekhe dogosak o.

²Nen, Allah ane hano motok yogeisigik, wene akhuni inakla limago welagarek meke iti tha'bokhogonat nilu ageik, yi wene ti wene tha'bokhogonat niluat welageik, netaiken Allah oba motok hakotdiluk tom ageikhe obolukmo nen higikhogon werlekmake loagaluk yogosusak erlogat welageik, hagakhe dogolik mekeat he, akhuni aperek inebe nakmurogon dogogin dek halok he, we yugunat hagakhe dogosak o.

³Yi meke ti meke an nikimo meke tha'bokhogonat akhuni inameke dek meke supurisigik, nebe motok warogo hali noagaluk neram nenat hagakhik, hagakhe dogolik mekeat he, akhuni aperek inebe nakmurogon dogogin dek halok he, we yugunat alomarogo hagakhe dogosak o.

⁴Akhuni aperek inebe inakmurogon dogolik, inobakhanini hapugutdiluk welageikharek iti. Itithogon inakmurogon dogolik, inobabut hano ua palek dek dogolik, inekaerek nen higirakhigik-hogorakhigik, hagakharek dek.

⁵Itithogon dogolik, inobabut hakolek welageik, yi meke ti meke inekaerek anek hasik kogotdigik, inakla aga horok welageik, it aperek nen weak hagarinakhunem wene inakla eberek motok welageik, hagakharek dek.

⁶Itithogon inakmurogon dogolik, it aperek nen mothogon hagakhidek korlo hagakhunem inakla arleken akhigidek dogolik, mot hagakhunem anek inakla arleken akhegarek.

⁷Inakmurogon dogolik, yi wene ti wene inoba agunem, inobakhanini hapugutdiluk welageik, inetaiken Allah oba hakotdiluk welageik, hano asigin iluk inakla arleken akhigik, inetaiken hapukhogon welageik, hagakharek iti.

⁸Itithogon hagakhe dogoluk nen, iniki ageikhe baga, Allah ane yogeisegarek iti meke yabokane yogeisausak dek ageik, akhuni inane inokodek meke elalinat egarek iti meke yabokane usak dek ageik, yi wene ti wene inilu welageikharek meke iti yabokane inilu asusak dek ageik, hagasugun mekeat he, akhuni inebe inakmurogon welageikahrek iti meke anek, dek ageidek motok dogogin o.

⁹Iti, o yogotak nen wene ato aperek anek ninilu welageik, Allah ane ato aperek anek yogeisigik, hagakhe lago iti.

¹⁰Meke re, yabokane ebe abit meke hagatlagunem nen, yogotak aperek anek werek meke iti dek asigin o.

¹¹An nebe yekerek oba, nane yekerugi inane meke igik, netaiken yekerugi inetaiken meke welageik, nakla yekerugi inakla ebekharek meke ebekhik, hagakhe lagagi mekeat he, yogotak nebe narlue agagisik nen, nobabut yekerugi inobabut meke iti arat here'isasigi o.

¹²Yogotak ya, inamukhak ileken weak werek korlek inileken lakhegarek hak, ninamukhak weak meke lakhekhe lago. Meke re, yabokane ebeat meke hutukhogon lakhagun o. Yogotakne, wene ato aperek anek ninilu welago. Mekeat he, yabokane at Allah nen an nebe hutukhogon ilu iti hak, an nen at Ebe hutukhogon nilu asigin o.

¹³Motok dogogin he, ninetaiken Allah oba hakotdiluk welagorek iti inom, hano asigin iluk ninakla arleken akhogorek iti inom, akhuni inebe ninakmurogon welagorek iti inom, wene ebe henagan etaat motok dogogin. Meke re, ebe kogat hakene re, akhuni inebe ninakmurogon dogosak itiat o.