Read Mid Grand Valley Dani 1 Korintus 6 Bible Online

1 Korintus 6 - Mid Grand Valley Dani bible

1 Korintus 6

¹Hit Allah a'buri meke, hit-hit hat ageikhe nen at ageikhe wene oba 'begen halok he, Allah a'buri meke nen pilinetdiluk wene iti oba 'bigik kokhik hagasuagaluk inayoko 'bigidek, it akhuni weak hagariogei meke inayoko 'bekhe lagap iti nenaluk. Hinekarli dek a?

²Yabokane Allah a'buri nen akhuni agat oba meke yoma wene inoba 'bigik kokhik hagasugun iti hinokodek nogo a? Itithogon hagasugun halok, wene herlekha'bugat meke iti, hit nen pilinetdiluk nen wene inoba 'bigik kokhik hagasusak dek nogo?

³Nit nenat, it malaikat Allah nen yoko usa'isa agarek meke emenogo, wene inoba 'bigik kokhik hagasugun iti hinokodek nogo a? Halok he, nit agat oba yoma dogolik, akhuni wene yi meke ti meke hasik inoba agunem, nit nen pilinetdiluk wene inoba 'bigik kokhik hagasusak dek nogo a? Hagasusagat o.

⁴Wene itithogon meke hinoba aga halok, pilinetdiluk wene hinoba 'bigik, kokhik, hagasuagaluk thani inayoko 'bekhe lagap. Nit Allah a'buri nen, “It iti inobabut weak,” iluk ogorek meke iti inayoko 'bekhe lagap a?

⁵Hinekarli wakhe lagei o. Hit hinagarlak lak hinom, hat ageikhe nen at ageikhe wene oba 'begen halok, ap Allah a'but akla motok kagalek dogolik wene pilinerogo degetdusak meke opakiat ageikhe dek nogo? Werek apekhe lagei.

⁶Mekeat he, hat ageikhe nen hagarlak ageikhe wene oba 'biluk, akhuni inetaiken Allah oba hakotdigidek meke nen pilinerogo wene oba 'bigik kokhik hagasuak nen iluk inayoko 'bekhe lagan iti.

⁷Hit-hit hinagarlak lak hinerugi hinom mekeat he, hinom wenemuk-wenemuk motok welagap iti nen erlok degetdakhekhe lagap o. Hit he, weak hagathinakhunem hinobakhanini hapugutdiluk dogoumo weak a? Alomathinakha halok here'isaumo weak a? Hano o.

⁸Hit he, hinagarlak lak hinom mekeat he, weagarinakhik, alomarinakhik, hagakhe lagap iti o.

⁹Akhuni weak hagariogei meke Allah apma 'bisekherekma iti iteerek asugun dek o, iluk, hinokodek nogo? Hinekaerek nen dalugup. Humi yugunat ha'isegarek meke inom, inetaiken kaneke oba hakotdiluk dogolik hogorakharek meke inom, ap inagugi meke param ha'isegarek meke inom, ap nen humi ha'isegarek hak it ap-ap ha'isegarek meke inom,

¹⁰iniki abusak waganharek meke inom, inamikmak weak hagakharek meke inom, apusu hunu-hunu asuogoluk nekarek meke etnogo nasi motok welageikharek meke inom, inabok weak wene inekalat inoba 'bisegarek meke inom, nukhetdisegarek meke inom, it akhuni itithogon hagakharek meke iti tha'bokhogonat Allah apma 'bisekherekma iti iteerek asugun motok dek o.

¹¹Alebageik hit aperek itithogon hagakhe lagagip mekeat he, yogotak Allah nen hinakla hano thobalogo 'binageisikhesik, hinebe at ekaerek hasik 'bakhasikhemo welagap o. Wene hinoba welageikhe meke iti, ninopase Allah Agoreke nen ninoe Etagapogot Yesus Kristus etaga baga, korogo wokhasikhesik Allah hinom dapulogo 'binageisikhemo welagap o.

¹²Hit meke ageikhe nen ekhe dogolik, “An yi meke ti meke yugunat hagasusak anek,” iluk iliogo mekeat he, an nakla nen, yi meke ti meke tha'bokhogonat iti nen hanorinabusak anek 'buk. Yi meke ti meke iti obatne atluk, iti meke nen an nebe apma 'banusak na'it o.

¹³It aperek nen yigithogon egaregat, “Nekarek meke iti ninelabut hasik. Nen, ninelabut iti nekarek meke hasik,” iluk egarek. Itithogon egarek mekeat he, pereat, at Allah nen yabokane degetdigin werek o. Allah nen, ninebe yi, param ha'isekhe dogoagaluk winametdinanhikhe 'buk. At he, ninoe Etagapogot hasigat winametdinanhikhe iti o. Ninebe yi iteerek he, ninoe Etagapogot werek o.

¹⁴Allah nen he, ninoe Etagapogot watlageikhesikmo nen ilugutdisikhe hak, at obatne baga, nit ninilugutninabiginat o.

¹⁵Nit ninebe yi Kristus iki isok hakene welago, iluk hinokodek nogo? Halok he, ninebe Kristus iki isok welago iti meke waganogo, humi inobabut yugunisake meke iti inom hunesusak nogo? Motok dek o.

¹⁶ It ap humi inobabut yugunisake meke iti inom hundiluk nen, inebe opakiat ageikharek, iluk hinokodek nogo a? Allah nen ekhe dogolik, “It inebe pere meke yabokane opakiat hagatlatluk dogogun o,” iluk isikhemo holal waganogo 'bisukhama werek iti.

¹⁷Nit ninebe hasik itithogon hagatlagorek mekeat he, ninoe Etagapogot ninom hundiluk nen, at ninom ninetaiken opakiat agorek iti o.

¹⁸Humi yugunat ha'isegarek iti meke ha'isekhe dogunogo iluk, lo laga dogono o. Yi weak ti weak hagakharek iti inebe itikmanke yiat hagakharek. Mekeat he, humi yugunat ha'isegarek iti, inekaerek inebeat weagatdakhegarek iti o.

¹⁹Hit nen he, “Allah nen Agoreke woknisasikhemo, ninebe at ai halek welago,” iluk hinokodek nogo a? Hinebe hinekaerek iteerek 'buk. At iteerek o.

²⁰Allah nen he, hinebe oko arat 'bogokhogon palogo wokhinakhikhemo welagap iti nen, akhuni nen at hogorasuagaluk, hinebe at hasik hano hagakhe dogono o.