Read Mid Grand Valley Dani 1 Korintus 16 Bible Online

1 Korintus 16 - Mid Grand Valley Dani bible

1 Korintus 16

¹Yogotak hit nen uang natogorlogo hinagarlak lak hinerugi Allah a'buri aperek 'bisauwogoluk egep iti, wene it Allah a'buri o Galatia meke yakulisigi iti hagat hagatno o.

²An nebe wagunem nen natogosusak dek o. Ya bagaat hari Minggu baga hibiku-yogoku hagakhe dogolik, hinebe tomok hinikimo aga halok, natogorlogo 'bisalok herogo dogono o.

³'Bisalok nen, ap wolok lugun meke hit nen, “It erlok,” iluk apegep meke halok inayoko 'bino. Itithogon inayoko 'biluk werekma, an nebe witluk nen, hit nen 'bisegep meke iti wolok loak nen, surat holal o Yerusalem la'isagein o.

⁴Meke re, an nebe lausak hano ago halok he, an ninomat lugun o.

⁵An o Makedonia ligin iluk nakla apigirikmo, etoma lalok ya haklageik arat lagei halok nen, hit hinoba wisigin o.

⁶Hinoba witluk nen, an hit ninom niki herlekha'bugat dogoluk nen a? O weak werek korlek niki ageikhe inomat dogoluk nen a, hit nen o an ligin apigima etoma la'anubageik nen iluk yokhisigi o.

⁷An itithogon o werlekmake lagaluk laga dogolik niki opaki hasik ninom dogosak na'it. Ninoe Etagapogot nen hano ekhe halok he, an niki pererlagat ageikhe inom ninom dogogun o, iluk nakla apekhe lagei.

⁸Wisik nen, o Efesus yoma akhuni, “Wene nina'it,” iluk wene paliogei meke inebe doalegat werek meke re, an nen it aperek yogeisugunem wene waganusak meke doalegat werek iti nen, yoma dogoluk Hari Pentakosta arat hagatdiluk nen wisigin o.

¹⁰At Timotius etnogo, an nen ninoe Etagapogot hasik hagakhe lagei hak hagariogo meke hit hinoba wisigin iti, ebe waga halok he, hit hinom ayuk dekhogon dogoak nen he, ebe hanorogo waganino o.

¹¹At wagunem it akhuni aperek nen, “At ebe erlok dek,” iluk inakla erlok degetdusak motok dek o. At apuke noba waga dogolik, ninagarlak lak ninerugi aperek emenogo inom 'bitneasuagaluk therisik welagei iti nen, at holak oba hanorogo yomakhekhe dogono o.

¹²Ninagarlak Apolos etnogo nen, it ninagarlak lak aperek emenogo wogosik hinoba wisuagaluk, eran-alep akla kagalhe lagei mekeat he, at yogotak ya wisusak iluk akla apiliogo dek o. Meke re, yabokane wisusak apekhe halok wisiginat o.

¹³Hinobabut hebelogo dogolik, hinetaiken Allah oba hakotdiluk, metegat dogono o. Hinobabut abat dogolik, hinobatnerogo dogono o.

¹⁴Hit yi meke ti meke hagasuogoluk, akhuni inebe hinakmurogon hagakhe dogono o.

¹⁵Nagarlak lak nerugi. Wene ageikhe yi hinakla kagalik. At Stefanus a'buri inom emenogo inebe hinilu o. O propinsi Akhaya etoma it tak Allah a'buri agoukhasik nen, it Allah a'buri aperek yomageisekhe dogouogoluk inetaiken oba nenat isukhasik nen yomageisiliogei iti o.

¹⁶It inobabut hakene halok he, it aperek it inom inobatnerogon hagakho halok he, tha'bokhogonat inapma ukiluk inane holek dogono o.

¹⁷Stefanus inom, Fortunatus inom, Akhaikus inom, noba wageikhasik, hit nen an hasik hagakhe dogou hak, it nen hano hagariogei iti nen, nakla arleken akhekhe lagei o.

¹⁸It wageikhama, an nakla hano aga hak, hit hinakla hano asigin o. Halok he, it akhuni aperek inobabut it hakene meke halok he, inalonhogo halhe dogono.

¹⁹Allah a'buri o propinsi Asia etoma ya ta natogorliogei meke yoma nen hit heagei wathinakha o. Ap Akwila age Priskila ipisak, nen, Allah a'buri it inaila natogorliogei meke inomat nen, ninoe Etagapogot inom hunik dogolik heagei motok doalegat wathinakha o.

²⁰Nen, ninagarlak ninerugi o yoma meke tha'bokhogonat nen heagei wathinakhaat o. “Nit tha'bokhogonat ninebe Allah a'buri,” iluk nen, hit-hit heagei hinape tharluk wat-wat ilik lano.

²¹An Paulus nekaerek niki nen holal waganogo heagei wathinakhi iti.

²²At ageikhe nen, ninoe Etagapogot akmu dek halok he, Allah nen at iti ebe homan 'buak o. Meke re, ninoe Etagapogot ibat eme o, u hak, Maranata, iluk igi iti o.

²³Ninoe Etagapogot Kristus obabut hano etnogo nen thethisik motok dogoak o.

²⁴Kristus Yesus ninom hunik dogolik, hinebe tha'bokhogonat nakmu iluk heagei wathinakhi iti o.