Read Mid Grand Valley Dani 1 Korintus 5 Bible Online

1 Korintus 5 - Mid Grand Valley Dani bible

1 Korintus 5

¹Akhuni nen, ap hit meke ageikhe he waganusak dek meke waganhesik werek iluk abok ekhe dogolik yoknekhama nasuk holhi o. It akhuni Allah ane inokodek meke nen itithogon hagakharek dek meke, ap iti opase age meke waganhesik werek iti.

²Itithogon hagakhe korlegat, hit hogorakhekhe lagap iti. Hit hagasusak he, hinakla weak atluk, ap weak hagakhe werek iti, ula'isausak meke hinom dapukhogon welagap iti.

³An nebe walegat welagei meke re, netaiken hit ninom welago hakene o. Iti nen, nebe ninom dogolik u hak, ninoe Etagapogot Yesus etaga palogo, at ap weak hagakhe werek iti wene oba 'bigima werek o. Halok he, hit opakimo natogokhunem, an netaiken ninom welago hakene iti nen, ninoe Etagapogot Yesus obatne baga, men hagatno.

⁵Ap iti etaiken ninoe Etagapogot wisigin itinem waga dogolik tiluak nen, yogotak ebe Iblis nen weagatduagaluk, at Iblis at wogotno.

⁶Akhuni nen inane dagakhogon ekhe dogolik, “Hipiri roti meke hisuagaluk eken hikherek meke herlekha'bugat akla 'bilukmo nen, roti ebe tha'bokhogonat hikherek o,” iluk egarek etnogo hinokodek nogo a? Hinilu dogolik hogorakhekhe lagap iti hano 'buk. Weak o.

⁷Akhuni Yahudi meke pesta Paskah neke dogolik, domba warogo, eken roti hikherek meke ula'isalok, hikhidek meke anek nekarek hak hagatno. Ninadomba wasu hak, Kristus ninobasik arat wakhukha iti nen, hinebe roti ket hikhidek meke agasip welagap hak eberogonat asubageik nen, eken roti hikherek meke alep meke ula'isegarek hak, weak hagakhe lagap meke iti horogo here'isani o.

⁸Halok he, pesta Paskah neke dogolik, roti eken hikherek meke akla kolakhidek meke nekarek hak, nit weak hagakhik, param hagakhik, hagakhe dogosak dek o. Ninetaiken opakiat dogolik, eberogonat meke anek hagakhe dogouok o.

⁹An nen alebageik wene holal waganogo hinoba la'i aga dogolik, men isigi apigi, “Hit he, it akhuni param hagarinabiogei meke hinom dapukhogon dogogup o,” iluk yokhisasigi o.

¹⁰Itithogon yokhisasigi iti, it akhuni Allah ane inokodek dogolik param hagakharek meke inom, inamikmak weak hagakharek meke inom, nukhetdisegarek meke inom, inetaiken kaneke oba hakotdiluk dogolik hogorakharek meke inom, it iti hasik isigi dek o. It itithogon hagakharek meke hinom dogosak dek, iluk ilema, it akhuni agat oba meke yoma motok here'isalok dukhitlep o.

¹¹Itithogon yokhisasigi iti, wene ebe yigithogon. At ageikhe nen ekhe dogolik, “An hinagarlak Allah a'burat o,” iluk ekhe dogoligat, humi yugunat ha'isigik, amikmak weak hagakhik, etaiken kaneke oba hakotdiluk dogolik hogorakhik, inabok weak wene inekalat inoba 'bisigik, apusu hunu-hunu asuagaluk nekarek etnogo meke nasi motok welageik, iniki abusak waganhik, hagakherek meke iti hakene meke hinebe hinom dapukhogon dogosak degat, hipiri hinom neke dogosak degat, iluk yokhisasigi apigi.

¹² It akhuni Allah ane inokodek meke wene an nen inoba 'busak nogo a? Dek o. Allah nen inoba 'bigin werek o. Allah ane holal waganogo 'bekhe dogolik, men isukha, “At ageikhe hinakla dogolik weak hagariogo meke iti, ula'isano,” iluk isikhemo holal waganogo 'bisukhama werek iti nen, ap ageikhe hit Allah a'buri hinom natogokhe lagap meke nen weak hagakhe halok, hit nen wene oba 'busak dek a? 'Busagat o.