Read Mid Grand Valley Dani 1 Korintus 2 Bible Online

1 Korintus 2 - Mid Grand Valley Dani bible

1 Korintus 2

¹Nagarlak lak nerugi. Allah ane iti akla limago werekma, akhuni agat oba meke nen inokodek meke iti, an nen pakhogon yokhisa agagi iti, an nane apusu tik-tik egerek oba, nakla kagalek oba, yokhisa agagi dek.

²An hit ninom dogolik, nakla nen wene werlek meke ebekhidek, at Yesus Kristus hasik ebekhe dogolik, kok hak he, at ebe o harokhogon meldiluk wakhukha wene itiat anek ebesigin o, iluk nakla apasigi.

³Nakla itithogon apasigisik nen ebekhe dogolik, an nekaerek nebe erlok degatma nayuk nen noageleke dik-digat hinoba wagagisik welagagi apigi.

⁴Itithogon dogolik, akhuni inawene an nakla kagalek oba, nane hano baga, nobatnerogon yokhisasigi dek o. At Allah Agoreke obatne baga, yokhisasigimo, ebeat ageikhemo, hinileken hasigip.

⁵Itithogon yokhisasigi iti, hit hinetaiken akhuni inakla kagalek meke iti inoba hakotdiluk welageidek mekeat he, Allah obatne werek iluk, hinetaiken at oba hakotdubageik iluk yokhisasigi iti o.

⁶It akhuni inetaiken horle meke halogat, wene horle meke iti inakla kagoukhogon yogeisogorek o. Itithogon yogeisogorek iti, it akhuni agat oba meke yoma, inawene meke dek. Inougi koktek inebe yabokane dek asugun meke o yogotak ya inapma werek yoma, inawene kagalek wene meke degat o.

⁷Wene iti Allah akla kagalek wene limago welageikhe meke pakhogon yogeisogorek. Wene iti akhuni agat oba meke inokodek mekeat he, ebekeram Allah nen yi meke ti meke winametdigidek dogolik, at nenat nit hanotninakhunem ninakla arleken akoagaluk akla apasikhe meke limagoat welageikhe.

⁸Akhuni agat oba meke inougi koktek o yogotak ya inapma werek yoma, wene iti inilu ageidek inokodegat werek o. Inilu dogolepma, ninoe Etagapogot hogorakhorek etnogo, ebe o harokhogon meldiluk watlep degat o.

⁹ Wene iti hasik, Allah ane yigithogon holal waganek werek, “At Allah nen yi meke it meke akhuni nen inileken higidek. Inasuk holhidek. Inakla nen kagalhidek. Meke re, tha'bokhogonat nit akhuni at ebe ninakmu welagorek meke karelogo 'binanhemo werek o,” iluk holal waganogo 'bisukhama werek.

¹⁰'Binanhe meke iti, at Allah Agoreke nen yi meke ti meke penakherek iti nen, Allah akla limago welagarek meke iti inomat penakhe dogolik, pakhogon yoknisasikhe o.

¹¹Nit akhuni ninakla tha ilu. Ninekaerek ninakla tomok ninilu welagorek apigi. Iti hagat, Allah akla it aperek inokodek anek. Ekaerek Agoreke arligat ilu welagarek o.

¹²Nit he, akhuni agat oba meke yoma inagoreke waganhugu 'buk. At Allah obabut hano nen woknisasikhe meke ninilu asuagaluk, at Agoreke usa'i ageikhemo horlasugu o.

¹³At Agoreke horlasugusik Allah obabut hano nen woknisekherek wene iti, akhuni Allah Agoreke inakla werek meke yogeisauwogoluk, akhuni agat oba meke inakla kagalek meke nen yakulnisugunem yogeisekhe lago 'buk. Allah Agoreke nen yakulnisugunem yogeisogorek o.

¹⁴Wene Allah Agoreke nen woknisekherek wene iti, it akhuni Allah Agoreke inakla werek meke anek hutdegarek iti nen, it akhuni inobabut inikhogat dogolik, hutdegarek dek. Itithogon hutdegarek dek iti re, it nen he, “Wene iti akhuni kepu meke nen egarek hakene iliogei,” iluk egarek iti nen, wene iti hutdigidek werek o.

¹⁵Itithogon mekeat, nit Allah Agoreke ninakla werek meke, yi wene ti wene hutdekhe lago. Hutdisinem, it aperek nen he, nit ninobabut hutdinaniogei dek o.

¹⁶ Wene iti hasik, Allah ane baga holal men iluk waganogo 'bisukha, “Ninoe Etagapogot akla ebekherek iti, tha hak ilu. Nen, tha hak nen, at asuk wasusak,” iluk it ap Allah ane yogeisekhe lagoukha meke nen, holal waganogo 'bisukha. Itithogon mekeat he, Kristus akla ebekherek wene iti nit ninakla itithogonat ebekhe lago.